#ولاد_تسعة "الفصل الاول/سميه تسعة"
#جمان_فريد
الجزء_الثامن"رحيل5"
⛔احداث هذه الروايه وشخصياتها من وحي الخيال بعض الاحداث غير واقعيه"فنتازيه" وبعضها بعيد عن واقعنا المعاش والبعض الاخر يلامس شيء من الواقع⛔
⚠️ملاحظه..
لما يبدا الكلام بهذه الرموز (♤ ♧) هذا يعني ان البطل/ة يسردوا في الأحداث..
اما لما يبدا بهذا (🌿) يعني الكاتبه هي اللي تسرد..
#ذكر_الله
أعوذ بكلمات الله التامات التي لا يجاوزهن بر ولا فاجر من شر ما خلق وذرأ وبرأ، ومن شر ما ينزل من السماء، ومن شر ما يعرج فيها، ومن شر ما ذرأ في الأرض، ومن شر ما يخرج منها، ومن شر فتن الليل والنهار، ومن شر كل طارق إلا طارقا يطرق بخير يا رحمن..
■■■■■■■■■■■■■■■■■■■■■
🌿ما كل نفسآ نستطيع فراقها
ففراق من سكن الفؤاد ممات🌿
•••••••••••••••••••••••••••••••••••••••••••••••••••••••••••
في مكتبه وسط القصر..
كان مقعمز ومقابله نديمه يخبر فيها عن اخر المستجدات..
🌱جمال:الناس اللي وصلنالهم سلموهم..
تسعه قاله..
/تأكدت من كل شي بروحك؟
هز جمال راسه بصمت..
تسعه قال..
/خلاص خلال اليومين هادم سلموا كل شي للشرطه..
جمال:حاضر..
تسعه:شن في تاني؟
عقد جمال حواجبه وقال..
/الفترة اللي فاتت وصلتني معلومات عن نية كمال إنشاء قوة مسلحة تابعه لعيلة البندار..
تسعه ضيق عيونه وقال..
/شني!؟
جمال قال..
/في هلبه عائلات مهمه دايرة نفس الشي بس اللي يبي يديره كمال اكبر من كونه قوة حمايه لعايلتهم..
تسعة:المعنى!؟
جمال:حجم ثروة كمال البندار قاعد يكبر بشكل رهيب وبسرعه وهذا يتناقض مع وضعه كتاجر عادي زي باقي التجار في السوق الكبير..
تسعه:شن هي المعلومات اللي وصلاتك عنه؟
جمال قال..
/اللي وصلني ان عنده اصول واملاك في الخارج مسجلها بأسماء ناس تانيه تمويه وغير هكي في شركه معروفه في وحده من الدول العربيه المالك متاعها ليبي اسمه "رمضان بشير" الشركه هادي ليها 4سنين متأسسة وقاعده تكبر بسرعة والحاجه هادي خلت الشكوك دور حواليها ولما دورت وراها اكتشفت ان رمضان هدا عنده علاقه تربطه بالزقطي تاني اقرب رجال كمال البندار ليه..
تسعه وهو يفكر قال..
/تبي تقول ان عيلة البندار ولوا لعمل جدودهم الأول..
جمال:هدا الواضح بس اللي مخليني مرتاب حكايه القوة المسلحه..معروف كمال البندار شخص اهوج وحقود وزيه زي غيره من البنداريه مش قادر يتخطى الثارات والمشاكل اللي كانت بين العيلتين،هدا غير الوضع بينك وبينه يعني كل شي متوقع القدام..
تسعه شافله شويه وقال..
/هات من الآخر ياجمال..
جمال:يقولوا من خاف سلم واني نقول من احتاط سلم لازم تكون في قوة مسلحة تابعه لعيلة بيت المال لحمايتها من أي خطر ممكن يهددها مستقبلا..عارف انت بلادنا تحكمها القبليه لادولة ولاحكومه ولاغيرهم السلطه العليا فيها للقبيله يعني كان صار ماصار ماتراجي من الدوله ديرلك شي بالذات في الألف والخمسين المدينه اللي الحكم الفعلي فيها لكبار عايلاتها..
♤كلام جمال كان دقيق ورأيه في محله لكن بوي زي ماتعود ماياخدش خطوة قبل ليدرسها من جميع النواحي والخطوة هادي مهمه وخطيره غيره ماياخدش وقت في تنفيدها لكن بوي ديما ليه حسابات تانيه..
