#ولاد_تسعة "الفصل الاول/سميه تسعة"
#جمان_فريد
الجزء_الثالث "قصر ذهيبه"
⛔احداث هذه الروايه وشخصياتها من وحي الخيال بعض الاحداث غير واقعيه"فنتازيه" وبعضها بعيد عن واقعنا المعاش والبعض الاخر يلامس شيء من الواقع⛔
⚠️ملاحظه..
لما يبدا الكلام بالرمز هدا (♤) هذا يعني ان البطل يسرد في الاحداث
اما لما يبدا بهذا (🌿) يعني الكاتبه هي اللي تسرد..
🌺 فضل الحوقله 🌺
..الحوقله مفتاح لكل باب مغلق وسر من أسرار تحقيق الأمنيات وإستجابة الدعوات .
لو يعلم صاحب الحاجه ما في هده الكلمه من عون والتوفيق والسداد ماجف لسانه منها...
■■■■■■■■■■■■■■■■■■■■
🌿 " إن أفعالنا لن تكون حكيمة إلا بحكمة أفكارنا، وأفكارنا لن تكون حكيمة إلا بحكمة تفهمنا للأمور "🌿
••••••••••••••••••••••••••••••••••••••••••••••••••••••••••
♤أنجيلا..مرت جدي التانيه..اصولها عربيه لكن من جد جدها قاعدين في بريطانيا بوها واحد من اهم رجال الاعمال غادي وعضو في احد الاحزاب السياسيه وكان سفير سابق لبريطانيا في دول عربيه..تعرف ع جدي في وحدة من المحافل اللي يديروا فيهم جماعة الثروة والفلوس في العالم مؤتمر ولا اجتماع مش عارف..بس اللي نعرفه انه تعرف عليه غادي ومن اول لقاء تفاهموا ع الشغل مع بعض..
جدي ماكانش يعرف بنته سمع عنها منه سمع..طبعا عايلات الاجانب في هداكا الزمان كانوا محافظين لحد ما يعني مش واخدين هديكا الحريه ولأن عايلتهم من اصول عربيه كانوا واخدين الحاجه هادي بعين الاعتبار في تربية بناتهم وجدي كان عارف هالشي كويس ولما زاد سأل عليها تأكد منه وبعد ماعطاته جداي الموافقه سافر لبريطانيا وفتح الموضوع مع بوها اللي رحب جدا بطلبه وفرح بيه وقاله ان حيفتح الموضوع مع بنته..
وهي لأنها كانت صغيره ومطيعة لبوها وافقت ع الموضوع مبدئيا لكن طلبت تشوف جدي وتتكلم معاه...
ع فكرة كانت متعلمه تدوي عربي لكن مكسر...
🌿مقعمز في حديقة فيلا والد انجيلا كان يمرر في نظره ع المناظر الحلوة..
ع جيتها هي لما جو عيونها عليه وقفت..
وقفت بش تتأمله..تتأمل لبسه شكله جلسته نظرة عيونه كل اللي شافاته فيه خلاها تحس بإنجذاب غير عادي اتجاهه..
كان مختلف عن الرجاله اللي شافتهم في حياتها البيض الحمر بعيونهم الملونه وكبرهم الكاذب..
شافت فيه تفاصيل الرجل العربي المميزة والهيبه الجليه اللي واهبها الله للراجل العربي الأصيل اللي تخليه فريد في كل شي عن باقي الرجاله..
ابتسمت ابتسامه خفيفه وقدمت لين وصلت فيه وقالت بالعربي المكسر..
/مرهبا "مرحبا"
هو شافلها وتفاجئ..فوق جمالها صغيرة في السن..غير نظره عنها بسرعه وناض وهو يقول..
/اهلا..قعمزي..
هي لما سمعت صوته تسارعت دقات قلبها..
قعمزت وهي شاده ابتسامتها وهو قعمز مقابلها ورجع حط رجل ع رجل وهو يشوفلها بإبتسامه بعدين قال..
/نحكوا عربي عادي ؟
هي بإبتسامه قالت..
/امم..
تنهد بإبتسامه وقال..
/اول شي كيف حالك؟
قالت:كويس..
ضحك ضحكه خفيفه وقال..
/الحمد لله..
رفعت عيونها فيه وقالت..
/كيف هالك انت؟.
قاللها بإبتسامه..
/الحمد لله..
مررت نظرها ع المكان وهي مرتبكه..
هو قاللها..
/انجيلا..
شافتله طول وقلبها قريب يطلع من مكانه حبت اسمها بصوته هلبه..
هو كمل يقول..
