كنت بسمع الكلام من ابني وعيني دمعت وكُنت على وشك البُكاء ؛ ابني كان صغير عنده 7 سنين كان دايمًا بيحب ينزل الشارع يلعب كورة ويجري.. باباه متوفي وانا بشتغل وبحاول اوفر ليه كل اللي محتاجة، المهم في يوم كنت بحضر العشا ولقيت تلفوني بيرن رديت وكانت الصدمة بنسبة ليا لما جاري قال:
_ ابنك في المستشفى بعد ما عربية خبطته!
طبعًا الصدمة كانت كفيلة تخلني واقفة ثابتة مش بتكلم، فوقت ولبست بسرعة بعد ما عرفت اسم المستشفى وهناك لقيته في العمليات، قربت من جاري الحج اسماعيل وسألته وأنا منهارة في العياط:
- ايه اللي حصل وزين جرى ليه ايه؟
رد عليا:
- كان بيلعب بالكرة زي عادته والكرة جريت منه في الطريق العربيات راح يجيبها بس الاستاذ دا خبطه بالعربية وجابه لهنا!
بصيت ناحية الراجل اللي واقف بعيد حاطت راسه بين ايده بكره وكأني عايزة ازعق فيه جامد بس من وجع قلبي على ابني مش قادرة اتحرك وفضلت ادعي وانا بعيط خايفة يحصل ليه حاجة، هو اللي ليا في الدنيا بعد وفاة المرحوم باباه، 3 ساعات اعصابي مش مستحملة صوت صغير لحد ما الدكتور خرج وقال :
_ الطفل كويس بس للاسف ايديه الشمال فقد فيها 3 صوابع.
انا سمعت كده وحطيت ايدي على بوقي ودموعي بتنزل اكتر من الاول محستش حتى بالراجل اللي خبطه وقف ورايا، سألته ينفع ادخل لابني والدكتور وافق..
دخلت ببص على زين وشه اللي متعور.. جسمه الهزيل كل دا زود وجع قلبي لدرجة اني متحملتش لما شوفت ايديه ملفوفة، اغمي عليا ومحستش بحاجة غير وانا على السرير بعد ما صحيت بصيت حوليا وملقتش غير الراجل اللي خبط ابني.. كمية الكره اللي كانت جوايا ظهر في عيني وهو لحظها وحاول يعتذر بس انا وقفته قبل ما يفتح بوقه :
- الواجب بتاعك وصل ابني خلاص فقد 3 صوابع منه دا غير التعب اللي في جسمه.
الراجل بص ليا شويا وبعدها قام من مكانه وقبل ما يخرج قال بندم:
- بعتذر على اللي حصل.
الراجل خرج وانا قومت روحت لابني واخدته وروحنا البيت مع الحج اسماعيل وبقيت بخلي بالي من ابني اكتر من الاول وبمنعه ينزل الشارع وهو تقبل شكل ايديه بعد ما فقد صوابعه وخف خلاص.
طبعًا صاحب الشغل بدأ يرخم عليا لاني مش بقعد كتير في الشغل وفي الاغلب بقيت بستأذن عشان الحق اروح لزين واجيبه من المدرسة واذكره وبقى الضغط عليا ازيد من الاول خوفي على ابني.. صاحب الشغل انتظاره انه يمسك عليا غلطة عشان يمشني.. وشغل البيت.. ومصاريف المدرسة.. ووو كتير اوي بقيت مش عارفة اروح فين ولا أجي منين وبقيت كل ليلة اعيط لدرجة اني نسيت شكل عيني وهي طبيعية مش ورمة من العياط..
