حكايتنا تبدا بولادة بنت صغيرة بعائلة فقيرة كانت عليها ديون بزااف .. نهار ولدت دخل باباها يخدم هي صغيرة و كاين ختها كبيرة .. لي نحكي عليها هي أنا و لي راح نحكيها قصتي .. انا رلين 20 سنة طويلة شعري شاتان و عينيا عسليين و برونات و عندي لاطاي و اختي رتاج كبيرة عليا بخمس سنين عايشة مع بابا و ماما .. بلا منطول عليكم حبوباتي نبدا بالقصة
كنت قاعدة نسمع فالغنا و نقرا فالكرونيكات كيما العادة و نتمنى يجي حب قلبي و فارس أحلامي ينقذني من هذا الجحيم كيما تحلم كل طفلة فقت من احلامي كي سمعت تكسار فدار عرفت عركة جديدة بين ماما و بابا كيما كل يوم مسلسل يعني بصح المرة هاذي فيها طلاق ماما شرات دار في ولاية اخرى و رحلنا بكل بساطة (فالحلقات القادمة تفهمو الأسباب ) .. بعد ثلاث سنوات راه في عمري 18 سنة راني ف ليسي .. رفدت صوالحي و رحت نقرا ستنيت صحبتي امال و كيما العادة طولت .. جات رحنا قرينا و كي خرجنا ساعة بكري رحنا ندورو و نشوفو اللبسة فالحوانت و نتفكرو كي جيت جديدة
امال: تشفاي نهار جيتي محبيتي تحكي مع حتى واحد
رلين: ههههه متفكرنيش تعرفيني منحبش نخالط الناس
امال: على هذا عندك غير انا هههههه
رلين: انا نطلع لدار نرتاح شوية تعبت بزااف
امال:اوك بب باي
رلين: غدوة انشاء الله
رحت لبلاصة عالية نحبها بزااف تقابل كامل المدينة قعدت سارحة شوية فقت كي شدني مهبول من يدي
المهبول: يفرج ربي
تبسمت و قتلو: انشاء الله
رحت لدار كيما العادة امي وحدها فدار و دمعتها في عينها باينة كانت تبكي غضتني بقيت نتفكر نهار الطلاق فالمحكمة
Flach back
بابا: ادي بناتك عليا منستحقهومش
ماما: حقار و ربي وكيلك
بابا: هههه الدراما ديريها بعيد منحوسش نزيد نشوفكم هنا و راني رايح نتزوج
نهاية flach back
حطت يدها على كتفي عنقتها حضنها الدافي يحسسني بالأمان و ينسيني هموم الدنيا خرجت نشري واش يلزم من الدار .. ف طريق راجعة لدار شفت واحد يلحق فيا زربت فالمشية لحقني شدني من يدي قالي: نحبك تروحي معايا بسيف ضربتو و هربت نجري دخلت لدارنا ننهج .. يتبع
