■■■■■■■■■■■■■■■■■■■■■
🌿 إن فى الحياة فترات إنتقالية لا يمكن إجتيازها دون أن يموت شئ ما بداخلك🌿
••••••••••••••••••••••••••••••••••••••••••••••••••••••••••••
♤"كانت فترة قاسية" هكي وصفت امي هديكا الفترة الصعبه في حياتها طبعا قبل ليجي بعدها ماهو اصعب منها..
المهم..ان ذكريات وفاة جداي "آسيا" كانت قاسيه على عيلة بيت المال كلها لكن اكيد حتكون اقسى ع صغارها عمي قيس وعمتي بلقيس..
عمتي بلقيس وحده من الناس المبلتين اللي عرفتهم في حياتي كانت بداية المصايب اللي نزلت عليها موت امها..
يومها محمد راجلها كان ناوي يحطها عند اهلها ويتوجه لمهمته اللي كانت في وحده من المناطق الحدوديه المهمه هادي كانت خطيره يعني هو كان ماشيلها وكفنه ع ايديه وهدا حال كل عسكري او ضابط أمن مهمته حمايه بلاده وناسه..
لما عرف بخبر موت جداي آسيا خاف هلبه ع عمتي بلقيس خاف لو بعد هالفاجعه تلحقها فاجعه ممكن تقضي عليها..
🌿بلقيس ماعرفتش بخبر وفاة امها الا بعد وصولها للقصر..
صدمتها كانت شديد كادت تفقد عقلها فيها..
نساوين خوها اختها هانيه حاولوا يهدوها لكن ماقدروش عليها لعند ماجتها زكيه خدتها في حضنها وقعدت تبكي هي وياها..
كانت بلقيس دس في روحها في حضن زكيه وهي تتخيل فيه حضن امها كانت تطلع منها كلمة "ماما" بالعبرة قطعت قلوب كل من يسمع فيها بالذات ربيعه اللي أي شي ليه علاقه بالأم يأثر فيها تأثير عميق..
🌱"للأسف مضطر نعدي توا"
تسعه قال بضيق..
/معذور يامحمد معذور..
حط محمد يده في جيب سترته العسكريه وطلع منها ظرف رساله ومده لتسعه وهو يقول بألم..
/في حال قدر الله يصير فيا شي عطيهلها..
شافله تسعه بنظره قلق ممزوجه بالحزن وهو يتخيل في حالة اخته لوصارت في راجلها حاجه..نزل عيونه للظرف وخداه وهو يقول..
/تروح منصور وسالم بإذن الله..
ابتسم محمد بألم بعدين ضم تسعه وتسعه ضمه وهو يطبطب ع ظهره..
محمد قال..
/عبد المتين في أمانتك بعد الله..
لما سمع تسعه كلام محمد حس بوجع لايوصف تباعد عنه محمد بعدين طبطب ع كتفه وقال..
/السلام عليكم...
ومشي محمد وعيون تسعه معاه لعند ماطلع من بوابه القصر تنهد بضيق وقال..
/يارب..
🌿ومع العصر كانوا قيس ومعاه محفوظ وزوجته في ليبيا..
اول ماوصل قيس للقصر طلب يشوف اخته وتسعه دخله ليها وين كانت قاعده في دار امها..
🍃"قيس!ماما ماتت تصدق!ماما سيبتنا ومشت لبابا"
قيس وهو ضامها بقوة قال ودموعه تنزل..
/الله يرحمهم ويغفرلهم..
هي قالت ببكاء..
/قعدنا من غير اب وام..قعدنا بروحنا في الدنيا..
قيس:لاماتقوليش هكي عندنا عيلة كبيرة عندنا مرت اب زي الأم عند خوت عندنا صغار خوت..عندك ولد..
قالتله:مافي حد يغني عن البو والام مافيش بالذات الأم ياقيس..غمضت عيونها بشده وقالت بحرقه..آه ياماما الله يرحمك ويسامحك ماقدرتيش تعيشي من غير بابا مشتيله وخلتينا ياماما الله يرحمك الله يرحمكم..
وقيس يسمع فيها وهو يذرف في الدموع وقلبه ينعصر من الألم...
🌿🌿🌿
بعت تسعه من يجيب حسناء وخالتها للقصر..
الخبر اثر في حسناء ووجعتها آسيا مع انها ماتلاقتش معاها غير مرتين بس اكثر شي آلمها هو حال بلقيس،حال بلقيس فكرها بحالها بعد موت بوها وامها الفاجعه اللي خلت حسناء تفقد السعاده وتنساها..
🌿وتعدي الأيام..ويفوت اسبوع ع وفاة آسيا هالجرح الغائر قي قلب بلقيس اللي حيتبعه جرح اعمق يكسرها بكل معنى الكلمه..
🍃"إنا لله وإنا إليه راجعون إنا لله وإنا إليه راجعون"
كرر تسعه هالجمله وهو واقف ع جمال اللي جابله خبر فاجعه اخرى حلت عليهم..
ع جية قيس ومحفوظ الزوز لما طلع تسعة من قاعة العزاء بسرعة حسوا بالإرتياب وطلعوا وراه..
قدم محفوظ وهو يقول بقلق..
/شن في!؟
شافله تسعة بألم وقال..
/محمد الأمين استشهد..
الخبر كان زي الصاعقه ونزلت على قيس..
محفوظ شافله بألم وهو يقول..
