#ولاد_تسعة "الفصل الاول/سميه تسعة"
#جمان_فريد
الجزء_السادس "رحيل"
⛔احداث هذه الروايه وشخصياتها من وحي الخيال بعض الاحداث غير واقعيه"فنتازيه" وبعضها بعيد عن واقعنا المعاش والبعض الاخر يلامس شيء من الواقع⛔
⚠️ملاحظه..
لما يبدا الكلام بالرمز هدا (♤) هذا يعني ان البطل يسرد في الاحداث
اما لما يبدا بهذا (🌿) يعني الكاتبه هي اللي تسرد
#الدعاء
ألَا إنَّه ما قُرعت أبواب السَّـماء بشيءٍ مثل الدُّعاء، وعلى المرء ألَّا يستكثرَ شيئًا في الدُّعاء، فإنَّ كل ما يظنُّـه كثيرًا فهوَ في مُلك اللَّه قلِيل، وكلّ ما يراهُ عسيرًا فهو في جَنب اللَّه يَسير.
- سعُود الشريم.
■■■■■■■■■■■■■■■■■■■■■
🌿 - الإنسان يملك قدرة عظيمة على تحمل الألم، ولكن الأهم هو أنه يتعلم من هذا الألم شيئًا أكبر عن نفسه.🌿
••••••••••••••••••••••••••••••••••••••••••••••••••••••••••
مقعمزة ع المندار جنب بوها شافت لساعتها وقالت بقلق..
/وينها لتوا؟
بوها قال بقلق..
/ان شاء الله خير..
شافتله بقلق وهي تفكر وتصيبهم هي وبوها فجعه لما سمعوا صوت دق قوي ع الباب..
ناضت وهي تقول بخوف..
/يالطيف..
ومشت بسرعه بإتجاه الباب وخلت بوها في قمة القلق..
🍃هي وصلت للباب وقالت.
/شكون؟
"اني نوال ياربيعه افتحي".
فتحت ربيعه طول ونوال خشت بسرعه وهي تقول بفجعه..
/امك شدوها الشرطه..
هي بصرخة قالت..
/شن تقولي!
نوال قالت..
/خدوها توا من حوش جيران امال..
ربيعه بدون وعي منها طلعت تجري مش عارفه وين تمشي لكن عقلها كان يفكر في امها بس كان يبيها تلحقها وخلاص حتى وهي مش عارفه وينها ولاشن صار فيها..
وصاحبتها تجري وراها تنادي فيها ماتسمعش فيها والناس تتفرج عليها وهي ماتشوف في حد منهم..
فجأه وقفت لما شافت منوبيه جايه مع ولدها..
كانت منوبيه تتصنع في البكاء والفجعه ع اللي صاب صاحبتها قدمت لربيعه بش ضمها لكن بمجرد ماوصلت فيها ربيعه دفعتها وصفعتها ع وجهها..
كل من شاف الموقف انصدم واولهم صلاح ولد منوبيه وزادت صدمته لما شاف ربيعه قدمتلها وجبدتها من ياقة جلابيتها وهي تقول..
/كله منك انتي..منك انتي ياإبليسة ياحقيرة..
منوبيه وهي خايفه قالت..
/اني شن دخلي..امك اللي خنبت.
وتصفعها ربيعه مرة تانيه ويقدملها صلاح يوقف بينها وبين امه وهو يقول..
/هيي انتي خير بلاك هبلتي..
ربيعه وهي تشوفله بحقد ودموعها ينزلوا..
/تو تشوفوا شن ندير فيكم ياحشاش انت وامك الخنابه الوسخة هادي..
جي بيمد يده عليها هي شدتها بقوة ودفعتها بعدين ولت بطريقها لحوشهم وهي تمسح في دموعها اللي تنزل ع ملامح وجه كلها غضب..
🌿قعدت مبروكه محبوسة اربعه ايام شافت فيهم الأمرين زي ماشافت بنتها من الناس اللي صدقوا بسرعه ان امها سارقه والموقف اللي صار بينها وبين منوبيه خلا الحق يركبها هي بروحها..
♤امي قالت هديكا الفترة ماقدرتش نطلع من الحوش وتعب بوي بسبب اللي صار لأمي زادني هم ع الهم..
امي مراة مبتلاة عاشت اصعب انواع الابتلاءات في الدنيا اقواهم لهداكا الوقت هو حبس جداي مبروكه ويلحقها موت جدي "ناجي"..ايه جدي مات متبلغم زي مايقولوا..وهدا اللي ينقال عليه قهر الرجال اللي كان يتعوذ منه الرسول..الراجل لما ينقهر وينذل يموت الف مرة قبل الموت المحقق..وجدي ناجي مات لما من ولى عاجز وعالة ع مرته وبنته..
