ياكثر حبك بقلبي والغرام أكثر 🤍

part 13

مشاري : اسف يروحي والله اسف بس غيرتي عليتس كبيره اسف
~ عند نجد ~
- بعد ماخلصت الملكه -
نجد : افف من بيرجعني البيت الحين!
الله لا يوفقك ي فيصل!
سعود جاء وراها بابتسامه: شفيها خطيبتي من مزعلها؟
نجد لفت عليه بغضب : تصدق كنت برفضك وبقبل بـ حمد بس كنت مو مرتاحه له وابوي قالي ولد عمس اقرب من الغريب!
سعود بسخريه: طيب ابوتس صادز ولد عمس اقرب من الغريب
نجد : وبعدين وخر للحين ماجبنا شيخ وصرت خطيبي صدق !
سعود: طيب ادري جبتي شيء جديد يعني؟
نجد : طيب انا زعلانه عليك يعني وخر
سعود : افا! حبي زعلانه !
نجد بسخريه: لو معطيني وجه شوي كان عرفت بس اكيد مو مهتم !
نجد فتحت كفها و تأشر على اصابعها بيدها الثانيه
ونطقت : مهتم لـ شغلك , قراراتك , حياتك , نفسك " بهمس سمعه سعود " , وحلا
سعود سحبها لصدره وابتسم بسخريه: غلط غلطتي ي خطيبتي! أنا مهتم لـ نجد ثم نجد ثم نجد ثم نجد ثم الباقي !
نجد دمعت عينها و ضربت صدره تكتم بكيتها:
خلاص روح روح سعود تكفى روح مابي ازعل عليك اكثر من كذا ومابيك تزعل علي
سعود : اضربي الى ان تطفشين ماني بتاركك
بعد مده جدا قصيره مابين الـ 5 ثواني الى 10 ثواني
طفشت نجد و استسلمت وانهارت بحضن سعود
سعود فز: هشش خلاص هشش
نجد كانت تشهق وبكل شهقه يفز قلب سعود نطق :
بس خلاص والله كذا تتعبيني حياتي انتي خلاص
نجد : قـ.قـ قلتلك مابي ا.ازعلك بس ا.ا.انت
سعود : اسف مع اني مادري وش سويت انا
نجد مسحت دموعها بعنف ونطقت :
تذكر كلامك و راجع افعالك ثم ارجعلي ي ولد عبدالعزيز!
راحت بعيد شوي وبعدين ضربت راسها ونطقت : صح محد بيوصلني!
نطقت بتفكير: ارجع لسعود؟
فزت : خير ارجعله! بطلب اوبر ولا ارجعله!
سعود كان وراها بس فيه مسافه بينهم :
افا تطلبين اوبر و سعود موجود !
لفت عليه ونطقت: وخر أنا زعلانه عليك ومره بعد !
سعود بقهر قربها منه : ياخي كل ثانيه تقولين وخر؟ ايه أنا ابي اصير قربتس عندتس شيء؟
نجد : ترا بركب معك بس عشان نفسي مو عشان اقابل وجهك ذا !
سعود : افا بس ي نجوده صار كل شيء شين فيني؟
نجد سكتت و راحت للسياره وركبت قدام
سعود تنهد ونطق بحده : شكلي بتزوج بزر مو وحده عمرها 21
عض شفته لما تذكر شكلها وهي تبكي وهمس : بس بزر حلوه
راح و ركب مكان السائق
كانت تتأمل الشارع بصمت
و سعود بين فتره وفتره يلف يناضرها
سعود وهو يسوق ويناضر قدام نطق :
نجود تدرين كنت احسب علاقتنا بتكون افضل علاقه! خصوصاً بالخطبه والكل بيحسدنا على علاقتنا ! طلعت كل امالي غلط واسوء علاقتنا الخطبه
نجد وهي تتأمل الشارع من الشباك :
أنا برضو حسبت كذا بس للاسف انت حطمتني و قلت انك م تبغاني و مدري وش ..
سعود وقف السياره على جنب ولف عليها بابتسامه : طيب شرايتس نحسن علاقتنا! وننسى الماضي لان بعدين بنخسر اننا ضيعنا افضل ايامنا
نجد لفت عليه : تمم
سعود نطق بحده: وبعدين عطيتس وجه ترا ! عدلي غطايتس بس !
