بتبدأ حكايتنا واحنا نرجع بالزمن لخمس سنين ورا
____________
في قصر ابو مازن
دق جرس بيت ابو مازن ، قامت ام مازن ورفعت راسها من شافت العامله تتجه للباب ونطقت: خلاص يا ريحانه روحي كملي شغلك أنا افتح الباب
مشت ام مازن تضغط زر الأنترفون ، انفتح لهم الباب الخارجي وتقدمت ام مازن تفتح لهم الباب
دخلو فارس وناصر والعنود واديم وغزل ، تقدم فارس يحب راس ام مازن ونفس الشي لناصر
حضنتهم ام مازن ونطقت وهي مبتسمه: كيف دوامكم اليوم ؟
نطق ناصر قبل يمشي: اوهوهه ماشش
قربت العنود تسلم على ام مازن وتحضنها ، ابتسمت ام مازن والتفتت على ناصر ونطقت: ليه صاير شي معكم
التفت ناصر عليها ونطق: لا بس اليوم طويل وممل والدروس صعبه وباليالله تنفهم
طبطبت عليه ام مازن ونطقت: يلا عادي الحمدالله انت عندك مدرسين يفهمونك وان شاء الله تتيسر يا حبيبي
التفت فارس عليه ونطق بنبره شماته: اخخ مشكله الي لسع مخيسين بالثانوي
طالع فيه ناصر بنص عين ونطق: مسوي فيها وانت مخيس فيها ثلاث سنين
العنود : ايهيهه بديتو بهواشكم خلاص ترا كلكم بتخيسون بالثانوي ثلاث سنين
التفت ناصر عليها ونطق: شوفو مين تتكلم ، تراك للحين بالمتوسط يعني اهجدي
ام مازن: خلاص انت وياه وياها ، روحو الحين ادخلو وبدلو ملابسكم ونامو اصحيكم العصر تتغدون وتتجهزون وبعد المغرب نمشي لبيت جدكم و جدتكم
التفت فارس على ام مازن ونطق: يالله يا امي وانتي إلى الان كل خميس لماً نرجع من المدرسه تخلينا ننام غصب عشان نروح عند جدي وجدتي
غزل: ايوا يا ماما خلاص ما يحتاج ننام نروح بيت جدي كذا عادي
ام مازن: ماشاءالله طول هالسنين وانا مربيتكم على هاذا النضام تجون الحين تبغون تعكسونه ! لا يا حبايبي ويلا روحو زي الحلوين بدلو ملابسكم ونامو عشان ما تنجلدون مني
راحو كلهم يدخلون لغرفهم يبدلون ملابسهم وينامون ، نطقت ام مازن بصوت عالي: سرينا ، سرينا
تقدمت سرينا تمشي لأم مازن وتنطق: نعم مدام
ام مازن: نادي ريحانه وتعالو شيلو شنط العيال والبنات ودخلوها لغرفهم وبعدين سوو الغداء
هزت راسها سرينا وراحت مع ريحانه يشيلون الشناط ويجهزون الغداء
تقدمت تطلع ام مازن مع الدرج وشهقت بخفه من شافت رنا نازله مع الدرج ونطقت: انتي ما نمتي !
ضحكت رنا بخفه ضحكة الورطه وهي ترجع شعرها على ورا ونطقت: شسوي ما جاني النوم الحين بعبي لي مويا واروح انام
ام مازن: من الساعه ١٠ مكلمتك وقايلتلك نامي كيف تروحين بيت جدك و جدتك اليوم !
رنا: عادي يا ماما يمدي يمدي
ام مازن: وشو يمدي الله يهديك الحين الساعه ١٢ ! ( تنهدت ام مازن وكملت تنطق ) من تخرجتي من الجامعه ونضام نومك كذا الله يهديك امشي خذي لك مويا وروحي نامي ولا مافي روحه لبيت جدك وجدتك !
