=توا عاد بعد ماذقتوا المقروض نبوا نسمعوا الحكم وزي ماقلت بكري بحياديه ومن غير مجاملات..
وحده من نساوين الكبار قالتلها..
=غير كان خلتينا حتى حني نحكموا ياحويوه..
قالت بضحكه..
/قتلك ياخالتي فطيمه انتي وخالتي مسعودة امهاتهم اكيد زابطين البنه وحتفرقوا بين مقروض جميله ومقروض ريان وقلب الام يميل لصغارها..
قالت وحده من النساوين الكبار..
=عندها الحق..
جميله قالت بنفاذ صبر..
/تي هيا عاد..
رفع ريان حاجبه اليسار وهو موجه نظره القدام..
مديحة بضحكه:هيا خلاص اللي ذاق يقول رايه قبل لتتوحش علينا الطقاشة..
ضحكوا وجميله وهي تمرر في نظراتها المحرجه عليهم غيرت نظرها لريان لقاته ع حاله لكن مبتسم ابتسامه جانبيه خفيفه شافتله بإزدراء وردت نظرها لحواء لما سمعتها قالت..
=هي نبدوا من عندك هبه..
..وكل من الحكام قال حكمه وكلهم كان حكمهم واحد عجبهم مقروض الزوز..
جميله بإنزعاج..
/اياااح..
ام ريان قالت..
/خلاص عطونا نذوقوا بش نفصلوا بيناتهم..
حواء قالت..
/لالا بنعطي حد تاني يفصل..
التفتت شافت خوها مقعمز ع الدروج وكعادته شاد لوح خشب ينحت فيه بالموس من قبل ماتكلمه قال..
/مانحباش..
تنهدت مديحة تنهيده مكتومه وهي تشوفله بهويام..
قالتله اخته..
/جرب هالمرة بسسس بسس..
رفع عيونه وشاف لريان بعدين غير نظره للصغار اللي يلعبوا شافلهم شويه وقال..
/نورا..
كلهم شافولها كيف جايه تجري وصلت فيهم وقالت..
=نعم..
رجع ركز في الخشبه اللي في يده وهو يقول..
/الصغار مايعرفوش يجاملوا..
ابتسم ريان وهو يشوفله وحواء قالت بضحكه..
/تعالي نويره تعالي نفهمك..
قاطعتها وقالت..
/نعرف نعرف عطوني نذوق عطوني..
ضحكوا وام ريان قالت..
/سلم بنية حناها..
وعطت حواء لنورا ذوق المقروض وجميله وريان مركزين معاها وع اعصابهم..
بعد ماكملت قالت..
=امم..الزوز حلوين لكن اللي في الصونيه هادي مازال احسن..
بأعلى صوتها جميله صاحت..
"خشي"
والبنات مشولها يجروا ضموها والنساوين الكبار يضحكوا..
نورا بعد ماكانت تشوف لجميلة بإبتسامه فرح حركت نظرها لعمها وقالت وهي ترفع في كتافها وتنزل فيهم..
=اسفه عمو لكن هدا العدل..
ريان ابتسم وقال..
/ولايهمك ياسكرة قلبي اساسا اني مش واخدها جديات..
وجهوا انظارهم ليه وجميله قالت تهكما..
/صدقتك ياهذا..
ضحكوا عليها وهو رفع يده و قعد يحرك فيها فوق ولوطا يقول بدون مايشوفلها..
=صه ياهذه صه..
نورا:ولايهمك عمو المهم فايز بقلبي..
ضحكواوواحد من الموجودين قال..
/ع قولت بوها سلطان..
الشباب كلهم بنات وولاد صاحوا بصوت واحد..
"إيييه ياااا"