نجد : سيارتك مضلله وبعدين احس اول م تعرفت عليك احس كلامك غير والحين غير
سعود ضحك بسخريه وهو يكمل الطريق: طيب اكيد عشت مع اهلي طبيعي بتتغير
~ عند لمياء ومشاري ~
مشاري : اسف يروحي
لمياء: م زعلت ويلا نمشي
مشاري : يلا
شال مشاري الاغراض الي هم ( شنطه للمياء - شنطه لمشاري - اغراض عنايه ( سكين كير ) للمياء )
لمياء طلعت و هي ماسكه بس شنطه يد
بعد مده قصيره ركب مشاري السياره وبداء يمشي متوجه للخبر
~ لما وصلوا الخبر ~
مشاري : وصلنا ي لمو
لمياء صحت و هي تفتح عيونها ببطئ : ايه ايه معك يروحي
مشاري : انزلي ولا شرايتس اشيلتس؟
لمياء بـ نعاس : ايه تكفى
مشاري راح لعامل الفندق وقاله يودي الاغراض لـ غرفتهم و عطاه رقم الغرفه
بعدها رجع للمياء وشالها
فزت لمياء : يمه شتبي!
مشاري : ياخي انتي قلتي شيلني ولانك لمويتي م ينقال لك الا تم وابشري
لمياء : طيب كمل كمل
و كملت نومها
مشاري وداها الغرفه
حطها على السرير بخفه
لمياء صحت ببطئ و نطقت ببحه نومها: مشوري تعبتك معليش
مشاري وهو يتثاوب : لا لاتخافي يروحي
( معليش نسيت اقولكم بالبارت الي قبل أن مشاري لبس ثوب اسود مع سدريه رماديه)
راح مشاري بدل ثوبه و لبس شورت بدون تيشيرت بحكم أنه اخر مره نسى انه بيجي للفندق وماجاب بجامته الي قبل
صحت لمياء بكسل جلست على السرير و فصخت عبايتها
و رمتها بالكنب الي بالجهه الثانيه و كملت نوم
مشاري راح للمرايه ابتسم برضى على شكله
راح للسرير و سحبها بالقرب منه ببطئ
قبل عنقها بخفه و❗❗❗.
--------
~ عند نجد و سعود ~
لما وصلوا جنب باب أهل سعود
دق سعود على مرام بيسالها عن مشاري
سعود : مرام
مرام : هلا
سعود: اسمعي وين ...
مرام : ادري بتسال عن عمي الزبده عمي بكره ماشي للرياض
و سكرت
سعود فز : بلاها ذي قفلت بوجهي!
نجد شهقت: بكره بنمشي سعودي !
سعود بحده مشى من بيتهم لمكان هو بنفسه مايدري وين بيروح
نجد : يمه وين بنروح
سعود لف عليها: افا تخافي وانتي معي !
نجد : لا لا بس قصدي وين بنروح
سعود ابتسم: بنحلل ذا اليوم لاني بشتاق لتس !
نجد ابتسمت: وييي يروحيي!
سعود : امانه عيديها
نجد باستغراب: وش؟
سعود : الي قلتي قبل شوي
نجد : وي؟
سعود : لا قصدي الي بعدها
نجد ضحكت بخفه و نزلت راسها بخجل
سعود رفع راسها من ذقنها : لا لا مو كذا ارفعي راستس!
نجد : سعودي
سعود : لبيه
نجد : شرايك تشتريلي ماتشا ؟
سعود : تصدقين ماقد ذقتها؟ باخذلي شاهي أطلق
نجد : غريب لكن مو مشكله ذوقها معي طيب
سعود : لا للاسف مستحيل اضيع فرصه الشاهي لا وبعد مع عيونتس الحلوه؟ مستحييل!
نجد بخجل : طيب بعدها نبي نروح ماك لاني شفت صحبتي مصورته واحس ابغى
سعود وهو يناضر قدامه ويسوق : ايه ومن ذي صحبتس؟
نجد ناضرته و طيرت عيونها ناضرت الشباك:
مالك دخل !
سعود : أما غرتي؟
نجد : لا مااغرت خليت الغيره لك
سعود : افا زعلتي وحنا تونا متراضيين؟
نجد : رجعني البيت
سعود : طيب بشتريلتس من ماك وبرضو ماتشا!
