اي والله انك رهيف السلطان تركتي سلطانك بدون قلبه

5

"اللهم صلى وسلم على نبينا محمد "

الصباح - قسم الحريم
تحديداً المطبخ
نوره قايمه من الفجر ومزعجه عمتها ام سعود
نوره بستغراب : عميمه الحين وش المناسبه الي خلتكم تاخذون شاليه؟؟
ام سعود لفت عليها : نوير ان ما طلعني وقومتي الي فوق اني لا اخليك تنظفين المواعين
نوره شهقت: ها لا لا خلاص بطلع اظافري ابيها
ام سعود: من زين اظافرك بس روحي روحي
نوره طلعت واتجهة لطابق العلوي
ام سلطان ضحكت: واضح انه غثتك من صبح الله
ام سعود ضحكت وكملت تسوي الفطور
-- الطابق العلوي
نوره دخلت الغرفه الي نايمين فيها رهف ولينا ورفيف : بنات قومو يلا بياذن الظهر وانتم نايمين
شافت محد قام منهم وتقدمت عند لينا وسحبتها تقوم لكن كملت نومتها وهي جالسه ونطقت بصراخ: وجع قومو وش النوم ذا !
تخصرت وهمست بتفكير: وش اسوي فيهم ذولي ؟؟ لحظه امي هي الي تعرف لكم
طلعت ونزلت تنادي امها : يمه تعالي لهم انتي تعرفين لهم
ام سلطان: بسم الله وش فيك انتي بعد خليهم يقومون بس
نوره: حاولت ولا احد قام
ام سلطان قامت مع نوره و وقفتهم ام سعود : لحظه لحظه
اعطت ام سلطان عصا ( او خيزرانه مدري وش تسمونها) ونطقت: ما ينفع معهم غير كذا
ام سلطان اخذتها: والله زينه من وين لقيتها ذي كود اشتري وحده وادب الي عندي
نوره ضحكت واستوعبت: تقصديني؟
ام سلطان: اقصد اخوانك السلق
حاولت نوره تكتم ضحكتها بس ما قدرت وضحكت
ام سلطان ؛ تبين تجربين المحطه فيها ولا؟
نوره سكتت : لا خلاص خلاص
طلعو للبنات الي فوق وصادفو رهف الي قامت من ازعاج نوره
نوره : قهر كنت ابيك تنجلدين
رهف ضربت كتفها: وجع ، امي سوت فطور ولا؟
نوره قاعد يجهز تعالي خلينا نشوف البنات وهم ينجلدون ونضحك عليهم
رهف : يلا ما ورانا شي وقفو عند الباب ويشوفون ام سلطان وهي تضرب البنات عشان يقومون
قامت رفيف وهي منخرشه ما تدري وش السالفه لكنها قامت : عميمه وش فيه من الصباح ربي ! ؟
ام سلطان : ان قمتي يصير خير وقومي الي جنبك (ًواشرت على لينا الي الا الان نايمه ) لا ارجع لها
رهف ونوره يضحكون عند الباب بس على الصامت
ام سلطان : قامو الباقي ولا؟
رهف قررت تنقذ البنات لانهم ما قامو : اي اي قامو
نوره : لا كذ..
سكتتها رهف : لا لا قامو
ام سلطان : يلا انتظركم تحت لا تتأخرون على الفطور
رهف : يلا شويات ونجي
نزلت ام سلطان ولفت نوره على رهف: وش فيك انتي كذبتي؟
رهف: اهجدي بس اهم شي طقطقنا على رفيف والباقي ما علينا منهم
نوره : بذي انتي صادقه يلا تعالي نقوم الباقي
طلعو البنات
.
.
.
قسم الرجال
كلهم صاحين من الفجر ، بس من الجهه الثانيه سلطان وسعود الا الان نايمين!!
