■■■■■■■■■■■■■■■■■■■■
🌿 لن تستطيع أن تُحارب قبح العالم ، دون أن تتلوّث منه بشيء..!!
-دوستويفسكي🌿
••••••••••••••••••••••••••••••••••••••••••••••••••••••••••
خشت لأحد شوارع منطقة شعبيه متوجهة لحوش البنت اللي تخدم عندها ووين جت فايته قدام دكان الشارع شافها صلاح وهي شافتله بنظره فيها شي من الازدراء بعدين غيرت نظرها عنه وهي ماشيه في طريقها..
ناض صلاح وقعد يلحق فيها من بعيد لعند ماشافها خاشه لحوش ربيعه..
▪▪▪▪▪▪▪
"ليك شهر قاعده في الحوش بروحك معقوله ماخفتيش بكل"
ربيعه بملامح وجهه متجهمه قالت..
/ماعندي ع شني نخاف..
عصمت قالت:كيف ماعندكش ع شن تخافي!؟ مش خايفه ع روحك من هداكا الخسيس اللي ديما حايم حواليك!؟
ربيعه قعدت ساكته ماكانتش عندها طاقه للنقاش..
تنهدت عصمت وقالت بمحايله..
/يابنتي بوك وامك الله يرحمهم هدا قضاء وقدر اللي ديري فيه لروحك مايردهمش راهو..وكانك ناويه تقتلي روحك بش تلحقيهم راك بتموتي جيفه..
تعبوا عيون ربيعه بالدموع وهي تسأل في عصمت..
/قصدك امي ماتت جيفه!؟
عصمت ردت بحزن..
/امك كانت نفسيتها تاعبه من اللي صار فيها وكأنها مش بوعيها وان شاء الله ماعليهاش ذنب في اللي داراته في روحها لكن انتي قاعده بوعيك ياربيعه..
حطت ربيعه ايديها ع وجهها وقعدت تبكي وتقول..
/معاش عندي حد ماقعدلي حد ياابله عصمت..
ضمتها عصمت وهي تقول..
/حتى اني زيك ياربيعه واللي زينا مفروض يوقفوا مع بعض ويساندوا بعض مالناش غير بعض بعد ربي..نوضي سلم وخيتي نوضي اغسلي وجهك ولمي حويجاتك وروحي معاي..
تباعدت عنها شويه وقالت بنبرة باكيه..
/كان قعدت عندك نقطع برزقك ياابله عصمت..
عصمت مسحتلها دموعها وقالت..
/الرزق على الله حبيبتي الرزق على الله..هي نوضي اسمعي الكلام وديري زي ماقتلك..
ابتسمت ربيعه بألم من بين دموعها بعدين ناضت ومشت للمكان اللي فيه حوايجها وعصمت معاها بنظراتها الحزينه..
🌿🌿🌿🌿🌿
مقعمز في مكتب الادارة في الشركه متاعه يسمع بإنتباه للمعلومات اللي يسرد فيها نديمه..
جمال:من لما مات راجلها وهما يهددوا فيها بطريقه مباشرة وغير مباشره لدرجة انهم دارولها مشاكل مع خالها وخلوه يلزها ويقطع علاقته بيها..
تسعه قال:قصدك كانت قاعده عند خالها؟
جمال:ايه..ماعندهاش اقارب هني غيره هو وخالتها اللي قاعده عندها حاليا..واني ندور وراها عرفت معلومه لفتت انتباهي هي من بعد وفاة امها وبوها قعدت عند خالها وبعد خمسة سنوات تزوجت من نور الدين الملفت ان خالها قبل زواجها من نور الدين كانت عليه ديون كبيره دخله الحبس لكن بعد زواجها مباشرة وفى كل ديونه..
هز تسعه راسه وقالت..
/فهمت..باهي توا هي قاعده في حوش خالتها..خالتها عندها صغار!؟ يعني شباب؟
جمال:خالتها عزباء يابيي.
رفع حواجبه وقال..
/معناها نساوين برواحهم!؟
هز جمال راسه بصمت..