/إنا لله وإنا إليه راجعون..
▪▪▪▪▪▪▪
"ياحليلي ياربي ياحليلي رحمتك بينا يارب العالمين رحمتك بينا"
تسعه مسح ع وجهه بعدين قال بألم..
/لاإله الا انت سبحانك اني كنت من الظالمين..
زكيه وهي تبكي..
/ياروحي عليك يابلقيس يابنتي كيف بتتحملي بس..كيف بنخبروها كيف!!
▪▪▪▪▪▪
"شنو!! ياالله!"
نزيهه وفريحة وربيعه وهانيه اطلقوا عبارات الفجعة هادي بعد سمعوا بخبر موت راجل بلقيس..
زكيه وهي تبكي..
/غير كيف بنخبروها بس..
ربيعه قالت بحزن ودموعها ينزلوا..
/المشكله انها حامل..
كلهم شافولها وزكيه قالت بصدمه..
/حامل!
ربيعه بألم..
/ايه امس قالتلي..
حطت زكيه يدها ع صدرها وقالت بصدمه..
/لاحول ولاقوة الا بالله لاإله إلا الله!
وهانيه ونزيهه وفريحه كانوا يسمعوا فيها وهما يبكوا بألم..
🍃وفي النهايه ماقدر حد يوصللها الخبر غير توأمها..
"ياربي لا..لا..حرام ياربي حرام..علاش ياربي علاش.."
كلهم كانوا يسمعوا في صوت صراخها ووجعها الشديد وكأنها قاعده تنحرق بالنار..
قعدت تصرخ بصوت عالي وهي تنادي في راجلها،ومرت بوها واختها ونساوين خوها يبكوا بالعبره..
فجأه سكتوا بخوف لما سكت صوتها وفي لحظه يطلع بيها قيس يجري وهو رافعها بين ايديه واختها هانيه لحقاته وهي تجري..
من اللي صار فيهم مافي حد فكر في أي شي غير حالتها..
كان مطلعها قيس من غير حجاب وهي اللي مفروض تلبس ثوب الحداد..
تسعه وين شافهم لحقهم ومشي بسرعه بيفتح باب السيارة من الخلف..
وجمال كان سابقه لباب السواق في هديكا اللحظه عيونه جو ع وجه بلقيس..شاف ملامح الألم مع الحزن كان شكلها يوجع القلب وقلبه انوجع عليها..
ركب للسياره وشغلها وتسعه في الكرسي الخلفي كان يغطي في اخته بكشايبته وقيس يساعد فيه وهو يرجف من الخوف ع اخته..
بعد ماغطاها تسعه كويس سكر الباب وركب القدام وع طول جمال تحرك وطلع من القصر وهانيه لحقاته بسيارتها..
🍃🍃
وتفقد بلقيس جنينها من الفواجع المتلاحقه والحزن الشديد وجسمها اللي ارهقه حزنها ع امها تعب بزياده من الاجهاض وهالتعب الزمها البقاء اسبوع في المشفى وكانوا برفقتها فريحه وهانيه اللي كانوا يتبادلوا عليها..
🍃من جهة تانيه كانت عزوزتها في حال اسوأ من حالها فجعتها في ولدها الوحيد كانت كبيره والكل توقع انها تلحقه..
♤ولحقاته بعد ماعدى ع موته شهر وشويه..زي ماقالت امي فترة قاسيه بل قاسيه جدا..
🌾🌾🌾🌾🌾🌾🌾
طلعت طاجين كبير معبي عصبان مصارين من الكوشه وحطاته ع الرخامه وهي تقول..
/اهو واتي يللا..
فطيمه اللي كانت تسقي في قصاع الكسكسي قالت..
/ترا قربيلي اللحم يازاهيه..
خدت زاهيه صونيه كبيره وقعدت تاخد من اللحم اللي محطوط في ليان كبير وحطاته جنب فطيمه..
فطيمه:قربي المصارين يامسعوده..
رفعت مسعوده الطاجين وحطاته جنبها..
ابتسمت فطيمه وقالت.. /خلاص بعد ماتتزوجي بتخطي علينا يامسعوده..
ابتسمت مسعوده وقالت..
/لايااللا ولانقدر امتى تحتاجيني ناديني تلقيني قدامك..
فطيمه بإبتسامه..
/سلمها ياربي..ربي يهنيك حبيبه.
مسعودة قالت بإبتسامه..
/سلمك يالللا..
فطيمه:شن ماينقصك وشن ماتبي قولي طول..
مسعوده؛خيركم ديما سابق ياللا..
فطيمه قالت..
/كله خير الله..شافت لزاهيه وقالت..شن صار في ولدك ومرته؟
زاهيه قالت..
/خلاص بيمشوا للسوق العالي..
فطيمه قالت..
/ربي يفتح عليهم ويعطيهم الذريه..
زاهيه قالت..
/آمين يارب العالمين..
🍃زاهيه عندها ولد ليه تسعه سنين متزوج ولم يزرق بالذريه بسبب مشاكل في الانجاب تعاني منها مرته برغم كل المحاولات اللي داروها مااستفادوا شي لعند مااهتدوا لطبيب خبرهم ان في فرصه وحده للحمل عن طريق عمليه من عمليات الانجاب المشروعه لكن هالعمليه تكلف مبلغ كبير ولد زاهيه قعد يخدم ليله مع نهاره بش يلمه ويديروا العمليه..