نجد لفت عليه : وحلا
سعود : وحلا برضو بس شرايك بكره قبل لا تمشين؟
نجد : تم بس ترا احب فرنش توست
سعود : ايه والله اني داري انتس تحبيها
نجد : تشوف كل يوم لازم تجيبلي حلا
سعود بخبث : ابشري كل يوم نجيب لك
نجد ناضرته و شهقت: ي وسخخ
سعود بخبث كتم ضحكته : انتي طلبتي وانا مااقول لتس الا تم !
نجد : الوساخه عندكم وراثه ؟
سعود : افا ليه؟
نجد : خايفه على صحبتي !
سعود ضحك بصوت عالي و نجد ضحكت من ضحكته
سعود وصل لـ ماك و طلب الي تبيه نجد و طلبله برضو
سعود : الا ي نجد متى ناويه زواجنا؟
نجد : ي فاهي مابعد ننخطب حتى
سعود : طيب عادي بس اسالتس
نجد : والله مدري بس عندي طلب
سعود : قولي وان كنت قادر عليه تم
نجد : أنا باقيلي اخر فاينل و ابوي بينقلني لجامعه الرياض واحس ابي اكملها في امريكا و خلاص
سعود أشر على خشمه: على ذا الخشم
وصل الطلب واستلمه سعود
نجد وهي تاكل : ياخي سعود جاني فضول من خويك الي مره مره Best ؟
* افضل *
سعود : وليه وش يهمتس؟
نجد : ياخي مجرد سؤال بس
سعود وهو يأكل برضو : مشعل
نجد : من ذا مشعل؟
سعود ضحك من تذكر كلامه واسلوبه
نجد لفت بقهر و سكرت البرقر: شكلها مشاعل لكن رقعتها و قلتها مشعل
سعود انصدم : لا يبنتي لا اشوفتس لافه الصدز والله يشهد أنه ولد كملي اكلتس
نجد : لا شبعت واذا كذا خلاص بس قول الصدق ليه الصدز؟
سعود سكر البرقر برضو : لاني تعودت اقولها عجبتني
نجد : اغار ترا ! اعجبك بس انا
سعود : ايه والله صادقه
نجد : طيب حكيني عن مشعل ذا
سعود قالها عن مشعل: و بعطيتس موقف
قد مره رجعت من الجامعه وانا ضايق مرره
قالي: نبمك طول يومك مغتلق؟ الله يعين مرتك عليك يالحساس!
نجد ضحكت بصوت عالي على تقليد سعود للهجه
سعود نطق بابتسامه:
تبسمي لعنبو من لامني في ضحكتس ورضاتس
تبسمي وخذيني من عالمي في عالم ثاني
تبسمي لي فداتس اللي مضى واللي بقى يفداتس ترا لولا غلاك وضحكتك ما بعت خلاني
ولاجيت أتدارك ما بقى من فرحتي والقاتس وأبيع العمر كله لأبتسم ثغرتس عشاني
نجد بخجل سوت نفسها مشغوله باضافرها: احبك
سعود ابتسم بوسع ثغره :
وانا أحبتس إيه والله أحبتس وأن بغيت أنساتس كيف أنساتس وانا أشوفتس يا عيوني في عيون أهلي وفي أوطاني والله م توهقت بغلاتس وصرت أحبتس وأعشقتس واهواتس واهيمتس وحاولت أتراجع وانسحب لاشك ما امداني
نجد : ياخي يزينك اذا صرت راضي بس يشينك اذا كنت زعلان
سعود : اعنبوتس طول حياتي راضي عنتس !
بس الا غيرتي يبنت عبدالله الا غيرتي و اذا مشيتي زين بتشوفين اسلوبي ازين من اسلوبتس بعد وبتحبيني أكثر واكثر
نجد: ترا حتنى اغار!
سعود : وانا مقدر غيرتس ومابسوي الا الي يرضيتس باذن الله
نجد : وانا معك !
سعود ابتسم مع ابتسامه نجد وبانت غمازاتهم
نجد : يمه سعود عندك غمازه ! تويي ادريي
سعود : أنا الي والله توي انتبه لغمازتس !