🌿بعد تم اجتماعه بجمال طلب من رئيسة الخدم في القصر"برنيه" تناديله زوجاته وهي مشت لكل وحده فيهم وين ماكانت..
نزيهة بالمكتب الخاص بيها اللي تشوف فيه مايخص شغلها في المصنع وباقي املاكها..
وفريحه كانت في حديقه القصر مع الصغار تقري فيهم..
وربيعه مقعمزة ع بعد مسافه منها تسمع لدروس اللغة الانجليزيه..
بعد ماعطتهم برنيه خبر مشوا من فورهم وفي ممر المرايات تلاقوا مع نزيهه..
كالعاده ربيعه كانت متجاهلتها تجاهل تام ونزيهه كان تلقى تخفيها من الوجود لكن فريحه في وسطهم عقلها كان مع تسعه بس..
وصلوا لمكتبه لقوا بابه مفتوح...
فريحه قالت:قدمي نزيهه..
مشت نزيهه في مقدمتهم للباب دقت عليه..
"تفضلوا"
خشوا ورا بعض،شافوه واقف ع واحد من ارفف مكتبته خدي منه ملف ورجع لمكتبه وقال..
/علاش واقفات؟قعمزوا قعمزوا..واشرلهم ع كنبه مقابله مكتبه..
قعمزوا الثلاثه وهما يشوفوله..
هو حط الملف وحول نظاراته حطهم فوق الملف بعدين مرر نظره عليهم وقال..
/شيهانه شادن حالكم باهي اموركم تمام؟
الزوز ردوا عليه بأصوات متقطعه..
"في خيار الخير..الحمد لله"
ابتسم وقال..
/عجبتكم الهدايا؟
نزيهه قالت بإبتسامه..
/غالبا ذوقك لايعلى عليه..
بدت ع وجه ربيعه ملامح تهكم خفيفه..
هو كذلك فهم تلميح نزيهه لكن تجاهله وقال لفريحه..
/وانتي يالشادن؟
ابتسمت فريحه وقالت..
/كله حلو.
نزل عيونه للملف وهو مبتسم وربيعه ركزت عليه..
رفع حواجبه بعدين رفع عيونه ورد نظره لنزيهه وهو يقول..
/رفعتي راسي في دبي منتجات البستان مكتسحة السوق في الخليج بصفه عامه..
هي قالت بإبتسامه..
/الحمد لله..ومازال بنخشوا ع الأقوى بإذن الله
قاللها؛شن ماتبي قولي..
قالتله:توا مانبيش كان وجودك ودعمك ليا بكلامك اللي يخلي معنوياتي في السمي..
هز راسه وقال بإبتسامه..
/من غير ماتقولي..واني نبيك ديما زي ماعرفتك مراة مولات عقل كبير وقلب صافي..
فريحه شافتلها بطرف عينها وربيعه ابتسمت وهي تشوف لتسعة..
نزيهه اللي حافظت ع ابتسامتها ع قد ماتقدر قالت..
/ان شاء الله ديما نكون كيف ماتبي..
هز راسه وقال..
/ان شاء الله..غير نظره لفريحه وقال..شن دايرين الصغار مع القرايه؟
قالتله بإبتسامه..
/ الكبار شادين ليه ليه لإمتحانات لكن اشرف وفاضل عطلوا الاسبوع اللي فات..
قاللها:عندي علم..وزع نظره عليهم وقال..كلكم نبيكم تهتموا بقراية الصغار حتى انتي ياربيعه زي مافهمتك قبل هادم صغارك حتى انتي..
نزيهه قالت..
/من رأيي لو تعفيها من حكايه تدريس الصغار خليها تلهى بدروس الانجليزي افضل..
شاف لنزيهه شويه بعدين رد نظره لربيعه وقال..
/نبيك تهتمي بكريمه...
فريحه شافت لنزيهه لقتها تشوف لتسعه بملامح وجه هاديه لكن نظرة عيونها كانت تبين حجم عاصفة الغضب اللي هبت في داخلها..
"حاضر"
بعد ماردت ربيعه ع تسعه قاللها..
/يحضرلك الخير..رجع وزع نظره بيناتهم وقال..
/من الليله حتتقسم بينكم الايام والبدايه مع اول الخير الشيهانه..
ابتسمت نزيهه بالغصب وهي تهز في راسها بإيجاب..
