اسكريبتات ..

{بدون عنوان}

صحيت من النوم بصعوبة
كسل .. خمول .. زهقان.. طهقان  ..
تتعدد الأسباب والنتيجة واحدة مش عاوزة اتحرك
مسكت الموبيل اشوف درجة الحراره كام
لقيت الموبيل سخن ومش بيجمع
عرفت ان اليوم بدأ خلاص

كان عندي مشوار فى مصلحة حكومية اخلص ورق
اليوم كان حر وانا مبحبش  الصيف وفرهدته 
كان لازم اروح انا أخلصه 
قومت اخدت  دش فى السريع وطلعت اخف هدوم البسها 
قعدت تحت التكييف فى الصالة وطلبت أوبر
بسرعة العربية جت  ودا غير العادة
قبل ما أنزل  بتحرك من مكاني وقع عليا كوباية العصير
دخلت بسرعة اغير والعربية مستنياني تحت البيت
لبست إللى قدامي ونزلت وبقول يارب عدي اليوم ع خير
  
ركبت العربية واعتذرت ع التأخير  
- على فين حضرتك ؟
= إللى موجود عندك فى اللوكيشن  لو سمحت
- تمام
- ممكن التكييف ؟
- مش شغال أسف 
- لا ولا يهمك مجتش عليك أتفضل .

ركبت العربية والهوي كان سخن، اقفل الشباك أتخنق، انا مبحبش الصيف ومبحبش انزل الصبح ومبحبش الشمس، ولا الهدوم إللى عليا  ومبحبش سواق أوبر  كمان..

وصلنا للمكان ويلا بقي انجز واروح..
كان المكان زحمة اووي والشمس حامية أوي ،
اخدت نفس محارب داخل معركة  ودخلت
- لو سمحت عاوزة اعمل الورق دا ..
= عند أستاذ عصمت
- وفين أستاذ عصمت ؟
- جاى  استنيه

روحت اقعد أستناه
المكان زحمة ومروحة واحده شغاله
مفيش أكسجين المكان كله ثاني أكسيد الكربون
خرجت برا اتنفس لكن كان الجو حر أوي .
سؤال واحد بيراودني
يارب هو انا بتعاقب ولا ايه؟!
استاذ عصمت جه
- الورق دا  ناقص دمغه
- اجيبها منين يا استاذ عصمت ؟
- عند الأستاذة سعاد  فى الدور الرابع
روحت لاسانسير  والاسانسير عطلان
وقفت استوعب وطلعت ع السلم 

وصلت الأستاذة سعاد  رجعتني لاستاذ عصمت
ومن استاذ عصمت روحت الخزنه  ومن الخزنة لاستاذ جلال
ساعتين بلف فى المبني وانا مش قادره  ..

خلصت ورقي وخلصت مشواري
مفيش عربية راضية تقبل طلبي 
ووقفت استني ميكروباص وقفت ساعه لغاية ما ظهر
رجعت البيت اخدت دش واترميت ع السرير
مش مستوعبه اللي شوفته وعيشته  واني أخيرًا فى سريري
موبيلي رن كانوا اصحابي
نسيت اننا متفقين نتقابل
بعتلهم  مش هنزل وقبل ما يشتموني قفلت الموبيل
وقررت هقطع  علاقتي بالناس لمده شهر
مش عاوزة اشوف بنادمين وهنام علشان انسي اليوم ..

حاولت انام مقدرتش
صداع لزمني من الصبح
ايه اليوم اللي  مش عاوز يخلص دا ؟
قمت اعمل قهوة
فارت مني مرتين  روحت قولت ماله الشاي وعملت شاي ..

رجعت اوضتي انام دخلت اختي و معاها موبيلها :
- إنتى قافله موبيلك ليه كلمي
  كان هو :
- مش المفروض أنك نايم دلوقتي
= هنام بس قولت أكلمك الأول ايه الاخبار موبيلك مقفول ليه ؟
- هروب  عاوزة اليوم دا يخلص
= يومك كان عامل ازاي ؟
- يوم مش لطيف  خالص
= احكيلي طيب ايه حصل ؟
بدأت تحكيله وهو بيضحك ع الل حصلها :
- بتضحك  ع أحزاني  شكرا يا صاحبي يلي كنت فاكرك  صاحبي..
= قولتلك استني بكره اجي معاكي 
- حبيت اعتمد ع نفسي سترونج  وومن وكده
= قصدك فرفوره  وومن ..
- انزل فى الشتا عادي لكن الصيف لا يا جماعة
= حاضر هبقي  ابلغهم  اى مصلحة حكومية يبعتولك فى الشتا بس ..
- اتريق  اتريق  كمل عليا ماهو فاضل أنت كمان ..
= لا مش رايق للخناق  يلا نامي ونتكلم تاني لما اصحي قبل ما اروح  الشغل
- تمام ..

