بنت الحلال [قصة كاملة]

الجزء 6

امنية: (شافت فيها مارضاتش) شنو؟ انا هاكا طريقتي مالك انتي ياك كنعاونك؟

خديجة: لااا ماديريش هاكا راك مغاتسالي تا لغدا، بلاتي نقادليك اري نوريك اريي

امنية: لا كنتي توريني غير قشريها انتي نيت، اصلا انا دمعاتلي عيني و عيانة غانمشي بحالي نرتاح

مشات خرجات من الكوزينة و هي كتمسح الدموع اللي طاحولها بسباب البصلة و طلعات نيشان لبيتها و مارضاااتش تشوفها خديجة كادير هكاك و ضحك عليها، هي قالتلهم عاد كتعلم يعني خاصهم يفهمو انها مكاتفهمش و اصلا هي عمرها دخلات للكوزينة باش تعرف كي كاتنقي البصلة!!

دخلات للبيت معصبة و مع الدخلة مع جمدات فبلاصتها و نوات تتراجع و تخرج فحالها و لكنها كانت دخلات و شافها و اللي عطا الله عطاه

كانت عارفة انه خرج فالصباح و مللي فاقت گاع مشافتو، اش جابو دابا و عاد جالس كايقرا القرآن من المصحف و مخشع معاه

دخلات كاتمسح عويناتها و كتعرج ، هز عينيه فيها و غير شافها حمرا و عينيها مدمعين ناض عندها بسرعة و شد فيها

لقمان: امنية! مالك؟ شنو هاد الدموع؟

امنية: (تجمع عليها كولشي، ماراضياش و حشمانة منو و حاسة بالحگرة و مباغاش تزوج هي اصلا) ا انا اننننن م مابغيييتش (شهقات بالبكية) بغييت نمشييي بحااااليييي مباغاكووومش ا انا اننننن هنننن

لقمان: (بنبرة جادة) مالك شكون قالك شي حاجة ولا قلقك، بلاتي اجي اجي (جرهاليه و خشاها فحضنه تا تنخششات فيه كتبكي) مالك على هاد البكى واش شي واحد قاليك شي حاجة؟

مجاوباتوش هي بقات غير كتبكي و كتنخصص و كاملة كترعد شوشاتو عليها و قلبها طااايب، تا جرها جلسها و وقف كايقرا عليها القرآن و رقاها و هي كتبكي و تمسح فعينيها و كتمتم بشفايفها كايترعدو

امنية: ب بغ بغاوني نطيب و و نا م مكانعرفش ع عطاوني البصلة م مكانعرفش

قربلها و جلس جنبها، شافها بدات كاتهدن جرهاليه و شد يديها بجوج بلمسات قشعرو بدنها

لقمان: دابا غير قوليلي واش معصبة حيت مكاتعرفيش طيبي؟

امنية: (حركات راسها بالنفي) البصلة

لقمان: (عقد حواجبه فيها) وااايلي هادشي كامل غير بصلة؟

امنية: (تأفأفات) اصلا انا كايوصلي واحد الوقت كانولي فشكل، اي حاجة كتبكيني، الهرمونات كايتبدلو!