🌿"والله حالها يقطع القلب ياللا"
زكيه بأسف:لاحول ولاقوة الابالله..
عصمت قالت بحزن..
/عندي ليك رجاء يااللا وعارفاتك مش حترديني خايبه نبيك تمشي للمراة وتخليها تتنازل وطلع مبروكه..
نزيهه قالت..
/تبيها تشفع لوحده خانبه!
عصمت:والله ياللا المراة امينه بشهاده كل من خدمت عنده البلي كله من هديكا الشيطانه منوبيه كانت معاها وهي اللي دارتها ورمت عملتها على مبروكه..
فريحه قالت.
/علاش شن في بيناتهم؟
عصمت:زمان منوبيه كانت تخدم في الحياش قبل مبروكه ولما تعسر حال مبروكه طلبت منها تشوفلها خدمه معاها وهي عاونتها ودبرتلها الخدمه لكن لأن مبروكه افلح منها وامينه وعاقله الناس بدت تطلب فيها هي بس حسدتها وحطتها في راسها ودارت فيها هالدير.
رفعت نزيهه حواجبها ونزلتهم بعدم اقتناع..
اما زكيه بعد ماسمعت من عصمت قالت..
/باهي تو نمشي غدوة نشوف المراة اللي قلتي عليها غير عطيني اسمها وعنوانها..
عصمت قالت بفرح..
/حاضر يااللا..
🌿وربيعه في هالوقت قاعده في حوشهم بروحها مستقبله القبله وهي تصلي وتدعي وتبكي وقلبها مفطور من الحزن..
"ياربي انت تشوف مافي شي مدرق عليك يارب برأ امي وخليها تطلع يارب وديرلنا اني وياها طريق يارب العالمين يارب..مالناش غيرك مالناش غيرك يارب".
دق باب الحوش..نزلت ايديها وع وجهها باديه ملامح الاستغراب..بعدين ناضت ومشت بإتجاهه وهي تقول..
/شكون؟
جاها صوت صلاح وهو يقول..
"افتحي ياربيعي"
بدت ع وجهها ملامح الغضب بعدين لفت ومشت بسرعه للكوجينه خشتلها خدت منها سكين كبير وقعدت واقفه في الصاله..
ورجع صلاح دق مرة تانيه وهو ينادي فيها ولما ماحصلش منها اجابه قال..
"موليلك ياربيعي وتو ناخدك تبي ولاماتبيش"
قالت بصوت مسموع ليها هي بس.. /ع جثتك ياوسخ..
🌿ومشت زكيه تاني يوم لحوش المراة اللي تسببت في حبس مبروكه والمراة لأنها كانت تقدر زكيه وتجلها وافقت تتنازل..
🌱"والله ع خاطرك بس ياللا ولا هالشكالات مفروض يخرتوا في الحبوس بش يتربوا"
زكيه قالت..
/من عفا واصلح اجره ع الله يابنتي..
هزت المراة راسها وقالت..
/حاضر تونمشي بعدين ونسحب الشكوى..
🌿وتنازلت المراة عن الشكوى وطلعت مبروكه لكن بعد ماولت انسانه مدمرة من الداخل الصدمه في اللي صار معاها سيطرت عليها تماما..
♤قالت امي ان جداي مبروكه بعد طلعت من الحبس كانت خاشه في عالم تاني لاتبي تتكلم ولاتاكل ولاتشرب عانت معاها هلبه ومن خوفها عليها ماقدرتش تغيب عنها وقالت ماكان في حد يجيهم ولايدور فيهم غير عصمت التركيه الوحيده اللي وقفت معاهم في هالمحنة..مش قلتلكم وين دمك وين سمك..!
🌿🌿🌿🌿🌿
خش لمبنى احدى الشركات اللي يملكها احد اصدقائه..
كان يمشي وراه شاب في بداية الثلاثينات من عمره..
الشاب هدا اصبح نديم وحارس لتسعه من سنه ونص اختاره من ضمن مجموعة شباب دله عليهم احد معارفه شاف فيه القوة والجديه واهم ميزة عنده صمت الدائم مايتكلمش الا لو تسعه كلمه وينفد الاوامر بدون مماطله وع احسن وجه..
"جمال"
قدم جمال ذو الاصول السرتاويه لتسعه وهو يقول..
/نعم..
تسعه: خلاص حسمت امري بعد مانطلعوا من هني نتوكلوا لطرابلس..
هز جمال راسه بصمت وهو يمرر في نظره حواليه..
وتسعه وجه نظره القدام وهو ماشي..
واول ماوصلوا لأخر للممر اللي يمشوا فيه وبيخشوا للتاني يتصادف تسعه هو وواحد من اصدقائه القدامي..