عبدالله يناظرهم بصدمه ، لف على مشاري : ذولي متى نامو؟؟ مشاري : يبن الحلال شف نومتهم وتعرف متى نامو
طبعا سلطان وسعود مو معترفين في الغرف نايمين بلمقلط وكل واحد نايم بزاويه،
عبدالله: ولله من دجتهم اخر الليول
زيد جاهم وانصدم انهم ما قومو سعود وسلطان: ورا ما قومتوهم ! اخلصو قبل لا يجي عمي عبدالرحمن ويطلع حرته فيهم
عبدالله رجع نظره لهم: انا اقول خلو ابوي يجي ابرك
ورجعو للمجلس الي موجود فيه عمهم عبدالرحمن
ابو سعود: قامو ولا؟؟
مشاري جلس جنب عمه : تبي الصدق ياعم؟
ابو سعود : لا ابي الكذب! وش رايك يعني؟
مشاري : رغم انك نسفت جبهتي بس تراهم ما قامو
ابو سعود وقف واخذ عصا من ورا الباب ، عبدالله همس لزيد : انا ما اقول الا الله يعينهم
زيد بهمس: اي انت معد انضربت بعد ما تزوجت
طلع ابو سعود واتجهه للمقلط وصرخ بعلو صوته : قومو يكلاب مجمع ، رفع عصاه ومحد قريب منه غير سعود جلده على ظهره فز سعود من الم ظهره، نطق سعود بخرشه : اعوذ بالله طالع لنا جني؟
ابو سعود : جني اجل
جلده من جديد ، هج سعود عن العيال اما سلطان لحق نفسه وقام قبل لا ينجلد من صراخ سعود
ابو سعود لف على سلطان: قايم ولا تبي تنجلد معه؟
سلطان مو مستوعب الا الان: ها ، قايم قايم
ابو سعود : ايه قومو الفطور ما بقى عليه شي
طلع ابو سعود ورجع للمجلس اما سعود يتحلطم عند العيال
سعود: ورا ما قومتوني بغيت اروح فيها لو ما هجيت
مشاري مسكه طقطقه ويضحك عليه ويتذكر ركضة سعود: سلطان انجلد معك ولا؟ هههههههه
سعود: مالت عليه هو الي خلاني اسهر ولا كان ما انجلد
مشاري: ايه ذا ربي عشان مره ثانيه لا جيتو تطلعون تقولو لي ما تسحبون
عبدالله: صادق ابوي يوم قال انكم كلاب مجمع اروح اشوف الفطور ابرك
زيد : ايه رح كحل عيونك قال ايش قال بشوف الفطور
ضحك مشاري : الله يعينك يا عبدالله
دخل مشاري وجلس جنب عمه ابو سعود : برد خاطري وقل انك جلدتهم الاثنين ياعم
ابو سعود لف عليه : تبي تنجلد معهم؟
مشاري: لا يعطيك العافيه ويطول بعمرك بس جلدت سلطان قاهرني من امس
ابو سعود : لا ، واذلف من عندي لا اجلدك انت وهو!
مشاري : عمي انت مسوي تحديد الجميع؟ وش دخلني انا
ابو سعود طفح الكيل من مشاري وضرب رجله : قم قم انا مدري وش بلاني فيكم مع عيال !
مشاري ضحك : بدال لا تحمد ربك ياعم عندك عيال اخوان ؟!
ابو سعود: لا بالله دبلتو كبدي! قم من عندي لا اطلع حرتي فيك
قام مشاري جلس جنب سعود : وش سالفه عمري اليوم مسوي تحديد للجميع
سعود: مشاري شرايك توقف بربره؟؟
وهمس له : ولا اقول لك رح بربر فوق راس سلطان تراه ما قام؟
مشاري : قدام
طلع مشاري وهمس سعود: يا حليله ذا مروق من صبح الله
.
.
عند البنات
يجهزون الفطور ويقسمونه والوضع عندهم لا يطاق
نوره ورفيف منشغلين يدورون الصحون والقدور
لينا مع ام سلطان وتجمع علوم ، نوره واقفه تشرف عليهم
غزيل مريحه راسها وتسوي الشاهي والقهوه
نوره : الا اقول بنات شرايكم بعد ذي الحوسه الي مسوينها نطلع للمسبح؟؟
رهف : تمام بس كلمي احد من اخوانك ولا انتي يا غزيل دقي على عبدالله يجون ياخذون فطروهم محد راح يوديه
غزيل كانت ترتب الفناجيل: توه عبدالله كلمني بيجي بعد شوي
رفيف : اجل خذو الفطور حقنا وحطو وخلو المطبخ فاضي لهم
نوره : اجل استعجلو انا بروح اشوف وش العلوم الي جمعتها لينا
خلصو البنات وخلو المبطخ للعيال وطلعو يفطرون
..
