مسلسل حته منى الجزء الثانى.
٧ : الحلقـه السابعـه.
#الكـاتبه_الصغيره_آيـه_يحيى_الأميـر .
فى شقة حنين..
حنين بدموع : معتز أنا تعبانه.
معتز : مالك؟!.
حنين : شكلى هولد.
معتز : هتولدى إيه وإنتِ فى السابع.
حنين : تعبانه يا معتز طب رن على ماما أو ودينى للدكتور.
معتز يعدل نظارته الطبيه على عيونه : طب ثوانى ورجعلك.
ينزل لأخته وميرفت ترد وهى ماسكة الريموت وبتقلب : سيبك منها دى لسه فى السابع بقلم آيه يحيى الأمير.
ويفضل معتز رايح جاى : بس دى تعبانه يا أم جمال يعنى مش بس إنهارده دى بقالها يومين تعبانه.
ميرفت بعصبيه : ما تقعد فى جنب وتكن شوية لا هى أول واحده تتعب ولا أول واحده تولد.
معتز : بس يا أم جمال دى أول مره تجرب تعب زى كدا وأكيد خايفة أنا هطلع أشوفها.
ميرفت تعلى صوتها بغضب وغيظ منه : أقعد يا معتز بلاش هيافه إتشد كدا إنت راجل مش حتة عيله زى دى تدهولك على عينك.
معتز يتنهد بقلة حيلة..
تخرج أم معتز من الأوضة : خير يإبنى فى إيه يا ميرفت إنتوا بتتخنقوا.
ميرفت تبص لـ معتز بتحذير : مفيش يا أما أدخلى كملى نومك.
أم معتز : فى إيه يا معتز يإبنى.
معتز بهدوء عكس ما بداخله : مفيش يا أما أدخلى نامى نامى يا أما.
على الجانب الآخر.....
فى إحدى المجمعات الطبيه..
خالد. جميله وجوزها ومالك إبنها.
منتصر وسهير.
نوال (أم زهـره)..
بيستنوا زهـره تخرج من العمليات..
خالد بخوف : إتأخروا؟!...
جميله تطبطب على كتفه : متقلقش يا خالد ربنا يقومها بالسلامة.
عند غاده...
ترن على منتصـر ..
منتصـر يرد : سلام عليكم ايوه يا غاده.
غاده : وعليكم السلام طمنى يا منتصـر زهـره قامت بالسلامة.
منتصـر يحمحم بجدية : لسه يا أم عبده لما تخرج هكلمك.
غاده بهدوء : هى جنبك.
منتصـر يدعى الغباء : مين؟!...
غاده بتنهيده طويله : أم خالد.
منتصـر يضحك : لاء والله بس فى ناس رايحه جايه فى المكان محبتش يسمعونى بقول إسمك.
غاده : ماشى يا أبو خالد إبقى طمنى على زهـره مع السلامة.
منتصـر بإبتسامة جانبيه : مع السلامة.
عند حنين...
حنين عدى عليها حوالى ساعتين ونص وهى تعبانه والتعب بيزيد.
حاولت تقوم عشان تجيب فونها ترن على مامتها أوى تنادى لجوزها وقعت فى الأرض.
فضلت تعيط وتكتم فى الصرخه والتعب بيزيد أكتر وأكتر وفجأه تصرخ بعلو صوتها.
واء واء واء.
واء واء واء تانى.
حنين ولدت توأم طبيعى.
وفجأه تبدأ تتنفس بضعف وتفقد الوعى..
على الجانب الآخر...
تقوم نهاد من النوم تصرخ : إسترها يارب إسترها على عبيدك يارب.
صالح يتنفض : مالك يا نهاد خير؟.
نهاد برعشة : ودينى لبنتى أنا عايزه حنين.
صالح بإقتضاب : دلوقتى!!.. يبص فى الفون ويلف لـ نهاد : دى الساعه ٢ ونص.
نهاد بعياط : قلبى مقبوض يا صالح حلمت بيها بتغرق فى بحر كله نار وبتصرخ وبتنادى عليا بنتى محتجالى يا صالح.
صالح يتنهد : إستهدى بالله بس قومى إشربى ميه وإتغطى ونامى.
نهاد بعصبيه : حرام عليك إنت مش حاسس بيا.