هالصديق ماكانش بروحه كانت معاه وحده تسعه مالاحظش وجودها وهو يسلم ع صاحبه بحراره..
/عاش من شافك ياراجل..
تسعه قال بضحكه..
/انت اللي مشيت وقلت عدولي..
تباعد عن صاحبه وصافحه باليد وهو يقول..
/شغتلنا الدنيا زي ماشغلاتك..
تسعه هز راسه وقاله..
/فعلا..هالدنيا تلاهي..مرر نظره القدام وقاله..شن عندك هني..
قاله:كان عندي مشكله وحليتها ودي..
تسعه:عندك مشكله مع رجب الخمسي!؟
قاله صاحبه بضحكه..
/كانت كانت وتوا خلاص حليناها والبركه في الأستاذه..
شاف تسعه للمراة اللي جنب صاحبه ابتسم بجديه وحياها بحركة الراس وهي ردتها بعدين شافت لصديق تسعه وهو يقول..
/استاذه حسناء تاشفين افضل محاميه ليبيه متخصصه في القضايا الماليه..
هي قالت بإبتسامه..
/ولو انه كلام كبير عليا لكن مشكور ع كل حال..
تسعه ضيق عيونه وهو يشوفلها بعدين قال..
/حسناء تاشفين..ارملة نور الدين الزواري!؟
هي شافتله بجمود..
اما صديقه قال..
/تعرف نور الدين؟
تسعه قاله..
/مش معرفه قويه بس تلاقينا كدا مرة والحق سمعته في الوسط متاعنا خلتني نحترمه هلبه..شاف لحسناء وقال..معاك تسعه سلامة بيت المال في حال احتجتك كيف نوصل فيك..
هي طلعت كرتها من الشنطه ومدتهوله..
خداه منها وشافله للحظات بعدين هز راسه ورفع نظره لصاحبه وقال..
/شن رايك تقعد لين نكمل شغلي هني مش مطول حاجه ربع ساعه..
قاله صاحبه وهو مبتسم..
/ مش مشكله..
هز تسعه راسه وقال بإبتسامه..
/نتلاقوا..ومشي كمل طريقه ونديمه وراه..
صديقه بعد ماتبعهم بعيونه قال..
/اكيد سامعه بتسعه بيت المال؟.
قالتله: اكيد اشهر من نار ع علم...هي توا نستأذنك استاذ..
قاللها:بارك الله فيك استاذه نشوفك ع خير..
هي هزت راسها بإبتسامه جديه وكملت طريقها..
🌺طلعت من مبنى الشركه وتوجهت لسيارتها اول ماوصلت فيها فتحت الباب ولما جت بتركب شافت ورقه مطويه محطوطه تحت مساحة السيارة..
ببرود قدمتلها وخدتها بعدين فردتها وقرت مافيها..
(وقتك بدي يتم)
وبكل برود كمكمتها ومشت رمتها في حاويه القمامه بعدين ولت لسيارتها ركبتها وشغلتها وتحركت بيها طالعه من مكان الشركه..
🌿وهانيه ماشيه بسيارتها وهي رافعة نساوين خوها للمشفى..
فريحه ونزيهه خشوا الشهر السابع وفي موعدهم هدا مع الطبيبه اللي يتابعوا عندها حيعرفوا جنس مواليدهم..
▪▪▪▪▪▪▪
"ماشاء الله للا نزيهه انتي حامل ببنت.."
حافظت نزيهه ع ابتسامتها بقوة بش تخفي ضيقها..هي مش كارهه جيبة البنات بس كانت خايفه تجيب خيبة تانيه زي كريمه ع حسب ماهي تشوف طبعا..
هانيه قالت بإبتسامه غرور..
/الله..بتجينا جميلة تانيه تنضم لقائمه جميلات عيلة بيت المال اللي اني ع راسهم..
ضحكوا والطبيبه قالت بإبتسامه..
/ربي يحفظكم..
هانيه وهي مبتسمه قالت..
/تسلمي..
🌱ومن بعد نزيهه جي دور فريحه..
الطبيبه قالت بإبتسامه..
/الله يبارك بيجيك وليد ياللا فريحه..
فريحة بإبتسامه..
/المهم الخلقة التامه والصحة كويسه..
الطبيبه قالت..
/لا الحمد لله الزوز في احسن حال..
هانيه قالت بإبتسامه..
/اللهم بارك...
🌱وطلعوا من غادي ونزيهه مش ع بعضها حداها هانيه وفريحة يهدرزوا ويضحكوا وهي مرة تسايرهم ومرة تسرح بتفكيرها..
🥀وبنتها كريمه بعد ماروحت من المدرسه خشت لدارها وهي تبكي..
سكرت الباب ومشت تجري لسريرها حولت الشنطه وقعمزت بعدين فتحتها وطلعت منها الصحيفه..