حاليا حينتقلوا للعيش في مدينه مجاورة للألف وخمسين اسمها السوق العالي حصل فيها فرصة عمل يحصل من وراه دخل كويس يقدر يكمل بيه ماقعد من المبلغ🍃
🌿🌿🌿🌿🌿
"وحمها واعر زي وحم نزيهه في هشام"
زكيه بقلق:معناها تبي مستشفى!
فريحه قالت..
/لامازال شاده حيلها..
زكيه:ماتخليهاش بروحها سلم بنتي..
فريحه هزت راسها وقالت..
/حاضر عمتي..
🌿هالحديث كان يدور بين زكيه وفريحه بالقرب من غرفة المعيشه اللي كانت راقده فيها ربيعه بتعب من الوحم..
ومن غرفة المعيشه لغرفة مكتب تسعه..
كان مجتمع فيها بحسناء وهو يخبر فيها عن أخر مستجدات قضية ولاد نور الدين..
🌱"حكموا علي زوز منهم ب 20عام بعد ماتبث عليهم تهمة الشروع بقتلك واللي قعد منهم حكموا عليه ب15عام لأنه خاش في هلبه معامع.."
حسناء:لو بيدي خليت الحكم عليهم واحد اعدام..
قاللها:يللا المهم افتكيني منهم وتوا تقدري ترجعي تعيشي حياتك في هدوء..
شافتله شويه بعدين قالت..
"مانبيش الطلاق"
ضيق عيونه وهو يشوفلها بعدم فهم..
ابتسمت وقالت..
/بصراحه الزواج منك فرصه غبيه اللي ضيعها..
رفع حواجبه تعجبا..
بإبتسامه قالت..
/نحكي جد..
غير نظره للمكتبه وثبته عليها وهو يفكر..
هي تعبوا عيونها دموع..بلعت ريقها بعدين قالت بنفس الابتسامه..
/عندك مانع؟
رد نظره ليها بعدين قال..
/هادي رغبتك؟
هزت راسها بصمت..
شافلها شويه بعدين قال..
/ماعنديش مانع..
فرحت فرحه كبيره خفتها وهي تقول..
/حاجه تانيه نبي نسكن هني..
داملها النظر لثواني بعدين قال..
/حقك لكن نبيك تستني اسبوعين تانيات بش نجهزولكم جناح انتي وخالتك نبيهة..
🍃صدمها باللي قاله توقعت يفهم عليها من طلبها استمرار زواجهم يفهم انها تبي هالزواج يكون حقيقي مش حبر ع ورق..
لكن للأسف لأنه مش حاس اتجاهها بأي نوع من المشاعر العاطفيه ماوصلاش شعورها اتجاهه اللي كان باين في عيونها،كل اللي فهمه انها تبي تقعد تحت حمايته وكذلك تستفيد من نفوذه🍃
يدوب ابتسمت ابتسامة جديه وقالت..
/باهي..ناضت وقالت..نستأذنك بنروحوا توا..
هز راسه وقال..
/تو يطلع وراكم جمال..في امان الله..
هزت راسها بعدين قالت..
/السلام عليكم..
ومشت طلعت وهو بعيونه معاها يقول..
/وعليكم السلام..
🌿وتذرف حسناء دموعها اول ماتخش ممر المرايا وهي تتألم من كسر قلبها..اول مرة تحس مشاعر الحب في حياتها مشاعر برغم انجرافها اتجاه الراجل اللي تحبه لكنها حاولت تكبتها بكل قوة..
هي حاليا حاسه بالندم شديد لأنها تبعت قلبها ودارت مايبي وهانت كبريائها مع ذلك مش حتقدر تتراجع عن اللي داراته..
🌿بعد لحظات..
طلع تسعه من مكتبه متوجه لجهة تانيه في القصر قعد يمشي يخش في ممر ويطلع من ممر لعند ماوصل في الباب اللي يفتح ع صالون العيله وغرفه المعيشه..
خش منه ومشي للصالون خشله لقاه فاضي استغرب..
طلع منه ومشي بإتجاه دار المعيشه ووين قرب منها سمع صوت التلفزيون..
خشلها وعيونه جو ع اخته بلقيس وهي حاضنه ولدها وتشوف للتلفزيون وهي تبكي غير نظره عنها للتلفزيون لقاها حاطه ع قناه حكوميه تبث في عرض عسكري..
خش وقدم لعند ماوقف مقابل التلفزيون بمسافه بسيطه وعيون فريحه وربيعه ومعاهم هانيه اللي كانت تبكي يشوفوله..
العرض كان فيه تكريم للضباط اللي شاركوا في العمليه الاخيره اللي مات فيها محمد..وهالتكريم شمل الضباط كلهم الاحياء منهم والاموات..
الضابط اللي كان واقف يتكلم ع زملائه ذكر محمد وقعد يمدح فيه وفي شجاعته وقوة ايمانه اللي شهد عليهم في ارض المعركه والكاميرات كانت متوجه لصورة محمد..
التفت تسعه لما سمع صوت عبرات اخته بدت ع وجهه ملامح الوجع..
قدملها وخدي منها ولدها وهو يقول..
/وحدي الله وادعيله بالرحمه..
بلقيس بالعبرة..
/الله يرحمه..
قعمزت جنبها هانيه ضمتها وقعدت تبكي معاها وتسعه اللي قلبه ماتحملش طلع بولد اخته هارب بدموعه وعيون فريحه وربيعه المدمعات يتبعوا فيه..
