اي والله انك رهيف السلطان تركتي سلطانك بدون قلبه

6

( بسم الله الرحمن آلرحيم)

قسم الرجال - مجلس العيال
سعود مسوي لهم شاهي ويخططون هل الاربع يهجون من الشاليه
عبدالله ناظهر وهم يتهامسون: لا تحاولون ابوي مسكر البيبان كلها
سعود ناظره بطرف عين وطلع المفتاح من جيبه وكان مفتاح الباب الخلفي : مو علي العبها على غيري
مطلق ابتسم ابتسامه جانبية: والله انك داهيه يا الحضري
سعود: حدك عاد لولاي كان الحين ناشب هنا يا ورع
سلطان : اقول امشو يلا
مشاري: طيب من سياره ورا الشاليه؟
سعود: انا ، يلا امشو بس بشويش لاحد يدري ، ترا مدري اذا حق الباب الي ورا ولا 
ربطو ثيابهم على خصرهم و طلعو بشويش وكلعاده سلطان مطفوق وتعادهم واشر لسعود يرمي المفتاح ، هز راسه سعود برضى ورمى المفتاح الي ما حسبو حسابه المفتاح انرمى ورا الباب! يعني لازم احد يتسلق الجدار ويجيب المفتاح
مطلق صفق راس سعود ونطق بهمس: حمار انت؟ ورا ما رحت ورا؟؟
سعود بنفس الهمس: وش اسوي الحق المفتاح  ، خلاص مشاري نط من ورا الجدار وجيب المفتاح
مشاري تخصر : وش دخل امي انا؟؟؟ انت الي طيحته  رح جيبه
سعود ضحك على وضعيه مشاري ومطلق كتم سعود بشماغه ، يعرفه مراح يسكت الا اذا جا ابوه : انطم شوي تكفى
، شلون يطفى ذا؟؟
سلطان: مالت عليكم انا بنط
نزل شماغه على كتوفه وعقاله براسه حتى لا يطيح شماغه ، تمسك في عروة الباب ورفع نفسه وقدر ينزل من الجهه  الثانيه ودور المفتاح ولقاه وفتح لهم الباب : لو اني ناط من زمان ابرك
طلعو العيال وقفهم مشاري: لحظه لحظه ، من بيسوق؟ لا يكون مطلق
سعود: تخسي لا انت وهو انا الي بسوق ، سلطان تعال جنبي انت الي تعرف للاغاني ولوكيشن
سلطان: يلا امش
مطلق ورا سلطان ومشاري ورا سعود تحركو من البيت لا من شاف ولا من درى ....
.
.
قسم الحريم
البنات مجتمعين بعيد عن الحريم ومسوين دايره ويتقهون
نوره: بنات نشف حلقي من الشاهي خلصت ثلاجتين مافي قهوه او قهوه مقطره اي شي غير شاهي
لينا : ايه صح انا جايبه عدة القهوه تبون؟؟
غزيل: اي بالله جيبي العدة هنا وسوي لنا
رهف: ايه صح لحظه انا بقوم اجيب شي بتستانسون عليه
رفيف : يلا خلونا نشوف وش الفعاليات حقتكم
قامو لينا ورهف يجبون الاغراض ، رجعت لينا ومعها العده ورهف جابت صندوق صغير 
نوره عقدت حواجبها: وش الصندوق ذا؟
رهف فتحت الصندوق الي معها وطلع الصور: صوركم وانتم صغار
رفيف : كذابه!
نوره: تكفينن ادور صوره امسكها على سلطان عندك ولا؟؟
رهف ضحكت: يوهه عندي صور يا كثرها
كان واضح ان الصندوق مليان من الصور
غزيل: يوليي لو القى صوره لعبدالله ويكون شكله يضحك يكون افضل
رهف ضحكت: يا اني لقيت ل سعود وعبدالله صور بتموت ضحك
لينا: غبي صوري تكفين طالبتك
طلعت رهف الصور وهم يدورون الصور كلها لفت نظرها نوره صوره سلطان الي كان معه بنت صغيره وماسك يدها نطقت بغرابه: من ذي الي مع سلطان؟
رهف عقدت حواجبها: وريني اشوف
عطتها نوره وشافت رهف وشهقت: ذي انا
نوره ابتسمت: كذابه!