عقد تسعه حواجبه وقال متسائل..
/اهل بوها وين؟
جمال:كلهم قاعدين برا..بين المغرب واسبانيا ومن قبل مايتوفى بوها العلاقه بينهم شبه معدومه..
تسعه:كيف توفوا بوها وامها؟
جمال:حادث سير وقتها كانت محاميه تحت التدريب..
تنهد تسعه بعدين قال..
/خودلي معاها موعد غدوة ان شاء الله..
جمال هز راسه وقال..
/حاضر..
🌿🌿🌿🌿
طلعت لحديقة القصر وهي دور ع ضرتها..
لقتها مقعمزة ع واحد من المقاعد الخشبيه الطويله بروحها..
تنهدت بحزن ومشتلها ولما وصلت فيها قعمزت جنبها وهي تقول..
/الجو بادي يصقع معاش يجي التقعميز برا..
آسيا قالت بألم..
/البرد في قلبي..صدري كله جليد يازكيه..
دمعوا عيون زكيه وقلبها انعصر من الألم..
تنهدت آسيا بحزن وقالت..
/صعبه الحياة بعد تفقدي انسان كان عندك الحياة كلها..انا زي ماتقولوا يازكيه عايشه من قلة الموت..
مسحت زكيه دموعها وقالت..
/والله ماعندي باش نواسيك لأن حالي من حالك حاسه في حاجه فيا ماتت معاه والله لولا صغاري وعويلتهم رانا قداش ليا لاحقاته..
ضحكت آسيا من بين دموعها وقالت..
/مرة لما مشينا المزرعه سألته انت تحب زكيه اكثر ولاانا.. شافتلها زكيه وهي مبتسمه من بين دموعها..
اسيا بضحكه قالت ودموعها ينزلوا..
/قالي نحبكم الزوز اكثر من بعض ومانقدرش نعيش من غيركم..انا كنت اعرف انه يحبك اكثر وكنت متمنيه يقولها كذب نحبك انتي اكثر لكي اقوله انا نحبك اكثر من روحي ومن حياتي كلها..رشفت ودموعها مازالوا ينزلوا زي السيل..
زكيه قالت بنبرة باكيه..
/تصدقي هو كان ديما يخلي فيا نحس انه يحبك اكثر مني برغم ان اللي حواليا كلهم يقولولي العكس ممكن من غيرتي عليه ماقدرتش نشوف اللي انتم تشوفوا فيه وحتى مافكرتش اني من يوم عرفته وهوانسان عادل عمره مافرق في المعاملة حتى بين صغاره وصغار خوته رباهم كلهم زي بعض وماسيبش الدنيا الا بعد ماعطاهم حقوقهم وزوجهم وتهنى عليهم..
طلعت من آسيا آهة ألم بعدين قالت..
/كم استاحشته استاحشت كل شي فيه بالذات صوته وهو يغني..
زكيه ابتسمت بألم وقالت..
/يااه ياصوته عمري ماسمعت احلى منه...وبدت تغني في نفس اللحظه اللي غنت فيها آسيا..
"نقشه حلو..عجبتني اوصافه
بان الزين وين ساوى لحافه..
بان الزين وين ساوى لحافه..
نقشه حلو..والحلو حلو"
سكتوا شويه وهما يشوفوا لبعض بعدين ضحكوا من وسط دموعهم لما اكتشفوا انه كان يغنيلهم في نفس الاغنيه وسرعان ماانقلب هالضحك لبكي خلاهم يضموا بعض والعبرات تطلع منهم وكأنهم قاعدين يسمعوا في الاغنيه بصوته الهادي..
"نقشه حلو والحلو حلو"
🌿🌿🌿🌿🌿
عصرا..
حل كمال البندار ضيف ع اهل قصر ذهيبه واكثر من انزعج من زيارته بعد تسعة مرته فريحه..
🌱فريحه بكره:امتى يجي هو كان في المناسبات شن جاي يبي توا!؟
نزيهه قالت بقلق..
/يفكنا الله من شره..
ع خشة هانيه قعمزت معاهم وقالت..