/طلبتك للزواج من بوك وهو قالي تبي تحكي معاي..قولي كل شي عندك وأي سؤال يخطر ع بالك اسأليه ماتتردديش..
حمحمت بعدين قالت..
/انت..ليش تبي تتزوج انا؟
ابتسم وقال..
/عجبتني عيلتك قلت خل نزيد نربط روحي بيها..
قالت:يعني مش عشان شراكه انت وبابا؟
شافلها شويه بعدين قال..
/لاحتى ع خاطر هكي نبي نتشارك مع بوك في كل شي..
سكتت شويه بعدين قالت..
/زوجة انت موافقه؟
قال:طلبت اذنها وهي عطتهولي..
قالت:لاتحبها!؟
قال:بالعكس نحبها..
قالت:وكيف تتزوج غير هي!؟
ابتسم وقال..
/شي عادي مافيشي مشكله نهائي..
قالت:كيف مافيش مشكلة! انت تعرف تحب اتنين!؟
ضحك وقال..
/الراجل يحب تلاته واربعه عادي جدا..
فتحت عيونها ع وسعهم بصدمه..
ضحك بعدين قال..
/شوفي انجيلا..الاحترام والود في العلاقه الزوجيه اهم من الحب بمراحل..ولو صار نصيب الود والاحترام اللي نكنه لزوجتي الاولى حتاخدي زيه بالزبط..حنخليك تحسي انك زوجتي الوحيده ومالكش فيا شريكه وحندير نفس الشي معاها..
قعدت تشوفله بنظرات عدم اقتناع..
هو ابتسم وقال..
/ع العموم كل شي نصيب والامر متروك ليك انتي تفصلي فيه..ومانبيكش تخافي تاخدي قرار الرفض لو كنتي مش مقتنعه شغلي مع بوك مش حيتأثر نهائي..
قعدت تشوفله بنظرات رغم الخوف اللي فيهم باين فيهم الاعجاب كان جاذبها بكل شي فيه بالذات اسلوبه في الكلام وثقته بنفسه..
ابتسملها بصمت..
وهي ردت الابتسامة وقالت..
/استأذن..
وناضت ومشت وهو تبعها بعيونها وابتسامته قاعده ع وجهه..
♤وعاد جدي سلامه من هي المراة اللي تعرفه وماطيحش فيه! ع فكرة هادي وحده من الحاجات اللي ورثها لبوي وبوي ورثهالنا عندنا جاذبيه مافيش مراة تقدر تقاومها...
ع االمهم..خدت وقتها انجيلا في التفكير وكانت نتيجة تفكيرها الموافقه وتزوجها جدي حسب الشريعة الاسلاميه ودارلها غادي عرس ماخلاش بوها يصرف عليه سنت واحد وبعد اسبوعين من زواجهم جابها لليبيا..
اكيد معروفه حالة جداي كيف كانت قالت اسود ايام مروا عليا في حياتي هديكا الفترة ولولا وجود بوي وعمتي وعزوزتها ذهيبه معاها راهو صارلها شي من القهر والغيره..
قالت بعد روح بعت السواق يجيب امه للحوش اللي قاعده فيه انجيلا بش تتعرف عليها ماكانش يبي يجمعها بيها من البدايه..
🌿"هادي اللا ذهيبه امي"
سلمت عليها انجيلا بالخد وهي تقول..
/كيف هالك عمتي!؟
ذهيبه وهي مبتسمه قالت..
/الحمد لله الحمد لله...بعدت وهي تمرر في نظرها عليها وتقول..اللهم صل ع النبي اللهم صل ع النبي..
سلامه قال بإبتسامة..
/عجبتيها راهو..
ابتسمت انجيلا بخجل..
وذهيبه قالت بإبتسامة..
/سلمها سلمها..
▪▪▪▪▪▪▪
"مافيها ماينشبح ماتنحط حداك ولاتجي في ظفرك"
زكيه وهي شاده دموعها قالت..
/باهي سي سلامه ماقالش امتي بيجي؟
ذهيبه وهي شاده ذراع زكيه بلطف قالت..
/غدوة إن شاء الله وقال بيبدا يقسم بينكم الايام يوم عندك ويوم عندها..
تنهدت بحزن وهزت راسها بصمت..
مسحت ذهيبه ع شعرها وهي تقول..
/بري سلم بنتي ارقدي وارتاحي ولدي ونعرفه ماتاخد مكانك عنده مراة لو من تكون..
يدوب ابتسمت بعدين باست راس عزوزتها وقالت..
/تصبحي ع خير عمتي..