لفت نوره على رفيف وغمزت لها نطقت رفيف: كوبل جديد شكله
رهف وضربت كتف رفيف: وجع وش كوبله انتي الثانيه
نوره: صدق خليني ازوجك اخوي ونصير مع بعض؟
رهف: وع ، حبيبتي انا مراح اتزوج الا واحد برا العايله وش اسوي بخوانكم؟
نوره: ايه ذا وجهي اذا تزوجتي من برا العايله
لينا وهي تجهز الاكواب: ليش تتزوج انشاء الله خلوها عندي بس ما اقعد لحالي في البيت
غزيل كانت مو معهم كانت تشوف الصور وتتأمل كل صوره بيدها
رفيف دقت رهف: هاذي شفيها؟
رهف: شدراني، لينا متى تخلصين
خلصت لينا وعطتهم الاكواب
نوره تتلذذ القهوه: اشكر امك على القهوه ، الا صدق وش سالفة صورتك رهوف انتي و السلطعون؟
رهف ضحكت: سلطعون يا الظالمه لا يسمك اخوك بس ، مدري بس كانت عندي من زمان وما كنت ادري من ذا اساساً
غزيل: يعني ما عمرك سالتي اخوانك؟
رهف: ما يدرون عن الصندوق اساساً
لينا: غريب
رهف : بنات ، العيال طلعو؟؟
نوره: اتوقع ليه؟
رهف: يوم اني طلعت انا وياك لسوق وانا راجعه للبيت اخذت مخالفه
غزيل: الله يعينك
كملو البنات يضحكون ويشوفون الصور ويصورونها
.
.
العيال
وقفو محل شاهي حرفيا يتغدو شاهي ويتعشون شاهي ويفطرون شاهي والسبب سعود
مشاري: بيجي يوم اجلد سعود على ذا الشاهي
سعود نزل من السياره: عجبك ولا ما عجبك انزل بس
سلطان: مشاري من اليوم وانت يتزبد لك انزل وانت ساكت
مطلق: تنرحمم يا المشاوي 
مشاري: اما عاد صرت مشاوي؟
دخلو المحل وجلسو في احد الطاولات
سلطان: سعود قم اطلب شاهي نعناع حبق قم
سعود: تبيه حطب ولا نار؟
مشاري: لا فحم
مطلق : ه ه ه ه تضحك مره يا التافهه انت وياه
سلطان ضحك: رح اطلب بس وانت ساكت
قام سعود يطلب لهم وكلعاده مشاري معه جوال سعود وجات رساله مخالفه سرعه ضحك بخفه : يا عيال سعود جايب مخالفه سرعة
سلطان: مستحيل سعود ما عمره اخذ مخالفه الا اذا احد من اهله اخذ سيارته
مطلق: لا تعلمونه بينهار الراتب باقي عليه
مشاري: انا مو بس بخيله ينهار بخليه ينجن بسبب المخالفه
مطلق: اهجد بس
مشاري: انت الي اهجد
سعود جاهم: شفيكم؟
مطلق لمشاري: انطم احسن لك
مشاري: جايب مخالفه؟
سعود عقد حواجبه : لا؟ لا يكون جا..
مشاري قاطعه: جت مخالفة سرعه على اسمك
سعود شهق: كذاب
سحب منه الجوال ودخل يشوف من الي جايبها رفع حواجبه من شاف الصوره ، رهف ما خذه سيارته! ارسل لها الصوره وكتب لها
" الاخت رهف؟ بتدفعينها طرق عنك"
وطلع من المحادثه وقعد ينتظر الشاهي ولف على سلطان الي يهوجس ، يهوجس في البنت الي شافها ، من هي؟ تذكر انها قالت اخوها سعود! ما اعرف هي لينا ولا رهف ، دقه سعود: شفيك انت
سلطان: ها ، لا لا مافي شي بس من الي جايب مخالفه
سعود: في غيرها ، اختي
وقعدو يسولفون وسعود يزبد لمشاري لانه خرشه في المخالفه
.
.
