اسكريبتات ..

{بابا}

- سلومة خطيبك كان بيكلمك، ابقي كلميه بقى

= آه فعلا الموبايل مكانش جنبي، ممكن موبايلك يا بابا أكلمه من عندك

- رصيدك خلصان برضو زي امك ؟

= هي ماما كمان رصيدها خلص ؟

- لا معرفش، انا بتكلم عن رصيدها عندي

= تمام، الباسورد كام بقى ؟

- ١٠٠٨ يا سلمى، احفظيه بقى

= ما هو باسورد غريب اوي يا بابا، مش المفروض تبقى نرم زي كل الأبهاب وتخليه ١٢٣٤ ؟

- أصل ٠٨/١٠ دا تاريخ مهم أوي في حياتي

= دا لا تاريخ جوازك ولا تاريخ ميلادك ولا تاريخ ميلاد أي حد في البيت، إوعى يكون حاجة تبع الإكس

- لا يا روح امك، دا أهم تاريخ في حياتي

= تاريخ صلاحية علبة التونة اللي جوا ؟

- تونة إيه يا بنت المفجوعة

= أصلك محتفظ بيها من زمان أوي

- دا تاريخ اليوم اللي عرفت فيه ان مامتك حامل فيكي يا سلمى

= الله، للدرجادي يا بابا الخبر دا فرحك ؟

- لا هو تزامن مع ماتش نهائي السوبر والأهلي هو اللي كسب في اليوم دا

= بتهزر

- طبعا بهزر يا حبيبتي، أسعد لحظة عيشتها في حياتي لحظة ما عرفت اني هبقى أب

= انت أجدع أب

- تخيلي يا سلمى انا كنت بصرف عليكي وانتي لسه في بطن امك

= ليه بقى يا افندم، هي ماما كانت مأجرالك الحبل السُري؟

- لا، كنت بصرف أدوية وڤيتامينات، ومتابعات، وأكل صحي وزبادي ولبن لمامتك عشان تطلعي صحتك كويسة

= أمال عايز تبقى أب ببلاش ؟

- ٩ شهور حمل، أمك شايلاكي في بطنها وانا شايلك في قلبي، ليل ونهار بفكر فيكي، بحوش مصاريف الولادة، والسبوع، والهدوم اللي هتلبسيها لما تشرفي

= أصيل يا ابو سوسو

- كنت بقبل حاجات كتير في العادي مكنتش هقبلها، بس عشان خاطرك

= حاجات زي إيه يا بابا ؟

- مضايقات في الشغل، مجهود زيادة عشان اكسب قرشين ينفعوكي

= يا حبيبي

- لما اتولدتي قعدتي ١٢ يوم في الحضّانة، كان عندي عربية صغيرة كدا، بيعتها وبقيت اروح الشغل مواصلات

- ضحيت كتير انت

= وانتي كنتي طفلة زنانة، مكانش بيحلالك العياط غير واحنا نايمين، كنت بطبق جنبك صاحي انا ومامتك

- معلش بقى يا والدي قلبك ابيض

= لما كبرتي شوية ودخلتي المدرسة، كنت بقعد اضفرلك شعرك، انتي اللي كنتي بتحكمي عليا بكدا

- دي فاكراها بقى، وفاكرة لما كنت بنزلك في نص الليل تجيبلي آيس كريم

= فاكرة لما جتلك نزلة معوية وقعدت جنبك لحد ما تخفي، انا اتجازيت في شغلي على الغياب دا

- عمرك ما حسستني بأي حاجة يا بابا، كنت بتضحك في وشي على طول

= كنت مخبي بلاوي ورا الضحكة دي

- ولما مجموعي مجابش الكلية اللي كان نفسي فيها، بعت حتة الأرض اللي حيلتك عشان تدخلني جامعة خاصة

= عمري ما كان عندي أرض، أنا عملت قرض من البنك، وكنت بوفر الأقساط بتاعته من مصاريف قعدتي على القهوة، والهدوم الجديدة اللي بطلت اشتريها، وأكلي أحيانا

- انا أول مرة اعرف المعلومة دي

= عالعموم هانت، كلها سنتين واقساطه تخلص هو واللابتوب بتاعك

- هو اللاب كمان قسط، انت مش واخده هدية من شغلك

= شغل ايه اللي بيدي لابتوبات هدية يا بنت الهبلة، هو انا شغال في ميكروسوفت ؟

- ياه يا بابا، دا انت جبل

= ولا جبل ولا حاجة، كل الأبهات بتعمل كدا، ويمكن فيه أبهات بتعمل اكتر من كدا

- ربنا يخليك ليا يا حاج

= تخيلي بقى يا سلومة بعد كل دا، لما خطيبك اللي لسه عارفاه من شهرين، الاقيكي مسجلاه على تليفونك بابا، ابقى معرفتش اربي يا بنت الكلـ ـب، امشي غوري اعمليلي شاي
{قلب الاب}🥹😂

(#منقول)