ذهيبه:قدامك كل خير بنتي...ومشت زكيه من قدامها وهي معاها بنظراتها المتعاطفه وبعد درقت عنها قالت بهمس..ربي يكبر محبتك في قلبه اكثر واكثر..
♤اكيد اهلها عندهم علم وماكانش عندهم مانع ولامشكله بالذات وبنتهم راضيه علاش بيعترضوا!؟ اساسا هداكا الوقت كان التعدد حاجه عاديه جدا..
🌿🌿🌿🌿
حاط يده ع خدها وهو يقول..
/بنستاحشك هلبه من اليوم لغدوة..
انجيلا بنظرات كلها هويام قالت..
/حتى انا بنستاحش انت بهلا بهلا..
ضحك بصوت عالي بعدين قال بضحكه..
/هلبه..هلبه..
هي عقدت حواجبها وقالت بضحكه..
/كلمه صعبه كتير..
ابتسم وقال..
/قوليها بالانجليزي..
قالت:لا..نبي نتعلم ليبي..
باس جبينها وقالت..
/تو تتعلمي مع الوقت..المهم توا ردي بالك ع روحك باهي..
تعبوا عيونها دموع وهي تقول..
/حتى انت..
هز راسه ومسح ع شعرها بعدين لف ومشي وهي تبع فيه بعيونها اللي نزلوا دموعهم..
🌱قبل ليطلع وصى عليها الوصيفه اللي دارهالها بش تقعد معاها ووصى الحرس اللي مدايرهم للحوش بعدين تحرك بإتجاه "قصر ذهيبه"
🌺🌺🌺
خش للقصر وفي يده باقة ورد وعقله يفكر في الحاله اللي بيلقى عليها زكيه كان خايف يشوفها ع حال يوجع قلبه..
"بابا"
ضحك لما شاف بنته هانيه جاياته تجري وهي فرحانه..
ضمها ورفعها لحضنه بعدين باس خدها وقال..
/حبيبة بابا..
هانيه:استاحشتك بابا..
قال:واني اكثر ياعيون بابا..وين خوك؟
هانيه:مشي مع حنينه لحوش محفوظ
هز راسه بعدين قال..
/باهي وماما؟
قالت:ماما مقعمزة في الجنان..
نزل بنته وشد يدها وقال..
/تعالي نمشولها..
ومشي هو وياها بإتجاه حديقة القصر اللي كانت كبيرة جدا وواسعه بمساحة حديقة عامه..
طلعوا برا لقوها مقعمزة ع كرسي قريبه ع شجرة ورد وشادة كتاب وتقرا..
هو قعد واقف يشوفلها بمفاجأه..
كانت بكامل اناقتها زي عادتها وشاده الكتاب ومنسجمه معاه..
اللي فاجئه حالها..توقع يلقاها شاده تركينه وتبكي ولايلقاها في حالة سيئة..لكن اللي شافه خلاه فوق تعجبه يزيد اعجاب بيها وقلبه يزيد يحبها اكثر واكثر..
"ماما بابا جي"..
نزلت الكتاب وقامت عيونها فيهم رسمت ع وجهها ابتسامه حلوة بعدين ناضت قدمتله..
وصلت فيه وقالت..
/حمد لله ع سلامتك ياسي سلامه..
خدت يده وباستها بعدين باست راسه وقالت..
/كيف حالك..
هو كان يشوفلها بهويام ويقول..
/توا بس ولى باهي..
ضحكت بخجل وشافت لبنتها وهي تقول..
/بري العبي ماما..
ابتسمت هانيه وهي تقول..
/حاضر..ومشت وخلتهم..
حطت زكيه ايديها ورا ظهرها وهي شاده الكتاب بعدين شافتله وقالت برفعة حواجب..
/ماشاء الله مزيان وسامن..
مدلها باقة الورد بدون مايتكلم كان هايم فيها وبس..
هي ضحكت وخدت الباقه وقالت..
/سلمك جياب..وقربت الورد ليها وقعدت تشم فيه..
وبدون سابق انذار لقت روحها في حضنه وسمعاته وهو يقول..
/استاحشتك هلبه ياغاليتي..
هي قالت بإبتسامه وعيونها مليانات دموع..
/واني اكثر..