🌿🌿🌿🌿🌿
الحاديه عشر ليلا..
🌱"خليك معاه يافريحه اني حالي باهي مافيا شي"
تنهدت فريحه وقالت..
/باهي كان تعبتي اتصلي..
هزت ربيعه راسها وقالت بإبتسامه..
/صحيتي.. فريحة ناضت ومشت بتطلع وهي تقول..
/تصبحي على خير..
ربيعه قالت بإبتسامه..
/قدامك كل خير..
بعد ماطلعت فريحه من الجناح قعدت ربيعه سرحانه تفكر في حال بلقيس وهي تقول في نفسها..
"مافي حد سالم من مصايب الدنيا لافقير لاغني كل حد واخد حصته من الوجع..حتى هي دنيا ياربيعه انخلقت بش تكون دار ابتلاء مش دار راحه"
غمضت عيونها وهي تقول..لاإله إلاالله..وبدت تقرا في آية الكرسي وماهي الا لحظات وراحت في النوم..
🌿ويطل صباح اليوم التالي..
بعد الفطور طلعوا الصغار كلهم للمدرسه بش ياخدوا صحايفهم واللي رفعهم راجل تعويضه..
كريمه لأول مرة تكون متحمسه رغم خوفها كانت متأكده انها ناجحه لكن مش عارفه شن شكل نجاحها..
ووصلوا للمدرسه واستلموا نتايجهم وكالعادة سلامة كان الأول ع مستوى المدرسه وخوته هشام ومعاذ الاولين ع مستوى فصولهم وكريم ولد مرعي قعد محافظ ع المركز الثاني ع المدرسه بعد سلامه..
اما كريمه اللي لما جت تستلم نتيجتها لأول مرة تسمع كلام كله مديح واطراء من المعلمه اللي توزع في الصحايف..
"برافو عليك ياكريمه برافو شديتي كويس وتفوقتي ونجاح نجاح باهر ووليتي من العشرة الاوائل صفقوا لكريمه"
وعلي صوت تصفيق زملاء كريمه وهي تمرر في نظراتها الفرحه عليهم وضحكتها مزينه وجهها البريء..
🌸طلعت تجري لخوتها وهي تقوللهم بفرح..
"نجحت نجحت جبت الترتيب السابع"
كريم قال:اووو..
وسلامه قال بضحكه..
/صحة ليك..
اما هشام قرصها من خدها وقال بإبتسامه..
/مبروك..
وهي بفرح قالت..
/شكرا..
معاذ:هيا نروحوا..
شافتله كريمه بضيق لأنه مااهتمش لأمرها..
خداها هشام من يدها مشت معاه ورا خوتها ورجعت تشوف لصحيفتها بفرح وهي تتخيل في ردة فعل امها لما تشوفها..
♤ويقعدوا اكثر الناس اللي تهمنا نظرتهم في الدنيا والدينا مهما شفنا من اعجاب وسمعنا من مدايح تقعد نظرة بونا وامنا لينا فرحتهم وفخرهم بينا هما الأهم وغالبا تتشكل نظرتنا لأنفسنا ع حسب نظرتهم هما..
🌿"ايوه بدريه كيف الحال"
هادي نزيهه ترد ع اختها بدريه اللي اتصلت بيها لسبب واحد هي تعرفه كويس..
"الحمد لله كيف حالك انتي وكيف حال العويله"
نزيهة:الحمد لله شن حال عبد الرزاق والصغار؟
"في خيار الخير..الصغار روحوا فرحانين من المدرسه احمد وايهاب ناجحين ممتاز وغادة الاولى زي العاده"
نزيهه بإبتسامه..
/ماشاء الله ماشاء الله مبارك عليهم..
"الله يبارك فيك..هاه شن صار في كريمه بشري"
تعكرت ابتسامة نزيهة وهي تقول..
/لتوا ماروحوش من المدرسه سلامتهم..
"اها..ان شاء الله كلهم ناجحين بالذات كريمه ع الاقل تعدي هالسنه وماتعاودهاش مرة تانيه"
بلعت نزيهه ريقها وقالت..
/ان شاء الله..
"المهم بنقولك غاده بوها بيديرلها حفله ع نجاحها عادي تجي تحضري انتي والصغار؟"
حكت نزيهه جبهتها بعدين قالت..
/تو نشوف..كان ماقدرتش نجي نبعت الصغار وخلاص..
"باهي باهي..هي مالا مانعطلش عليك ماتنسيش تبشريني"
نزيهه:ان شاء الله ان شاء الله..بالسلامه
"بالسلامه"
سكرت نزيهه بعدين خدت نفس ومشت بإتجاه صالون العيله..
🌿في الوقت اللي خشوا في الصغار يجروا بصحايفهم وفي مقدمتهم كريمه اللي كانت ملهوفه لرؤية وسماع ملامح وكلمات الفرح من امها...
تلاقوا مع تعويضه خبروها بنجاحهم وهي هنتهم بفرحه بعدين قالتلهم..
"اللات في الصالون"
وانطلقوا يجروا للصالون لعند ماوصلوا فيه وخشوله..
كريمه ماشافت حد من الموجودات غير امها مشتلها طول وعطتها الصحيفه وهي تقول بحماس وفرح..