نجد : ياخي تراك تجنن يحظ عيالك..
سعود الي قطع كلام نجد من نطق بحده: عيالنا ... عيالنا مع بعض!
نجد ارسلت له بوسه بالهواء
و سعود كمل معها سكرها بيده وحطها بقلبه
نجد : ياخي يزييينك
سعود : يزينتس ويحلوتس ويزين غمازتس
نجد بخجل ضربته بخفه: استحي ياخي
سعود : وراتس تستحين كثير ؟
نجد: من كلامك الحلو ذا ياخي
سعود : انتي ازين منه ترا
نجد : خلاص ياخي استحي ترا
سعود ضحك : ابشري
~ في الديره .. بيت ابو مشاري { في غرفه مرام } ~
كانت في سريرها تناضر جوالها استوعبت أنها للحين م غيرت فستانها ولا مسحت مكياجها تنهدت بتعب من اليوم بحكم انها أخت العريس و بفرح لان اخوها الكبير اخيرا بيتزوج قامت و قررت تروح لمجلسهم لان قبل فتره اقترحت لابوها تحط مرايه طويله هناك وإن جاء رجال يجي واحد من اخوانها يشيل المرايه و حددت أنه يكون بمجلس الرجال بحكم أنه افخم واحلى من مجلس النساء
وكان رد ابوها : يفداتس المجلس والمجالس كلها والبيت كله بعد ي عنقودي ووحيدتي من البنات
ابتسمت لما تذكرت الموقف طلعت بتروح عشان تتصور هناك
فتحت الباب بخفه بحكم أن غرفه امها و ابوها قريبه من غرفتها
طلعت من غرفتها رايحه لمجلس الرجال وهي تتمشى بأطراف أصابع أقدامها خوفاً من انها تزعج أحد بصوت خطواتها وصلت للصاله عادت ذكريات موقفهم الاول والمره الثانيه اصطدمت فيه لكن اصطدمت بصدره شهقت بخوف
وأيضا هو انفجع بس ابتسم لما شافها نطق : وش تسوين هنا في ذا الوقت؟
زفرت براحه من عرفته ونطقت : بروح اصور في المجلس
غمز لها و قال : م تحتاجيني اصور معك؟
توسعت عيونها بصدمه: لا شكرا!
ضحك بخفه ثم نطق : طيب ليه تمشين على طرف رجولك؟
ابتسمت ونطقت: عشان م أزعج احد
ناضرت وراها من حست انها بعدت شوي عن الغرف جميعها
مرت من جنبه و راحت وراه بركض للمجلس
ضحك بصدمه: كيف مرت كذا ما شاء الله!
راح لغرفه مشاري و عبدالله المشتركه
بحكم ان مشاري مو موجود فاا بينام عند عبدالله
وصلت للمجلس رفعت يدها تتحسس دقات قلبها وابتسمت
راحت تتوجه للمرايا رافعه جوالها الي جاها هديه من سعود لما رجع من سفرته و اقنع ابوها الي كان رافض انها تاخذ جوال بدأت تسوي وضعيات تصوير وتصور
بعد دقائق من تصويرها سمعت صوت في الحوش رفعت أصابع أقدامها و ناضرت الشباك ابتسمت لما شافت سعود و نجد جو تذكرت انها سكرت بوجه سعود زفرت بخوف
ثم رجعت ببطئ وشوي سرعه لاجل مايلاحضها سعود
الي تقدم ومعه نجد فتح الباب و نطقت : غريبه البيت فاضي !
سعود ضحك : الساعه 6 الصباح يحلوه من صاحي ذا الوقت؟
نجد : أنا وأنت وبعدين ليه شكلك حلو كذا
سعود: مالي نصيب من شوفه فستانتس؟
ضحكت نجد و فكت عبايتها و غطايتها اكتفت بانها تحطها
على رقبتها
سعود بتأمل عض شفته : يلبيه!
الشعر البني و العيون المعسله والخد المحمر والغمازه
والطول والمنطوق والقوسين ياعذب الشفرات
تحبني ماتدري اني هايم فيها !