♤جداي زكيه مراة ذكيه وحكيمه في اغلب حالاتها وكانت تعرف تتصرف صح هدا علاش قعدت مكانتها في قلب جدي كبيره ومش غير عنده هو بس حتى اهل الألف والخمسين مراة ليها يد في الخير ولازم يحضروها في كل مناسبه تصير عند اكابر عائلات الالف وخمسين وحتى انها كانت تخش في مشاكل وتحل فيهم..كان زوجه لايقه بسلامة بيت المال من كل النواحي وهو بشخصيتها هادي كان يزيد حب ليها اكثر واكثر
🌿وتمر الشهور ع زواج سلامه من انجيلا..وخلال هالشهور مااجتمعوش انجيلا وزكيه..لكن ذهيبه كانت تمشي لأنجيلا مرتين في اسبوع..
انجيلا بدت تتعود ع حياتها في ليبيا وحبتها من حبها لسلامه اللي كانت غارقه فيه..لكن كانت عندها رغبه تتعرف ع ضرتها وصغار راجلها..
🌱"انت قلت نحنا عيلة وحده لما نجيب بيبي لازم يعرف اخواته ويكبر معهم صح ولامش صح!؟"
بضحكه قال..
/وصح الصح..
ابتسمت وقالت..
/خلاص انا عازم زكيه دغوة..
ضحك وقال..
/باهي خليني نشوف زكيه ونرد عليك يادغوة انتي..
بضحكه قالت..
/صعبه كتير...
▪▪▪▪▪▪▪
"ماعنديش مشكله"
سلامة قال وهو مبتسم..
/توقعتك توافقي..
زكيه:اني كنت نبي نفتح معاك الموضوع هدا حتى فكرت نرفعها معاي لللمة اللي بيديروها عيلة الهاشمي اخر الاسبوع نبي نعرفها ع ناس الألف وخمسين ونخليهم يتعرفوا عليها..
هز راسه بالموافقه وهو مبتسم...
🌿وجي تاني يوم ورفع سلامه امه ومرته وصغاره لحوش مرته التانيه..
ولما وصلوا غادي لقوا انجيلا في استقبالهم..
الضراير لما شافوا بعض انصدموا في بعض وركبت فيهم نار الغيرة وذهيبه قعدت مركزه عليهم وهما يسلموا ع بعض..
زكيه وهي مبتسمه بتصنع..
/كيف حالك؟
انجيلا بنفس الابتسامه..
/كويسه..انت كيف حالك؟
زكيه:الحمد لله..
سلامه وهو مبتسم قال..
/وهادم تسعة وهانيه..
مدت زكيه يدها لتسعه وهي تقول..
/ماشا الله ..ماشا الله..جميل كتير..
صافحها تسعه وقال..
/هادي مرتك الانجليزيه بوي؟
سلامه بإبتسامه..
/ايه هي هادي انجيلا..
طلق يدها وقال..
/اني تسعة الولد الكبير عمري 10 سنين..
انجيلا قالت بإبتسامه..
/وانا انجيلا عمري 19 سنة..
ضحكوا عليها كيف نطقت رقم 19يالليبي..
شافت لسلامه وقالت بضحكه..
/صعبة كتير..
وسلامه يشوفلها وهو يضحك وعيون زكيه المليانات دموع عليه وبنتها هانيه تشوفلها وهي حاسه بيها وفاهمه كل شي..
شافتلها انجيلا وقالت..
/كيف حالك ياحلوة..
قلبت هانيه عيونها وقالت..
/كويسه..
ذهيبه انصدمت وزكيه شدت بنتها من يدها بقوة وقالت..
/سلمي عليها ماما..
مدت هانيه رووس صوابعها وهي تشوف ليد انجيلا بإزدراء ويدوب سلمت عليها..
وانجيلا بلعتها وفوتت بعدين قالت بإبتسامه..
/تفضلوا تفضلوا..
خشوا كلهم وسلامه مشي جنبها وقعد يطبطب ع ظهرها وهي شافتله بإبتسامة حب..
والحركه هادي شافتها زكية وقعدت النار تاكل في قلبها وحاولت ع قد ماتقدر تتمالك نفسها ودير روحها عاديه وعزوزتها حاسه بيها..
🌱واجتمعوا ع طاولة الغدي وانجيلا كانت تتعامل مع زكيه احلى معامله وزكيه كذلك،قدام سلامه كل وحده فيهم كانت تبي تبان احسن من التانيه..
انجيلا:تبي عصير تسعه؟
تسعه:لاشكرا..ممكن نسألك سؤال..
بوه ضيق عيونه وهو يشوفله بإبتسامه..
انجيلا قالت بإبتسامه..
/أسأل حبيبي..
تسعة؛ماتبيش تولي مسلمة؟
كلهم شافوا لأنجيلا واكثر من يراجي في اجابتها سلامه..
هي بإبتسامه قالت..
