عند قمر
دخلت البيت وشافت امها تنظف استغربت لان مو من عاده امها تنظف بالوقت هذا
قمر:يمه وشفيك؟
جميله:اقول انكتمي ودقي على رفيف وتعالي ساعديني انتي وهي بيجون ضيوف اليوم
استغربت قمر مو من عاده أحد يجيهم بنص الاسبوع لكنها طنشت ودقت على رفيف وجات رفيف وقامو يساعدون امها بالشغل
بعد وقت طويل من الشغل والتنظيف جلسوا البنات بتعب في غرفه قمر
رفيف بتعب:ياخي ودي افهم انا وش دخلني اجي انظف معاكم
قمر ضحكت ضحكه خفيفه:خلاص اقولك امي تعتبرك بنتها الثانيه
دخلت عليهم جميله وبيدها البخور وفتحت عيونها بصدمه وصرخت عليهم
جميله:منجدكم انتو ماغيرتو! اقول قومي غيري انتي وياها الضيوف ماباقي لهم ويجون
قمر:طيب يمه حنا شدخلنا
جميله:اقول قومي غيري انتي وياها يلا لا اشوف الضيوف يجون وانتو باقي وعاد لا أوصيكم تكشخو ترا هذول اول مره يجون عندنا
رفيف:ايه اول مره عشان كذا سويتي كل ذا التنظيف
جميله:ايه يعني تبينهم يدخلون بيتي أول مره وهو مو نظيف؟؟
قمر:خلاص خلاص بنقوم بس انتي روحي هاتي الفير من عندك
جميله:تمام هيا استعجلو
نزلت من الغرفه متجه لغرفتها وقامت رفيف تقلب بالفساتين عشان تطلع فستان لها ولقمر ولقيت فستان كان ناعم مرهه وكان لونه وردي فاتح وكان بدون اكمام وشبه قصير مسكته وهي واقعه بغرامه حرفيا حطته على جسمها ولفت بحيث تخلي قمر تشوفه عليها
رفيف:قمر شرايك تكفين مره عاجبني
ناظرتها قمر وحرفيا خقت عليها:ياحيوانه يهبل من وين طلعتيه ماتذكر أنه هذا عندي!
رفيف:سحر ومحر حبيبتي
ضحكت قمر بشده وسكتت وهي تشوف رفيف تنزل فستان أقل ما يقال عليه يجنن بالمعنى الحرفي كان احمر وبدون أكمام وقصير ومخصر
قمر:يابنت لا تقولين ذا لي!
رفيف عطتها ابتسامه خفيفه:ايوه شرايك
قمر:مو منجدك ترا مو خطوبه!
كشرت رفيف بوجهها:اقول اقسم بالله اذا مالبستيه بعلم خالتي
كشرت قمر وقامت مسكت الفستان بقل حيله ودخلت الحمام(الله يكرمكم) تلبسه ورفيف كانت تنتظرها بعد وقت نزلت قمر وكان شكلها يهبل بشكل مو طبيعي لدرجه رفيف خقت عليها
رفيف:ياحيوانه من وين مخبيه الجمال ذا كله!
ابتسمت قمر بثقه:ماشفتي شي بعدك لسا الميكب والشعر يمامي
رفيف:اقول بس بروح انا اجرب فستانك الي صار فستاني
دخلت الحمام(الله يكرمكم)تجرب الفستان وبعد وقت نزلت وكانت جميله بشكل كبير
صرخت قمر:تهبلين!
رفيف بفزع:الله يقلعك ياحيوانه خوفتيني
ضحكت قمر وتكلمت رفيف باستغراب
رفيف:الحين امك قلنا لها تجيب الفير وذهبت ولم تعد!
قمر:منجد بالله الحين كيف اسوي شعري!
رفيف:حبيبتي والفير حقتك؟
قمر:ماعرف له ياختي
رفيف:اقول هاتي بس يلا بسوي لك شعرك بمناسبه انك حلوه
قمر بفرحه:تم
بعد وقت خلصوا البنات وتكشخو وحطو الميكب وصار وقت يقيمون بعض
قمر:الله نهبل!!!
رفيف:دوري دوري اشوف
دارت قمر وهي تضحك ووتدلع:شفتي وربي ياحظ الي بياخذني
رفيف:ياشيخه قسم بالله تهبلين الحين عرفت من الي خلص الجمال على البنات
ضحكت قمر وشوي ويسمعون اصوات الحريم برا
رفيف:يالله شكل الحريم شرفو
قمر:يابنت مابي انزل ماكملت جملتها الا وهي تسمع صوت امها تناديهم
رفيف:حلو خالتي جميله ماتخلي شي بخاطرنا
ضحكت قمر بشده وبعد حاله الضحك الهستيري عدلو شوي بملامح وجههم ونزلو متجهين لمجلس الحريم وقفو قدام الباب وهم يسمعون اصوات الحريم
رفيف:توتر مابي ادخل
قمر:ادخلي وانا وراك ماعليك
كشرت رفيف:حبيبتي ماتمشي علي
عند ام نجم
كانت جالسه بالحوش تنتظر نجم يجيها ولكنه تأخر فقررت انها تدق عليه دقت عليه واول مارد
نوره بغضب:كم مره قلت لك تعال تأخرنا على العزيمه!
