I'm coming ~ هانا جاية

part 19

﴿ انا جاية ،~ I'm coming ﴾
قصص مغربية 🎭✨
بقلمي انا لونا نينو 🖋️📒

_________________________

هناء بقات غالبة على المخ حتى جاو البوليس هزوه و هزو اخ إلهام مع التطلعية ديال عينيها كايبان ليها شي بوليسي خارج سيفيل ركزات فيه هناء الشوفة كيفما ركزها فيها هو

سرعان ما تذكرت الهوية ديالو ابتاسمات بتفاجأ كيفما حتى هو تبدلات الملامح المتفحصة ديالو لأخرى مسرورة و بشوشة

هناء تمشات عندو بسرعة : مجد !!!

مجد بمزاح : بلحمو و شحمو

هناء ضحكات و ضرباتو لكتفو بالضحك: فين الشحم ما بقات عندك حتى شحمة كاع الشحمة اللي كانت فيك هزيتها انا و الهام

مجد : لا والو غير كاتهضري باقا الرشاقة هي الرشاقة

هناء: لهلا يخطيك ... اجي اخويا غير قول ليا فين هاد الغبوور ضربتي كروة ديال الصح على هاد الدرب واخا نكونو قاتلين ليك بوحمارة

مجد تنهد : و الله ما لخاطري اهناء راه مشيت للرباط مع الواليد داك الوقت راك عارفة اش كاين كملت قرايتي تماك و وليت كوميسير و فاش سمعت البلان الي وقع في الدرب نزلت مع السطافيط

هناء ربتات ليه على كتفو : احسن ما درتي أمجد و الله من صغري كنت كانقول ليك نتا غادي تكون مخزني و هانتي وليتي كوميسير حجرتو تقيلة في البلاد

مجد : ربي يخليك اختي هناء ... مال هداك الموسخ معاكم

هناء حركات راسها : و الله اخاي ما عرفت كنت خارجة حتى جات عندي الهام كاتغوت كاتقوليا عتقي راه المخ كايتعدى ليا على خويا هي فاش هزيت التيلي عيطت البوليس و مشيت ليه لقيتو قاتل الدري عصا و بغى يدخل فيه موس

مجد زير على يدو : الدرب واقيلا ما بقاو فيه رجال منين الشمايت ولاو كايتعداو عين باين

هناء : اخاي راه كنا مدايرين غير وجه يماه و مرتو ساعة اليوم ما نكدبش جمعت ليه كلشي حب و تبن

مجد : احسن ما درتي ... هانتي سيري رتاحي في داركم و انا غانتكلف بالباقي

هناء : صافي انا غادي نعول عليك ... اجي بلاتي واش غادي ترجع الدرب

مجد ضحك و غمزها : خليها حتى نديرها ليك مفاجأة