السلام عليكم
رواية "في عداد الاعمار"
نورا ناصر
الفصـ10ــل العاشر
مو مٓالت ودٓاع
هستونه مِتلاگين
بعدها عيونه
مَن المستحه مَدنگه
بعدها تشوفنا
عُيون الشمس ظِلين
ما لحگنا نكسر عينها بشبگه
«لشاعرها»
رجعت ماشفت بشار خليت گلاص الجاي على طرف الكرويته االخشبي انتظرته يصير دافي حتى اشربه
طلعت كالت: امي وين ياسر؟
كتلها طلع
وين راح
مادري يمه عوفي الولد بحاله
ماعليج شربي كلاصج وكومي غسلي جم ماعون ظلن بالسنگ
يمااا والله عظامي توون وون عليه كوة كملت ضيافة صحبان ياسر خليني ارتاح شويه والله مريضة رحميني اذا انت امي ماترحميني منو يرحم بيه
يمه يمه يمه مريضة الخاتون المريض ينام يهجع مو ينطط
ووين منططة لخاطر الله كاعدة هنا وساعدتج بالضيافة ماخليتج وانت قويه يعني بيج تغسلين وكلشي تسوين عينيني بايام مرضي
وبعدين اختنكت من الغرفة واذا انام تزيد عليه الفلاونزا اطفي المكيف تكضني الحارة اعلكه تكضني الباردة
ولا اهتمت لشكوتي الها انه احجي وهي مشت للباب الرئيسي كالت خل اروح ورا ياسر خاف راح للشط
اوووو
التافت عليه كالت ماكلج وين راح
هزيت راسي بلاء
شربت الجاي وعلاج وطبيت اغسل المواعين بالمطبخ ورجعت للطارمة امي واكفة بالباب
وراها طب سعود بيده السلية مالته نفضها بالكاع كلها سمج صبور وريحة الزفر عطت
ظليت اباوع للباب اتاني هسه يطب ياسر بعدين يطب ماكو
تأخر وما مادخل
ظليت مستغربة وخايفة
وامي تنهش سعود نهش بالحجي
ودي سليتك ورى البيت لاتعلكها هنا ريحة االزفر وع وع
شوف خل اكلك انه اكره الصبور ماانظفه وكريمة تتعاير مريضة ماتنظف تريد ودي لخطيبتك تنظفه الك
ظل يضحك كومي كريمة جيبيلي سجينه ونجانة خلي انه انظفه واسويله حطب واشويه وناكله بالعشى تازه احسن ما عايز على تنظيفكم
ظلت افكار تعصف براسي وين ياسر؟
خذتني الصفنة كريمة كريمة ظل يناديلي مأثرة بيج الفلونزا هههه شبيج طكيتيها صفنة ام صابر
ها اي كمت على حيلي
التفتت عليه چا وين ياسر مو وياك؟
انتبهت امي النا بكل حواسها تباوع لسعود تنتظر رده
رد سعود كال مادري ما شفته ليش مو يم جماعته
لا راحو وهو اجه وراك تبعك
أنت تقرأ
في عداد الأعمار
Romanceأعرفُ أنكِ فتاةٌ باردة تشبه الجنازة، تشبه الوطن، وتشبه نفسها أيضاً إنكِ روحٌ لا يستطيع الكل فهمها، وما لا نستطيع فهمه، مقدّس..