نجم:يمه انا مع ماجد مره ماينفع اجيك
نوره وهي فقدت صبرها:اقول تعال انت وهالسربوت الي معك ثلاث دقائق ماتجي لا انا امك ولا انت ولدي
نجم بقل حيله:تمام تمام ثلاث دقائق وانا عندك بس ترا مابنزل عندهم
نوره:تعال ويصير خير
بعد أكثر من ثلاث دقائق ركبت نوره جنب نجم وماجد كان بالكرسي الخلفي استغربت نوره من أشكالهم لانه مو من عادتهم يكونون بالثوب والغتره
نوره:غريبه مو قلت مابتجون؟
فز ماجد:ايه بنروح عرس
ضرب نجم ماجد بكف لانه يعرف امه ماتحبه يروح الزواجات بدون أبوه أو بدونها وتحسه من قل الاحترام شتت أنظاره لامه وهو يحمد ربه انها ماكفخته لكن صدمته لما قالت
نوره:تمام بالتوفيق وصولوني وامشو
نجم بصدمه:ت تمام .......يمه فيك شي؟
نوره:وش فيني يعني؟
نجم:ها؟ لا خلاص
وصلوها وقدام باب بيت اهل قمر
طالعتهم ام نجم بنظره حاده من تحت النقاب وقالت
نوره بنبره جديه:بنزل انتظركم عند الباب ثلاث دقائق ماشوفكم رحتو مجلس الرجال والله والله اني ما ارضى عليكم ابد!
أنصدم ماجد وزادت صدمته برود نجم نزلت ام نجم ومشى نجم يعدل السياره
ماجد:نجم مو منجدك! وشفيك بارد!
نجم:عاد انا عارف ان امي مابتخلينا نروح ولا تنسى أننا رايحين عشان نتعشى خلاص نتعشى هنا
ماجد تأفف بزعل وفتح الباب ونزل وتبعه نجم وهو يضحك عليه
نجم في نفسه:مسيكين ماشاف شي
عند البنات
قمر:يلا عاد ادخلي انتي وانا بعدك!
رفيف:اقول ماني داخله
انتفضو من صوت نوره الي جا من خلفهم
نوره:امشو ندخل كلنا سوا!
التفتت قمر وابتسمت ببلاهه وهي تأشر لها بمعنى تفضلي
رفيف:ها اساسا كنا ننتظرك ياخاله
ضحكت نوره وهي تمسك بيدينهم وتدخلهم غصب وتدخل معهم
جميله كانت بتهاوش البنات بس شافت ام نجم معهم
جميله:ياهلا ياهلا بنور القلب اخيرا مابغينا تجين
ضحكت نوره وهي تحضنها:والله عاد شسوي نجم الله يهداه تأخر علي
ومشو وهم يتكلمون وجلسوا في احد الاماكن ووجهت جميله نظرها لقمر
جميله بحده:قمر خذي رنيم وريهام واجوان واثير وروحو الصاله الصغيره اجلسو فيها
قربت قمر وهي تهمس في أذن امها
قمر:يمه اقدر اخذ ريهام واجوان وتثير بس رنيم بزره تزعجنا!
ناظرتها امها بحده وهي تقول
جميله:اسمعي الكلام وخذيها
تأففت قمر وهي توجه نظرها لهم
قمر:تعالو يلا!
قامو البنات ومشو معاها وجلسو في المكان الي قالت عليه ام قمر كانو ساكتين وكلهم متفرقين بكراسي الكرسي الاول رفيف وقمر والكرسي الثاني ريهام واجوان والكرسي الثالث اثير انتبهت رفيف للطفش الي هم فيه وتكلمت
رفيف:بنات!..... سكتت بعد ماشافت أن الكل ناظرها وتوترت ثم قالت:اء شسمه شرايكم نجلس بالأرض ونسوي دائره ونسولف ونلعب!
وافقوها البنات وجلسو وقبل تجلس قمر عدلت وقفتها وناظرت فيهم
قمر:بنات وين رنيم؟؟
ريهام:شفتها واحنا جاين الغرفه راحت الحوش ليه؟
شهقت قمر بصدمه:ليه ماتقولينن في خروفف في الحوش!!