هزت راسها رنا وراحت تاخذ لها مويا وترجع لغرفتها وتنام
____________
في قصر ابو نايف
نزلت ام نايف للصاله وفزت من شافت ايهم وتيار يتضاربون ومافي احد موجود يفرق بينهم ، نطقت بصوت عالي وهي تنزل من الدرج بسرعه: بس انتتت وياهه فكووو بعضكممم بسسس فك ايهم تيار لكن تيار ما فكه وكمل يضربه وصرخت ام نايف على تيار تنطق: يا تيياارر بسسسس فك اخوكك
فك تيار ايهم وهو معصب ونطقت ام نايف: وشفيكم انتو انهبلتو جاكم شي !
تيار: والله ايهم هو الي انهبل
ايهم: هاهه وتتكلم بعد وانت الغلطان ! تبغاني اعلم امييي !
تيار التفت عليه وجاء بيضربه وصرخت ام نايف: بسسس يا تيياارر
سحبت ام نايف تيار جنبها ونطقت: انطم انت ولا كلمه ( التفتت على ايهم وكملت تنطق ) قولي وش مسوي
ايهم: الأستاذ خلاني افتش على واجبهم واصحح لهم وتيار كتابه ماهو كامل ولا حتى حال الواجب ولماً علمت الاستاذ و هاوش تيار وعاد هاذا الي صار
تنهدت ام نايف بقلة حيله ونطقت وهي تلتفت على تيار: خلاصص يا تيار جننتني تعبتني إلى متى وانت كذا ! مستوعب هاذي ثاني سنه لك بالثانوي ! السنه الجايه آخر مرحله ثانوي وبعدها جامعه ! بتجلس كذا !
نزلت ليان ونطقت: وش صاير اصواتكم واصله إلى آخر دور بالقصر
حكى ايهم لليان الي صار وكملت ام نايف تنطق: سئلتك امس يا تيار وانت تلعب بالبي سي سئلتك يا تيار حليت واجباتك ؟ ذاكرت ؟ قلت لي لا ابدد أنا خلصت واجباتي وحليتها من زمان والي اشوفه مو نفس الي قلته ! لكن خير خير يا تيار ، البي سي مسحوب ( فز تيار يطالع بأمه وكملت تنطق ام نايف ) ايه ايه لا تطالع فيني كذا و بتروح معي بيت جدك وجدتك اليوم ومن يوم ورايح بتروح معي حتى الديره ! وحتى الجوال مسحوب وخلك
تيار: امييي لااااا تكفيييننن خلاص والله بتعدل تكفيين
التفتت ليان على تيار ونطقت: يالله يا تيار مو طبيعي وش ذا الإهمال ! اهتم لنفسك ولمستقبلك شوي ! وتبغى البي سي وما تبغى تروح معانا ! صعبه يا حبيبي الي يبغى وناسته وسعادته قبلها يجتهد ويسعى بس انتي ما تدور غير اللعب ومستقبلك مخليه بالزباله ولا همك
لتفت عليها تيار ونطق بصوت عالي: شدخلككك انتي ! لا تدخلين بشي ما يخصك خلاصص !
التفتت ام نايف على تيار ونطقت بصراخ: تتتييييااااررر ! وش قلة الادب هاذي !! اعتذر لأختك بسرعه
التفت تيار على ليان ونطق بدون نفس: آسف
ليان: مقبول بس لا تكررها
هز راسه تيار ونطقت ام نايف: يلا روحو نامو
دخلو غرفهم ونامو ونطقت ام نايف وهي تلتفت على ليان: انتي شكلك توك صاحية من النوم
هزت راسها ليان ونطقت: جايه اقولك انو ترا بكلم السواق يوديني اشتري بعض الاشياء وهاذي خلاص آخر شي من التجهيزات لزواجي واكون قفلت على كل شي
هزت راسها ام نايف وراحت ليان تلبس عبايتها وتركب مع السواق تروح تتسوق
_______________________________
في قصر ابو مازن - الساعه ٥ قريب المغرب