تنهد وقال..
/امي ومرت بوي امتى يروحوا؟
فريحه قالت..
/عمتي قالت بعد آذان العشي..
عقد حواجبه وقال..
/وهانيه هانم؟
فريحه:ساعه تانيه وتخش..
هز راسه بعدين قال.
/كان ماعندكم شي تبوا تقولوه تقدروا تتفضلوا..
ناضوا الثلاثه وهما يقولوا بأصوات متقطعه..
"سلامتك"
ابتسملهم وهما ردوله الابتسامه ومشوا طلعوا مع بعض وكانت ربيعه اخر من طلعت لما جت بتسكر الباب شافت لتسعه بإبتسامه حلوة هو ردهالها بعدين سكرت الباب وهو رجع لبس نظاراته وفتح الملف اللي قدامه..
🌿في ممر المرايات..
كانوا يمشوا مع بعض بصمت للحظات بعدين نزيهه قالت..
/تو انتي شن تفهمي فيه منهج صف رابع؟
فريحه شافت لربيعه اللي قعدت ساكته..
نزيهه وقفت وقالت بحده..
/انتي نكلم فيك؟
فريحه شدت يد ربيعه ووقفتها..
شافتلها ربيعه وقالت..
/خيرك؟
فريحه قالت..
/نزيهه تكلم فيك..
شافتلها ربيعه وقالت..
/سامحيني ماانتبهتش..
دامتلها نزيهه النظر لثواني بعدين قدمتلها خطوة وقالت..
/ننصحك نصيحه ياريت تاخدي بيها ديري بينك وبيني حدود واتقي شري احسنلك..وبعد مارمقتها بنظره احتقار مشت كملت طريقها..
فريحه شافت لربيعه لقتها تشوف لمكان نزيهه وهي مبتسمه بتهكم تنهدت وقالت..
/طبعها صعب لكن قلبها طيب مع الوقت تتعود عليك وتحبك..
شافتلها ربيعه بإبتسامه وقالت..
/عادي نشرب معاك فنجان قهوة ؟
ابتسمت فريحه وقالت..
/عادي..ومشت وربيعه مشت معاها وهي مبتسمه..
🌿🌿🌿🌿🌿
وفي احدى النوادي الرياضيه اللي يكونوا اعضائها اصحاب الطبقة المخمليه..
كانت هانيه مقعمزة مع صديقه ليها اسمها "تيسير" صديقتها هادي بنت من بنات ثالث اكبر عيله في الالف وخمسين ومن اهم واغنى العائلات في البلاد..الهاشمي..
كانت جايه للنادي مع ولد خوها اللي يبلغ من العمر ستة سنوات كانوا يتفرجوا عليه وهو يلعب بكرة المضرب وكلامهم كان عنه.
🌱تيسير:ياستي امه وبوه مسافرين يجددوا شهر العسل احتفالا بعيد زواجهم وخلوه عندنا
هانيه قالت بضحكه..
/وانتي عاد تحبي المسؤوليه هلبه
ضحكت بإنزعاج وقالت..
/ذكرتيني بماما لليوم صارعه راسي بمحاضرة طويله عريضه عن الزواج والله لولا بابا راهو من زمان زوجتني غصب عني
ضحكت هانيه..
شافتلها تيسير بإبتسامه بعدين قالت..
/لكن انتي تبي تتزوجي مرة تانيه صح؟
هانيه بملل..
/لاماتقوليهاش حتى انتي جايبتيلي عريس!
ضحكت وقالت..
/يجنن ويهبل نص بنات البلاد بيهبلوا عليه لكن هو بيهبل عليك انتي..
عقدت حواجبها وهي مبتسمه بإستغراب وقالت..
/مني!؟
تيسير قالت بنبرة مازحه..
/أخويا
هانيه بإستغراب..
/مني فيهم!؟
قالتلها:معمر..
حاولت هانيه ع قد ماتقدر تخفي اندهاشها وفرحها "معمر" خو تيسير كان شخصيه ناجحه ومميزة في عالم المال والأعمال بالإضافه لوسامته وشخصيته الجذابه ولأنه متصف بالكبر ماقدرتش تلاحظ عليه اي شي يدل ع اعجابه بيها في اللقاءات اللي جمعتها بيه..
"هانيه خيرك ساكته"
رفعت حاجبها وقالت..
/استغربت..
تيسير قالت بإبتسامه..
