ترياق الرُوح

الترياق الخامـس ⚜️ (العودة) .

بسمهِ تعالى :

مهضوم اريد اشتكي والمشتكى للرب
ما ادري ياهو الدخل بيناتنا وخرب
مو بس مزاجي صرت بفراشي اتگلب
وابتعد من اي بشر من عندي يتقرب

حتى اليبيع الورد من سولفتله شحصل هز ايده واستغرب

" تريــاق الـرُوح "
________________ .⚜️⚜️⚜️⚜️. _______________

دليار :

ـ بعدنـا نسولف ونضحك وسمعنا عمو وبابا ديسولفون 

::ـ هسه الولد يفرون الاسواق كلها ويجيبون مسواگ كامل

ـ رد عليّ آكرام
::ـ ها يابـه شنو شكو ؟

::ـ  نريد نسوي عشة لسلامـة اخيكم واريدكم  تتسوگون غراض للعشة

سائد ::ـ خالي الدنيا ظهر الجو يموت حر والعالم كلها معزلة خليها لباچر نتسوگ العصر من يفتحون والصبح سوو

جاوبـة بابا :
::ـ لا وليدي هسه احسن بعد شوية العالم تتجمع تتحمدلة ع السلامة وفشلة يطلعون بدون عشة اساسًا المفروض اليوم مسويَّن ع الغدة بس انشغلنا وراحت بعد

سائد :
::ـ  هاي هيَ  تدللون خالي ، هسه نغسل ونصلي ونطلع

ـ رد عليَّ عمو مُنتظر :
::ـ ما يدلل عليكم ظالم وليدي ، تصلون وتتغدون وتطلعون حتى ترجعون تنامون محد يجي هسه للعصر يلا تتجمع العالم

ـ بعده ما مكمل جملتة اندگ الجرص والباب ضحك وأشر ع الباب گلة

::ـ مو كلتلكم محد يجي هسه

ـ گام شهم يفتح الباب سمعنا صوت عَمتي علياء وشهم يرحب بيها طلعنا نشوفهـا وندخلها جوا  بعدنا بباب المطبخ وسمعنا شهم يگلها

::ـ اهلاً وسهلاً عمتي فدوة لگلبج ما لكيتي غير الظهر تجين جان اجيتي الصبح العصر الجو يصلخ

ـ ضربتة ع كتفة وضحكت وگلتلة
::ـ اي مو اشوفكم مخليني بعيونكم ولك شمدريني ابن اخوي مسوي حادث لو ما أمير يگول والله وكيلك سحلته من شعرة وجبتة واجيت ما شفت گدامي صبح ولا عصر تليد عزيزي وما گدرت اضل من سمعت بي مسوي حادث حتى ذني الغبرات جبتهن گوة بتراك البيت النوم بعينهن عبنهن توهن كاعدات نايمات للظهاري

ـ جاوبها شهم
::ـ دخلي عمه دخيل ربج ساحله العالم على مود تليد هسه من زينة اشو حاطنا ويكفخ بينا عبالك جهاله ولا يگلك بعمرة

ـ خطية نباوع لبناتها صارن حمر ويعصرن بعبيهن من الحر وعمتي مستمرة تريد تكمل عاد فريق الانقاذ اشتغل عدنا وسوينا هجوم اذا بقينا عمتي تسولفلة ع العشيرة شصار بيها من سمعو تليد مسوي حادث يگلك مو تليد مدري شنو