قلبي بينادي باسمك - مكتملة-

Part 78 فاق

سوار: سالي انت لازم تروحي البيت قعدتك هنا ملهاش لازمه 

سالي: لا طبعا مش همشي من هنا ، انت عاوزه تركي يصحى و ميلاقينيش جنبه 

سوار: حبيبتي عدى 4 ساعات من بعد عمليته الدكتور قال 48 ساعه لسه بدري ، ارتاحي انت و عبد الرحمن بايت معاه 

سالي: لا مش همشي يعني مش همشي ، انا مش هطمن وهو بعيد عني 

بصت سوار لرضوى ، قربت رضوى من سالي و مسكت ايديها و باستها 

رضوى: حبيبتي ان شاء الله لما تركي يصحى هيروح بيته محتاج تكوني واقفه على حيلك تساعديه ، مش هينفع تبقى تعبانه 

اترغرغت عينيها بالدموع 

سالي: ماما ارجوكي افهميني ، انا مكنش بيعدي عليا يوم من غير ما اشوفه او اسمع صوته ، مش هعرف انام و انا عارفه انه في العنايه ، على الاقل و انا هنا هبص عليه كل شويه 

رضوى: انا عارفه و و الله حاسه بيكي ، و لكن عيالك محتاجينك و تركي محتاجك ، محتاج بيته يكون مترتب و نظيف و عياله كويسين عشان لما يرجع بيته ان شاء الله تكوني فضياله بس 

سوار: فتره النقاهه الي بعد العمليه اهم من العمليه نفسها يا سالي ، دي فتره طويله و صعبه محتاج تركيز و مجهود ، لازك ترتاحي و تجهزي نفسك ليها 

بصت سالي لسوار 

سوار: اسمعي مني يا سالي ، انا كنت مع ماما بعد جلسات الكيماوي بتاعتها و مجهود ان البيت يكون مهيأ صعب جدا ، محتاج منك قوه 

سالي: اوعديني ان اي حاجه هتحصل هتعرفوني بيها 

سوار: اوعدك اي حاجه عبد الرحمن يبلغني بيها هبلغك بيها ، و متقلقيش احنا هنرجع له بكرا في معاد الزياره 

رضوى: ايوا متخافيش 

هزت سالي راسها بمعني تمام ، مسكت سوار ايد سالي 

سوار: سالي انا عارفه انه مش وقته بس مش محتاجه اقولك ، اوعي بابا و ريم يعرفو حاجه 

سالي: لا طبعا هو انا عبيطه ، عمو عبد الله مش هيستحمل و ريم ممكن تسقط فيها 

سوار: انا قلت أأكد بس 

حضنتها و باست راسها 

سوار: يلا 

مشو مع بعض عشان يقابلو عبد الرحمن الي واقف قدام العنايه بيبص على الاجهزه و متابع كل رقم بيظهر 

سوار: عبد الرحمن 

لف وشه و بص لهم 

سوار: احنا هنمشي 

عبد الرحمن: طيب انتظرو بوصلكم 

رضوى: لا لا خليك انت مع تركي احنا هنركب تاكسي بسرعه