/في شني!؟
هانيه:مش عارفه بس يعني مش حاطه في بالي بكل فاجئتيني!
قالتلها:تعرفي قداش ليه مكلمني عليك من قبل وفاة عمي سلامه الله يرحمه واني وقتها جسيت نبضك قلتي ماتبيش تتزوجي لكن لما حكتيلي يومها عن اخر موضوع جاك يعني كيف عطيتيه فرصه كلمت معمر طول وقتله تبي نكلمهالك مرة تانيه قالي ياريت..وختمت كلامها بضحكه..
هانيه قعدت ساكته وهي توزع في نظرها قدامها..
"هنو"
شافتلها وقالت..
/نبي نتكلم معاه قبل..
تيسير ابتسمت وقالت..
/ok..تو نكلمه ونرد عليك..
هزت هانيه راسها بصمت وهي تفكر..
ع جية ولد خو تيسير وقف عليهم وقال لعمته..
/شفتي عمتي كيف غلبته؟
ضحكت تيسير بإرتباك وقالت..
/ايه شفتك حبيبي برافو عليك..
ابتسم بفرح..
هانيه وهي مبتسمه قالت..
/بطل خلودي..
هو قاللها ابتسامه..
/شكرا
هانيه ردت عليه بضحكه..
/العفو..
وعمته قعدت تمسح ع شعره وهي تشوفله بإبتسامه.. 🌿🌿🌿🌿🌿🌿
"اني عندي خمسه خوت بنتين وثلاثه ولاد ترتيبي فيهم الوسطانيه قبلي ولد وبنت"
ربيعه قالت..
/كلهم متزوجين؟
فريحه قالت..
/ايه..اختي تزوجت قبل عامين..
ربيعه:امم..باهي انتي خريجه شني؟
فريحه قالت..
/كليه الآداب قسم الاعلام..
ربيعه ابتسمت وقالت..
/فكرتي تخدمي بشهادتك؟
قالتلها:قبل لنجيب سلامه بعد ماجبته وجو بعده خوته شفت ان التفرغ لتربيتهم أولى..
ربيعه مررت نظرها ع الصغار وقالت..
/عندك حق..
فريحه وهي تشوفلها كان متحرك في داخلها شعور الغيره لكن قلبها ماقدرش يحقد ع ربيعه ولاينفر منها..
شافتلها ربيعه وقالت..
/بنطلب منك طلب..
فريحه قالت..
/تفضلي..
قالتلها:اني مع السنه الجايه بنبدا نقرا منازل نبيك تساعديني في القرايه..
فريحه قالت..
/تسعه تو يديرلك مدرسين..
ربيعه قالت..
/لالا مانبيش حد براني نبي حد قريب عليا هكي اريح..
فريحه ابتسمت وقالت..
/ماعنديش مشكله..
ربيعه بإبتسامه قالت..
/مشكورة..
فريحه قالت..
/العفو..
ردت ربيعه نظرها للصغار وركزت ع كريمه لاحظتها تقرا بإجتهاد مبالغ فيه ضيقت عيونها وقالت..
/علاش كريمه عاودت السنه؟
فريحه:دماغها بالهون شويه مش زي خوتها..
ربيعه:نشوف فيها شاده هلبه..
فريحه قالت..
/تحاول مسكينه تبي تنجح..
ربيعه قالت..
/دارولها مدرسين؟
فريحه:ايه..لكن استيعابها ضعيف حتى اني قريتها خوتها حاولوا معاها مافيش فايده هدا حد قدراتها..
"وامها؟"
عقدت فريحه حواجبها بضيق وقالت..
/حتى هي..
سكتت ربيعه شويه بعدين ناضت ومشت بإتجاه كريمه..
وصلت فيها قعمزت جنبها وقالت..
/شن جو كيري؟
شافولها الولاد وكريمه قالت بضحكه..
/كيري؟.
ربيعه وهي مبتسمه قالت..
/حلو ولا؟
كريمه هزت راسها وهي تضحك..
ربيعه قالت..
/انتي احلا..
ابتسمت كريمه وقالت..
/شكرا..
ربيعه:العفو ياسموحه..قولي شن جو القرايه..
كريمه شافت للكتاب وقالت..
/كويسه..
خدت ربيعه الكتاب وقعدت تتصفح فيه وكريمه وهشام يشوفولها..
سكرت ربيعه الكتاب وحطاته ع الطاوله وقالت..