..
بعد الفطور
البنات جالسين ومرتاحين ان عمتهم ام هناء مو موجود نامو وقامو واختفت في ضروف غامضه
نوره: تتوقعون انه درت اني فضحت بنتها عند عمي؟
رهف: لا طبعا ، كم ساعه وتطلع لك من تحت الارض
رفيف: يوهه والله انكم تنرفزون قومو خلونا نتجهز ونتكشخ ونسبح والسالفه ذي لو قلتوها بجلدكم
غزيل: على طاري السباحه ، تعرفين تسبحين رفيف؟
رفيف: لا
رهف ضحكت: اخخ يا رفيف من جدك انتي!!
رفيف ابتسمت: لا والله ما اعرف
لينا جتهم ركض : بنات الحقو الحقو!
نوره: ها ابشري وش الي طلعتي منه
لينا: يوهه كثيررر السواليف بس خلوها في اليل بس الحين بلشه صدق!
نوره : اجلسي وقولي لنا
جلست لينا : منى!
عقدت رهف حواجبها: من ذي؟
لينا : الله يسلمكم هاذي ام وحده من اخويا سعود وسلطان!
نوره شهقت : ام مطلق!!!
لينا: عليك نورر هي
غزيل: ومن ذي عندها بنات؟
لينا : للاسف لا ما عندها غير مطلق مطلق هو وحيد امه وابوه
رفيف: ابوك يا البلشه
رهف: وش انتي الثانيه
رفيف: مافيه شي بس بلشه ما نعرفها!
نوره: عادي يابنت الناس واساساً بنقعد برا مراح نقعد عندهم
لينا : بش فيه مشكله
البنات قالو بصوت واحد: وشو!
لينا: هدو هدو ، خوفي تجي ام هناء ! وتصير مشكله!
نوره : ليه؟
لينا: من العلوم الي جمعتها ان ام هناء ماتبي ولدها ناصر يصير خوي مطلق لانه مخاوي سعود وسلطان
نوره: وجع! بطلع قرونها لو جت
غزيل: اقول اهجدي بس وقومو الحين نروح نسبح ابرك
رهف: يلا
قامو البنات يتجهزون
.
.
قسم الرجال
العيال بعد الفطور ماسكين لهم زاويه ويلعبون العبه الشهيرة ( جاكارو ) سعود وسلطان فريق ومشاري وزيد فريق ، ولا بد من غش سعود وسلطان
خلص القيم بفوز سعود وسلطان
مشاري: وش ذا الغش
سعود: ياحمار اخر واحد عندي طلعته فبنت المفروض يطلع بشايب هههههههه
سلطان : كفو
زيد: سعود قم وسو لنا شاهي
مشاري: وين عبدالله؟
سلطان: راح البقاله
سعود : ذهب ولم يعد هو؟ بروح اسوي الشاهي ونرجع نكمل واطلع عيونكم
راح سعود ومشاري على سلطان ودق كتفه
سلطان: شتبي؟
مشاري: اسمع خلنا نشيل سعود ونرميه في المسبح؟
سلطان ضيق عيونه: والله انه فكره بس ليه؟؟
مشاري: بس كذا قاهرني
سلطان:تم امش يلا
مشاري: الحين؟
سلطان: وش رايك يلا امش ، اربط ثوبك وطلع جوالك من مخابيك لانه اعرفه بيتمسك فينا
مشاري : بخلي جوالي معي بصور
ربطو ثوبهم وتلثمو عشان يخرشونه ، ركضو للمطبخ وسعود كان يضبط شماغه وينتظر الشاهي يخلص ، ما حس الا ان رجوله ارتفعت من الارض : وجعع من انتمم!!
سلطان ومشاري ماسكين ضحكتهم قربو من المسبح
سعود منخرش : يا عيال الكلبب اصبرووو جواليي بمخباي!!
سلطان ومشاري يتكلمون في الاشاره
سعود بصراخ: طيب فكوني اطلع جوالي وبعدين سوو الي تبونن !!
