:_ أنا نفسي أكل جلاش وكنافة في رمضان السنادي.
بابا قالي الجملة دي برجاء شديد بعد ما مسكني حوار حلويات رمضان كل سنة، وبقاله6 سنين بحشيها في عيش وأكله له في سندوتشات عشان متترميش حرام، المهم رديت عليه بهدوء:
_ بابا لو سمحت مش أنت مسكتني الحلويات من 2017 يبقى تسبني أظهر ابداعي.
_ ابداع ايه حسبي الله ونعمة الوكيل، أنا من يومها بقيت بقف قدام الحلواني في الشارع وبتفرج على الحويات زي العيل الصغير اللي مش لقي ياكل في الشارع.
أنا شهقت جامد وقولتله بغيظ:
_ ميصحش يا بابا تعمل كده.. يقولوا علينا إيه حرمينك منها.
_ هما لسه هيقولوا.. دا أنا صعبت عليه في مرة واداني صابع بلح شام من فرحتي بيه قعدت اتصور بيه يجي 30 صورة.
برقت لبابا جامد وبقوله بعصبية:
_ ايه الطفاسة دي يا بابا كلته كله ومدنيش.. طب كنت اشحت واحد ليا.
بابا من غيظه قام خلع الشبشب وحدفه في وشي وقال:
_ عارف لو مطلعتيش الحلويات السنادي مظبوطة هبيتك على سلم العمارة النهاردة.
قومت جري ودخلت المطبخ وبدأت اعمل وصفة سهلة شوية وهي صوابع جلاش محشية كنافة بالمكسرات، وبدأت اعملها بحذر لحد ما طلعتها من الفرن وسقيتها بالشربات وظبطت أوي.
خرجت من فرحتي بالصينية طلعت اجري بيها اروح لبابا في البلكونة بس رجلي اتزحلقت والصينية اتحدفت مني من البلكونة وقعت في الشارع مبقاش غير صابع واحد في يدي، بابا بصلي بصدمة وأنا بحاول استوعب اللي حصل، المهم بابا قال:
_ يارب تطلع طعمها وحش يارب.
أنا روحت رديت بكل دهاء:
_ لا يا بابا دي طلعت ناجحة وحلوة.. حتى دوق.
وحطيت صابع الجلاش في بوقه لقاه طعمه حلو أوي، بابا عينيه دمعت وقام مسك خرطوم في البلكونة وجري ورايا بيقول:
_ دا أنا هعملك صوابع جلاش النهاردة.
_ يا بابا مقصدش والله دا من فرحتي بيها وقعت.
_ وأنتِ تفرحي وتكسري فرحتي ليـــــــه.
وهوب بابا راح رزعني واحدة خلاني رقعت بالصوت، لحد ما قولتله:
_ كفاية هبقى اجبلك طبق حلويات من برة بس كفاية جسمي اتسلخ.
بابا وقف ضرب وبصلي جامد، وبعدها مشي وأنا حطيت ايدي على اماكن الوجع بقول في سري:
_ أنت مش أب أنت.. بتعذب بنتك على صينية جلاش.
#سلمى خالد