/تنوضي تلعبي نقيزة؟
كلهم استغربوا..
كريمه بتعجب:نقيزة..
ربيعه هزت راسها وهي ترمش في عيونها..
ضحكت كريمه بعدين شافت لفريحه..
فريحه وهي مستغربه قالت..
/نوضي معاها..
ناضت كريمه وهي متحمسه خدتها ربيعه من يدها وقالت..
/تعالي..
ومشوا مع بعض وكلهم يتبعوا فيهم بأنظارهم..
"بلعاني تبيها تسقط"
وجهوا انظارهم لمعاذ وهو هز راسه بمكر ورجع لقرايته وفريحه تشوفله وهي تفكر..
🌿وفي جهة تانيه من الحديقه كانت في ارضيه فيه بلاط من الالوان مختلفه خدت ربيعه رشاده"حجر" وحدفاته ع اقرب وحده ليها وبدت تلعب وكريمه تشوفلها بحماس..
"هيا دورك"
خدت كريمه الحجر وبدت تلعب كانت تتلخبط وتغلط لكن ربيعه كانت تصححلها في اخطائها وتخليها تعاود لعب من اول وجديد..
ونزيهه تراقب فيهم من احد شبابيك الدور التاني وهي تغلي من الغضب..
🌿🌿🌿🌿
الساعه العاشرة ليلا..
كان تسعه في جناح نزيهه مقعمز ع السرير وفي يده الساعه يضبط فيها ع المنبه ونزيهه واقفه ع الزيانه تحط في عطرها وهي تشوفله وتفكر..
خدت نفس بعدين حطت العطر ومشت قعمزت مقابلة تسعه وقالت..
/تسعه نبي نقولك حاجه وياريت ماتفهمنيش غلط..
حط الساعه ع الكامدينو بعدين شافلها بإنتباه..
هي قالت..
/كريمه معاودة السنه ولو ماشدتش كويس حتعاودها مرة ثالثه واني مانقدرش نتحملها الحاجه هادي بكل،نبي بنتي تقرا مع مدرسين ياتسعه مش مع وحده ماعندهاش غير الشهاده الابتدائيه...سامحني وارجوك ماتتحسسش من كلامي نبيك تفكر فيه بمنطق..راهو بكري خلتها تفوت القرايه وتلعب شفتها بعيوني..
ضيق تسعه عيونه وهو يفكر..
نزيهه قالت بضيق..
/اني همي كله مصلحة بنتي بس..
تسعه:وحتى هي بنتي ونعرف مصلحتها كويس خلي حكايه قرايتها عليا ومانبيكش تدخلي فيها بكل..
تمالكت اعصابها بعدين هزت راسها وقالت..
/حاضر..
🌿وفي جناح البنات..
كانت ربيعه مقعمزة جنب سريركريمه تحكيلها في قصه من القصص اللي قرتها في صغرها مضمونها كله عبرة وتحفيز كانت تحكي وهي تمثل بحركات وجهها وايديها خلت كريمه تعيش وسط القصه وهي تتخيل في روحها البطله معاها..
اما اروى اللي كانت يدوب تفهم ع قد عقلها وسنها انسجمت مع طريقة سرد ربيعه وحركاتها..
🌱"وهكي فازت البنيه وخدت الجائزة وولت بطله مايقدر يغلبها شي واللي كانوا يضحكوا عليها ولوا يصفقولها حتى هما وهما فاتحين عيونهم وفامهم هكي"
ضحكوا كريمه واروى وربيعه ضحكت معاهم وهي تشوفلهم بعدين قالت..
/هي توا ع النوم يللا..ارقدوا خلاص..
اروى قالت..
/ارقدي معانا..
ربيعه رفعت حواجبها وقعدت ساكته..
كريمه بملامح رجاء قالت:ارجوك..!
ضحكت ربيعه وقالت..
/باهي..
ربعت ايديها واتكت ع الكرسي وقالت..
/هيا غمضوا عيونكم..
نفدوا امرها..
ابتسمت وبدت تغني اغنيه كانت تسمع فيها من امها في صغرها..
"نني نني نني واني عليك نغني
نني نني جاك النوم امك قمرة وبوك نجوم..
نني نني نني يجعل نومك متهني
نني نني نني ياقليبي وقطعه مني..
هوها ياهوها بنيتي سلم بوها..
بيه الناس يهابوها..