موقف بين نارين التزعزع والثبات
قلي شسوي والوصل حالي وطعم الهجر مر
نجد ابتسمت رفعت يدها تحب كفها ثم قربته لـ خد سعود
سعود : ياخي كنت ابغاها من شفتس بس اصبري علي باخذها غصب عنتس
نجد ضحكت بخفه و دخلت البيت
سعود : بتنامي عندي اليوم؟
نجد : ايه غصب عنك بعد ! بس انتضرني بالحوش نكمل سهرتنا هناك ترا م نسيتها للحين
سعود كان يحاول يتذكر و ابتسم من تذكر الي هي تقصده : والله تم
نجد : اييه صح نسيتت
سعود : وش نسيتي؟
نجد : انتضرني هناا
راحت لغرفه مرام ركض شافتها مو موجوده
لفت انضارها للباب من دخلت مرام ونطقت :
مرامتيي وين هذيك الي شريناها انا وانتي لي أنا وسعود؟
نطقت مرام : اووه شكل سهرتكم مطوله اليوم؟
ضحكت نجد : أيه عقبالتس انتي والفيصل
ابتسمت مرام من طاريه و فتحت دولابها بعدها تقدمت لنجد تعطيها البيجامات
ابتسمت نجد و باست خد مرام ونطقت : شكراا مرره
طلعت ركض عكس مرام الي راحت تمسح مكياجها
راحت نجد لسعود عطته البيجامه : خذ البسها
سعود ضحك : تستهبلين نجودي؟ اخر عمري البس توم وجيري !
نجد تنهدت بغضب فيك : يعني م استاهل؟
سعود : الا تستاهلين ويلا رايح البس والبسي انتضرتس بالسطح
راحت نجد لمرام شافتها تمسح مكياجها : ما شاء الله مسرع !
مرام : تراي سريعه
نجد : طيب اطلعي بالبس
مرام ضحكت : ابشري وبعدين بتروحين عند الحب
ثم طلعت
نجد ضحكت و لبست بسرعه ثم نطقت : ادخلي ي اخت خطيبي
دخلت مرام و بدات نجد تمسح مكياجها و مرام برضو تكمل مسح مكياجها
بعد بضع دقائق خلصت نجد لفت على مرام الي مخلصه قبلها و نطقت : شرايك بالبجامه؟
مرام : تجننن مرهه
نجد : انتي الي تجنني
بعدها طلعت رايحه للحوش و شافت سعود سابقها
صوروا مع بعض ناضروا الفيلم لعبوا وكل شيء سووه حرفياً لما خلصوا شالوا اغراضهم و سعود شال الشاشه الصغيره الي حاطينها للاحتياط فقط رجعها مكانها
ثم نزل و ناضر نجد الي سبقته
انسدح بالارض بالمكان الي فرشته له نجد
نطقت نجد وهي منسدحه بسرير سعود تناضر السقف : اليوم افضل يوم حرفياً!
خصوصاً من شفتك وانت تلعب بالسيف !
كنت زعلانه عليك بس برضو كنت مُعجبه بشكلك الي كان
هيبه وفخممم
سعود :
برضو أنا لمحتك ضحكتيني الله يلعن بليستس من دخلتي ركض
نجد : ايه ماكنت ابي اتصفق من غيرتك ذي
سعود : كويس انتس فاهمه ويلا ارقدي الساعه 9
نجد : تصبح على خير
سعود : وانتي من اهلي
ابتسمت نجد وغمضوا عيونهم الاثنين يهوجسون
وهذا الي صار برضو مع مرام الي فكرت تهوجس بفيصل و فيصل الي يهوجس بمرام
ونفس الشيء مع عبدالله الي تذكر شكل وجد وعض شفته
ووجد الي تذكرت عبدالله و غمضت بخجل
وناموا الاحباء كلهم بس الى الان م نعرف ولا يعرفون مستقبلهم !
هل بينتهي حبهم قبل لا يبدأ حتى ؟
هل بيكتمل حبهم وبيعيشوا بسعاده؟
او بيخترب كل شيء !
بنعرف بعدين والان انتهينا من هذا البارت نراكم في وقت لاحق
-----------
انتهى بارتنا الي مليئ بالاحداث اتمنى يعجبكم 🤍
الصدق تعبت شوي بس فداكم ( 2241 كلمه )
وكالعاده يحلويني لا تنسون تعليق حلو زيكم و نجمه تقديراً لتعبي 🫶🏻🫶🏻🫶🏻