:_ هو أنتِ مش وراكي حاجة غير مكرونة بالصلصة.. الكون كله اتخلق فيه مكرونة بس.. أنا قربت ازرع مكرونة.
سمعت بابا بيزعق مع ماما في خامس يوم رمضان عشان بنفطر اغلب الوقت مكرونة بالصلصلة وجنبها اكل خفيف، المهم ماما مسكتتش المرة دي وراحت ردت عليه بتقوله:
_ مش عجبك قول اكل ونعمل مش تزعق وتشخط كده.
_ وانا مالي هو أنا اللي بطبخ.. مش كفاية بجبلكم الفلوس اللي بتطفحوا بيها.
_ بقولك ايه هي مفيش غير مكرونة وبطاطس محمرة كمان.
_ لا دي مبقتش عيشة.. أنتِ ست بيت مش شاطرة نهائي.. فين امك تشوف شطارة بنتها.
ماما شهقت جامد وراحت بصتله وقالتله بغيظ:
_ وعلى ايه أنا هروح بنفسي اوريها شطارتي.. دور بقى على اللي يفطرك في رمضان.
ماما دخلت لمت هدومها وبابا فضل يبرطم بالكلام لحد ما ماما مشيت العصر كده وأنا وبابا قاعدين في الصالة بنبص لبعض وساكتين.
المهم عشان اقطع الصمت دا روحت قولتله:
_ وبعدين يا بابا!
_ بعدين في ايه؟!
_ مين هيطبخ النهاردة!
_ مش عارف، أنا متوقعتش اللي امك عملته دا خالص.
_ ماهو يا بابا ميصحش الصراحة اللي بتعمل أنت بتتكبر على نعمة ربنا كُل وأنت ساكت.
بابا بصلي جامد ولسه هيهزق روحت لحقته وقولتله:
_ بس التغير مهم برضو.
بصلي بجنب عينيه وقالي بقرف:
_ تربية امك بصحيح.
اتنرفزت من الكلمة الصراحة وحلفت لأخليه لما ماما ترجع يترجاها تسامحه، ومكملتش دقايق ولقيت بابا بيقولي:
_ ادخلي اتصرفي في فطار.. أنتِ ست بيت دلوقتي.
وفعلًا دخلت بهدوء، وأنا ببتسم ابتسامة خبيثة، وبدأت احط الأكل وعملت السجق وحطيت فيه شطة كتير أوي لدرجة أن اللي ياكلها ممكن يغمى عليه من الوجع، وبعدها جبت المكرونة كده متشالة في درج غير الدرج بتاعها ومكنتش عارفة السبب غير لما حطيتها تتسلق ولقيتها بتتكسر ومليانة نشا جامد.. وجبت اكبر مغرفة في البيت وحطيت ملح عليها وهي بتتسلق بس ملح يطير كِلية بحلها.
المهم خلصت المكرونة وحطيت الصلصة فيها وللأسف عجنت مني، لو كلب أجرب كحيان بقاله عشرة أيام مكلش عمره ما هيقرب منها وياكلها.
المهم المغرب أذن وحطيت الأكل وبابا بيبص واتخض من منظره البشع.. واللي أنا نفسي خوفت منه بس كله فدى إنه يعرف قيمة أمي ومكرونتها.
المهم من الجوع قعد وكل ولسه بيقول بسم الله وحط أول معلقة مكرونة في بوقه راح تفها بسرعة وجسمه بدأ يترعش من كمية الملح وزعق وهو بيشرب مياه كتير لدرجة إنه خلص الأزازة كلها وقال:
_ ايه كمية الملح اللي جبتلي شلل رعاشي دي.. أنا لو رنجة مش هتحطي كمية الملح دي في الأكل.
بصتله ببراءة وقولتله:
_ ما أنا معرفش بيتعمل ازاي! فينك يا أمي عليها طبق مكرونة ولا الشيف بوراك.
_ مش هي اللي غضبانة خليها براحتها..
المهم بابا ساب طبق المكرونة وراح ياكل سجق ومع أول لقمة كانت عينيه بتنزل دموع لوحده وكأن فيه غاز مُسيل للدموع حوليه، بدأ يكح جامد وبمسك صدره لما بلعها وشرق وأنا جريت بسرعة جبتله مياه لأن فعلًا كان بيفطس، ولما شرب راح قالي بدموع:
_هاتيلي لبن.. أو ايد امك ابوسها أنا مش هستحمل المنظر دا كده كتير.
بصتله بانتصار كده وقولتله:
_متأكد يا بابا!
بابا مبصليش جري بسرعة على التلفون بيصرخ بعلو صوته وبيقول:
_ ألحقيني يا سامية بنتك هتموتني.
#سلمى_خالد