/اكيد نبي..قرأت كتير ع الاسلام وحبيته انت ادعيلي نولي مسلم قريب..
قاللها بإبتسامة..
/ان شاء الله تحضري رمضان وانتي مسلمه..
انجيلا بإبتسامه..
/شكرا..
وبوه قال:آمين..
شافتله انجيلا وابتسمت وهو ردلها ابتسامه وزكيه وهي تشوفلهم كانت حاسه روحها بتموت..
ذهيبه:ان شاء الله بش تغيري اسم نجيلة هدا..
ضحكوا انجيلا وسلامه اللي قال..
/انجيلا يام انجيلا..
قالت:اللي هو مش عاجبني..
ضحك سلامه وقال..
/لما تسلم بإذن الله بنعطيها اسم ليه مده في بالي..
انجيلا قالت..
/ممكن اعرفه؟!
قاللها:آسيا..
بفرح قالت..
/الله حلو كتير..
قاللها:الاسم هدا كان اسم زوجة فرعون..
تسعه قال:تخليني نحكيلها قصتها بوي؟
ابتسم سلامه وقال..
/احكي..
وبدي تسعه يحكي في قصة آسيا اللي اثرت في انجيلا هلبه
تسعه:وقالت لربي ربي ابني لي عندك بيتا في الجنه..من كثر ماكانت تحب ربي دعت يديرلها حوش في الجنه عنده هو تبي تكون قريبه عليه..يقولوا اختارت الجار قبل الدار.
ذهيبه بإبتسامه:الله يبارك ع وليد ولدي الله يبارك ع بي البيين..
سلامه وهو مبتسم..
/احسنت ولدي..شاف لأنجيلا لقاها تمسح في دموعها وهي مبتسمه ابتسم..
وزكيه حست روحها هداكا الوقت مالهاش وجود هكي حسسها سلامه لأن طول الوقت ماكانش يشوف غير في انجيلا..
🌱وروح بيهم من غادي وولى لأنجيلا بش يكمل يومه معاها ع حسب الدور..
هديكا الليله زكيه ماقدرتش ترقد غمضه كانت تصلي وتبكي وتدعي ربي يصبر قلبها ويبرد نارها ويعطيها الحكمه ومايخليهاش تخسر حب راجلها ومكانتها عنده..
ومن بعد هديكا الليله بدت زكيه تحاول تبرد قلبها وتكمل في اللي كانت دير فيه وهو التعاطي مع وضعها بحكمة وهدوء..
وجي يوم اللمة ومشتلها هي وضرتها الناس لما شافوا ضرتها انبهروا بيها برغم ان زكيه كانت اجمل منها لكن الناس هداكا الوقت كانت تلفتهم هلبه الشقوريه والعيون الملونه لأن وجود اصحابهم كان نادر او محدود بمناطق معينه زي جبل نفوسه..
🌱وقعدت زكيه تعرف في ضرتها ع اكابر نساوين "الألف وخمسين" اللي كانوا سلفاتها السابقات منهم..ارملة منصور كانت متشمته في زكيه شماته لاتوصف اما ارمله عبد الهادي كان عاجبها حال زكيه كيف تحاول تبين روحها عاديه وقويه وتتعامل مع الموقف بأريحية
🌿وتعدي الايام واخيرا خشت انجيلا الاسلام ومن فرحة سلامه بيها ذبح وصدق وغرق فقراء الالف وخمسين بالعطايا
ودارلها حفله بسيطه دابهم دارت فيها زكيه تصرف حلو بالمرة زاد كبرها في عين راجلها.
🌱"جميل جدا شكرا"
قالت الكلام هدا انجيلا اللي ولى اسمها اسيا بعد ماخدت الهديه اللي جابتهالها ضرتها وكانت طقم ذهب غالي..
زكيه:ربي يثبتك..
هي قالت بإبتسامه..
/آمين..
تسعه قدملها وقال..
/وحتى اني بنعطيك هديه..مدلها كيس صغير من قماش شكله حلو بالمرة خداته وهي تقول..
/شكرا..تسعه..
سلامه وهو مبتسم بإستغراب قال..
/ترا افتحيه وشوفي شن فيه..
ابتسم تسعه..
هي فتحت الكيس وطلعت منه سلسال ذهب فيه تعليقه ع هيئة دائرة منقوش عليه اسم اسيا..
هي بإنبهار قالت..
/حلو حلو يجنن..
تسعه قال بإبتسامه..
/اني درته ونقشت اسمك عليه..شاف لبوه وقال..ساعدني فيه مرعي شويه..