سلطان غمز لمشاري انه يرميه ، سعود بس شاف غمزات سلطان تمسك فيه بقوه ولو طاح سعود طاح معه سلطان ،
طاح سعود في المسبح من مسكته في سلطان سحبه معه مشاري يصورهم ويضحك ، طلع سعود من السبح يدور جواله شاف مشاري يضحك ويصور : انا داري ان انت الي مسوي كل ذا
سحبه ورماه هو وجواله في المسبح ، سلطان طلع ومعه جوال سعود : امسك جوالك بس
سعود:الله لا يوفق عدوكم ، على الاقل خلتوني اطلع جوالي
سلطان ضحك: ما جبت جوالي لاني داري وش بتسوي يا الخايس
سعود: اروح ابدل لبسي ابرك بس ، والحق الثاني ترا سبك بيغرق
سلطان لف للمسبح : شكله غرق والله
طب سلطان وطلعه ونطق سعود: احسن عشان مره ثانيه ما تجيب فيني العيد ياكلب
مشاري: طيب على الاقل قل انك بترميني
سلطان: النيه هو الي ياكلها واحنا الي اكلنها
مشاري: ايه معليه بس اهم شي سويت الي فبالي
سلطان: امش ندخل لا تجينا ضربه شمس بس
رجعو العيال وبدلو لبسهم وكملو لعبهم
.
.
البنات
ما تجهزو وخلصو ويتصورون ويغنون في الغرفه
نوره: ها متى بتكشخون؟
رهف: بعد ما المسبح افضل
لينا: يعني اليوم تلبسين فستانك الاز...
قاطعتها رهف: اسكتي يا الفضيحه اسكتي
كانو كلهم شورتات سودا وتوب علاق ابيض
طلعو البنات وهم يضحكون ويسولفون
نوره : رهف لا تنسين جيبي الاسكيرمات
رهف : تمام بس وحده تجي في المشروبات
نوره: خلاص انا اجي معك
طلعو البنات الباقين للمسبح واول من دخل المسبح لينا بما انها تعرف تسبح
رفيف: ها عميق ولا؟
لينا: شوي مو مره تقدرين تجين بس تمشين على اطراف رجولك
غزيل طبت مع لينا: الله المويه دافيهه
نوره ورهف جو ومعهم الاغراض الي جابوها للمسبح
رهف: ها شلون العمق؟؟
رفيف لفت عليها: تعرفين تسبحين
رهف: اي بس احيانا اجيب العيد بنفسي
لينا: زين مره طبي بس
نوره : متاكده ما تجبين العيد برهف؟
لينا: لا معليك طبي بس
دخلت رهف : يونسس رفيف ادخلي بتستانسين
رفيف كشرت: لا يمه اخاف اغرق
رهف: تعالي بس معي
رفيف : بدخل لكن ولله لو صارلي شي اني لا اجلدك
رهف ضحكت: تعالي بس
دخلت رفيف وجا طولها : الحمدالله جا طولي خرشتني لينا تقول شوي عميق
لينا: وتصدقيني انا تراني قصيره انا حتى نفسي ما اصدقها
البنات شغلو اغاني ويغنون ويضحكون ورهف طبعا مفعله الشايب الي يصور الكل ما سكتهم تصوير وفضايح البنات كلها عند رهف
وبدون سابق انذار تطب عليهم ام هناء : اعوذ بالله ما تستحون انتم!!!
رهف توّسعت عيونها! ذي وش جابها!!
نوره طلعت من المسبح: ليه حبيبتي لا يكون مسويه شي غلط؟
ام هناء : متفصخات وقدام العالم!! وتقولين وش مسويه!!
نوره تكتفت : مشاء الله من العالم انشاء الله
ام هناء : لو فيه احد يطل عليكم!!! وعلى قلت ادبكم ذي !
رهف : لا تنسين تقولين رهف الي جايبه الشورتات والتوب
ام هناء : والله امك ما عرفت تربيك !!
رهف : تربيتي افضل من تربيه بناتك وتربيتك انتي بكبرك!
لو اني مو في المسبح طلعت و ريتك تربيه امي!
