بنت الحلال [قصة كاملة]

الجزء 10

امنية: خدوج قوليلي اش غاديري لا جاو فيك الخطاب؟

خديجة: (شافت فيها بجدية) اش ندير، طبعا مغانقبلش اش ندير انا بشي خطاب و بنتي؟

امنية: مالها بنتك تعيش معاك معززة مكرمة فحالا عايشة مع باها و بالعكس مللي يكون معاكم راجل راك غاتكوني عايشة حياة مزيانة

خديجة: (حركات راسها بالنفي) لا أختي ماعندي ماندير لا براجل ولا بخيالو، براكة عليا غا هاد الحياة و راضية باللي قسملي الله فحياتي

امنية: (تنهدات) و غير فكري فالموضوع (شافت فيها بجدية) انا صراحة دواو ليا شي ناس فيك بغاو يتزوجو

خديجة: (شافت فيها بسرعة و قالت مستغربة) دواو معاك انتي؟ شكون هادو بالسلامة؟

امنية: (تبسمات بخفة) خويا وليد، قالي من نهار شافك معايا ديك المرة مللي مشينا حضرنا للعرس و هو باغيك غير مكاتبش مع الوقت و الظروف جاو مور بعضهم

خديجة: فين شافني اختي هي غا دوزة دزتها من حداه درك يتزعط

امنية: هو جا من الباب و بغاك و قالي ندوي معاك و نشوف الرأي ديالك بعدا و عاد غايدوي مع لقمان باش يطلبك منو، و بالنسبة لعبير كوني هاانية غايحطها فعينيه قالهالي و قالي انتي اللي بغاك مابغا تا وحدة من غيرك

خديجة: (تحنحنات و شافت فالفراغ بسهوة) و لكن! ا انا مكانتخايلش راسي مزوجة من مور المرحوم و...

قاطعاتها امنية بجدية

امنية: و شحااال قدك اختي و انتي بنتك راها غادا و كتكبر ان شاء الله غايجي وقت اللي ماتقديش تحكميها بوحدك و خويا راه ماشي حيت خويا غانشكرو و لكن هو من اطيب خلق الله و باغيك و شاريك

خديجة: (تنهدات و قالت بجدية) امنية جيتوني قراب و ماباغاش نخسر معاكم، انا حاليا مكانفكرش فالموضوع و..

قاطعاتها بجدية

امنية: لا خاصك تفكري، على قبلك انتي ماتفكريش بزاف فبنتك حيت بنتك راها غاتعيش معززة مكرمة، و بالعكس غاتلقى الحنان دالاب تا هو و وليد عمرو يفرق بينها و بين وليداتكم لا درتوهم فالمستقبل، بالعكس غايحسبها بنتو الكبيرة دياالو و انتي خاصك راجل فحياتك، ماتنكريش و تقولي لا مكاينش المرا اللي مكاتحتاجش الراجل فحياتها، هادي غريزة فينا حنا لا النسا ولا الرجال و تبارك الله راك دوزتي عماين بوحدك بلا راجل! شنو بغيتي مزال تكملي حياتك كولها هكا، تا لإيمتى

خديجة: (بهداوة) ان شاء الله أ أمنية خليني نفكر و نخمم و ساعة نرد عليك، دابا انا معارفاش