قعدت تشوفلها وهي تبكي بخوف وتقول..
/حي عليا من ماما حي..
🍃ووصلت ماما ياكريمه اللي جوها خوتك سلامه ومعاذ يجروا بصحايفهم وهما يقولوا..
"شوفي امي"
هي ابتسمت وخدت الصحايف..
شافت نتيجة سلامه اللي كان يقرا في الصف السادس درجاته كلهم كاملات وجايب الترتيب الأول..
ضحكت وقالت..
/فريحه سلومه الأول..
فريحه مسحت ع شعر ولدها وقالت بإبتسامه..
/عارفاته من قبل ماياخدها..
شاف سلامه لأمه وهو مبتسم بحب..
ومعاذ قال لأمه نزيهه..
/شوفي صحيفتي..
شافت نزيهة صحيفه معاذ اللي كان يقرا في الصف الثالث ضحكت وقالت..
/نجيه ياربي حتى هو الاول..
وضمت سلامه ومعاذ لحضنها..
هانيه وهي مبتسمه قالت..
/الله يبارك ع غزلاي الشاطرين..عقدت حواجبها وقالت..وين الباقي؟
سلامه قال..
/حدا حناي..
🌱ومشوا كلهم لصالون العيله..
خشوله لقوا اشرف وهشام مقعمزين حوالين جداهم اللي كانت تغنيهم وحداها آسيا تشوفلها بإبتسامه..
طلقوا السلام..
الولاد طول ناضوا لامهاتهم بش يوروهم النتيجه..
هشام كان يقرا خامس واشرف ثاني والزوز كان نجاحهم باهر جايبين الاول ع فصولهم..
فريحه:الله يبارك الله يبارك يبوا رقيه..
زكيه:ايه حق..
هانيه:كريم ولد مرعي شن صار فيه؟
سلامه رفع يده وهو فارد اصابعه الوسطى والسبابه..
ضحكت هانيه وقالت..
/زي ماقالت كريمه مايقدركش..
هني نزيهه استاقظت لغياب كريمه تبدلت ابتسامتها لملامح الامتعاض وقالت..
/وينها كريمه هادي؟
هشام شافلها بخوف وخوته قعدوا يشوفوا لبعض ماعدا معاذ اللي شاف لأمه وقال..
/كريمه سقطت جابتهم كلهم كعك..
انصدموا فريحه وهانيه،وزكيه وآسيا كانوا يشوفوا لنزيهه بضيق..
هي غمضت عيونها وفتحتهم بعدين قالت..
/وينها؟
فريحه قالت بقلق..
/نزيهه!
هي بعصبيه قالت للولاد..
/وينها!!؟
معاذ حتي في هادي تبرع وجاوب..
/في دارها..
لفت ومشت نزيهه وهي معصبه وعزوزتها تقول..
"بالشويه يابنتي"
لحقتها فريحه وقعدت تمشي وراها وهي تقول..
/نزيهه..
نزيهه قالت بعصبيه..
/ارجوك يافريحه ماتدخليش مانبيش نزعلك..
فريحه بقلق..
/باهي ماتنسيش راك حامل مش باهي ليك الانفعال..
مابتش ترد نزيهه وكملت طريقها لين وصلت لجناح البنات..
فتحت الباب بقوة وخشت..
بعدين كملت لدارهم وفتحت حتى الباب هدا بقوة..
لقت كريمه راقده في سريرها وغامه روحها..
قدمتلها بسرعه وجبدت الغطا وهي تقول بغضب..
/نوضي نوضي..نوضي ياغبيه يافاشله..
ناضت كريمه قعمزت وهي تبكي..
نزيهه:شن ناقصك قولي شن ناقصك!؟ حتى المدرسين الخصوصيين درتهملك..احسن مدرسين درتهم هدا كله ومانفعش فيك..
كريمه وهي تبكي قالت..
/واعر صف رابع ياماما..
بغضب قالت..
/انتي الغبيه والفاشله..ياريتهم وحده ولااتنين كلهم ياغبيه كلهم..
حطت كريمه ايديها ع وجهها وقعدت تبكي..
بإزدراء قالت..
/هدا اللي عندك انتي البكبكه وخلاص مش فالحه غير فيها وفي اللعب والماكله طبعا..مش عارفه لمن طالعه مش عارفه ولاكأنك بنتي،اني ماكنتش هكي ولاخواتي هكي بري شوفي بنات خالاتك كل وحده اشطر من التانيه ولا بوك وعيلته مافي حد فيهم خايب وغبي هكي..لمن طالعه لمني!؟
وكريمه تسمع وتبكي بس وحالتها هادي زادت استفزت امها ضربتها ع كتفها بغيظ بعدين مشت وهي تقول..مانعرفكش تطلعي منها الدار هادي لين نقول اني..