🌱قال هكي ع اعتبار ان مرعي يملك محلات ذهب هدا جزء من الورث اللي قعد من بوه..
سلامه وهو مبتسم بإعجاب قدم لولده وهو يقول..
/ماشاء الله..ماشاء الله..وطبس عليه باس راسه..
ذهيبه قالت بإبتسامه..
/ليه وقت متعلم الحاجه هادي يخي قالي نبي نصنعلك خاتم ذهب ياحناي..
زكيه قالت بإبتسامه..
/حتى اني قالهالي..
ضمه بوه وقال..
/ربي يحفظك ياولدي..
ذهيبة وهي مبتسمة وعيونها مليانات دموع قالت..
/سلم بي البيين..كبير الألف وخمسين..
ضحكوا وتسعه قال..
/مافيش كبير للألف وخمسين غير بوي ياحناي..
ضمه بوه بقوة وهو يضحك..
وحناه ذهيبه قالت بضحكه..
/نجيه وسلمه ياربي نجيه وسلمه..
وامه ومرت بوه كانوا يشوفوله بإبتسامه...
▪▪▪▪▪▪▪
"عجبها هلبه وقالت شكرا كتير تسئة"
ضحكوا ولاد عمه بعدين محفوظ قاله..
/لكن اني مستغرب فيك كيف تحب مرت بوك..
رفع تسعة حواجبه وقال..
/علاش!؟
محفوظ:كيف علاش!؟ المراة هادي خداها ع امك كان اني بوي قاعد حي وخدي ع امي مانشحبش في وجهها..
تسعه:علاش نديرلها هكي كان هي مادارتلي شي!؟ هي مراة كويسه ومع امي كويسه مانكرههاش ع خاطر بوي خداها ع امي راهو هدا شرع ربي..
مرعي ولد عمهم كان مقعمز حداهم يسمعلهم وهو مبتسم التفت عليه تسعه وقاله..
/مش ربي قال يامرعي..فأنكحوا ماطاب لكم من النساء مثنى وثلاث ورباع؟
هز مرعي راسه وهو مبتسم..
رجع شاف تسعة لمحفوظ وقاله..
/هاه ريت مش غلط ولاحرام..
محفوظ شاف لمرعي وقال..
/تو انت يامرعي بتتزوج اربعه؟
بضحكه قاله..
/لا اني ان شاء الله ناخدها وحده بردع اربعه..
محفوظ قال..
/حتى اني..
تسعه وهو يشوف لمرعي قال..
/مرعي انت كبير علاش ماتتزوجش؟
ضحك مرعي وقال..
/مازال شويه..
محفوظ:وليت تخدم وعمي عطاكم ورثكم من بوك معناها خلاص لازم تتزوج..
مرعي:نزوج خواتي بعدين نتزوج..هي توا ياسركم دوة وخلونا نراجعوا الورد...
▪▪▪▪▪▪▪
"خواتك مسؤوليتي اني يامرعي"
مرعي:مسؤوليتي اني بالدرجة الاولى ياعمي نتهنى عليهم بعدين نلهى بروحي..
سلامه هز راسه وقال..
/باهي بنقولك..اختك الكبيره جاها موضوع زواج،ولد الحاج الهاشمي جاني امس للمصنع وفتح معاي الموضوع..
مرعي:انت شن رايك فيه ياعمي؟
سلامه قال:الشاب واهله ماشاء الله عليهم وانت شوف روحك كان تبي تزيد تسأل عليه وتتأكد..
مرعي:لاياعمي مدام انت شكرت فيه خلاص الحاجه اللي تجي من تالاك كلها خير..
طبطب سلامة ع كتفه وقال في نفسه..
"الحمد لله اللي ماخلاكش تجيب من طبع بوك شي"
♤كلهم صغار عمام بوي ماجابوش من طباع ابائهم بكل كلهم طلعوا لجدي سلامه..ممكن لأن هو اللي رباهم من لما جو للدنيا..مرات نقول ان ربي ماباش يرزق جدي بهلبه صغار بش يرعى صغار خوته..بصراحه اني عندي جدي مازال خير من بوي راجل قل نظيره عادل لأبعد حد..مع نساوينه عادل مش مقصرفي حقهم ولامفضل وحده ع تانيه عادل في معاملته لصغاره وصغار خوته..عادل حتى في معاملته مع الناس اللي يخدموا تحته..وسبحان من عطاه القوة والذكاء وروح القياده اللي خلوه ناجح ع جميع الاصعدة..في اسرته..في علاقاته الاجتماعيه..في ادارة رزقه وارزاق صغار خوته..نشوف فيه شخصيه ماتتكررش تفوق حتى ع بوه اللي سموني ع اسمه..