"نجحت ماما نجحت جبت الترتيب السابع"
🌵في هاللحظه خشت ربيعه من الباب اللي يدخل لجهة الصالون وغرفة المعيشه قعدت تمشي بشي من التعب وهي تفكر في نتيجه الصغار لما وصلت في باب الصالون وقفت فيه وهي تشوف لنزيهه وتسمع فيها تقول..
"اللي يشوف القرايه اللي كنتي تقري فيها يقول بتجيبي الاولى ع مدرستك..خودي خودي.."
هالكلمات اللي انقالت بنبرة تهكميه مسحت كل مشاعر الفرح اللي كانت غامرة كريمه..خدت من امها الصحيفه ورجعت تشوف لدرجاتها وتقديرها وجملة" الترتيب السابع" شعورها بالإنجاز تحول لشعور بالاحباط خلاها تشوف نتيجتها بنفس النظره اللي شافتها بيها لما رسبت في كل موادها العام الماضي.
المشكله ان مافي حد من اللي حوالين نزيهه تفوه بكلمه تجبر خاطر كريمه.
هانيه كان كل تفكيرها إن نجاح كريمه هدا سببه بنت الطبقه المعدمه اللي تعليمها ع قدها وماتعرف شي من الدنيا يعني الفضل ليها فهالنجاح وحاجه زي هادي لايمكن تعترف بيها هانيه ولاتقبلها.
وصمت فريحه كان بسبب خوفها من زعل نزيهه من حبها ليها ماتبيش تزعلها ولا بأي شكل كان برغم عدم رضاها عن معاملتها لكريمه..
لكن ربيعه ماهمها حد غير كريمه..وهي تشوف في ملامح الإحباط والحزن مرسومات ع وجهها قالت..
/كريمه..
كلهم وجهوا انظارهم للباب..
ربيعه بإبتسامه..
/شن صار؟
كريمه قعدت تشوف لربيعه بحزن واللي جاوبها هشام لما قال..
/نجحت جيد جدا وجابت الترتيب السابع..
ربيعه رسمت ع وجهها ملامح فرح ودهشه مبالغ فيهم وهي تقول..
/حقه!!..ضحكت وقالت..ترا هاتي نشوف..
قدمتلها كريمه وعطتها الصحيفه وهي تشوفلها بنظرة أمل..
خدت ربيعه الصحيفه وشافت الدرجات وهي تقول..
/صحة ليك ياكريمه صحة ليك..شافتلها وقالت..صحة ليك درتي زي بطلة القصه هديكا متفكرتيها؟
كريمه تفكرت القصه وقالت بفرحة..
/ايه هديكا اللي بعدين جابت ترتيب الاول وكلهم صفقولها..
ربيعه بضحكه:صح..رفعت ربيعه عيونها في الاولاد وقال..ريتوا كريمه شن دارت؟ مانجحتش بس لالا جابت تقدير وولت من الأوائل..
هشام ضحك وبدي يصفق وسلامه صفق معاه وهو يضحك..
ربيعه حطت الصحيفه تحت ذراعها وبدت تصفق معاهم وهي تضحك وكريمه في قمة الفرح..
الفرح اللي ماتبيش تشوفه نزيهه كل اللي كان بين عيونها ربيعه وهي تتخيل في تسعه يبجل ويمدح فيها ويزيد يكبر مكانتها بيناتهم وكل خوفها لو توصل عنده لمكانه ماقدر يوصلها حد والشي هدا لايمكن تقبله نزيهة..
"خلاص ياسر"
وقفوا الاولاد تصفيق وشافولها بفزغ اما ربيعه قعدت تشوفلها بإمتعاض..
نزيهه بحده:نسيتي اللي حني فيه ياهانم!
هانيه بغضب:بدل الميت عندنا زوز وقلوبنا مقهورة ومقتطعه وهي تصفق وتضحك!
ربيعه قالت..
/صغار هادم ياهانيه جايين فرحانين..
هانيه قاطعتها وهي تقول بغضب..
/ضمي فمك ماتناقشيش..
نزيهه التزمت الصمت وهي تشوف لربيعه بتشفي..
وهانيه متابعه تقول بعصبيه وغل..
/من نهار جيتي وحال هالعيله كل يوم لتالي والمصايب تنحدف علينا من كل جيهة عرقوبك عرقوب سو..
فريحه قالت لهانيه..
/خلاص..
هانيه بعصبيه قالت..
/لامش خلاص خليني نقول الكلام اللي مايقدر يقوله حد هني غيري اني..
ربيعه قعدت ملتزمه الصمت مش عجزا ولاخوفا بل لأنها سمعت صوت خطوات وشمت ريحة عطر تعرفهم كويس كانوا يقربوا منها لعند ماوصل صاحبهم حداها ووقف جنبها..
نزيهه انخطف لون وجهها من الخوف لما شافاته اما هانيه جمدت في مكانها وهي تشوفله..
"بابا!!..نجحت بابا جيت ترتيب السابع"..
غير نظراته المرعبه عن هانيه وبدلهم بنظرات فرح لما وجه عيونه لبنته وهو يقول..
/ماشاء الله ع اللا بوها ماشاء الله..ونزل وطبع قبله ع راسها وهو رافع عيونه في هانيه اللي كانت هاربه بنظرها عنه..
نزيهه غيرت عيونها عنه وشافت لربيعه لقتها تشوفلها بإبتسامه مكر خفيفه جدا..بادلتها بنظرات حقد ممزوجه بالغيظ وفريحه تشوفلهم..