/شن جو ؟
فريحه قالت..
/زفت بجية الزفت كمال البندار!؟
هانيه بإستغراب..
/شن عنده جاي!!؟
نزيهه؛وين نندروا ع دعوته..
ويخشوا عليهم سلامه ومعاه كريم..
كريم شاف لهانيه كيف طالعه بجمبسوت الجينز اللي لابساته وشعرها القصير اللي كانت رافعاته فوق والمكياج اللي كان زايدها جمال قعد مسهم فيها وخلاص..
♤في هلبه يجهلوا المعلومه هادي الراجل من لما يتخطى عمره عشرة سنوات يبدا ينظر للمراة بنظره بعيده بعض الشي عن البراءة..يعني كان شافك طارحه وع سنقة عشرة او لابسه ضيق ومش مستور نظرته ليك ماتختلفش هلبه عن نظرة الراجل البالغ..هدا علاش شرعا مفروض المراة تتحجب عن الذكر الأجنبي عنها و تنضبط في لبسها قدام المحرم ليها بعد يوصل سن العشر سنوات..
لكن كريم كانت مشكلته مشكله الفرق بينه وبين عمتي هانيه ربع قرن ومن هداكا الوقت ماقدرش يشوف مراة احلى منها...
🌱سلامه:امي ماشيين اني وكريم للنادي ماتبوا شي؟
نزيهه بإبتسامه قالت..
/سلم هالتراس ياربي نبي سلامتك بس حبيبي..
شاف لأمه وقال..
/وانت ياقنين؟
فريحه بضحكه:ردو بالكم ع ارواحكم..
قاللها:حاضر..وغير عيونه لعمته وقال..وانتي ياكوين..
هانيه ضحكت وقالت..
/اغلب كريم..
احمر وجه كريم لكن قال بتحدي..
/تو نروحلك بيه مهزوم ماتوصيش..
ضحكوا وهانيه قالت..
/روحلنا بيه يبكي ياسلامه..
خبط سلامه بيده قفا كريم وقال..
/من عيوني..
ردله كريم الضربه ووجهه قاعد محمر وشده من رقبته ومشي بيه وسلامه يضحك وامهاته وعمته يضحكوا عليهم..
🌿وعند تسعة وضيفه اللي كانوا يتبادلوا في الابتسامات المصطنعه والاحاديث اللي كلها رمي كلام..
🌾كمال وهو حاط رجل ع رجل قال.
/قريبا ان شاء الله حناخدوا وكالة سيارات ****** ..
تسعه رفع حواجبه وقال..
/حلو حلو مبارك
قاله كمال بإبتسامه جانبيه..
/وحاجه تانيه انت اول من يعرفها شريت نص محلات السوق الكبير..
عقد تسعه حواجبه وقال..
/نصهم؟
كمال قال..
/نصهم وحندير غادي سلسله معارض للأثاث والادوات الكهربائيه بكل أنواعها ومعرض مواد بناء..كلهم حيكونوا تحت اسم ابناء البندار..
ابتسم تسعه اخفاءا لغيظه وهو يقول..
/ماشاء الله ماشاء الله..مبارك
🍃السوق الكبير جاي في مركز الألف وخمسين وهو مايبيش البندرايه يملكوا شي غادي وكمال كان عارف الحاجه هادي كويس لهدا قرر يخترق منطقه نفوذه ويملك مساحه فيها🍃
ردله الابتسامه وهو مركز ع غيظ في عيون تسعه وقال..
/الله يبارك فيك..حمحم وقال..خل نخشوا في الموضوع اللي جايك ع خاطره..
ضيق تسعه عيونه وهو يراجي فيه يقول اللي عنده..
كمال شافله شويه بصمت بعدين..
/من غير مقدمات اني جايك نطلب كريمتكم ابله هانيه لفتح الله ولد عمي..حتى هو كان متزوج وماتوفقش وتوا ناوي يتزوج مرة تانيه واظني المرة هادي اختار صح..
ضحك تسعه ضحكه خفيفه وقال..
