بنت الحلال [قصة كاملة]

الجزء 5

بعدما بدلات عليها خرجات من البيت و هي مفگوعة، نزلات لتحت و بانولها نعيمة مع خديجة و وسيلة مرت خو لقمان و جوج نساء اخرين، قربات عندهم مبسمة ابتسامة خفيفة ممسكنة بنظرتها، سلمات عليهم هوما و النسا الجداد اللي عاد شافتهم

جلسات فبلاصتها مؤدبة و النسا كايصليو على النبي

"تباارك الله عروستك انعيمة طلعات غزااالة"
"الله يبارك تبارك الله كولشي فيها هو هداااك"

نعيمة: (تبسمات بفخر) ولدي المرضي راني راضية عليه عليها عطاه سيدي ربي وحدة فحالها غزاالة (طبطبات عليها برضى) عروستي الفنة

امنية: (تبسماتلها بخفة و قلبات عينيها للفراغ كدوي فخاطرها) كايعبرو فيا تقول ماطيشة قبالتهم، اويلي على طلعات غزالة؟ كرشة دالعيد انا؟

نغزاتها خديجة خرجاتها من ديك السهوة تا شافت فيها امنية بسرعة

امنية: خلعتيني اصاحبتي

خديجة: قوليلي اش دار معاك داك صعصع راني عارفاه شلاهبي!

امنية: (بخفوت) مادار والو ، اصلا ماعندو مايدير، هو اللي قاليك خوذيني للصالون؟

خديحة: لا ماشي هو انا اللي اقترحتها عليه باش نفوجو شوية و هو وافق، ماتوقعتش غايجي يلحق علينا، السيد ماسخاااش بييك ههههه

غمزاتها كتفرنس تا قلبات عينيها امنية كاضحك فنفسها و قالت بابتسامة

امنية: اه مسكين مكايسخاش بيا!

شافت فالفراغ حابسة الضحكة بالزز تا دوات وحدة من الضيفات اللي معاهم

"قوليلي ألغزالة، بعدا كاتعرفي طيبي ولا والو؟ كنت صراحة كنساين مرت لقمان تكون حااادگة مامنهاش جوج!"

امنية: (تبسمات ابتسامة صفرا كاتشوف فيها) اممم كنعرف اخالتي

خديجة: (نغزاتها) هاد اللصقة ماتحليهاش عليك راها تنوضك طيبيلها بلهلا يطريه ليك

يلاه كملات هضرتها قالت لوخرى
"ايوا ورينا حنة يديك!"

شافت فيها امنية مبسمة بهداوة و هزات يديها قبالتها كتوريها الحنة

امنية: ها هي اخالتو، شوفي شحال غزااالة

شافو فبعضياتهم كاملين كايضحكو عليها، حسبوها گاع مافهمات قصد لوخرى و هي غا طانزة عليها، ناضت من جنبهم و قالت بابتسامة

امنية: خديجة عفاك وريني الفيلا، راني مزال ماشفت منها والو، مع يلاه عروسة جديدة عااد غانوالف معاكم