قفلت معاه علشان انام معرفتش ..
بعتله مش عارفه انام وعاوزة اليوم يخلص مش عارفه
شاف الرسالة ومردش 
قولت اكيد نايم ولما يصحي  هيرد  عليا

ساعة وموبيلي رن كان هو ..
- أنت صحيت
= انا تحت البيت يلا انزلي
- بتعمل ايه ؟
= انزلي يلا عاوزك فى حاجة  متتأخريش  ..
- طيب اطلع أنت لاني والله ما قادره
= لا مش هطلع
- على فكره احنا مكتوب كتابنا تزق  الباب وتدخل
= بقولك انزلي يلا بطلي رغي وهرجع معاكي ..

مكنتش مصدقة انه هنا
او كنت عاوزة دا خيال عشان منزلش
لكن لقيته كلمني وبيقولي أنجز 
نزلت وكان مستنيني وروحنا ع الكورنيش طلب كرسين
قعدنا واشترالي سندوتشات كبدة مشطشه
وايس كريم  وترمس ولب  وسوداني
وختمناها  ب اتنين شاي بنعناع
واحنا بنتكلم او معني اصح انا بتكلم وبصيح وهو بيسمع :
= ها مرضية كدة ولا نطلب حاجة كمان
- لا كده تمام .. رغم اني لسه واكله
= الف هنا ..بس احنا كده محتاجين نغير التلاجة
- ليه ؟
= علشان تكفيكي  يا حبيببتي ..
- قصدك ايه؟ انا بأكل كتير ؟!
= يا حبيبي براحتك، بس انتى كنتي قايله ملكيش نفس ..  
- نفسي بتتفتح  معاك اعمل ايه طيب، اعمل حسابك لما نتجوز مش هتاكل  برا لوحدك
= انا اقدر .. تحبي تضربي كشري ؟
- لا كفايه كده  ..قولي صحيح مش هتروح شغلك ؟
= بدلت مع صاحبي هنزل مكانه بكره .
- ومنمتش  ليه ؟
= لو سيبتك كده هصحي ع رسائل صياح منك ولو نمت هحلم بكوابيس بتجري ورايا بالسكينه ففي الحالتين مش هعرف انام ..
- يا رخم ..
= كله تمام  روقتي كده
- اقولك الصراحة
= ها ..
-  أنا بعد اي مشوار مزعج ببقي عاوزة انام عشان بصحي ناسية انا نزلت اصلًا ، إنهاردة معرفتش اعمل كدا  لكن نفس تأثير النوم حصل  .
= أزاي ؟
- لما كلمتني بصراحة
= وقبل ما اكلمك  ؟
- كان كابوس صباحي
=ضحك : وأختفي
-  لما شوفتك إتنسي خلاص ولا اكنه حصل ..
= طبعًا بعد الكبدة والترمس والآيس كريم  والشاي  لازم تنسي
- انت باصصلي فى الأكل
= لا طبعًا ..انا كلي ليكي يا حبيبي
- حبيبي من زمان والله
= من امتي ؟
- سنتين واسبوع  كدا
= واللي قبل السنتين
- من أول ما دبلتك  اقتحمت  ايدي فبقيت حبيبي  وأبو عيالي رسمي نظمي فهمي ، بذمتك  كنت هتلاقي حد زيي فين ؟
= ملقتش
- ولا هتعرف اصلًا متحاولش 
=ضحك : مش هحاول لان رغم جنانك دا فيكي حاجة مش موجودة فى حد
- ايه ياتري ؟
= أنتي الوحيدة إللى بتقدر تفصلني عن اى حاجة، سواء يوم مزعج أو موقف .. لما بكلمك او بشوفك بهدا وبعرف أفكر
- يلا اى خدمة بس ع فكرة الإحساس متبادل يومي اختلف عن ما بدأ مكنتش اتوقع انه ينتهي كدا .
= عدي جمايل
- هعدهم  حاضر بعد كوز ذرة مشوي من عند عمو دا .
= اعملك قلبي كوز ذره يا حبيببتي
- حبيبي يا مثبتاتي 
= المهم انك روقتي دلواقتي
- جدًا
 
اتمشوا عند عربية الذرة وطلبوا اتنين ذرة وقعدوا يتكلموا 
ويضحكوا  وسكتوا  لحظة :
= بس مش ملاحظة حاجة ؟
- ايه..؟!
= القمر مش فى السما رغم انهارده يوم  ١٥
- لا ازاي ..
ببص ع السما بدور ع القمر  لاقيته قرب مني و  قالي :
= لأن القمر قاعد جنبي ومعايا ..

رغم أنها كلاشية  اوي لكن حبيتها منه
دايما كلامه له أثر فى نفسيتي
واليوم انتهي احلي كتير ما بدء
وكان عمو صاحب عربية الذره بيسمع الست
ف قعدنا جنبه اكلنا الذره وانا ساندة  رأسي ع كتفه وبندندن مع بعض مع الست وهي بتقول :

الليل وسماه ونجومه وقمره
قمره وسهره وأنت وانا يا حبيبي انا
يا حياتي انا ..كلنا كلنا فى الحب سوا