/والله ياخوي كمال طلب ولد عمك مش عندنا لأن اختي سكرت موضوع الزواج ومعاش تبي تفتحه بكل..
ضيق كمال عيونه وهو مبتسم بإستغراب..
تسعه بإبتسامه..
/ماتمنيتش نردك لكن امور زي هادي طالعه من يدي..
قعد كمال يشوفله شويه بصمت بعدين قدمله راسه وقال..
/اسمع كان قاعد حامل في نفسك شي من ايام زمان..
رفع تسعه يده وقال وهو مبتسم ابتسامه تخفي غضبه..
/كمال حبيبي..كمال..نزل يده وهو يقول..اني عمري مالزيت ضيف مانبيش نديرها معاك انت..
ضحك كمال ضحكه طويله بعدين قال /شكلك يولي مليح لما تتعفلق..هدا علاش تلقاني ديما نطيرلك فيها..
قعد تسعه يتمالك في غضبه بالقوة..
اما كمال بعد ماخدي غايته في الضحك قال..
/ياودي كل شي نصيب والمرة هادي ربك مش كاتبلنا نسابوا بعض مرة تانيه..ناض وتسعه ناض معاه وهو يقول..
/آنست..
كمال بإبتسامه:الله يآنسك..
🌿وطلع كمال من غادي وهو في قمة الانبساط بعد مامارس هوايته المفضله وتسعه بعد ماسقده توجه طول لمكتبه خشله وسكره عليه وماطلعش منه الا للصلاة وقعد فيه لتاني يوم..
بعد صلاة الفجر توجه مع نديمه لطرابلس بش يتلاقى مع المحاميه..حسناء تاشفين..
▪▪▪▪▪▪▪
"اهلا وسهلا سيد تسعه"
قاللها:اهلا بيك..اني جيتك امس ولما لقيت الظرف مش مناسب اجلت لقائي بيك لليوم..
نزلت نظرها لمكتبها وقالت..
/امم..رفعت عيونها فيه وقالت..شن تحب تشرب؟
ابتسم وقال..
/مشكورة مانبي شي..خل نتكلموا في القضيه اللي نبي نرفعها ونبيك انتي تستلميها..
هزت راسها وقالت..
/نسمع فيك..
🌿وحكالها تسعه تفاصيل المشكله اللي صايرة معاه وهي سالاته بعض الاسئله الاستفساريه وفي نهايه حديثهم عنها قالت..
/الموضوع مش كبير من اول جلسه القاضي يحكملك..
قاللها:وهدا اللي نبيه ماعنديش وقت نضيعه في وجع الراس متاع المحاكم لولا ان هو جبرني ماكنت خشيت هالمواويل..
هي قالت بإبتسامه استغراب..
/لفت انتباهي ان رجل اعمال كبير ومعروف زيك ماعنداش محامي خاص.
ابتسم وقال..
/اني راجل نتعامل بالثقه يعني مانقدرش نحط حد في مكانه حساسه زي هادي ويكون قريب مني لو ماكنتش واثق فيه ميه في الميه لهذا قلت لنفسي خل نجرب كذا محامي اللي نلقاه اهل للحاجه هادي نحطه..
قالت بإبتسامه..
/اكيد في استشاريين قانونيين..
قال:اكيد لكن من بعيد لبعيد..
رفعت حواجبها ونزلتهم وهي متعجبه وهو شافلها شويه بعدين قال..
/اسف لو ادخلت في خصوصياتك..اني عندي خلفيه ع اللي صاير بينك وبين ولاد زوجك الله يرحمه ونبي نعرض عليك المساعده..
ابتسمت بجديه وقالت مقاطعه لكلامه..
/لالا مشكور جدا سيد تسعه نعرف كيف نتفاهم معاهم ونديرلهم حد..
دام النظر ليها للحظات وهو مبتسم بصمت بعدين قال..
/ع راحتك..
▪▪▪▪▪▪▪▪
متوجه لسيارته وهو يقول لنديمه..
/توقعت رفضها..المهم خليكم وراها وشن مايصير معاها بلغني طول..
جمال قال..
/حاضر..