جلسه البنات
رهف انخرشت من جات رساله من سعود: بس عرف
اخذ جوالها نوره وشافت الرساله وقالت: كاتب لك الاخت رهف  بتدفعينها طرق عنك
رهف: الحمدالله ما اتصل عطيني
اخذت الجوال وردت عليه " ايه يصير خير" وطلعت من المحادثه: بنات امشو نروح البقاله وناخذ لنا كم تشوكلت احس اشتهيت تشوكلت
رفيف: يلا مشينا ابي كود رد
غزيل: روحو انتم انا مالي خلق
لينا: ولا انا
رفيف: اجل مشينا احنا
لبسو عباياتهم ونزلو وشافتهم ام سعود: تعالي انتي وياها وين انشاء الله؟
رهف: بنروح البقاله ونجي تبون شي؟
ام سلطان: روحو سلامتكم
طلعو البنات وكلهم حطو طرحهم على شعروهم الا رهف حاطه الطرحه على كتوفها
نوره: غطي شعرك لا يطلع احد من العيال
رهف: بلعقل مين راح يطلع؟
رفيف: اقول خذي سياره احد من اخوانك خلونا نطلع في السياره احسن برد لو مشينا
رهف : اوكي بدق على عبود
دقت رهف عليه ورد : عبود ابي سيارتك بروح للبقاله انا والبنات
عبدالله: من معك؟
رهف: انا ورفيف ونوره خلصني برد
عبدالله: يلا جايك
طلع عبدالله لهم وعطاها المفتاح وركبو السياره واتجهو للبقاله
نوره: بنات المحطه تخرش !
رفيف: اعوذ بالله مسكن جن ذا
نزلو البنات واخذو اغراضهم وهم منخرشين الا رهف عادي عندها واخذت اغراضها وطلعت والبنات وراها
نوره: رهف ماعندك قلب انتي!!
رهف: شفيكم ترا محطه طافيه انوارها وش فيها؟
رفيف: الا اقول متى بتاخذين لك سياره جديده وتتوظفين؟
رهف: السياره محلوله اما الوظيفه قاعده اقدم ولا احد قبلني
نوره : رجعينا بس لا انهار عليكم المكان يخرش
ركبو السياره ورهف تضحك على البنات الي خايفين ورجعو البيت ورهف كل ما تتذكر اشكالهم  تضحك عليهم
.
.
مقهى الشاهي ، العيال
سلطان لف على سعود وهمس له: وش صار على موضوع خطبتك؟
سعود ابتسم من الطاري: اليوم بكلم ابوي ادع يوافق اخطبها
سلطان: يارب
مطلق: وش تتهامسون عليه؟؟
سلطان خز مطلق بمزح: سر ، امزح مافيه شي
مشاري: والله انك تسذوب
سعود:  لا تحلف بس
تاخرو العيال الى الساعه ١٠ في اليل نطق سعود: سواليفكم مطوله امشو بسرعه في موضوع مهم بكلم فيه ابوي
مطلق: اي والله امشو ابوي لا يلعن جدفي
مشاري فهم وابتسم ابتسامه جانبيه وقرر ينرفز سعود : اي موضوع؟
قامو العيال وطلع سعود مستعجل و وراه مطلق ومسك سلطان مشاري: الحين تفهم بس خل سعود بحاله تراه متوتر الاخ
مشاري: يعني اخذ موضوعه بجديه؟
سلطان سحبه : ايه ومهم بعد ، انطم الحين ولا تنبهه عن اي ساهر ولا اي شي امش وانت ساكت
ركبو العيال وسعود مسرع مايبي الوقت يتأخر وبتأجل لبكرا
سلطان مسك يد سعود اليمنى من شاف سرعته تعدت الـ ١٣٠  وهمس له: هد هد مراح تطير والله بتاخذها بس هد لا تصدم الحين ولا تهج فيك السياره هد
هد سعود وهمس ل سعود: مابي الموضوع يتاجل ما بغيت ان ابوي يروق شوي
سلطان : سعود وقف على جنب اسوق عنك وضعك ما يسمح انك تسوق
سعود: خلاص قربنا ما يحتاج
مشاري ومطلق ورا يستشهدون همس مطلق لمشاري: وش سالفته ذا تو كان وش زينه
مشاري: تذكر سعود خطب اختي اكثر من مره وابوي يرفض لين ما عمي رفض والحين سعود يبي يرجع يخطب اختي لانها خلصت دراستها
مطلق: اها ، ادع ربك بس نوصل بخير وسلامه
اول ما وصلو نزل سعود وهو منخرش مايبي ابوه ينام الحين ويبتلش سعود ويعرف اخلاق ابوه الصبح ، نسى حتى سيارته مفتوحه
مطلق: انا بمشي تبون شي؟
سلطان : سلامتك ، سلم لي على عمي
مطلق: يوصل
نزلو كلهم ومطلق وامه مشو وسلطان قفل سيارة سعود وهو يفكر، معقوله تقفلت بوجه سعود لدرجه انه صار يخاف يتاجل الموضوع ولهاذي الدرجه الحب يسوي كذا بسعود؟
دخل و وراه مشاري
( عند سعود)
لقى ابوه جالس لحاله ينتظره
ابو سعود: وين هجيت انت والسلق الي معك؟
سعود جلس جنبه: ما هجيت رحت اجيب شاهي والعيال معي ورجعنا ، يبه ابي اكلمك بموضوع
ابو سعود فهم عليه : مافيه وقفلنا على الموضوع من زمان يا سعود تلقى غيرها
سعود بيأس: يبه ثلاث سنين وانا احاول فيك ويوم خلاص تنفتح تقفلها بوجهي؟ يبه تكفى البنت خلصت دراستها مافي حجه ان عمي يرفض
ابو سعود عصب على الخفيف: انا مو قلت لك قفل على الموضوع؟؟ تقلع ولا عاد اشوفك فاتح موضوع خطبتك عليها!
