بقلم الكاتبه روشان
سحب موبايلي من ايدي وركعه بكل قوته بالكاع صار كل قطعة بمكان واني نظراتي عليه شلون اتفلش ،رجعت رفعت راسي وقبل لا احط عيني بعينه ضربني راجدي من قوته حسيت اذني اطرشت
لزمت وجهي الي بدا يطلع نار من اثر الضربة مدري من نار روحي الي تريدني انقض عليه واملخه حتى ارد اعتباري من هالتعدي الي سواه بحقي
بس مكدرت اسوي اي تصرف وهو متخبل كبالي يصرخ بكل صوته ولزم كلشي بالغرفة وكسره التيبلام ،التحفيات ،عطوري ومكياجي الي عالميز يكسر ويصيح ويسب بيه
كمل تكسير واجه ناحيتي بسرعة عبالي راح يضربني مرة لخ ،فغطيت وجهي بيدي احمي نفسي منه وكعدت بالكاع بسرعة
وكف فوك راسي يرجف لازم نفسه بالكوة وسكت اسمع بس صوت انفاسه العالي
رجعت حسيت بالقوة وكفت بسرعة ودفعته وصحت
ما اسمحلللك ابد تمد ايدك علييييه ،ما اسمحلللك تسبني وتجيب طاري احد من اهلي الي سويته راح تندم عليه والله والله ،،احجي وااشر بيدي بتحلف وايدي ترجف والغصة بصوتي ودموعي غدرتني ونزلت
واني ماريدها تنزل كدام هيج واحد
-لتخليييني ارجع اضرببببج ولج ...(اخذ نفس عميق) ولج لو محترمة نفسج جان ما جبتي الضرب والاهانة لنفسج ،لو محترمة هالكلب ابن الكلب الي كبالج جان مصار الي صار
انتي مرة متزوجة اذكررررج لو نسيتتتي ؟
-اخاف صدكت نفسك انت رجلي ؟!!!
الي بينا ورقة ،ورقة احركها وانهي كلشي وانهيك من حياتي ما اتحملك بعد ماااا اتحملك افهههم حس على نفسك
نظرات الغضب الي بعيونه اتحولت لنظرات استهئزاء وحجى بنبرة حقيرة
-قصدج الي بينا لزمة لازمها عليج وبس تلعبين بذيلج اجيب بيها راسج جوة قندرتي
-انت انذل شخص شفته بحياتي
-اي عفية خففي النبرة ،ولا تعلين حسج وياي بعد ،اتذكري الي تحجين وياه منو ،
كمل جملته واندار انطاني ظهره ،وكمل كلامه
-هاي اخر مرة اشوفج تحجين وياه ،والا وحگ حركة اعصابي هاي الي صارت بسببج
ادمرج بيدي واخليج معلكة بهالدنيا لا تطولين تعيشيها ولا تموتين وتخلصين منها
-جاوبته ببرود ،ليش هيج حارك دمك واعصابك بسببي ؟ انت انسان عندك نفسك رقم واحد بالدنيا شنو الي جابرك عليه وعلى شلعان الگلب وياي
تحبني ؟
ضحك ضحكته الخبيثة وجاوب
-اكيد لا ، اخر وحدة ممكن تفوت لگلبي هي انتي
-سبحان الله شعور متبادل ،اتمشيت ببرود
واتوجهت للباب اريد اطلع وقبل لا افتحها سحبني من ذراعي بقوة ورجعني للخلف
صارت عيني بعينه ،وكال
-صاييير شي بيناتكم ؟ التقيتي بي مو
-انمردت مرد من سمعت كلامه ،ملامحي الباردة اتحولت بثانية ،عيوني غوركت وشفايفي نشفن بالكوة طلع مني الكلام
شجاااي تحجي !!! شلووون تفكر بيه هيج ؟
فقدت اعصابي بديت اضرب بي بكل قوتي وهو يحاول يلزم ايدي
منو انت منووو ،حتى تشكك بشرفي يا نذذذل
عبالك كل الناس عديمة شرف مثلك يا عديم الشرف
انت اخر واحد تحجي بالشرف ، ولك انت بس سوايتك الناقصة بأخوك المفروض تطم نفسك عليها العمر كله بس انت واحد لا احساس ولا ضمير
جان يحاول يسد حلكي وهو يصيح (اششش اسكتي) لحد ما جبت طاري اخوه انخلس بمكانه وخر ايده مني وابتعد مصدوم شلون ومنين عرفت بهالموضوع ،شوية وطلع من الغرفة بسرعة مكدر يحط عينه بعيني بعد
.....................
عمة خليها تفوت الله عليج ،والله تخاف برة
والله متدري عثرت ووكع الجاي عالثوب اني هسه اغسله الج ويرجع نظيف
بس فوتيها للبيت
-اششش اكلتتتي راسيييي ،امشي ولي من وجهي لا احط قهري بيج انتي هم
اختج الادب سز هاي اذا ما ابيتها برة اليوم ما اطلع بت ابوية ،حتى تعرف شلون تحط راسها براسي وتخبث ويايه بعد
-دا اكلج ما متقصدة وروح بابا ما تقصد،هسه لو اني جان كلنا ميخالف تطلع مني
بس هي والله فقيرة وتخاف توصل يمج مو انوب تضوجج بشغلة
زين خل تفوت جوة وطلعيني اني بدالها
احجي وياها وما تجاوبني ،ادور عالمفتاح مدري وين حطته حرت شنو اجيب حتى افتح الباب ومكدرت افتحها
فرفحت روحي صارت ساعة ١ بليل وهي برة تبجي اسمع بس صوتها المخنوك ادري بيها تخاف ،وعمتي شكة ابليس ماعدها مخافة الله
ومحد بالبيت يكدر يحجي وياها
رحت للمطبخ لكيت نص كرصة خبز خليتها جوة تيشيرتي ،دورت بالثلاجة فارغة مابيها بس مصفي الخيار وكم طماطية وبطالة المي
اخذت خيارة خليتها بجيبي وبطل مي لزمته بيدي ورحت لعمتي كلت الها
اذا متخليها تفوت لعد طلعيني اني يمها ترى اگلب البيت على راسكم ماخليكم حتى تنامون
بس كملت كلامي كامت بسرعة جرتني من ضفيرتي وسحبتني للباب طلعت المفتاح من جيبها فتحتها ودفعتني للطرمة وهي تغلط عليه
