"عودة فبراير"

بارت 9

لا تنسون التصويت♥️.

وَلي فُؤادٌ إذا طالَ العذَاب
هامَ اشْتياقاً إلى لُقيَا معذّبهِ

_________________________________
شهم : مرن 3 اشهر وبعد ماسمعت شي عن سمر بس عرفت طلگت رجعت افكر بيها مثل قبل وحالتي صارت اسوء

بس ايمن حاول يطلعني من هاي الحالة الچنت بيها ضل كلما يطلع يخابرني ونطلع سوه يعزمني دائماً ويحاول ميجيب طاري سمر گدامي

2021/2/21 عودة فبراير

شهم : گاعد بغرفتي العب ويا ابني ياسر وخابرني ايمن گال جايك نطلع للكوفي گتلة تمام

چلب بيه ياسر اله يروح وياي نجبرت اخذه

اجاني ايمن ورحنة للكوفي طلبنة نراگيل وگعدنة نطيت لياسر تلفوني يلعب بي وضلينه نسولف ساعة ونص
وتلفون ايمن رن جاوب وطلعت خالتي سعاد گلتله تريد عشة

كمل ايمن الاتصال وحاچاني

ايمن : شهم هاي خالتي سعاد تريد عشة من المطعم گوم اوصللها ونروح بعد تأخر الوقت

شهم : تمام

اخذنالهم العشة ورحنة اني الي اسوق السيارة ايمن چان مابي حيل
وصلنة نزل دگ الباب ايمن وطب جوه گعدت اني برة وصافن ع البيت وذكرياتي  بي  10 دقايق وطلع ايمن

صعدنة السيارة اريد امشي وسمعت صوتها بالباب تگلي

سمر : شلونك شهم

التفتت عليها بسرعة اريد اصدگ هي مامعقولة لگيتها ذابة الشال ع راسهة بأهمال وخصلات شعرها طالعة وكبرانة ملامحها بعدها نفسها سمر جاوبتها واني بس اريد اتحرك احس جسمي جمر مامتوقع شوفتها بهذا الوقت

شهم : هلو سمر الحمدلله

انتبهت ع ياسر ابني وضلت تسولف ويا

سمر : ها يسوري حبيبي شلونك

ياسر : زين

سمر : فدوة نسخة من ابوك

شهم : باوعت بعيونها وهي هم ضلت تباوع ماطولت ثواني ودرت وجهي عنها ماتحملت اباوع بعيونها ذكرياتي كلها ترجع واني حالف انساها ماريدها تشوف الضعف بعيوني

شخطت السيارة كل قوتي ونطلقت باسرع شي ماگدر اسيطر ع روحي طلعت حرگتي بالسواقة وعيوني مامركزة بالطريق ايمن يحاچيني ماسمعة فصلت عن العالم

لزمني ايمن من ايدي يلا وعيت ع نفسي

ايمن : شهم شبيك لخاطر اللة الطفل ويانة راح نسوي حادث

شهم : اوك

ماعندي طاقة حتى احچي شوفتها رجعتني 7 سنين ليوره
_________________________________
سمر : گاعدة بغرفتي وگمت داريد اسوي عشة امي گالت لتسوين وصيت ايمن يجبلنه من المطعم گتلها اوك ورجعت دخلت لغرفتي