طلع سعود وهو مقهور وركب سيارته ولا سمح ل اي احد من العيال يكلمه قفل جواله وحرك ما يدري وين يروح مافي اي مكان في باله مايدري وين يتجهه...
( العيال)
سلطان: مشاري وين اختفى ذا
مشاري: الواضح ان عمي قفلها بوجهه مره
سلطان يحاول يدق عليه ولا يرد : جواله مقفل
مشاري: ياخوفي يصير به شي
سلطان: لا انشاء الله ما يصير به شي
مشاري : وانت جالس هنا ليه قم اسأل عبدالله
قام سلطان وهو خايف ، خايف على سعود  شاف عبدالله ونطق بخوف: عبدالله شفت سعود؟
عبدالله عقد حواجبه: لا اخر مره شفته مع ابوي ، فيه شي
سلطان : لا بس طلع وجواله مقفل
عبدالله: انشاء الله خير
سلطان: انشاء الله
طلع سلطان يجلس في الجلسة الي عند الحوش شغل الحطب وقعد قدام النار يفكر وين بيروح سعود؟ ذا كله عشان رفيف؟ ومن تفكيره نام بمكانه...
.
.
البنات كل وحده دخلت غرفتها بعد تعب اليوم وكلهم نامو الا رهف ، تدق على سعود ولا يرد انتظر الين الساعه ٢ الفجر ونامت وهي تنتظر اتصال من سعود مو مرتاحه ابدا.....
.
(سعود )
بعد ما لف الرياض كلها رجع للشالية فتح الباب وشاف سلطان الي نايم عند الجلسه جلس جنبه ورفع راسه فوق وهمس: رفض يا سلطان رفض ، وش اسوي اخطبها بدون لا يدري؟
فز سلطان من حس بوجود احد جنبه ونطق من شاف سعود: وين اختفيت انت!
سعود: ما اختفيت طلعت افرفر شوي فيه شي؟
سلطان : خرشتني ياولد شف الاتصالات الي جاتك
سعود فتح جواله وانخرش من اتصلات رهف الي كانت قبل ساعه ما رجع يتصل اكيد انها نايمه طلع سعود اقرب غرفه ودخل فيها ونام بعد تفكيرر..
.
.
( الصباح - الخميس) اخر يوم في الشاليه
قسم البنات
وصل علم لرهف ان مافي امل لسعود ورفيف
رفيف انتبهت لرهف انها مسرحه : رهف؟ فيك شي
رهف فزت: ها ، لا مافيني شي
ام سعود جاتهم: يلا قومن لمو عفشكم بس 
نوره: احس بدري ليه تمشون الحين
دقتها رهف بهمس : نسيتي انتي اليوم السفره في اليل!
نوره : ايه صح
قامو البنات يلمون عفشهم ودنياهم وتحركو من الشاليه
رهف ركبت مع سعود وشافته انه يتامل سيارة مشاري الي فيها رفيف نطقت رهف: شفيك؟ والحين صدق ابوي رفض!
سعود لف عليها: ايه صدق ، غطي شعرك السياره مو مظلله
غطت رهف شعرها ونطقت: معليك خليها علي ولا تضيق
سعود : وش بتسوين؟
رهف: خلها علي وبس ، بشرط!
سعود: اطلبي الي تبينه واعتبريه تم !
رهف : السياره الي بطلعها لي بتكون بسمك لين ما اطّلع الرخصه!