سعد سعد سعد سعد بنيه خير من الف ولد..
ياللاتي وياللات..عرسك جانا بالدعكات
وميه وطناش السبات واللي صانعهم قالوا مات..
نني نني جاك النوم امك قمرة وبوك نجوم"
وع صوت ربيعه الهادي راحو البنات في النوم هي وقفت غني بعد شافتهم متعمقين في النوم مسحت دموعها وهي مبتسمه بعدين جت بتنوض بش تطلع لكن في هاللحظه خطرت عليها ذكريات من طفولتها خطرت عليها الليالي اللي بدت تشتاق فيها لحضن امها وهي صغيره وامها كانت باخله عليها بيه..بخلت عليها بحنها لما بدت تكبر كانت تعامل فيها بجفاف زادت كبرها سنين ع سنينها ولعند اليوم قاعده تجهل السبب...
تفكيرها فالشي هدا خلاها تكمل ليلها بحداهم او بالاحرى جنب كريمه اللي فكرتها بطفولتها كانت تبي تعطيها الشي اللي فقداته سنين من عمرها..
قعدت متكيه ع الكرسي وهي تتأمل فيها ودموعها ينزلوا لعند ماراحت في النوم...
♧لما سمعت قصة عمتي ربيعه مع امها اللي جي في بالي ان امها كانت تشوف فيها غلطه او هم او عقبه..ايه العقبه اللي وقفت في طريقها وماخلتهاش تكمل حياتها مع راجل تاني بعد مابوها صارله الحادث وانشل وللأسف الامهات اللي زي "مبروكه" في منهم هلبه مش شويه..بس اكثر شي اثر فيا وخلاني نحب عمتي ربيعه اكثر من ولدها انها ماخلتش طفولتها البائسه تشوه قلبها ولاتأثر ع نفسيتها تأثير سلبي بالعكس خلتها انسانه متحديه للظروف في كل مراحل حياتها وفي كل تحدياتها كانت تفوز وتحافظ ع نقاء قلبها وسريرتها..ممكن هدا علاش حبيت ولدها..ولاحبيتها هي اكثر من ولدها!؟..المهم نحب ولدها وخلاص..
🌿🌿🌿🌿🌿
في صباح تاني يوم..
كان تسعه يتجهز بش يطلع يشوف اشغاله وهو ماشي بإتجاه باب القصر شاف ربيعه خاشه..
هي لما شافاته ابتسمت وهو ردلها الابتسامه ووقف عليها يسأل..
/وين كنتي؟
ربيعه قالت:سقدت كريمه للمدرسة..
بإبتسامه قال..
/قالوا امس بدال ماتساعديها في القرايه خلتيها تلعب..
ربيعه قالت بإبتسامه..
/امم..نقولك حاجه خليني نتم المهمة اللي عطيتهالي بطريقتي وماتدخلش فيها بكل..
رفع حواجبه وهو مبتسم تعجبا..
قالتله وهي رافعه حاجبها..
/كان طلعت نتيجتها ماتسرش دير فيا اللي تبيه..
قرصها من خدها وقال بإبتسامه..
/نراجو ونشوفوا شن يطلع منك..ماتبي شي؟
قالتله:جيلاطي..
ضحك وقال..
/الكوجينه فيها كل شي..
قالتله:لا نبيك تجيبه بروحك ..حطت سبابتها ع مكان قلبه وقالت..الحاجه اللي تجي منك ديما فيها الزايد..
خدي يدها وطبع عليها قبله بعدين قال..
/حاضر يااللا..استودعناكم..
ومشي وهو مبتسم ونظراتها المغرمه تلحق فيه لعند ماطلع من القصر..
تنهدت من قلبها ولفت بتمشي شافت نزيهه واقفه بعيد شويه تشوفلها برفعة حاجب..
تجاهلتها ربيعه وكملت طريقها لكن لما جت فايته من جنبها شدتها نزيهة من ذراعها بقوة وقالت..
/يكون في علمك اللي يكون عليها الدور هي بس اللي تقعد تخدم تسعه من ليلتها لقبل تجي ليلة ضرتها واني وفريحه قعدنا ماشيين ع النظام هدا السنين هادي كلها وانتي ومجبورة نقولها وللأسف زيك زينا لازم تمشي باللي ماشيين عليه..
ربيعه شافت ليدها وقالت..
/حولي يدك لوسمحتي..