وركبوا السيارة وتحرك بيهم السواق وعيون حسناء تراقب فيهم من ورا شباك مكتبها..
♤وتمشي خالتي حسناء في القضيه اللي رفعها بوي لعند ماجي يوم المحكمه اليوم هداكا كان حافل بالاحداث..
🌿طالعين من قصر العدل وخصمهم فات من جنبهم بالمحامي متاعه وهو في حالة عصبيه جمال قعد يتبع فيهم بنظره وهو يسمع في حديث تسعه وحسناء..
🌱حسناء بإبتسامه جاده..
/لااسفه اني نفضل نخدم بإستقلاليه..
هز راسه وقال وهو مبتسم..
/مش مشكله المهم لما نحتاجوا نجوك طول..
هي قالت بنفس الابتسامه..
/وان شاء الله معاش تحتاجني..
ضحك ضحكه خفيفه وهي قالت..
/نستأذن..السلام عليكم..
هو قال:وعليكم السلام..
ومشت بإتجاه سيارتها..وهي ماشيه طلعت المفتاح من جيب جاكيتها طاحت منها ورقه مطويه وقفت وجت بتنزل تاخدها..
فجأه تجي بإتجاهها سيارة مسرعه هي سمعت صوتها رفعت عيونها وشافتلها بصدمه..
السيارة كانت خلاص حتوصل فيها وتصدمها لكن في لحظه لقت نفسها عند تسعه شافتله وهي مصدومه وهو كان يشوف لنديمه جمال كيف اطلق ع عجل السيارة الرصاص وطبقهم بعدين قعد يجري وراها ومعاه جماعه من حرس القصر..
غير نظره لحسناء وقاللها..
/تعالي..
خداها من يدها وهي مازال في حالة الفجعه والصدمه ومشي بيها لسيارته..
فتح الباب وركبها من الخلف بعدين سكره وقعد واقف جنبه يراقب في اللي قاعد يصير قدامه..
اللي كان يسوق في السيارة فتحها وحاول يهرب لكن ماقدرش يفلت من قبضة جمال اللي شده وسلمه للحرس اللي رفعوه من فورهم بعدين رجع لتسعه اللي قاله..
/اركب معاه ووصلوها لحوشها لما تشوفوها خشت تعالوا..
جمال:بتقعد هني؟
تسعه هز راسه بإيجاب..
"سيد تسعه"
وجهوا انظارهم لشباك السيارة اللي كانت حسناء مطلعه راسها منه وهي تقول..
/ماتعبوش ارواحكم تو نروح بروحي..
تسعه قال:مافيش تعب استاذة..رجع نظره لجمال وقاله..اركب..
حسناء قالت..
/قتلك مش لازم ياسيد تسعه..
هو حاول يهدي اعصابه نزل راسه وقال..
/ارجوك يااستاذة فوتي العناد توا وخليهم يوصلوك لحوشك وبعدين دبري امورك بمعرفتك..
شافتله بنظره حادة بعدين وجهت نظرها القدام..
هو ابتسم ابتسامه خفيفه وشاف لجمال وجمال فتح باب الكرسي الامامي وركب والسواق شغل السيارة وتحرك..
قعد تسعه بنظره مع سيارة لعند ماتباعدت بعدين لف ومشي بإتجاه قصر العدل..
🌿وفي قصر ذهيبه..
كانوا الضراير يتمشوا في حديقة القصر تحت عيون هانيه وبلقيس وغزلان..
غزلان اللي كانت عيون قيس طول الوقت عليها..
قيس خدي اجازة اسبوع بش يروح ويشوف امه ويشوف معاها عيون ليهم شهور طويله شاغلين قلبه..
كان مقعمز مع ولاد خوه ومعاهم كريم اللي مرة مرة يسرق في النظر لهانيه..
🌱"خلاص توبه هادي اخر مرة"
نزيهه قالت بضحكه..
/ديما تقولي هكي.. فريحة بتذمر قالت..
/لاالمرة هادي خلاص قرار نهائي..
نزيهه قعدت تضحك..
شويه نزلت فريحه نظرها للأرض وقالت..