سعود: بس ذا الطلب؟ ابشري بس تضبطيني؟؟
رهف : معليك بس ، تكفى مر الكوفي من امس وانا مشتهيه قهوه
سعود وقف وطلب لها درايف ثرو
وصلو البيت ورهف راحت المطبخ تسوي ل ابوها قهوه عشان يروق لها حطت القهوه وابوها جالس في الصاله: ماشاءالله وش المناسبه
رهف: بكلمك بموضوع ويليت ما تردني
ابو سعود: سيارتك ومحلوله غيره؟
رهف صبت له قهوه : سعود وز...
ابو سعود قاطعها: رهف هاذا الموضوع قلت لكم قفلوه
رهف: وان قلت ان عمي ينتظر سعود يجي ويطق الباب؟
ابو سعود: مشاء الله وانتي دباب للعايله؟؟
رهف: يعني يا يبه ما تثق بعلوم بنتك؟ 
ابو سعود : يصير خير ، اكلم اخوك واشوف وش بيصير
رهف وقفت: عاد يلا انا انتهى وقتي الان وحان وقت النوم تصبح على خير يبه
ابو سعود يتلذذ القهوه: نوم الهناء
ركضت رهف لغرفة سعود ودرعمت عليه
سعود: بسم الله الرحمن ، طقي الباب على الاقل!
رهف: حط بيدي ٥٠٠ ريال بسرعه
سعود : صح انها اخر خمس ميه بس نعطيك ياها
عطاها ونطق: وش العلم؟
رهف: ابوي يتنظرك تحت
وطلعت انصدم سعود : الحين الخمس راحت على ذي الكلمتين؟؟
نزل سعود وهو متوتر : سم يبه بغيتني؟
ابو سعود: امدا علمتك؟
ضحك سعود: قالت لي انك تبيني
ابو سعود: جهز نفسك الأسبوع الجاي بنروح نخطب بنت عمك رفيف
ابتسم سعود.: تقولها صادق. يبه؟؟
ابو سعود : لا مقلب ، قم قم محد يقولك شي تجهز بس وبلغ ولد عمك اننا بنجي يوم الثلاثاء
سعود وقف وباس راس ابوه: ابشر ابشر الي تبيه يصير
طلع سعود وهو مستانس دق على مشاري وبلغه وعلى طول دق على سلطان : سلطعون ابشرك؟؟
سلطان: ها وش صار
سعود: خطبتي عليها يوم الثلاثاء
سلطان: ايهه واخيرااا ياولددد
ضحك سعود: ايه خلاص انتهى وضع تقفيل الجوال واختفي
سلطان : يلا نشوفك يوم الثلاثاء يا البزر والله انك كبرت وتزوجت يا الخايس
سعود قفل بوجهه وراح غرفته ينام نومة الهناء
،
،
مر الوقت يمر لين وصلت الساعه ١ الفجر
وقت سفرة البنات
الكل جاهز رهف معها سياره سعود ، مرت البنات كلهم
رفيف: تراني منخرشه
نوره: بنات سلطان توه مسك خط الشرقيه عنده مع خويه هناك شغل مدري وشو
رهف: محد داري بس اسكتو
مسكو الخط وهم مستانسين وخايفين قطعو ربع الطريق تقريباً لهم ساعه وشي
نوره : رهف وقفي عند البقاله شوي نريح رجولي انتهت من جلستي
رهف: اي والله يلا تعبت شوي
وقفو ورفيف نزلت للبقاله ورهف ونوره جلسو في المسجد يسولفون جاتهم رفيف: ها يلا نكمل؟ قبل لا يطلع النور
رهف: اي يلا مشينا طلعو ولكن يصنمون بمكانهم من شافو سلطان واقف عند سيارة سعود مستغرب
رفع راسه من عرف من هي : مشاء الله وش موصلكم هنا؟؟
رهف: من انت؟؟ وليش واقف عند سيارتي؟؟
سلطان ضحك بخفه: سيارتك اجل ، نوير اطلعي احسن لك وان ما رجعتي انتي والي معك بدق على عمي ابو سعود وانتي بكيفك!
رهف : لا لا خلاص بنرجع
ركبو البنات بيأس ورجعو للرياض ورهف مستفزها الشخص هاذا من وين يطلع اساساً ! وليش دايم يطلع لها؟؟
رجعت البنات لبيتوهم ورجعت البيت واستقبلها سعود ونطق بشماته: انقفطتو؟ ههههه
رهف: ه ه ه ما يضحك
وعطته المفتاح وطلعت لغرفتها ونامت وهي مقهوره!
-----------------------
( انتهى البارت )
اعذروني ما قدرت انزل اكثر من كذا😢😢