بنت الحلال [قصة كاملة]

الجزء 7

بقات قالبة وجهها تا تدق عليها البيت و دخلات عندها خديجة

خديجة: (تبسماتلها) حبيبة مسالية؟

امنية: اه خديجة دخلي

خديجة: جيت عندك نجلسو شوية، شنو بانلك تمشي معايا اليوم انا معروضة لعرس واحد صاحبتي من ايامات القراية

امنية: اممم نمشي بغييت و لكن ماعندي باياش، راك عارفة تا العرس مادرتوش ما عندي جهاز و جابني على غفلة زرب عليا، كنت انا مزال عوالة نجلس فدارنا تا نكمل كولشي

خديجة: اه انا عارفة، ماتخافيش عندي واحد التكشيطة واعرة عمرني لبستها، كنت خيطتها و موراها مات راجلي الله يرحمو و من داك الوقت ماحضرت لشي عراسية و صراحة مابقيتش باغا نلبسها حيت كنا ختارينا كولشي ديالها بجوجنا و كتفكرني فيه

امنية: الله يرحمو مسكين

خديجة: صافي نعطيهاليك و نمشيو للصالون نصايبو وجاهنا ماتخافيش كولشي غايكون نااضي، انتي غير قوليها للقمان حيت راه مافخباروش

امنية: (تبسماتلها ابتسامة صفرا) واخا انا نقولهاليه

خديجة: صافي انتي قوليهاليه و لبسي عليك، غانمشيو للصالون و من تما نلبسو و نتحركو للقاعة، راها غادير العرس بالنهار و بكري گاع الثمنية غانكونو هنا

امنية: (حركاتلها راسها بالايجاب) واخا صافي، غتاخذي عبير؟

خديجة: لا نخليها مع ماما

تافقو بجوج و فعلا كيما تافقو دارو و مشاو، الحاجة الوحيدة اللي مدارتهاش هي مقالتهاش للقمان، مشاو للصالون دالمرة اللي فااتت و هاد المرة ركنات الطموبيل عند الباب دالصالون، دخلو بالقفاف داللباسي فيديهم و مشاو كل وحدة عند وحدة يصايبولهم

ترخات امنية كاتشوف فوجهها فالمراية و شافت فالبنت اللي غاتصاوبلها

امنية: شوفي نقصيليا شوية من حجباني مايجيوش باينين بزاف حيديلي تا الموسطاش و شوفي عندي زغب رقييق فوجهي حيديهلي تا هو بغيت نبان كانشعل و ديريليا شي مكيااج واااعر عرفتي نبان بيه بومباااا

"واخا اختي، كوني هانية انا غانتهلا فييك"

امنية: واخا صافي

غمضات عينيها و ترخات للبنت اللي دارتلها فوجهها مابغاات ماهزات يديها منها تا رداتها بومبا كيفما قالتلها، شدات المراية و شافت فوجهها مبسمة و حمقها راااسها