حب في أوقات صعبة

بارت 10 ولاخير

في يوم جديد نوضت فتحت النت قالو اليوم النتيجه بديت نوض في رويده زي المجنونه وخايفه الحق نتيجه الشهاده حتي تبدي مجاوبه ومتأكده تبدي خايفه ومش متأكده نوضنا دوشنا وضمينا وقعمزنا علي اعصابنا وفاتحين النت خش رائد حار فينا
رائد خيركم شن فيكم
رويده اليوم النتيجه
رائد اكيد ناجحين توا نمشي نجيب حلويات
انا لالالا راك تجيب تفاول علينا بالكعك خلي لين تطلع النتيجه
رويده ايه صح
رائد عليك تشاؤم وطلع
(تبو الحق حتي اني زمان هكي مادرتش ولا ن ع حلويات حتي كيكه مادرتها علي ما خايفه ههههه)
نرجعو لقصتنا المهم مع الساعه 5 اتصل بيا هيثم
هيثم الووو
انا الوو
هيثم مبروووووووك حبي نجحتي بتقدير ممتاز
انا وووووووه الحمدلله ياربي يبارك فيك جتني تجري رويده
رويده خيرك
انا نجحت
رويده لحظه رائد يتصل
ايوه رائد
رائد مبروك ياشفشه نجحتي
رويده الله الحمدلله يارب
رائد شن رنا صار فيها
رويده رنا نجحت
رائد كويس سلام سكر تنهد اه يارائد لو صبرت بس راهي توا بتكون ليك مش توا بتزفها لغيرك اه ياربي رنا طيبه تستاهل الي خير مني

عند رنا ورويده يحضنو في بعض وفرحانين بيطيرو خش ع محمد جاب الحلويات وعصائر لضيافه وقعمزنا هدرزنا تاني يوم جت أم هيثم هيا وياه ونسرين يباركو هدتلي خاتم دهب وهيثم هاتف جديدمعاه بوكس ورد وشوكلاته حركات مكتبه الوفاق وهدرزو وروحو وبدي يقرب موعد العرس واني نوتي في بتاتي وفرحانه في يوم طالعين لقينا ولد ماشاءالله جميل والادب في وجهه عجباته رويده وقعد يتبع لين عرف الحوش بعد ايام جاب أهله خطبها وبعد مشاورات وسألو عليه وافق عمي لكن مزال ماكملش بني حوشه قاله عمي تم براحتك البنت تقرا وانت ابني واني جي اسبوع عرسي ع ناديه كانت الأم الي انحرمت منها ماخلت ولا حاجه تنقصني وعمي وقفلي الحق زي بنته بالزبط درت سهريه وعزمت عليها صاحباتي وجو خالاتي ومرت خالي وبناتها يحسابو ع ناديه بديرلي عرس مشي حالك لكن تفاجأو بالي شافوه كان كل شي منظم ومرتب وجبت مصوره صورت وجاني هيثم بالعربي صورنا كانت أحلي لحظات حياتي بديت حلاله شعور منقدرش نوصفه من الفرحه كانت واضحه علي وجهي عيوني يلمعو قعمزت هدرزت اشوي علي هيثم الي ماطلع غير خليني ونخليك هههههه

تاني يوم من الصبح مشيت لكوافيره مع ساعه 7كملت جاني عمي ورويده رفعوني ودخلني عمي لصاله كان فرحان بيا كأنه مدخل رويده مش أني