وقف تسعه ع حيله وشاف لولاده وهو يقول..
/شني يازعماء؟
سلامه بإبتسامه:مافيش جديد ياملك زي كل عام..
تسعه بضحكه..
/الله يبارك الله يبارك..لكن اني فرحان بكريمه اكثر منكم كلكم..
معاذ:علاش!؟ هي جابت السابع وحني الاول..
تسعه قاله..
/هي بطلة قدرت تتحدى نفسها وتنجح وتولي من الأوائل..
هشام بإبتسامه..
/صح..
سلامه بضحكه:ولت زعيمه حتى هي..
ضحكت كريمه بفرح..
ربيعه شافتلها وقالت بإبتسامه..
/وبإذن الله العام الجاي تجيب الأول..
شافتلها كريمه وهي مبتسمه بحماس وربيعه دارتلها حركه بأنفها..
تسعه شاف لربيعه بإبتسامه بعدين غير نظره لغيرها من زوجاته وقال..
/فريحه ونزيهه اسبقوني للمكتب..غير نظره لصغاره وقال..بروا لدياركم..
عطت ربيعه الصحيفه لكريمه خدتها ومشت وخوتها لحقوها وبعدهم طلعوا فريحه ونزيهه اللي كانت تغلي من الغضب..
قعد يشوفلهم تسعه وهما ماشيات لعند مااختفوا عن نظره خدي نفس وغيره لهانيه وقال..
/هي كلمه بنقولك عليها وبديريها..
قعدت تشوفله بخوف وهي ساكته..
"اعتذري من ربيعة"
ربيعه نزلت نظرها للأرض بدون مادير أي تعبير ع وجهها وهانيه تشوف لخوها بصدمه..
تسعه عاود يقول بنبرة غضب..
/ هيا اعتذري..
نزلت عيونها وفي قمة الغضب اللي حاولت تكتمه غمضت عيونها وقالت..
/اسفه..ولما جت بتمشي قاللها..اقعدي في مكانك..
وقفت وهي ضامه شفايفها لداخل بغضب..
تسعه شاف لربيعه وقال..
/قبلتي ياربيعه؟
شافتله وقالت..
/صار خير ياتسعه اصلا اني مادورتش حاسبتها زي اختي الكبيرة شن ماقالت مقبول منها..
طبطب ع كتفها وقال..
/بري للمكتب..
هزت راسها وهي تقول..
/حاضر..ومشت طلعت وهي مبتسمه..
تسعه قعد معاها بنظره لعند مادرقت بعدين رد نظره لأخته وقاللها..
/اللي يوصل في أي وحده من زوجاتي يوصل فيا اني ياهانيه وزعلي تعرفيه كويس ماتشريشي ياهانيه..مفهوم!؟
هزت راسها بصمت وهي تكاد تنفجر من الغضب..
داملها النظر لثواني بعدين مشي وهي بعد طلع خبطت بغضب ع رجليها وصرخت صرخة غيظ مكتومه..
🌿🌿🌿
ومن الصالون رجع تسعه للمكتب لقي زوجاته مقعمزات ع نفس الكنبه يستنوا فيه..
قعمز ورا مكتبه بعدين وزع نظره عليهم وقال..
/زي ماتعرفوا زواجي من حسناء كان متعلق بشرط معين لما يتحقق ينتهي الزواج..لكن..الحاجه هادي تغيرت توا..
ابتسمت نزيهه وقالت..
/قصدك حيستمر زواجك منها بدون شروط..
هز راسه وقال..
/بعد اسبوعين حيجوا هي وخالتها يستقروا هني..
نزيهه قالت..
/بصراحة ماكنتش نتمنى زواجك منها ينتهي اول شي لأنها مناسبة هلبه ليك ولينا تاني شي لأنها محاميه ممتازة لازم يقعد في بينك وبينها رابط بش نضمنوها وتقعد محل ثقة..
"صدقتي.."
وجه تسعة نظره لربيعه اللي متابعه تقول..
/وغير هكي ماقعدلهم حد هي وخالتها..
تسعه ابتسم وقال..
/وهدا اكبر سبب خلاني نستمر في الزواج..
ابتسمت ربيعه ونزيهة تشوف لهالإبتسامة بغيظ شديد تحاول تخفيه..
غير تسعه نظره لفريحه وقال..
/ماعندك شي تقوليه يالشادن؟
فريحه ردت بإبتسامه..
/ماعنديش كلام نزيده ع كلامهم..
ابتسم وقال..
/كويس..تقدروا تمشوا..
ناضوا نزيهه وفريحه وقعدت ربيعه اللي قالت..
/نبيك في حاجه..
شافولها ضرايرها وتسعه قال..
/قولي..
قعدت ساكته وهي تشوفله هو غير نظره لفريحه ونزيهه بعدين قال..
/تبوا حاجه؟
شافوله الزوز وفريحه قالت..
/لا..بعدين خدت نزيهه ومشت طلعت بيها وسكرت الباب..
نزيهه جبدت يدها من يد فريحه وقالت بغضب..
/شفتي حركاتها هالثعالة هادي!
فريحه قالت بضحكه استغراب..
/ثعاله؟
رفعت نزيهه حاجبها وقال..
/الثعلبه ينقال عليها ثعاله..
فريحه بضحكه..
