بقلم الكاتبه زهراء_العراقية
نبدأ الصراع الاول
ملامة تتبع ملامة.. شد اعصاب.. وجوه غاضبة.. وجوه متعاطفة.. ضرب على المتن المزرق.. من كثر اللطمات وجهي ما احس غير بحرارة تطلع منه تنذرني بليلة وجع راح تصدر من كدماته الحمرة بالحقيقة ما اعرف اذا حمرة او لا بس خمنت او خيالي صورلي من الحرارة الي تطلع منها تخيلتها كأن جلدي منقشع وية ضربة اوتي سلخ جلدي عن وجهي وصارت حمرة !
ابوية كفاه ضربي و لزم رضوان عني ابعده .. اجت مرته اخذتني من ايدي
صرخت صرخة خاوية من التعب خلتها اتكول
-شنو ايدج مخلوعة؟
سؤال مو بمحلة عجزت عن الاجابة عنه بسبب صوتي المبحوح من الصراخ والخوف
رجع رضوان عليه وركلني برجلة او طفر و ضربني وكعني على الارض مرة لخ . وابوية و علي بعدوه وبابا صرخ
-وخريها منا .. طلعيها تمارة ابسرعه
اخذتني لغرفتها و سدتها اجيت اكعد على الارض اخذتني وكعدتني على سريرها
-ليش هيج نيوفر ليش طيحتي حظج وحظ اهلج
الملامة توجعني اكثر من جروح جسمي و الندبات الي بوجهي اكثر حتى من خلع ايدي طلعت .. واني ما اعرف شسوي لجسمي ويهدأ انام اظل كاعده ... كمت الووب من الاوجاع من بطلوا ضربي الا هاجت كلش عليه ..عقلي توقف عن العمل والتفكير من سمعت اصوات عمامي .
و اصواتهم ما عرفت اشخصها لأي واحد ييهم واحد يكول نكتلها . والثاني يهدي ويذكرهم بالله .. رجع صوت رضوان زلزني من صاح اكتلها ورب الكون اكتلها .. وصارت ربدة .. و انضربت باب الغرفة حيل خلتني اضم وجهي بحضني . وكلت هاي ساعة موتي . رجعت الاصوات ابتعدت عني . دخلت تمارة قدمت الماي الي
-اشربي ، عمج رابح و اخوج رضوان يردون هدر دمج واجه رضوان ينفذة لو لا حلم ابوج وعمامج ابو عامر و ابو منال وخروه عنج ليش هيج يا يمة سويتي بنفسج هيج ؟ ليش مدللة اشحلاتج ضيعتي شبابج وسمعتج وسمعة اخوانج راحت .
كعدت يمي تندب وتبجي
عين مطفية من بوكس اخوية وعين وحده تجري دمع بحاجة لأحد يأخذ صاحبتها بحضن يطمنها أن كلشي تمام اريد امان ما لكيته عند تمارة ولطمها
نمت او خدرت و روحي فرت بالنوم و اون من اوجاعي و اميرة كاعده يمي تمسح بجروحي .
بالكوة فتحتها لعيني على صوت ضرب على الباب قوي و صار اخوية رضوان بنص الغرفة ... ما شفته شفت واحد ثاني متحول لذيب جاثم وشفت اسنونة الصاكهن مثل انياب الذيب بأيدة شي مالحكت اميزة خشبه مدري معول مدري ما لحكت اميزة لأنه ضربني و وداني لعالم ثاني .عالم اظلم نسيت بالتدريج اني شصار وياي قبل لحظة ، اني منو اني وين ؟كل هاي الاسئلة تطرح ببالي .. زين ليش مكدر افتح ... اصوات يمي دتحجي وياي ، لحظة يمكن اسمي نيوفر اني نيوفر ايي
اجاني طيف طفولتي .. كاعدة و اعيوني تخز ببيبي وهي تلبس عباتها ..
-يلا بيبي كومي
بعناد طفولي
-ماااااااااااااااا
-دكومي يبيبي لا تولبين گلبي كبرتي
سحلتني
-اذا مشيتي عدل وياي للمدرسة اشتري الج دفتر رسم
- عندي بابا جابلي البارحه
كلتها واني اشاهك
دخلتني للصف وتتوسل الي اثبت ولا اظل ابجي