طلقتها بغضب..
ربيعه برغم الألم اللي كانت تحس بيه ابتسمت مكرا وقالت..
/والله النظام هدا اني عارفاته كويس لكن اللي صار توا ماليش ذنب فيه تسعه هو اللي وقفني بري حاسبيه هو..
ومشت وخلتها وهي تضحك مكرا بدون صوت ونزيهه تشوفلها بغيظ شديد..
♧مشكلة خالتي نزيهه مع عمتي ماكانتش عمي تسعه لا..يعني هي ماكانتش كارهه عمتي لأنها ضرتها كانت تكرهها لأنها تشوف فيها وهي اقل منها انحطت في مكانه ماتستحقهاش مكانه تخليها تتساوى بيها..وهادي نظره هلبه ناس من اصحاب الفكر"البرجوازي" ايه خالتي نزيهه برجوازيه زيها زي عمتي هانيه بالزبط..
🌿هانيه اللي تأجل لقائها بمعمر بسبب الارتباطات المهمه عنده لكنه بعت وعد مع اخته انه حيكمل شغله في اقرب وقت ع خاطرها..
🌿🌿🌿🌿🌿
وتعدي الأيام وربيعة كانت مسخرة اغلب وقتها لكريمه تقري فيها ولو صعبت عليهم حاجه يساعدهم هشام..
وهشام من خلطته بربيعه عجبه جوها وبدي يرافق فيهم وقت القرايه ويقرا حداهم وحتى كان يشارك في الالعاب اللي دير فيهم ربيعه..
زي الخربقه او زي ماهي معروفه في وقتنا الحالي بلعبه..
(XO)..
ويوم عن يوم بدوا الولاد ينضمولهم واحد ورا التاني حتى من معاذ وكريم ولد مرعي..
"بف..بف..
ﻃﻮﻳﺮﻱ ﻃﺎﺭ ﻣﻊ ﺍﻟكفاﺭ
ﺟﻨﺎﺣﻪ ﺳﻮﺩ ﻭفمه ﻧﺎﺭ
ﺗﻄﻠﻊ ﻗﻄﺔ ﻭﻻ ﻓﺎﺭ
ﺣﻄﻮ ﻃﻮﺑﻪ ﻋﻠﻰ ﻃﻮﺑﻪ ﻭﺭﻭﻧﻲ ﺍﻟﺒﻨﺖ
ﺍﻟﻤﺨﻄﻮﺑﺔ
ﺣﻄﻮ ﻃﺎﺳﻪ ﻋﻠﻰ ﻃﺎﺳﻪ ﻭﺭﻭﻧﻲ ﺍﻟﺒﻨﺖ
ﺍﻟﻌﻄﺎﺳﺔ
ﺣﻄﻮ ﺷﻴﺸﺔ ﻋﻠﻰ ﺷﻴﺸﺔ ﻭﺭﻭﻧﻲ ﺍﻟﺒﻨﺖ
ﺍﻟدرويشة
ﺣﻄﻮ ﺷﺎﺷﺔ ﻋﻠﻰ ﺷﺎﺷﺔ ﻭﺭﻭﻧﻲ ﺍﻟﺒﻨﺖ
ﺍﻟﻐﺸﺎﺷﺔ"
هادي كانت استفتاحيه للعبة وابيس"الغميضه" اللي كانت تقول فيها ربيعه بعد قالتها بدت دور عليهم كلهم كانوا متخفيين في اماكن مختلفه بين شجر حديقة القصر..
"كريم شفتك شفتك"
طلع كريم يجري وهي تجري بش تسبقه لكن في نص الطريق حست بدوخه والدنيا ظلمت في عيونها وفقدت الوعي..
🌿🌿🌿🌿🌿
"توا جاني اتصال من صديق في مديريه الأمن في طرابلس قال شدوا ولاد نور الدين"
تسعه هز راسه وقال بإبتسامه..
/وهكي درنا اللي علينا مع الزواريه..
جمال:من رأيي تستنى شويه لين نشوفوا شن بيصير بعدين
تسعه:فكرت هكي لكن لازم نعطيها علم باللي صار بش ترتب وضعها وتشوف شن لازم دير..
جمال هز راسه بصمت..
تسعه ناض من ورا مكتبه الموجود في مصنع الرخام وهو يقول..
/للألف وخمسين..