ام هناء دخلت داخل وطبعا راحت تقول لهم ان رهف طالبه ذي الملابس
نوره: وع ملقوفه
رهف: معليك منها بس جيبي المشروبات
رفيف طلعت واخذت من المشروبات و وزعتها على البنات
لينا شهقت من شافت رهف معها مشروب طاقه: وجع رهوف!! انتي تدرين لو امي درت فجرت فيك!!!
رهف: اعوذ بالله محد داري ترا!
غزيل: غريبه ليه وش فيها لو شربت ؟
لينا: ابد بس امس شاربه اثنين وهاذا الثالث كملته اليوم
رفيف: وجع رهف تبين تذبحين نفسك؟؟
نوره: رهف ترا لو صار لك شي بعلم عمتي ان شربتي ثلاث!
رهف: بسم الله اكلتوني ترا عادي ومراح يصير شي ياما شربت ولا صار شي
لينا: بكيفك بس تراني قلت لك
طلعو البنات على صلاه الظهر من عشره وهم في المسبح طلعو وبدلو لبسهم يتكشخون
.
.
العيال
قريب المغرب
سلطان وسعود و ينتظرون مطلق وسعود بعير ما ينسى متوعد فيه بعد ما هج وخلاه يكمل الشاهي لحاله
وصّل مطلق ومعه امه نزلت ام مطلق لجهه الحريم ونزل مطلق وشاف سلطان : ارحبب ارحبب
حضنه سلطان ؛ البقى البقىى
ابتعد عنه وشاف سعود وابتسم : ارحبب يا الحضري
سعود ضحك : البقى يا البدوي
سلطان سكر الباب : امش امش بس ، ورا ما جا عمي فهاد؟
مطلق: اخوياه عازمينه ويبني اروح معه وسحبت
سعود : رح رح سلم بس
دخل مطلق وسلم وبعد ما خلص طلع لسعود وسلطان ، مسكه سعود: تحسبني نسيت يا البدوي؟؟
مطلق تكتف: وش سويت بعد
سعود : وحركتك بشاهي؟
مطلق نزل يد سعود : وانا قلت لك مراح اسوي معك
سعود ضرب كتفه: تقلع
ضحك مطلق ودخلو المجلس بما ان الرجال في المقلط كملو لعبهم في المجلس مطلق ومشاري مع بعض وسعود وسلطان مع بعض
.
.
البنات
بعد ما خلصو من الميكب وشعورهم جا وقت انهم يلبسون
نوره لابسه وردي وكان ضيق ولكن مو مره وكعب ابيض وشعرها ويفي
لينا فستان اسود وكان ناعمم مره وعلاق وضيق من عند الخصر وشعرها ويفي اطراف وكعب مايل على لون البنُي
رفيف فستان سماوي وكتف وكتف لا وشعرها ستريت وكعب اسود
غزيل فستان موف فاتح وطويل لكنه ضيق نفس طريقه فستان نوره وعلاق وشعرها ويفي خفيف وكعب اسود
اما رهف مبتلشه بشعرها : خير جهزو كلكم؟؟
نوره: بسرعه ترا ام مطلق وصلت
طلعو البنات ورهف دخلت تبدل لبسها ، لبست ازرق غامق ومفتوح من عند الصدر بشكل مربع وكان طوله تحت ركبتها بشوي وضيق من الخصر وكعب شفاف وشعر ويفي اطراف وبما ان رهف شعرها طويل فكان طالع بشكل جميلل وناعم طلعت رهف من الغرفه ونزلت وشافت ام مطلق الي جالسه جنب امها وسلمت عليها
ام مطلق: مشاء الله بنت من انتي؟
رهف: بنت عبدالرحمن
ام مطلق: مشاء الله تبارك الله الله يحفظك
جلست رهف جنب نوره وهمست لها: تهبل واضح انها صغيره
نوره: من الي فهمته والي قالته ان عمرها ٣٩
رهف: الله يطول بعمرها
كملو سوالف وضحك ونوره ورهف يدعون بس ان ما تطب عليهم ام هناء
______________________________
" أنـتـهـى الـبـارت ..."

اعتذررر جدااا ولكن حصلت لي ضروف بسيطه وانحلت
للمعلوميه بديت انزل يومياً في الانستا🤍🤍

البارت اكثر من٢٠٠٠ كلمه!