في عداد الأعمار

15

السلام عليكم
رواية في عداد الاعمار
الفصل 15
نورا ناصر

متعبة
"كأني ركضت ألف عآم ولم أصل الى شيء"

كريمة

ملخت خدودي تملخ ، امي واكفة بالزاوية ظليت اباوعلها جانت تعدل بعباتها

وجهت كلامي الها سويتيها ييمه سويتيهاااا ليش هالظلم هذا ليش مو ابنج ابن بطنج معقولة ماتحسين بينه

گالت ببرود قاتل؛- شعليه قابل ، هو هذا شغل الشرطة....

كعدت بجمود على الكرسي .. كل مجرم واله يوم وبشر القاتل بالقتل الاعدام مصيره

جنت دايخه مسطوره بس الدموع تنزل بصمت مريب احس كل شي فراغ احس نفسي بوسط متاهه ما اكدر اطلع منها

معقوله لجاي يصير معقوله اكو ام هيج تسوي بضناها تفضل شخص مات وراح عند رب كريم على ابنها الحي الي ممكن يعوضها فقدان اخوي ياسر

وسعود مو اقل صدمه مني سعود جان يباوع بخذلان وقلة حيله وكأنه خجلان من نفسه ان ايمان تكون امه

شفت بعيونه قلة حيله شفت بعيونه غدر الزمن وظلمه وجوره عليه كلها بكفه وغدر امي وطعنتها اله بكفه

هو منو اله بهالدنيا منو سنده اذا امه الي حملته ببطنها وكبرته شمرته بالتهلكه وخذلته وقدمته طعم سهل للصياد

شيترجى !! متهوم من ناس غرب وينتظر اهله يوكلوله محامي ويوكفون بصفه ويسوون المستحيل حتى يطلعونه من حلك الموت؟

شنو الي يترجى من هاي الدنيا سعود انصدم بسند ظهره نصدم بهذا اليوم الي بليلة  وضحاها شفته صار شايب كسيح وجور الزمن اكتسح وجهه وكبره الف سنه بدقايق

ما حجه ولا نطق حرف جان مستسلم لأبعد حد الضابط كال… سعود … عليك إلقاء القبض بتهمة القتل العمد للمدعو ياسر توفيق

مد ايده بكل برود واستسلام وكأنه حاضر للكلبشات والسجن والتهمه الباطله المنسوبه اله

ابوي لطم على راسه ولزم الضابط وهو يكول… انت شتحجي عمي تريد تبلينه تريد تسويلك سالفه علينه ابني بري مثل براءة الذيب من دم يوسف

ابني ما يكتل اخو  ،  سعود مو مجرم سعود مو مجرم

عاطت بيه امي بكل عصبيه وتوحش… لاااا مجرم ابنك لاتكول عليه بريء مجرررررم كتل ياسر من غيرته وغله وحقارته يريد يستولي على كل شي ما يريد واحد يشاركه وياه حتى لو اخو ابن امه وابوو

خنكها ابوووي وشرايينه طكت … انتي شتحجيين انتي شلون الج لسان وينطق هيج كلام يا بااااطله ولج هذا سعود سعود!! تعرفين يعني شنو سعود مفروض انت اكثر وحدة تعرفينه

لا ليله ليل ولا نهاره نهار يبجي على اخو وما فارك گبره
شيب على اخو وهو بالعشرين شلون هيج تتهمينه