اسكريبتات ..

{الجيم}

هبت في دماغي أنزل الچيم الساعة ٣ بعد النص الليل، قولت أكيد هيبقى فاضي والدنيا جميلة، بعت ل " عادل " صاحبي بس قالي مكسل فنزلت أنا مع نفسي، وفعلًا أخدت الشنطة وإزازة الماية وقومت نازل، وصلت الچيم وفعلًا زي ما توقعت، مكنش فيه إلا ٣ لأ ٤ أشخاص بالظبط، بس على حظي الفقري النور كان قاطع، وكانوا مشغلين كشافين، مش مغطيين مساحة الچيم وكل واحد مشغل كشاف موبايله بقى.

أول ما دخلت ملقتش الكابتن اللي بدفعله تمن التمرينة، معرفش اللي بيجي الوقت ده اسمه ايه الصراحة، ولا حتى اللي بيجي الصبح، أصل أنا مبقاليش كام يوم مشترك في الچيم ده، فبصيت للرجالة اللي بتلعب واللي ما شاء الله أجسامهم الله أكبر الأربعة، مش عايز أبالغ وأقول ياخدوا مستر أوليمبيا مرتاح، سألتهم هو فين، فقالولي راح يجيب حاجة ياكلها وجي، فقولت ألعب على ما يجيي.

روحت أسخن عند المشاية، واللي كانت للأسف بعيدة عن باقي الشباب، ولسوء الحظ الچيم على عكس باقي الچيمات التانية كان كبير، فنور الكشافين مش واصلي تمامًا، فشغلت كشاف الموبايل، بس.. وأنا شغال ع المشاية حسيت بحاجة، حسيت كإن العجلة شغالة لوحدها! دعكت عيني يمكن بيتهيألي، بس العجلة شغالة فعلًا لوحدها!

وقفت في مكاني وقربت ناحيتها براحة، بس لقيتها واقفة، استغربت، رجعت عشان أكمل ع المشاية لقيتها.. شغالة لوحدها! ك.. كإن في حد بيمشي عليها، لو أتوماتك كنت قولت ماشي، لكن دي مبتشتغلش إلا لما حد بيمشي عليها! بيمشي ايه ده بيجري! ساعتها جريت وروحت عند باقي الشباب، واحد منهم شافني بنهج فقالي:

- مالك.

- م.. مفيش، أنا شكلي شديت بس ع المشاية.

ابتسم كإنه بياخدني على قد عقلي وكمل لعب.

هو أكيد بيتهيألي، أو عشان النور قاطع بس، أصل مشاية ايه ولا عجلة ايه اللي هيشتغلوا لوحدهم؟!

- هتلعب بال ٤٠ يا كوتش؟!

- لأ أنا هلعب ب ال الخمسة و عش..

ايه ده؟! أنا في واحد سألني دلوقتي هتعلب ب ٤٠ وقولته لأ، هو راح فين؟! بصيت للأربعة..

- هو.. مش كان في واحد جنبي دلوقتي سألني على ال..

شوفت علامات دهشة واللي بينفي براسه، هو في ايه؟! لأ مهو الموضوع كده مش طبيعي، أنا دماغي فيها حاجة غلط، أنا بتجنن ولا ايه! قعدت ع الدكة وحاولت أهدى، رفعتها للمستوى التالت وبدأت ألعب دمبل عالي، عدة، اتنين.. تلاتة..

- كوعك يا كوووتش.

بصيت عليهم، الصوت مكنش جي من ناحيتهم، مش من اليمين أصلا، كان جي من جنب ودني الشمال، مبصتش، والحمد لله من الضلمة مكنتش شايف حاجة من المراية أصلا، فضلت ألعب كتير عشان أنسى العبث اللي بيحصل حواليا ده، ممشتش ليه أصلا؟! الصراحة محبتش يتقال عليا جبان، وحشة في حقي وأنا جي الچيم وبتاع، أصل باين عليا وهيفهموا، فكان لازم أكمل.

فضلت ألعب لحد ما وصلت للفشل العضلي، الدمبل هيقع خلاص..

- أخر واحدة اهيه عاش قوي.

- تسلم يا كوتش والله فعلا كنت محتاج حد..

رميت الدمبل الأرض واتنفضت من مكاني، أيوه، مهو إيد مين اللي كانت بتساعدني دي والأربعة مرميين هناك أصلا، كده حرام بقى، أنا لازم أفوق، أنا مش طبيعي، روحت الحمام، وأنا داخل لقيت حد خارج..

- الريحة زي الزفت.

هو مين ده؟! أكيد مش في الحمام من ساعة ما جيت يعني، يلا هى جت عليك! غسلت وشي وخرجت، بس أول ما خرجت سمعت صوت نزاع..

- الحقني.. الحقوني.

بصيت لقيت واحد البار بالوزن اللي فيه واقع على صدره، جريت عليه على طول، رفعت البار ولسه بقوله..

- انت كوي..

ملقتش حد! لأ بقى، رزعت البار ع الأرض، عشان واحد من الأربعة يقولي:

- هو في ايه يا كوتش؟!

- أنا اللي في ايه برضو؟! انتوا مش شايفين أي حاجة ولا حاسين بأي حاجة؟!

واحد منهم قالي:

- اااه..

كده يبقى في حاجة فعلا، لقيت واحد تاني بيقولي:

- أنت أول مرة تيجي الچيم في الميعاد ده صح؟!

قولتله..

- أيوه، اشمعنى؟!

- لأ لو ناوي تيجي بعد كده في الميعاد ده فاتعود على كده.

بصيت بصة دهشة وسألتهم ليه فبصوا لبعض قبل ما واحد منهم يحكيلي:

- أصل الچيم ده حصل فيه حاجة وحشة زمان.

- حاجة ايه؟!

اتنهد قبل ما يقول:

- الچيم ده من حوالي ٢٠ سنة، كان الله أكبر الرجل عليه دايما، وكان في چيم تاني جنبه كان بيجيله كام واحد، تقريبًا والله أعلم الراجل صاحب الچيم التاني كان ليه يد في اللي حصل..

- ايه اللي حصل؟!

- والرجالة بتلعب في أمان الله زي دلوقتي الچيم ولع بيهم، اللي كان بيلعب ع المشاية، واللي كان تحت البار واللي واللي.. كل اللي كان موجود ساعتها الله يرحمه ومن ساعتها بيحصل زي ما أنت شايف.

- طب وانتوا ايه اللي بيجيبكوا في ميعاد زي..

- أنت بتكلم مين يا كوتش؟!

لقيت واحد ظهر في وشي فجأة، فسألته..

- أنت مين أنت كمان؟!

- أنا الكابتن.. أنت بتكلم مين؟!

- أنت جيت؟! كنت بكلم الرج..

هم فين! الأربعة اختفوا! مفيش حد خالص.

- كان.. كان في أربعة هنا دلوقتي و..

- مفيش حد، أنا خارج من ١٠ دقايق جبت الأكل ده وجيت ومكنش فيه حد، أنت بتترعش ليه يا كوتش.. أنت كويس؟!

- سلام عليكم.

- وعليكم السلام ورحمة الله وبركاته.. خد رايح فين؟! تعالى كمل التمرينة طيب!

ومن ساعتها وقررت مروحش الچيم في الميعاد ده أبدًا.

(منقول)