في عداد الأعمار

الثالث عشر

السلام عليكم
رواية في عداد الاعمار
الجزء ثلاثة عشر
نورا ناصر

‏"ياربِّ جِئتُكَ والأحَمالُ مُرهِقةٌ
‏أمْشى إليكَ من التقصِيرِ في خَجلِ!"

كريمة...

شالوا التابوت وانطلقوا بي للنجف لمثواه الاخير
بعد ايام شفت بيها كل انواع العذاب النفسي

ايام مرت واحنه مانعرف وينه لحظات انعزل بيها عن العالم الي يروش بيها بيتنا

واشوفه داخل من باب الهول جنطته بايد والطوبة بايد ثانية ويضحك لو مطنكر وعاكد النونة متعارك وي جماعته لو امي مامخليته يروح يلعب بالساحة واكوم اضحك عليه انه واصنف ويحمك عليه ويغلط

رغم ياسر جان مدلل بس ما عاش حياة سعيدة  ،  امي محاصرته بحبه وحنانها لدرجة هالشي صار عليه نقمة

سفرات مدرسية ماكو طلعة للشط للبساتين بيت الاقارب ماكو اربعة وعشرين ساعة مفاولة عليه  ،  لا يغرگ لايطيح لا يتعوور

مرة من المرات اجه متعور طاكته شوكة برجله وبوكتها جان طالع ويه سعود للبساتين

من شكى الها على رجله  ، كلبت الدنيا وذيج الدعاوي على سعود

الله يهلكك الله ينتقم منك يمتى يكبرون على راسك واخلص منك.... 

ماجانت تدري بوكتها دعاءها مستجاب بس على عزيز گلبها ياسر....

وارجع للواقع والصريخ والبجي والنحيب يترس إذني
واشوف امي نزعت دشداشتها وظلت بالكيمونة الداخلية

شافتها عمتي فاطمة وحاولت تمنعها ، هجمت عليها امي وخرمشت ايديها بالطوول

اجن عماتي وخرنها وجم وحدة من نسوان الديرة
هدأن امي ورجعن عليها دشداشتها.... 

ظلت الملاية تقرا على الامام الحسين....

وتقرا على رملة شلون استشهد ابنها القاسم...

وتقرا على ليلى زوجة الامام الحسين  وابنها علي الاكبر الي توذر جسمه بالمعركة.... 

وتقرا على السيدة زينب وفقدانها لأخوتها جان ينعصر گلبي ويتدمى علىى اخوي....واكول الله يساعد السيدة شلون فقدتهم كلهم بيوم واحد

  امي دزت على گوالات يقرن واجن الگوالات.... وبلشن يقرررن على الميت ويلچمن جروح ويكسروون گلووب يأذن النفس..  النسوان ملخت نفسهن كلمن وحدة فاقدة عزيز تبجي وتصررخ... 

عمتي فاطمة حييل متدينة اعترضت على جيتهن
كالت لعمتي هاشمية هاي حرام هيج تسوي هذا جزع
خلي الملاية تقرا على الحسين ونقرا اجزاء من القرآن

كلتلها عمتي هاشمية كعدي وسكتي ايمان تحطج وتكتلج هسه هي ساعة زمان وتخلص وترووح لبيتها