اجوان:خليك منها ياقمر تراها بزر خوافه مستحيل تروح له اجلسي
قمر:رنيمم؟؟خوافه! اشك انها بزر اساسا تنهدت بغضب وهي تكمل كلامها اقول بروح اشوفها انتبهوا أحد من الحريم تدري وخصيصا امي
اثير:تمام بس انتبهي يمكن ينقز عليك الخروف وكملت كلامها وهي تمثل بيدينها عووو
ضحكت قمر بتسليك:ههه ماتضحكين تافهه
ضحكو البنات وهم يعرفون أنه قمر أكثر وحده فيهم خوفا من الحيوانات ماعدا القطط
مشيت قمر ونزلت للحوش وهي تتحلطم
قمر بحلطمه بصوت مسموع:عاد اخر عمري بكشختي وزينتي وحلاتي انزل ادور على ورعه عند الخرفان وع وع
وراحت وهي تتسحب لعند الخروف الي كان مربوط بعمود ولمحت ظل رنيم ركضت بدون ماتحس ولا انتبهت أنه نجم كان عند رنيم ويداعبها لكن قبل توصل قام نجم بعد ماناداه ماجد عشان يدخل له
وصلت قمر لرنيم ومسكتها من يدها وهي تهاوشها
قمر:كمم مرهه قلت لاتجين عند الخروف ها! تخيلي عضك ماحد بياكلها غيري عاد وكملت هواش فيها وتتحلطم وتعاتبها وشوي رفعت عيونها لعيون رنيم وانتبهت أنه عيونها مليانه دموع توترت وخافت انها تبكي وتفضحها
قمر بتوتر:اءء رنيم امزح امزح معك نلعب نلعب بس ماقصد ازعلك والله
شهقت بعد ماصاحت رنيم باعلى صوت عندها وقعدت تبكي وركضت لداخل لفت قمر بفزع وصرخت بصوت عالي بعد ماحست بالخروف يحاول عضها
قمر بصراخ:يمههه!!!! بعدت عنه شوي وهي تقول بتحلطم
قمر:هذا الناقص بعد تعضني يالعضاض!ورع احترم نفسك لاقسم بالله ورفعت اصبعها السبابه عليه وهي مو منتبه لوجود نجم الي جا اول ماسمع صوت بكاء رنيم وتنح فيها وبنفس الوقت مستغرب انها تكلم الخروف بهاذي الطريقه وكأنه يفهمها كملت قمر كلامها:لاقسم بالله اجي معاهم واقطعك ذا الناقص قاعد في حوش ابوي وتبي تاكلني بعد!طلعت له لسانها يامسكينن انا باكلك وانت بتموت ولا بعد اقسم بالله اخر من يقوم من الصحن انا عاد خل عضتك تنفعك!حيوان! صرخت بخفه بعد ماحاول أنه بعضها للمره الثانيه
قمر بخوف:امزح امزح والله ماتعشى وعد ماتعشى اساسا ماحب لحم الخروف!
ولفت عشان تتهرب من الخروف وترجع للبنات وشهقت بصوت عالي وهي تشوف نجم قدامها بثوبه الابيض وغترته الحمراء توترت وهي ماتعرف تتصرف اساسا وهو كان متنح فيها ويطالع بوجهها وعيونها الي كانت عسلي واضح ووجنتها الحمراء وشفتها الورديه الي كانت حاطه عليها قلوس بدون شي لأنها ورديه طبيعي ومايحتاح تحط شي وتكلم وهو مو حاس بنفسه
نجم بصوت ماينسمع:سبحان من سواك!
طالعته قمر وهي ماتتذكر وين شافته وشافت أنه متنح فيها وطالعت جسمها وتذكرت فستانها ونطقت بدون ماتحس بنفسها وهي تظن أنه قليل ادب رفعت يدها وصفعته باقوى ماعندها وتكلمت
قمر:قليل ادب!!
نجم مسح على خذه وهو مو مستوعب:خير وش سويت لك انا!؟
قمر:ليه جاي؟؟
نجم:سمعت صوت البنت الصغيره الي كانت هنا تبكي وجيت حسبت الخروف سوا فيها شي وسمعتك وانتي تهاوشين الخروف!
قمر:كمان وصخ! عصب نجم وكان بيمسكها بس هي خافت وركضت لداخل عند غرفه البنات
عند البنات
كانت جلستهم كلها ضحك ووناسه وطاح جسر الحيا الي بينهم وكانو مندمجين بالسوالف
اثير وه تكمل سالفتها بضحك:تخيلو والف وادعي يارب تطيح عشان يعرف كيف يرقمني وماهي إلا دقايق طاح من الدرج على وجهه قدامي وقدام الكوفي كله وربي ماقدرت امسك ضحكتي ضحكتت بقوهه وفضحته كل الكوفي يطالعونا انفجرو البنات بالضحك لكن سكتو بصدمه بعد مانفتح الباب بقوه ودخلت قمر وهي تقفل الباب وتلهف من التعب وجلست بعد مافسحت لها رفيف مكان وحطت راسها على كتف رفيف
رفيف بخوف عليها:بنت قمر وشفيك؟؟
ريهام:لقيتي رنيم؟
ضربتها اجوان على رأسها:ماتشوفين البنت تلهف من التعب وانتي همك رنيم!
اثير:قمر تكلميي وش صار عليك خوفتينا!
تنهدت قمر بتعب وعدلت جلستها وبدأت تحكي لهم الي صار معاها وهي للان مو مستوعبه