🌿وروح للألف وخمسين متوجه للقصر طول كان يبي يشوف صغاره ويطمن ع حال اخر امتحان ليهم وبعدين يطلع من عندهم للحوش اللي قاعده فيه حسناء..
لكن بعد ماخش للقصر استقبلاته أمه بخبر حمل ربيعه..
♤لامش اني مش حامل بيا اني..حمل امي الأولى كان بأختي الكبيره منها "فداء"..
🌱"مبارك مبارك مبارك"
ربيعه وهي مبتسمه بخجل قالت..
/مبارك عليك حتى انت..
تسعه قال بإبتسامه..
/عاد توا هدي شويه وبطلي لعب وردي بالك من روحك..
ربيعه وهي مبتسمه بضيق قالت..
/خسارة الصغار كانوا فرحانين بأخر يوم امتحان كلهم كانوا مجاوبين ومرتاحين واني عطيتهم وعد اليوم ندير معاهم هلبه حاجات..
هو قال بإبتسامه..
/ان شاء الله بعد تجيبي تلعبي معاهم لين تعيي طبعا كان لقيتلهم وقت..
ضحكت وهو يتأمل فيها بإبتسامه يفكر فيها،في حالاتها المختلفه اللي يشوفها بيهم مرات تبان زي العجائز في حكمتها وكبر عقلها ومرات تتحول لطفله بكل معنى الكلمه وحالاتها هادي كانت تزيد تجذب فيه ليها..
🌿ويأجل تسعه مشيته ويقعد باقي اليوم في القصر مع صغاره اللي كان يحاول ع قد مايقدر يقضي معاهم اطول وقت ممكن..
🍃زي ماكانت آسيا تتمنى تكمل باقي عمرها وهي راقده بش تشوف سلامه في الحلم..
احلامها بيه تكررت هلبه بالذات في الآونه الاخيره كانت تشوف فيه في المنام شبه كل الليله وتفيق من نومها ع وقت صلاة القيام وتفيق في زكيه معاها..
بس هالليله زكيه فاقت ع صوت آذان الفجر فاقت مفجوعه حست بقلبها انقبض بقوة لأول مرة تفوتها صلاة القيام بعد عام من الالتزام بيها..
خدت نفس..بعدين تعوذت من الشيطان ونزلت من سريرها وتوجهت للباب..
🍃طلعت من جناحها وتوجهت لجناح ضرتها لما وصلت في الباب دقت ونادت عليها كذا مرة ماردتش..
تملك قلبها خوف مش طبيعي خلاها تفتح الباب وتخش ووين وصلت في سرير آسيا لقتها قاعده راقده..
قدمتلها حطت يدها ع كتفها وقعدت تفيق فيها..
/آسيا..آسيا..آسيا نوضي الفجر يذن راح علينا قيام الليل..
وآسيا ماصدرتش منها أي ردت فعل حتى نفسها ماطلعش..
بدت ع وجهه زكيه ملامح الفزع وهي تقول بنبرة مرتعشه..
/اسيا..اسيا نوضي..تربحي نوضي..بالله عليك ياوخيتي نوضي...
وخرت عنها وضربت بإيديها ع رجليها وهي تقول بنبرة باكيه..
/ياحليلي!
وطلعت تجري من الجناح وهي تبكي وتنادي بصوت عالي بصراخ..
"تسعه..ياتسعه..تسعه"
صوت صراخها فيق الخدم اللي يباتوا في ملحق جنب القصر..
ناضت برنيه تجري وطلعت من الملحق وخشت من احد ابواب القصر وهي تسمع في صراخ زكيه..
"آسيا ياوخيتي نوضي تربحي"
برنيه بعد ماسمعت اللي قالاته زكيه مشت تجري لأقرب هاتف واتصلت بالهاتف الموجود في جناح فريحه اللي قاعد فيه تسعه..
بعد ما بلغاته مشت بسرعه لزكيه لقتها مقعمزة بهده في الممر وهي تبكي بالعبره..
وتسعه نزل يجري من الدروج بدون وعي منه نسي المصعد بالمرة وزوجاته نازلات وراه وين وصلوا تحت تلاقوا مع هانيه اللي كانت طالعه تجري من جناحها وهما وراها..
وين وصلوا في الممر اللي يرفع لديار اسيا وزكيه..
لقوا زكيه ضامه برنيه وهي تبكي بالعبره وتقول..
"آسيا جاتك ياسلامه"
...يتبع....