وصلت في الباب اللي كانت واقفه قدامه فريحه وهي تشوف لكريمه بحزن..
سكرت نزيهه الباب وهي تقول لفريحه..
/بيني وبينك يافريحه لو خشتيلها ولاطلعتيها..
ومشت طول وهي معصبه وفريحة تنهدت بألم وهي تسمع في بكي كريمه..قالت بتعاطف..
/ياروحي..
🌿ونزيهة بعد ماطلعت من جناحهم جتها تعويضه تجري وهي تقول..
/للا نزيهه اختك بدريه ع الهاتف..
بدت ع وجه نزيهه ملامح الضيق مشت وين مافي الهاتف وفريحه وراها اما تعويضه مشت تشوف شغلها...
وصلت نزيهه في الطاوله الموجود عليها الهاتف رفعت السماعه وردت..
/اهلا بدريه..
"اهلين نزيهه شن حالك وحال العيله"
نزيهه قالت..
/الحمد لله شن حالكم انتم؟
"الحمدلله..صغارك خدوا الصحايف؟"
بلعت ريقها وقالت..
/ايه
"ايه بشرينا"
خدت نفس وقالت..
/هشام ومعاذ زي العاده الترتيب الاول..
"ماشاء الله..زي ولادي وحتى مودة بنتي جابت الاول..شن صار في كريمه ان شاء الله غير تخطت الجيد العام هدا"
نزيهه مررت نظرها قدامها وهي في قمة الضيق بعدين قالت..
/لا للأسف المرة هادي سقطت بكل..
"تبصري!"
نزيهه بإبتسامة اسف قالت..
/ياريت..
ضحكت اختها وقالت..
"شكلها مش متاع قرايه بكل..اهو طيرلك العين ع الولاد"
🌿واستمرت بدريه في مسخرتها اللي مغلفتها بغلاف المزح ونزيهه ع قد ماتقدر كانت دير في روحها عاديه كله ولاتبين لحد اي شي من ضعفها،وضرتها تشوفلها بإستياء فاهمه وعارفه بشن تحس زي ماعارفه شن قاعدة تقوللها اختها اللي ماكانتش طيقها وتتمنى لو تخلي نزيهه تقاطعها مدى الحياة..
♤متأكد ان حال نزيهه واختها بدريه حيفكركم بهلبه ناس في محطيكم وممكن يفكركم بأنفسكم..تعرفوا الانسان اللي ديما يحب يكون الاول في كل شي ويكرس حياته للحاجه هادي لازم يظلم نفسه ويظلم احبابه معاه لأن الوصول للقمه والمحافظه عليها شي صعبه هلبه ومرهق هلبه يخلي البنادم يحط نفسه تحت ضغط رهيب ويحط غيره معاه ويهلكهم نفسيا زي مايهلك نفسه..وهدا كان حال خالتي نزيهه مع نفسها ومع صغارها...
🌿وامك يالخضر حتى هي عاشت حياتها من صغرها تحت ضغوطات وصعوبات كبرتها قبل وقتها..
شيطانة الإنس منوبيه من نقمتها عليها طلعت عليهم دوة هي وامها مست حتى شرفهم مش بس امانتهم..
افترت ع مبروكه انها تصاحب في الرجاله اللي تخدم في حياشهم وبنتها ماشيه ع طريقها..
والناس عاد ماعندهمش الروح مع الطعن في الاعراض مسرع مايصدقوا بش ينزهوا انفسهم...
🍃"وانتي جايه تعاودي في اللي سمعتيه ولاتسألي!"
نوال بضيق..
/الله يسامحك ياربيعه راك صاحبتي عمر ونعرف امك من صغري ماريتش اشرف منكم،لكن جيت عاودتلك بش تحطوا حد لهالدوة اللي طالعه مادسوش ارواحكم الناس هكي تصدق فيهم..
مسحت ربيعه دموعها وهي تقول بغضب..
/اللي قال واللي صدق جعنهم يلقوه ويتلقوه..يردهولهم ربي في اعز ماعندهم...
🍃وحديثهم هدا سمعاته امها في الخفاء وزادت نفسها انكسرت وداخلها دمر اكثر واكثر...
🌿🌿🌿🌿
تاني يوم..
روح تسعة للقصر ووين خش داخل لاقى اروى تمشي بروحها ضحك وقال.
/اروى..
شافاته ابتسمت بفرح وقدمتله تجري وهو قدملها ضمها ورفعها وقال..
/عطيني بوسه..
عطاته خدها باسه بعدين قال..
/عسل..
ومشي بيها داخل وهو يهدرز عليها لعند ماوصل في الصالون الكبير لقاهم مجتمعين فيه قال..