/قصدك اثنى الثعلب..عضت فريحه ع شفها السفلي بعدين قالت..حي عليك كان يسمعه تسعه..
نزيهه:اني اصلا مانشوفش فيها مرته هادي عقاب جاريه وكانا قاعدين في زمان ملك اليمين راهو تسعة مادارهاش اكثر من جاريه تغيرله جوه ويضيع بيها وقت...
ومشت بعصبيه وفريحه لحقتها وهي تضحك وتحرك في راسها يمين ويسار..
🌿في المكتب..
بعد طلعوا سأل تسعه ربيعه..
/شن عندك يااللا؟
قالتله:نبيك تعطيني الإذن نمشي لعصمت نقعد عندها نهارين تلاته..
عقد حواجبه وقال..
/علاش؟
قالت:زي ماتعرف الوحم متعبني ونبي من يعانيني خليني نقعد عندها لين يولي حالي باهي..
قاللها؛شني مافيش هني من يعانيك؟
تنهدت ربيعه وقالت..
/بارك الله فيها فريحه ماقصرتش بكل لكن حتى هي عندها مسؤوليات تانيه مش ملزومه بيا تعانيني..
رفع تسعه حاجبه وقال..
/ماعنديش مراة تبات برا القصر واني موجود هدا شي..الشي التاني اليومين الجايات بيجي واحد يخدم في القصر بيجيب معاه اخته عمرها في حدود 17عام بنخليها نديمتك تخدمك وترد بالها عليك لعند ماتشدي صحتك..
ابتسمت وقال..
/كان هكي باهي..
ابتسم وقال..
/يبهي ايامك يااللا..
ضحكت بخجل بعدين قالت..
/في حاجه تانيه..
عقد حواجبه وهو مبتسم..
قالتله وهي مبتسمه..
/قبل عطيت وعد لكريمه كان نجحت نديرولها حفله كبيره لكن قدر الله وماشاء فعل والوضع توا مايناسبش نديرولها شي هني فقلت في عقلي لو تاخدها هي والصغار للمزرعه وديرلهم حفله غادي المهم تفرح بنجاحها..
بإبتسامه قال..
/ع فكرة هدا نجاح حتى ليك انتي اللي درتيه معاها ماقدروش يديروه مدرسين اصحاب خبرة كان نعرف الاسلوب اللي مشيتي بيه معاها من وين تعلمتيه؟.
ضحكت بعدين قالت..
/في المدرسه اللي كنت نقرا فيها كانت عندنا ابله زي الاخصائيه النفسيه الطلبه اللي مستواهم بالهون كانت دير معاهم هكي..تحكيلهم قصص فيها تحفيز تلعب معاهم العاب تحرك العقل وهكي ومع الوقت مستواهم تغير..
بإبتسامه اعجاب قال..
/يشكروا فيها مدرسة الفضيله بكوادرها بإدارتها لليوم مستمرة بنفس المستوى..
ربيعه قالت..
/صح..وحتى المدرسه اللي يقروا فيها الصغار ممتازة لكن اني نتمنى لو تخلي كريمه تقرا في مدرسة بنات..
وهو مبتسم قال..
/هدا اللي ليا مدة نفكر فيه وبعد اللي سمعته منك عن الفضيله قررت نحولها غادي..
ابتسمت ربيعه..
هو تنهد بإبتسامه وقال..
/بالنسبه للحفله موافقك في اقتراحك لكن بشرط تجي معانا..
قالت:اعفيني..
عقد حواجبه وقال..
/علاش؟
هي قالت:مش لايقه مع الوضع اللي حني فيه وغير هكي..تنهدت وقالت..ممكن يصير تحسسات..
فرد حواجبه وقال..
/في الشرع الحزن تلاته ايام بس ماعدا الارمله لازم تحد ع راجلها اربعه شهور وعشرة ايام لهالسبب وافقتك ندير الحفله في مكان تاني غير القصر ع خاطر بلقيس بس..بعدين النجاح هدا انتي ليك فيه فضل من بعد فضل الله سبحانه وتعالى..وكمل يقول بإبتسامه..يعني اني بنحتفل بيك حتى انتي..
ضحكت ربيعه..
وهو قال بإبتسامه..
/خلي يفوت الاسبوع هدا وبإذن الله حنختار يوم من الاسبوع الجاي نرفعكم فيه للمزرعه..
هزت راسها وهي مبتسمه بعدين ناضت وقالت..
/مانزيدش نعطلك نستأذن..
بإبتسامه قال..
/ولو اني نبيك تزيدي تعطليني لكن تحقيقا للعدل بنعطيك الإذن..
ضحكت ربيعه بخجل ومشت طلعت من المكتب وهو معاها بنظراته المعجبه لعند مادرقها الباب اللي سكراته وراها..
🌿🌿🌿🌿🌿
الساعه العاشرة ليلا..
كانت بلقيس في دارها ضامه ولدها لحضنها ترقد فيه وهي تغنيله في تهويدة النوم ودموعها تنزل..
دق باب دارها وسمعت بعد الدقه صوت خوها تسعه وهو ينادي فيها..
"بلقيس"
رشفت ومسحت دموعها بعدين قالت..
/خش خوي خش..
فتح الباب وخش عليها شافلها بعدين ابتسم..
هي يدوب ابتسمت وقالت..
/تعالى..
سكر الباب وقدملها خدي كرسي وقعمز قريب عليها وقال..
/رقد العزري..