/مطر ولا؟
نزيهه شافت للأرض وقالت..
/ايه..
وبدت تقوى المطر خدت نزيهه يد فريحه ومشوا مع بعض بسرعه للمظله وقعمزوا تحتها ويسمعوا بلقيس وهي تتفرج ع الاولاد كيف يلعبوا تحت المطر تقول بضحكه...
/سعدودهم خاطري نلعب زيهم..
نزيهه قالت بقلق..
/هكي بيمرضوا ياهمومي!
ع طلعة كريمه شافتهم وهما يلعبوا ضحكت وجت بتلحقهم وقفتها امها لما قالت بصوت عالي..
/وين ماشية تعالي هني..
اختفت ضحكتها وحلت محلها ملامح الخوف والضيق مشت وقفت تحت المظله وهي تشوف بحزن لخوتها كيف يلعبوا..
غزلان كانت مركزه عليها ناضت من مكانها ومشتلها وقفت جنبها وقالت..
/الدعاء مستجاب توا..شن رايك ندعوا اني وياك بأكثر حاجه نتمنوها..
كريمه قالت بحماس..
/باهي..
ابتسمت غزلان ورفعت ايديها بعدين غمضت عيونها وبدت تدعي همسا..
"يارب نحفظ القرآن بأكثر من رواية وننجح في الشهادة الاعداديه بتفوق"
وكريمه قلدتها وبدت تدعي..
"يارب ننجح بش ماما تحبني"
وجنبهم بلقيس ناضت وهي تقول بحماس..
/معاش نقدر خلاص..
وطلعت تجري من تحت المظله وتنوض بعدها هانيه وهي تقول بضحكه حماس..
/حتى اني سهفوني..
🌹وطلعوا الزوز وقعدوا يلعبوا تحت المطر وصوت ضحكاتهم معبي الدنيا..
سلامه وهو يمسح ع شعره المبلول قال..
/عماتي هبلوا..
هشام قاله..
/تحشم..
قيس اللي كان واقف تحت مظله تانيه وهو يراقب في غزلان لما سمع كلامهم قال بضحكه..
/بلقيس مهما تكبر تقعد طفله..
سلامه التفت عليه وقال..
/حتى عمتي هانيه..
قيس:لاهانيه تبان اصغر منها في كل شي..
وكريم يسمع فيهم وهو يشوف لهانيه كيف تجري ورا بلقيس وهي تضحك لكن فيسع غير عيونه لسلامه لما سمعه يقول لقيس..
/سمعت بوي يومها يقول لأمي خطبها كمال البندار لولد عمه..
قيس:هدا اللي مازال!
سلامه قال بضحكه..
/حتى بوي قال هكي وقال قتله اختي معاش تبي تتزوج..
ضحك قيس..
اما كريم رجع يشوف لهانيه وهو يقول في نفسه..
"احسن خل تقعد لين نكبر "
🌱لكن هاللحظات الممتعه انتهت مجرد ماصرخت فريحه وهي تتألم ناض عليها الوجع وكان باين عليه وجع ولاده وحالتها خلت ضرتها تتوجع زيها ويحصلوا الكل في معاناتهم لين طلع بيهم قيس مع واحد من السواقين وهانيه مشت معاهم..
🌿وفي نفس الوقت في مكان تاني..
كانت ربيعه طالعه تشري بعض اللوازم اللي وصتهم عليها عصمت..
وتصب عليها المطر في الطريق ولأنها كانت قويه ادرقت تحت مظله لوحده من محطات الحافلات وقعدت تستنى في المطر توقف..
وبعد حوالي عشرة دقايق وقفت المطر وطلعت ربيعه من تحت المظله وقعدت تمشي بسرعه لأنها تأخرت..
وهي ماشيه يطلع في وجهها صلاح..
تجاهلاته لكن هو وقف قدامها وطلع "بوخوصه"
فتحت عيونها ع وسعهم بفجعه وهي تشوفلها وهو قاللها بتهديد..