/السلام عليكم..
ناضوا ولاده ومعاهم امهاتهم اللي قدموله وسلموا عليه..
تسعة بإبتسامه..
/حالكم باهي؟
الزوز مع بعض قالوا..
/الحمد لله..
امه قالت بإبتسامه..
/جايينك وليد وبنيه..
ضحك وقال..
/ماشاء الله ماشاء الله..نزل اروى وقدم لأمه كب ع راسها وقال..شن حالك امي؟
هي قالت:الحمد لله امي شن حالك انت..
تسعه بعد ماكب ع راس اسيا قال..
/الحمدلله..كيف حالك خالتي..
بإبتسامه باهته ردت عليه..
/الحمد لله..
هو قعد يشوفلها بإبتسامه حزن يشوبها القلق منظرها يبان متعب جدا وحالها هدا مش مريحه..
التفت ع ولاده لما شافهم جايينه واحد ورا تاني يكبوا ع يده..
ابتسم وهو يشوفلهم بعد ماكملوا قرب منه هشام ومسح ع شعره ومرر نظره عليهم وقال..
/شن حالكم..
كلهم بأصوات متقطعه قالوا..
/الحمدلله..
ومعاذ قاله..
/بوي خدينا الصحايف..
ابتسم وقال..
/بشروا..
سلامه:كلنا شبالك ياأسد..ورفع سبابته فوق..
ضحكوا عليه وبوه مسح ع شعره وقال..
/صحة ليكم..
وعاد معاذ مايقدرش يسكت عن الخبر الأهم وبكل حماس قاله..
/كريمه جابتهم كلهم كعك..
فريحه شافت لنزيهه بقلق..ونزيهه كانت تشوف لتسعه بنظره فيها خوف..
هو عقد حواجبه وقال.
/وينها هي؟
هشام وجه نظره لأمه بعد سمع سؤال بوه اللي جاوب عليه معاذ..
"امي حابستها في دارهم."
تسعه وجه نظره لنزيهه اللي كانت تشوفله بنظره بانت فيها ثقة مصطنعه وكلهم كانوا يشوفولها معاه..
هو طلق هشام بعدين مشي طلع من حداهم..
خدت نزيهه نفس وكلهم كانوا يشوفولها ونظراتهم كانت بين الخوف والضيق والترقب..
🌿🌿🌿
وصل تسعه في جناح بناته..
خشله بعدين خش للدار لقي كريمه راقده في سريرها..
قدملها وقعد يتفحص في وجهها بنظره لقاها راقده ودموعها ينزلوا،قلبه وجعه ع الآخر..
طبس عليها مسح دموعها وقعد ينوض فيها..
/كريمه..كريمه..بابا كريمه..
فاقت كريمه وهي مفجوعه..
هو مسح ع شعرها وقال بهدوء..
/اني بابا حبيبتي..
هي بدت تبكي وقالت..
/اسفه بابا..
نهضها وضمها وهو يقول..
/معليشي بابا معليشي..
دفنت وجهها في رقبته وقالت..
/مش زعلان مني!؟
قاللها:مانزعلش من بنتي الحلوة اني..
بعدها شويه وقال..
/تطلعي معاي نتغدوا برا وندهوروا؟
هي ابتسمت بفرح من بين دموعها وقالت.
/باهي..
باس ع راسها بعدين قعمزها ع السرير وقال..
/راجي هني شويه..
تبدلت ملامح ابتسامته للغضب وهو ماشي بيطلع من الدار..
توجه للممر اللي يرفع للصالون لما وصل فيه وقف في نصه ونادى..
"فريحه..نزيهه"
بعد لحظات جوه الزوز وهما يحاولوا يمشوا بسرعه.
شاف لفريحه وقال..
/بري جهزي كريمه بنطلعها معاي..
هي قالت..
/حاضر..ومشت طول وعقلها مع نزيهه..
تسعه قعد يتبع فيها بنظره لعند ماطلعت من الممر بعدين وجه نظره لنزيهه وقال..
/نحاول ع قد مانقدر ماندخلش في تربيتكم للصغار لكن لما نشوفكم تغلطوا لازم نحطلكم حد..بنقولك كلمتين خليهم ديما في بالك وانتي تربي في الصغار..ديما خليك متفكره ان هادم صغار تسعه بيت المال يعني امانه عندكم..امانه يانزيهه..وصلت؟
كانت تشوفله بضيق وهي تسمع فيه وفي اخر كلامه نزلت عيونها وهزت راسها بإيجاب..
هو قاللها:بري ارتاحي في دارك وتو نخليهم يجيبولك غداك لعندك..
بلعت ريقها وقالت..
/حاضر..