شافت لولدها وقالت..
/بادي يرقد..
تنهد تسعه بعدين قال..
/بلقيس..
شافتله هو ركز ع عيونه اللي تعبهم البكي وملامح وجهها اللي استعمرها الحزن..حمحم بعدين قال..
/الله يرحم خالتي آسيا ومحمد ويغفرلهم ويجعل مثواهم الجنه..
نزلت عيونها اللي طاحوا دموعها وهي تقول بنبرة ألم..
/آمين..
هو قاللها:وخيتي..انتي توا تحت جناح خوك تسعة بإذن الله حنخليك تعيشي مرتاحه معززة مكرمه مش حينقصكم لاانتي ولاولدك شي..محمد رحمة الله عليك قبل ليمشي وصاني عليه وحطه في أمانتي..
شافتله بنظرات ألم ودموعها ينزلوا..
قاللها تسعه..
/هدا توا ولى ولد من ولادي مش ولد اختي..
ابتسمت بألم وهزت راسها وهي ترشف..
مسح تسعه ع شعرها بعدين طلع من جيب قميصه ظرف الرساله ومدهولها وهو يقول..
/عطهالي محمد قبل ليمشي وقال كان صارت فيها حاجه عطيها لبلقيس..
وقلب بلقيس انفطر من الألم وهي تشوف للرساله خدتها منه وقعدت تبكي..
هو ناض وطبس عليها باس راسها بعدين مشي بسرعه وطلع من الدار...
هي بعد ماطلع حطت ولدها جنبها بعدين خدت نفس عميق وفتحت الظرف..طلعت منها الورقه بإيديها اللي يرجفوا وهي تبكي بصمت..فردتها وبدت تقرا فيها..
(حبيبتي ورفيقة قلبي بلقيس..
كنتي ديما تقوليلي عطيني وعد ماتفارقنيش لأخر العمر واني كنت نقولك خلينا ندعوا الله يخلينا لبعض طول العمر..ماكنتش نبي نعطيك وعد اني مش قده اللي كيفي يابلقيس صعب عليهم واجد يعطوا وعود كيف هدي ويوفوا بيها..اني ماشي توا بندير واجبي وحاط روحي بين ايديا هالروح اللي يملكها رب العالمين،كان جي الآجل وخدي امانته بنوصيك ع عبد المتين نبيك تربيه احسن تربيه ربيه ع الدين والعرف وخليه راجل يابلقيس..وبنوصيك ع امي راك تنسيها عارفك مش حتحرميها من ولدنا لكن انا نبيك انتي تواصليها لأنها تحبك زي ماتحبني)
وقفت بلقيس قرايه وهي تبكي بالعبرة قعدت ع هالحال للحظات بعدين هدت شويه ورجعت تقرا ماقعد من الرساله..
(بالك وين تشوفك تبرد ناري في قلبها شويه..ونوصيك ع نفسك يابلقيس خليك كيف ماانتي ضحاكه وجوك ديما سمح ردي بالك تخلي الحزن يسيطر عليك ويغيرك..واخر شي نوصيك عليه الدعاء..راك تنسيني من الدعاء واحكي لولدي عني واجد وخليه يدعيلي حتى هو...سامحيني يابلقيس)
وكانت هادي الجمله اللي ختم بيها محمد رسالته..غطت بلقيس وجهها بالورقه وانهارت بالبكاء وقلبها مفطور من الألم وهي تقول..
"الله يرحمك ويسامحك الله يرحمك"
🌿ومن دار بلقيس لجناح زكيه اللي كان معاها في نفس الدور لكن يبعد عنها بمسافه..
كانت مقعمزة فيه مع بنتها هانيه وهي تسمع فيها تقول..
🌱"نبي نتكلم معاه قبل لنديروا اي خطوة رسميه"
زكيه:باهي قولي لخوك تسعه قبل..
هانيه بضيق:قوليله انتي..
زكيه بإستغراب..
/وعلاش ماتقوليلاش انتي!؟
هانيه ضمت شفايفها لداخل بغضب بعدين قالت..
/اليوم دارلي موقف خلاني مش طايقاته..
زكيه باستنكار قالت..
/هانيه!
هانيه بعصبيه:هزبني ع خاطر هديكا الجربوعه وخلاني نعتذر منها..
زكيه قالت بإمتعاض..
/اكيد انتي اللي مطوله لسانك..
غمضت هانيه وهي تحاول تهدي نفسها بعدين فتحتهم وبدت تحكي لأمها عن الموقف اللي صار...
🍃هانيه:حني في عزي وحالنا حال حزن وهي تصفق وتضحك! لا ولما عاركتها طولت لسانها عليا!؟ هادي ياماما تمقرست هلبه راهو وحال ولدك معاها ولى يخوف كان مااندرلهاش حد من توا تركب ع ولدك ودلدل رجليها وتسيطر ع كل شي..
زكيه قالت وهي عاقده حواجبها..
/غدوة الصبح ان شاء الله نفتح مع خوك موضوع ولد الهاشمي توا بري ارقدي..
ناضت هانيه وهي مستاءة بعدين قالت..
/تصبحي ع خير..ومشت طلعت وامها معاها بعيونها وهي ترد عليها وفي نفس الوقت كانت تفكر في كلامها عن ربيعه اللي ياما سمعاته منها ومن نزيهه ولأول مرة يأثر فيها ويسببلها شي من القلق...
....يتبع...
