حكاية_تمني _
( بقلم بسمة البياتي)
البارت_السادس _
على صوت الصياح والهوسة نزل جواد مستغرب اول مشافوا هجمو عليه وبدون مقدمات باخمس المسدس ضربوا على راسة وجتفوا
حاول يفلت من ايدهم يريد يفهم شكو وشرايدين منه اشو هذولة تخبلوا التموا عليه ضرب وغلط بابشع الالفاظ
المنظر فطر گلبي غطيت راسي بظهر ماما واشهك بالبجي
حياة... بداعت اعزازكم لاتضربو والله جواد فقير وبحالة بحياتة مماذي نملة
... واحد منهم اشر الهم يوخرون منه
اخذوا واخذوا بابا وطلعوا ماما كعدت تلطم
الناس التمت والجيران اجوي يريدون يعرفون شجاب الأمن علينا وليش اخذوهم
احنا بيا حال وهما واكفين يستفسرون
ماما جاوبتهم بقهر وبجي ماعرف والله ما اعرف شيريدون وليش اخذوهم
اياد راح يركض البيت خالة يكوللهم
نص الجيران راحوا من شافوا الشغلة حامية وكلها اتكول ياروح مابعدج روح
حياة... تصخمنا وتعزينا انهجم بيتنا راح الرجال وابنة وين اروح منو أسال المن انطي وجهي
... اجتي خالة وزوجها والولد
ابو اسلام... شكو شصاير ليش اخذوهم ترى كلشي مافهمنا من اياد بس كال الشرطة اخذت بابا وجواد
حياة... يا شرطة ذولة الامن يكولون على جواد عميل لج عيني ثريا كدامنا التموا عليه شبعوا ضرب
ثريا... ماكو غير هذا العار ابو سعد دك الناقصة بيهم وتبلى عليهم الله لايوفقة دنيا واخره
تمني... كاعدة على صفحة مكرفصة وايدي على وجهي منظرهم وهما يضربوا ويسحلون بي ميروح من بالي
لليل بيتنا انترس عمام جواد وولدهم وعمامي وباقي كرايبنا كلهم اجوي ولحد هاللحظة محد يعرف شنو السالفة وليش اخذوهم
وللصبح ظلينا على نفس كعدتنا وعينة على الباب بلكي ينفتح ويدخلون علينا ونخلص من هذا الكابوس
اول مطلع الصبح اخوان بابا راحوا يسالون
من رجعوا الظهر الوجوه مصوفرة ومتبشر بخير
ماما تلكتهم من الباب بشروا شصار شهاب وجواد ليش ما اجوي وياكم
ابو عاطف... ام اياد الشغلة جبيرة الله وحده يكدر يطلعهم منها
... عزززا بعيني ليش
... عندي صديق يداوم بالامن طلبت منه يشوفلي شنو السالفة من رحنالة كال نصيحة لاتجون وتسالون لان السالفة خطرة وحتى اليجي يسال عليهم يروح بالرجلين
جواد متهوم هو بحزب المعارضة ضد النظام والبلاغ بس على جواد
شهاب ما ادري ليش اخذوا
... يعني شنو هاهية راحوا
... الله موجود ويفك شدتهم
تمني... الحد هاي اللحظة عقلي ممستوعب الديصير وكل املي جواد يرجع
ماما من سمعت كلام عمو هلكد مادكت. ولطمت تخربطت للعصر محد بقى يمنا غير بيت خالة ثريا
معادن الناس تبين بالمواقف الصعبة والكل ظهر على حقيقتة ويمكن حقهم لان هاي دولة مينلعب وياها
ثريا... كوموا نروح البيتنا ما ابقيكم اهنا
... ما اتحرك من بيتي خليني كاعدة ومجبوبة
... لج لأنعاندين انتي صاحبة بنات اذا مخايفة على روحج خافي عليهن
... خالة اخذتنا البيتها من البارحة لكمة مخالين بحلكنة جابوا الاكل محد بينا اله نفس ياكل
اذكرت جواد جان جوعان سودة عليه غصيت بالبجي
ثريا.. حبيبتي استهدي بالله وبطلي بجي مو گلبج راح يطك
... احجي وياها بشهكة خالة جواد جان تعبان وجوعان حتى ملحك يرتاح وياكل لكمة وجمالة اخذوا حافي
من سمعوني الكل بجوا على بجيي ماما سحبتني الحضنها مدري اني اصبرها لو هي تصبرني
ثاني يوم اجة عمو ابو اسلام كعد ويا ماما كال
... خيتي ام اياد يشهد الله اني ما ساكت ومابقيت احد ما كلفتة يسال عليهم ويشوف شنو سالفتهم
... مايحتاج اتكول ادري بيك ماتقصر وانت وولدك وكفتوا وكفة ويانة خوان شهاب ما وكفوها يكفي فاتحيلي بيتكم
... البيت بيتج اذا ماتشيلكم الكاع انخليكم فوك راسنا
اليوم رحت الصديقي هم حزبي ومن المنطقة حجيتلة سالفة شهاب وحواد والرجال ماتفاجئ الظاهر عنده علم بيها
ومن سالتة اذا ابو سعد اله ايد بالسالفة كال الحجي بينا اي هو قدم تقرير للحزب بجواد
... جنت اعرف والله من الله لاينطي ولايوفقة كسر ركبتهم عززا بعيني راحوا بالرجلين
... كال الشكوى بس على جواد ليش ماخذين شهاب ما ادري
... هسه اني شسوي المن اروح المن اشكي
... نصيحة خيتي كعدي وسكتي والله اقل حركة منج حتى انتي ياخذوج وموبعيد حتى البنات يروحن بيها استري على بيتج وبناتج
تمني... خمس ايام واحنا ابيت خالة وبابا وجواد مامنهم اي خبر خمس ايام ومحد دك الباب وسال علينا
ماما متحملت قررت نرجع للبيت خالة وعمو حاولوا يقنعوها تبقى مقبلت كالت ارجع البيتي احسن وانتظر الفرج من الله
رجعنا للبيت من دخلنا انقبض گلبي كولشي بي كأيب وحزبن حتى الحياطين احسها تبجي
صعدت الغرفتي ذبيت روحي بمكان جواد. وحضنت مخدتة بجيت الحد ما تعبت