بعدين مشت في الجهة اللي ترفع للمصعد الكهربائي..
وهي ماشيه شافت فريحه ماشيه بكريمه لبوها..
فريحه شافتلها بأسف اما كريمه كانت تشوفلها بحزن وفيسع نظره الحزن هادي تبدلت للخوف لما شافت نظرات أمها الغاضبه ليها..
بسببها اليوم سمعت كلام من اللي يسوى واللي مايسواش بسببها تسعه عاقبها بنفس العقاب اللي نزلت بيه عليها..
🍃وغالبا مواقف زي هادي تكبر الفجوة بين الام وبنتها وتعطي للأم المبررات والدوافع اللي تخليها تزيد تقسى ع بنتها🍃
🌿🌿🌿🌿🌿
وحتى مبروكه ماكانتش ام حنونه لربيعه ناجي كان احن منها عليها لكن ربيعه طول هالسنين ماقدرتش تجافي امها ولاتحس اتجاهها بالنفور كانت ديما ليها بنت باره مهما شافت وسمعت منها...
🍃في صباح اليوم التالي..
كانت مبروكه واقفه ع الغاز طيب في الشاهي خشت عليها ربيعه وقالت..
/يام بنطلع نجيب خبزة وجايه مش معطله..
هزت مبروكه راسها بدون ماتتكلم..
تنهدت ربيعه بضيق ومشت طلعت من الحوش..
وهي ماشيه بطريقها للمحل لقت صلاح مقعمز قدامه يراجي فيها..
برغم غضبها الشديد تجاهلت وجوده وخشت للمحل..
ربيعه:صباح الخير عمي رافت..
قاللها بإنزعاج..
/ماعندي شي نبيعه توكلي..
قعدت تشوفله بصدمه وعيونها تعبوا دموع..
ع خشة صلاح قال..
/عطيها شن تبي ياعمي رافت..
هي بغضب مشت طلعت من المحل قعدت تمشي بسرعه ودموعها ينزلوا وتمسح فيهم..
سمعت خطوات حد يجري وراها بعدين سمعت صوت صلاح يقول..
/ربيعه راجي..ربيعه..
مابتش تعبره نهائي وكملت طريقها..
هو سرع خطواته ووقف قدامها وقال..
/تبي خبزة ولا خودي..
ع خطمه واحد من الجيران شافتله لقت في عيونه نظره اتهام بشعه..
ضربت كيسة الخبزة بغضب ارتمت ع الطريق باللي فيها وهي تحركت تجري لحوشهم هاربه من بشاعة العالم الخارجي..
لما وصلت في الحوش فتحت الباب وخشت سكراته..
حاولت تتماسك ماتبيش تبكي قدام امها..ماتبيش تزيدها ع مابيها..
مسحت دموعها وخشت داخل واول ماوصلت لوسط الحوش شافت منظر خلاها تصرخ بفزع بأعلى حسها..
شافت امها شانقه نفسها حتى الموت...
🌾🌾🌾🌾🌾🌾🌾🌾🌾🌾🌾🌾🌾🌾🌾🌾
في ارض واسعه..
كان بحصانه الأسود اللي اطلق عليه اسم"رماح" يجري وبوه يشوفله من بعيد وهو يضحك بفرح واعتزاز ويقول..
/بنداري ولد بنداري الفرسنة تجري في دمنا..
صديقه الساعدي قال..
/ولدك هدا ماشاء الله عليه راجل من صغره..
شافله وقال..
/مايتخيرش عن محرز.
ومحرز اللي كان واقف حداهم يتفرج لما شاف سلطان وقف الحصان ع رجليه قعد يصفر..
وكمال والساعدي قعدوا يصفقوا وهما يضحكوا..
🌾وطلعوا من هديكا الارض اللي كانت ملهد للخيل ومشوا يشوفوا احوال الرزق..
كمال كان يبي ولده سلطان يتمرس في كل شي من صغره بش يكون ذراعه اليمين واقرب الناس ليه كان يحبه جدا حب كبير ومعلق عليه كل آماله..
وسلطان قريبا حيجيه أخ لأن امه حامل حاليا في الشهر السابع بولد..
🌾"قال شايفها مرة في السوق وعجباته وحتى هي مطلقه زيه يافطيمه"
فطيمه وهي تكسر في الفطيره اللي بدير بيها فتات قالت..
/ولو اني شايفاته مشروع فاشل ومش صاير منه لكن ع خاطرك حاضر تو نكلم كمال..
=يسلم خاطرك يافطيمه..
ابتسمت فطيمه والتفتت لوحده من النساوين اللي تخدم عندهم مراة خمسينيه اسمها "زاهيه" نادتها بإسمها وقالت..
/بالله طنجرة البصله..