🌿🌿🌿🌿🌿
وحملت "آسيا" وكان الحمل متعبها..وحمها كان واعر لهدا قعدت معاها ذهيبه الى جانب وصيفتها وقعدوا يعانوا فيها..
في الوقت اللي كانت فيه زكيه متفرغه لتربيه صغارها وواجباتها الاجتماعيه..
اما سلامه في هالفترة انشغل بمشاريعه يطلع برا البلاد ويقعد مسافر بالشهور..
وفي اواخر اشهر حمل آسيا..
كان كيف مروح من السفر طول خداها ورفعها للمستشفى بش يعرفوا جنس الجنين..
🌱"ماشاء الله ماشاء الله زوجتك حامل بتوأم يابيي سلامه وليد وبنيه"
هو بإبتسامة فرح قال..
/ماشاء الله ماشاء الله..التفت ع مرته وقال..سمعتي ياآسيا؟
اسيا وهي تمسح في دموع الفرح قالت..
/ايه الحمد لله..فرحانه بهلا بهلا..
ضحكت الطبيبه وهو ضحك معاها وهي قالت بضحكه احراج..
/صعبة كتير..
▪▪▪▪▪▪▪
"كول تولمه كول درتها انا"
كلي طرف "دولمة" وقال..
/ماشاء الله ماشاء الله..تسلم ايديك
اسيا:تعلمت حاجات تاني من عمتي بس مازال بازين صعب شوية..
قاللها:انتي توا ريحي روحك ومعاش ديري شي بعد تجيبي ع خير بإذن الله تعلمي اللي تبيه..
بإبتسامه قالت..
/ان شاء الله..
هو شرب من العصير بعدين قال..
/قداش قعدت معاك امي واني مسافر؟
اسيا:شهر وكانت تبي تزيد لكن من يومين روح ع شان زكيه مريض..
بفجعه قال..
/زكيه مريضه!
هي بخوف قالت..
/ماتخافش هي كويسه توا..
ناض طول ومشي بإتجاه الهاتف الارضي وعيون آسيا عليه..
اتصل برقم القصر ردت عليه وحده من الخدم طلب منها تنادي زكيه..لحظات وردت عليه امه..
"ايوه ولدي حمد لله ع سلامتك"
هو بخوف قال..
/الله يسلمك..يام زكيه وين؟
"مريضة شويه وليدي بردة وتمشي ع حالها"
هز راسه وقال..
/باهي باهي..سكر السماعه ومشي طول بإتجاه دار النوم بدل حوايجه وطلع بسرعه وخلا آسيا مضايقه ودموعها تنزل..
▪▪▪▪▪▪
"والله بردة عاديه ياسي سلامه"
وهو حاط يده ع خدها قال بخوف ..
/وجهك اصفر وضاعفه وتتكلمي بالسيف..
ابتسمت وقالت..
/والله حالي باهي وخير من قبل..
قاللها:قصدك انتي هكي خير من قبل؟
ضحكت وقالت..
/والله مافيا حاجه..
تباعد عنها ومشي للدولاب بش بيطلع منه حوايج ليها وهو يقول..
/تو تمشي معاي المستشفى مانبيش نقاش..
🌿ورفعها المستشفى تعاين بعد الفحص كتبلها الطبيب مجموعه ادويه خداهم سلامه وروح بيها..
🌱سلامة:بري انتي يام اقعدي معاها اني بنقعد هني حدا زكيه لين تصح..
امه قالت:حاضر ولدي اللي تبيه..
مشي من قدام امه وولى لدار النوم وامه بعد ماابتسمت مشت تجهز نفسها بش تمشي لحوش آسيا...
♤الراجل ممكن يحب اكثر من مراة لكن وحده بس هي اللي تاخد منه قلبه وتخليه عندها هادي مايقدرش يتحمل يعيش من غيرها وهكي كان حال جدي مع جداي زكيه وحال بوي من بعده مع وحده من نساوينه وحالتي اني بعدهم..
"أنت شمسي التي أحظى بها وحدي
ما طاب بعدك صوتٌ أستهلُّ به يومي!"
ااه..ماطاب بعدك صوت استهل به يومي...
🌿🌿🌿🌿🌿
وجابت اسيا توأمها في المشفى ولما طلعت منها لقت عزوزتها مع ضرتها يستقبلوا فيها في حوشها..
🌱لبست زكيه البنيه والوليد رشقات ذهب وفضه وهي تقول..