/تمشي قدامي توا وفمك ساكت تفتحيه نقتلك ونقتل روحي ماعنديش مشكله
بلعت ريقها بخوف بعدين قامت عيونها فيه لاحظت بياضهم مولي احمر عرفت انه واخد جرعه من مخدر الحشيش..
نزلت عيونها وهو زاد قربلها السكين..ولأن الطريق شبه فاضيه مافي حد شاف اللي صاير بش يساعدها..
خدت نفس بعدين قالت..
/باهي..
قاللها:قدامي..طلعي صوت ياويلك..
قعدت تمشي بهدوء لعند ماوصلت لسيارة "عكاريه" فتح الباب وركبها وسكره كويس بعدين مشي ركب جنبها وشغل السيارة وتحرك..
صلاح:توا ياربيعي بتقعدي في حوشنا لين تروح امي من طرابلس مشت غادي بش تحضر عرس بنت خالي المهم بعد العرس نديروا عرسنا حني ونكملوا العمر جميع..
قعدت ساكته وهي مركزه بنظرها ع الطريق وهو جنبها يغني في اغاني عاطفيه وعايش مع اوهامه اللي ساعدت جرعة المخدر في تفخيمها..
وبعد ماقطعوا مسافه قصيرة وصلوا لحوش منوبيه اللي في طرف الغابه..
درس صلاح ونزل بعدين مشي من الجهة التانيه فتح لربيعه لباب..
نزلت وفي يدها كيسه فيها الحاجات اللي خدتهم هو قاللها..
/هي بري قدامي ياربيعي..
مشت ربيعه بكل هدوء وهو وراها يغني،وفي عز حالة الطرب اللي عايشها تلتفت عليه ربيعه وتهبده بالكيسه ع وجهه والكيسه كان فيها فازو"برطمان" خبط جبهته وخلا الدنيا تلف بيه اكثر ماهي لافه..
وتطلع تجري وهو حاول يشد حيله ويلحقها..
🌿في الطريق القريبه للغابه..
كانت تمشي سيارة صاحبها يقول..
/امتى المزاد؟
جمال:بعد اسبوعين بالزبط..
سكت تسعه وهو يفكر وفي عز تفكيره يخترق مسامعه صوت صرخة مراة عقد حواجبه وقال..
/صوت عياط!
جمال وهو يسمع قال..
/ايه..
"زودولي..تعالولي"
السواق قال..
/كأنها تقول تعالولي..!
تسعه قاله..
/درس يمين درس..
🌿وربيعه قاعده تجري بأقصى سرعتها وصلاح وراها وهو يقول..
/ماتمشيش معاك معاملة البنادميه انتي تبي معاملة تانيه..
ربيعه وهي تجري سمعت صوت خطواته قريب صرخت مرة تانيه بأعلى صوتها وهي تستنجد وبدون ماتركز عترت في حجر وطاحت ع ركابها...
وتحصل بين ايدين صلاح اللي شبه فقد عقله وهو يقول..
/هدا اللي يمشي معاك انتي..
قعدت تضرب فيه وتقاوم وهي تبكي..جي بين عيونها يوم موت بوها ومنظر امها وهي منتحره قعدت تبكي وتعيط وصلاح استغل حالة ضعفها هادي وكان حيتمكن منها..
وفي هاللحظه وصلوا تسعه وجمال..
المنظر اللي شافوه طلع عقل تسعه من راسه جبد مسدس جمال وجي بيطلق النار ع صلاح لكن تفاجئ بربيعه وهي تخبط فيه بحجر كبير ع راسه..
وهالمرة صلاح فقد الوعي تماما وكان حيطيح عليها لكن هي بكل قوتها دفعاته عنها جي مرمي ع الأرض بعدين صعوبه ناضت وجت بتهرب لكن وقفت في مكانها لما تسعه وجمال قدامها..
قعدت تشوف لتسعه وهو يشوفلها وفجأه تسكروا عيونها بعد فقدت وعيها وكانت حطيح ع الارض لكنها جت بين ايدين تسعه اللي تلقاها....
♤ومن يومها وامي محموله ع كفوف راحات بوي...
...يتبع...