رفعت الطنجره ومشت بيها لفطيمه حطتها جنبها وقالت..
/ارتاحي ياللا اني تو نكمل عليك..
فطيمه قالت..
/تعرفي كمال يازاهيه مايبي حد يسقيله غداه غيري..
زاهيه قالت..
/باهي خليني نسقي متاع النساوين..
فطيمه قالت بإبتسامه..
/باهي..
شويه قالت ضيفتها اللي تكون بنت عم كمال..
/زاهيه شن صار في ولدك ومرته ع حكايه الصغار؟
قالتلها بأسف..
/قاعدين يعالجوا كل مرة بحاجه مرة بالطب العادي مرة بطب العرب..
فطيمه:مالهمش عامين متزوجين تو يديروا الصغار إن شاء الله..
زاهيه قالت..
/إن شاء الله..
ويسمعوا صوت منبه سيارة كمال..سيبت فطيمه اللي في يدها وحطت شاربتها ع راسها وطلعت بسرعه بش تستقبله..
🌾وصلت في الباب وقعدت تستنى لعند ماانفتح وخش كمال ومعاه سلطان..
قدمتله بسرعه وهي تقول..
/حمد لله ع سلامتك..وبدت تحوله في البالطو..
هو قاللها..
/الغدي واتي..
حطت البالطو ع ساعدها الايمن وهي تقول..
/ايه واتي ياسي كمال..
مشي وهو محاوط بذراعه كتافه سلطان وقال..
/جيبيه للمربوعه..
قالتله:حاضر..ومشت طول لدار النوم علقت البالطو ع الشماعه وبسرعه ولت للكوجينه بش تجهزله غداه..
🌿🌿🌿🌿
"اني والله مانبي نمشي فيه طريق المحاكم لكن هو جبرني"
تسعه قال الكلام هدا عن واحد كان عنده معاه خدمه وصارت فيها بعض المشاكل..
شاف لمساعده جمال شويه بعدين قال..
/في محاميه شكروهالي هلبه..كان تذكر قبل شهر شفتها مع مصطفى بوعايشه في شركة رجب الخمسي..
جمال قال..
/حسناء تاشفين..
اشر عليه وقال..
/ايوه هي هادي..هي عطتني كرتها..وكيف جاي بيفتح الدرج قاله جمال...نعرف عنها كل شي حتى مكان سكنها..
شافله تسعه وهو رافع حواجبه..
جمال قاله:من بعد هداكا اللقاء سألت عنها كويس لأن احتمال يصير بينك وبينها شغل لازم نعرف عنها كل شي..
ابتسم تسعه بعدين قال..
/خلاص نمشولها لمكتبها..
جمال قال..
/توا؟
تسعه قال..
/ايه ماعنديش وقت نضيعه في مشاكل تافهه زي هادي
ومشي طلع من مكتبه وجمال طلع وراه وسكر الباب بالمفتاح.
🌾🌾🌾🌾🌾
"مني مني!؟"
فطيمه بشي من التوتر قالت..
/بنت بيت المال تقريبا سماها هانيه
سكت كمال شويه وهو يفكر بعدين قال..
/ماعنديش مشكله الايام الجايه ندير زيارة لنسيبنا ونجس نبضه..
قالتله بشي من الريبه..
/تتوقع يعطوها!؟
قاللها:ماأظنش..ابتسم ع جنب..لكن هكي ولاهكي بنمشيله ليا سنين ماكسدتش عليه..
قعدت فطيمه ساكته وهي تشوف للسجاده..
هو شافلها شويه بعدين قال..
/ارقدي وارتاحي..
قالتله:ماتبي مني شي؟
رد نظره للتلفزيون وقال..
/تؤ..
هي ناضت بصعوبه ومشت خشت السرير ورقدت ع جنبها وخلاته يتفرج ع الأخبار..
🌿🌿🌿🌿🌿
وصلوا تسعه وجمال لمكتب "حسناء تاشفين"..لكن وين خشوا حجرة السكرتاريه سمعوا اصوات نقاش حاد جاي من مكتب حسناء والسكرتيره واقفه جنب المكتب وهي في قمة الخوف..
فجأه انفتح باب مكتب حسناء بقوة..
شافوها وقفت جنب الباب وهي تقول.
/اطلع اقلب وجهك اطلع ورد بالك تجي هني مرة تانيه..
طلع واحد من المكتب وهو يأشر عليها بسبابته متوعدا ويقول..
/الايام بينا..
قالتله بعصبيه ممزوجه بالسخريه..
/اعلى مافي خيلك اركبه..
ومشي الراجل بغضب وهو يتمم وعيون تسعه وجمال معاه وينتفضوا الزوز ويردوا نظرهم لباب المكتب بعد ماسمعوه انخبط بقوة...
...يتبع...