/ربي يحفظهم ويرعاهم ويفرحكم بيهم..
آسيا بإبتسامه قالت..
/شكرا كتير..
التفتت زكيه ع راجلها وقالت..
/مازال مااخترتوش اساميهم؟.
سلامة:اني نبي امي تسميهم..
ذهيبه شافت لآسيا..
/واني نبي زكيه تسميهم ياصفيرة انتي..
زكيه بصدمه..
/اني!؟
ذهيبه:منين قالي سلامه سميهم انتي يام قلت بننشد زكيه كان في بالها اسم انتي قتيلي ع اسامي قنينه..
شافت زكيه لآسيا..
وآسيا شافت لسلامه وقالت بإبتسامه..
/اذا سلامه يبي هكي انا نبي..
ضحك وقال..
/شن في بالك اسامي يازكيه؟
زكيه شافت للصغار بعدين ابتسمت وقالت..
/قيس وبلقيس..
ابتسم سلامة من قلبه..
وذهيبه قالت:ايوه هما هادم..
آسيا شافت لسلامة وقالت..
/عجبك سلامه؟
شاف لزكيه وقال..
/هلبه..
ابتسمت زكيه بخجل وآسيا شافتلها بغيره بعدين شافت لسلامه وقالت وهي مبتسمه..
/اذا يعجب سلامه يعجب انا..
ابتسم وقال..
/خلاص..قيس سلامه بيت المال..وبلقيس سلامة بيت المال..
🌱برا الدار اللي هما فيها في وسط الحوش وين ماكانوا مقعمزين تسعة وهانيه..
تسعه بتذمر:هيا عاد امتى ينادونا بش نشوفوهم..
هانيه وهي مربعه ايديها قالت بحده..
/شوفهم انت اني مانبيش..
عقد حواجبه وقال بغضب..
/هي انتي هادم خوتك راهو..
قالتله:انت خويا بس ولد ماما زي مااني بنت ماما..
قاللها:تعرفي ديري هكي بوي يحرج منك ومعاش يكلمك بكل..
فكت ايديها ونزلتهم وقعدت تشوف لخوها بخوف وضيق..
♤قالت جداي بعد ماجابت آسيا كثر مشيهم وجيهم ع بعض ع خاطر الصغار وهدا بأمر جدي كان يبي الخوت ياخدوا ع بعض وحتى يبيهم يتحابوا هما وصغار عمهم..
وقعد هالحال سنين فهالسنين زوج بوي بنات خوته منصور وعبد الهادي كلهم وبعد عطاهم لأحسن رجاله وعايلات وتهنى عليهم فكر يزوج مرعي لكن مرعي قال انه مايبيش يستعجل في موضوع الزواج يبي يكمل جامعته وياخد الماجستير بعدين يتزوج وجدي خلاه ع راحته..
اما بوي لما وصل لسن 15 عام مع محفوظ ولد عمه قرر بوي يدخلهم معترك الحياة بكري بكري..كان يبي يعلمهم الزوز وبالذات بوي قيمه القرش اللي يجي بتعب ويخليهم يعرفوا الدنيا الصح لما يحتكوا بناس من طبقة اجتماعيه مختلفه عنهم بش يتعلموا المرونه وفي نفس الوقت يقدروا قيمة الحياة اللي عطهالهم الله سبحانه وتعالى..
قالي بوي ماخلا في شن خدمنا جدك خلانا نبيعوا في السوق الكبير الشعبي في الالف والخمسين بعدين خلانا نخدموا عمال في المصنع بأسماء غير اسمائنا..وكل مرة يحطنا في مكان يخلينا نخدموا من الصبح ونروحوا لما طيح الشمس..قالي امي كانت تتعامل معاي زي بوي بالزبط لافي مرة ريتها قالت حرام ولاياناري كانت تربي فيا راجل لكن حناي هي اللي كانت تسخف عليا مرة مرة وكانت تعارك في بوي وامي ع خاطري..
وقعد بوي ع هالحال لعند ماتخرج من الثانويه بمجموع قوي خلاه يكون الاول ع البلاد كلها ومحفوظ هو التاني ولأنهم من المتفوقين عطتهم الدوله هما والثلاثه الاوائل اللي يجوا بعدهم بعثة دراسيه في بريطانيا...
وطلع بوي هو وولد عمه وصديق عمره محفوظ لبريطانيا وهكي خشوا مرحلة جديده في حياتهم مرحلة الغربه اللي تزيد تقوي عود الراجل وشخصيته وتعلمه دروس يادروس...
...يتبع....
