لؤلؤة صنعاء (رواية يمنية) روايات يمنيه

الحلقة الثانية عشر

عند إسراء كانت قد كملت تصلي المغرب وجلست تفكر ليش لؤلؤة اختارت ابن خالها وفلتت وليد اخوها برغم انها كانت تقول ان ابن خالها واحد قليل ادب  وعينه طويله

وبعد شويه قامت ونزلت تسوي العشاء

اما عند وليد وبشار ومحمد والجد سليم كانوا جالسين في المسجد بعدما كملوا يصلوا مغرب وبيقروا قرآن لوما يأذن عشاء

بس كان محمد والجد قلقين من صمت وليد فهم قد رأوه كيف انصدم وانكسر مع انوه حاول ما يبين بس بان عليه

وبعد نص ساعة اذن عشاء وقاموا يصلوا جماعه وخرجوا يسيروا يتعشوا

وعندما وصلوا كانت حنان وإسراء في المطبخ وبراءه بتجهز السفره

فدخلوا وجلسوا لوما يقربين العشاء

بشار بمزاح /هيا براءه سرنا نصلي وجينا وانتي عادش بتفرشي السفرة.

براءه /والكذب وايحين ابسرتني عادنا غر جيت افرشها

بشار بضحك /لا تكذبيش قد ابسرتش لو تقلي ماشي لوما تشبعي

براءه بزفير /انا شاسير اقرب العشاء انت مممسوخ تشتي تمسخني معاك انا داريه وبعدا تجيلي امي تقرشني لا عندكم

بشار بضحك /وما فيها

محمد بضحك /خلاص اسكت خليها تخطالها علاشان لاتجيش حنان تقرشها

وبالفعل خطيت وهي بترطن وبشار ومحمد وسليم بيضحكوا عليها بينما وليد ساكت كأنه في عالم آخر

محمد /مالك ياوليد ساكت من مغرب

وليد ببسمه صغيره /مالي شي وبعدا راسي بيوجعني شويه

محمد /خلاص نكمل نتعشاء ويسير بشار يديلك حبوب من حق الراس وان عادوه بيوجعك شليناك نعالجك

وليد بأيماء/خلاص سابر

وبعد شويه جلسوا يتعشوا في هدوء وكانت إسراء وحنان والجد ومحمد بيشوفوا وليد وعارفين انوه حزين بسبب رفض لؤلؤة له

وبعد ما كملوا يتعشوا طلع وليد غرفته ولحقته إسراء وفلتت الغسوال على امها وعلى براءه

ولوما دخلت شافته وهو بيخلس حقه الفنيله الطويله المكممه ويلبس فنيله نص كم علاقي

أسراء بحب اخوي وهي تتوجه صليه/ايش فيك ياوليد بين احس ان فيك حاجه

وليد وهو يحضنها ويقل ببسمه /ولا فيني شي انا بخير