Maung

D day

<Unicode>

တစ်ယောက်ထဲဖြတ်ကျော်သွားရမယ့် နေ့ရက်တွေကတကယ်ရှိတယ် ကျော်သွားနိုင်ရင်တော့ ပျော်ရလိမ့်မယ်ပေါ့ ကိုယ်တကယ်လဲ ကျော်လွှားနိုင်ခဲ့ပြီလေ
မောင်မရှိတဲ့နေ့ရက်တွေကို တစ်ယောက်ထဲရင်ဆိုင် ဖြတ်ကျော်လာခဲ့တာ ဒီနေ့ဆို ရက်ပေါင်း 548 ရက်တိတိပြည့်ခဲ့ပြီ လူတစ်ယောက်ကို စောင့်မျှော်နေရတာဟာ သိပ်ရင်ခုန်စရာကောင်းကြောင်း မသိခဲ့တာအမှန်ပါ ကိုယ်မောင့်ကိုစောင့်မျှော်နေသလို မည်သူတစ်ဦးတစ်ယောက်အပေါ်ကိုမျှ စောင့်မျှော်မနေခဲ့တာလဲ ပါလိမ့်မယ်ပေါ့
စိတ်ရောကိုယ်ပါနွမ်းခဲ့ရတဲ့ မောင်မရှိတဲ့ ဒီ 548 ရက်အတွင်းမှာ ကိုယ်လေ မောင့်ရဲ့ရယ်သံလွင်လွင်လေးတွေ ကြားချင်မိခဲ့တယ် အဆင်မပြေတာတွေဖောင်ဖွဲ့ပြီးပြောပြချင်တယ် အနွေးဓာတ်ပါးပါးလေးကိုယ်လိုချင်မိပါတယ်
တကယ်လဲ screen ပေါ်က မောင့်ပုံလေးတွေကြည့်ရင်း ကိုယ်ပြောပြဖြစ်ခဲ့တယ် တချို့ရက်တွေမှာ လတိုင်းရနေကျ မောင့်စီက message လေးတွေကြည့်ရင်းပေါ့ တကယ်ကို နွေးထွေးမှုကို ခံစားမိတယ် အနွေးဓာတ်ပါးပါးဆိုတာထက်လေ မောင့်မေတ္တာဓာတ်ကြောင့် လိုအပ်တာထက်ကိုပိုပြီးကိုယ်က ပျော်ရွှင်ခဲ့ရပါတယ်
မနက်ခင်းနိုးထလာတာကအစ ကိုယ့်ရဲ့နေ့တစ်​ရက်တာအလယ် ညဥ့်နက်သန်းခေါင်အဆုံး  ဘာတွေဖြစ်ပျက်ခဲ့သလဲဆိုတာ ချစ်ခြင်းမေတ္တာအပြည့်အဝနဲ့ မောင့်ကိုဖွင့်ဟခဲ့ပါတယ် ဒီလောက်အတိုင်းအတာဆိုရင်ဖြင့် ကိုယ်ဟာမောင့်အပေါ် ချစ်မိနေတာထက် ရူးသွပ်နေခြင်းလို့သာ ခေါင်းစဥ်တပ်လိုက်မိရင်တောင် ကိုယ့်အလွန်မဟုတ်ပေဘူးမလား
သို့သော် ရူးသွပ်ခြင်းမှာ ခေါင်းစဥ်မဲ့တတ်တာမို့ အချစ်လို့သာ သတ်မှတ်ပါရစေ
အင်း အချစ် တဲ့ ဘာရယ်မဟုတ်ဘူး နက်ရှိုင်းတယ်
နွေးထွေးတယ် အရာရာတိုင်း ခွန်အားဖြစ်စေတယ်
မောင့်အပေါ် ချစ်မိတာဟာ ဝဋ်ကြွေးတစ်ခုဖြစ်ခဲ့မယ်ဆို​ရင်တောင် နောင်ဘဝတွေအထိဆပ်ချင်ပါသေးတယ်
ကိုယ့်အတွက်တော့ မောင်ကတစ်ဖန်ပြန်ငေးကြည့်ရတဲ့ ဖြစ်တည်မှုအပိုင်းအစလေး
ဝေးဖို့်နောက်ထား သူ့မိဘနဲ့ မျှပြီးတောင် ချစ်လို့မဝသေး
ချစ်လှစွာသော အေးချမ်းမှုလေး
မြတ်နိုးမှုကိုရှာကြံရမယ်ဆိုရင်ဖြင့် စာဖွဲ့၍မကုန်နိုင်သော အမျိုးသားငယ်လေး
မောင့်ရဲ့စတော်ဘယ်ရီတွေလို နှုတ်ခမ်းဖူးဖူးလေးကိုပဲကြည့်မလား
အေးချမ်းတဲ့ မျက်နှာလေးကိုပဲ ငေးနေမလား
သာယာတဲ့ အသံလေးကိုပဲ နားထောင်မလား
မောင့်ရဲ့ဆံနွယ်အိအိလေးကအစ ခြေဖမိုးဖြူဖြူနုနုလေးအဆုံး ကိုယ့်အတွက်တော့ အရာအားလုံးဟာ မောင်နဲ့ပတ်သက်ရင် မြတ်နိုးဖွယ်ရာအတိလေ
ကိုယ်သိတဲ့ နိမ္ဗာန်ဆိုတာ အဲ့ဒါပါပဲ
သေဆုံးပြီးသည့်တိုင်အောင်ပင် ထိုနိမ္ဗာန်ကိုသာရချင်မိပါတယ်