حارة الدخاخني (قيد النشر)

الفصل الثامن

عندما تتخذ القرار الصحيح لا تبالي لقلبك...
تألم يوم، شهر بقرار عقلي صحيح أفضل من أن تتألم طيلة حياتك بقرار خاطئ من قلبك.
مارتن لوثر كينج

أخرج دفعة من الدخان الحارق زافرا إياها خارج رئتيه فأحاط دخان أرجيلته الكثيف من حوله لينهي آخر دفعة دخان بها ووقف تاركا محله ومتوجها لسيارته التي قادها لبيته الثالث ودلف بعد أن فتح باب ڤيلته بالمفتاح ليستمع ﻷصوات طفلتيه تلعبان معا وفور أن انتبهتا لوجوده صرختا بفرح وهرعتا ناحيته:
-باااابي.

انحنى مستندا على ركبيته واحتضنهما وقبلهما قبل كثيرة مبتسما:
-حبايبي.

وقف معتدلا بعد أن خرجت زوجته الثالثة تبتسم له فابتسم بدوره وتحدث متحركا صوبها:
-رضيتي عني ولا ايه؟

ظلت بسمتها مرسومة على وجهها وهي تجيبه:
-وانا ليا مين غيرك.

ابتسم هو الآخر وسحبها من خصرها بقوة فارتطمت بصدره وتسائل والحيرة جلية على ملامحه:
-يا ترى مخططالي ايه في دماغك؟

رمقته بنظرة مندهشة ودفعته بعيدا عنها بامتعاض واستدارت توليه ظهرها:
-كمان! بعد كل اللي عملته ده وقلقان مني يا رشوان أكون بخطط لحاجه، بجد الله يسامحك.

أدارها لتواجهه وتكلم وهو رافعا حاجبه الأيسر:
-ماهو اللي يشوفك ويشوف عمايلك يوم الجمعه اللي فاتت ميقولش إن دي ماهيتاب ابدا.

زفرت أنفاسها وأطرقت رأسها تحاول كتم غضبها:
-انا آه مضايقه طبعا انك هتتجوز عليا ومش قابله الموضوع بس عارفه إن طالما حطيت حاجه في دماغك هتعملها، يبقى ايه لازمة الخناق! وأول القصيده بانت أهي لما مجتيلش طول الاسبوع ولا فكرت تسأل عليا ولا على بناتك.

زم شفتيه بفروغ صبر وأمسكها من ذراعها ووقف أمامها يسألها بحيرة:
-ايه المشكلة لما أتجوز رابع؟ ما انتي متجوزاني وأنا على ذمتي اتنين.

ردت بعد أن تعلقت بعنقه تتدلل عليه:
-آه بس انا كنت الأخيره ومتجوزتش عليا خالص، حتى اللي طلقتهم كانو قبل مني وكنت مفكرة أني مميزه وحاجه تانيه عندك بس طلعت زيي زيهم.

قبلها من وجنتها وترك خصرها ممسكا براحتيها يقبل كل واحدة على حدى ورفع رأسه ينظر لها متغزلا بها:
-انتي عارفه أنك واخده الحته اللي في الشمال لوحدك ومحدش مشاركك فيها وجوازتي لها أسباب.

حدقت به بتركيز تتسائل:
-اسباب ايه؟

أجابها زافرا بقوة ومبتعدا عنها دالفا لغرفته:
-مش لازم كل حاجه تعرفيها يا ماهي، أنا عمري ما حسستك إن في زوجه تانيه في حياتي ولا هتحسي بده في الوضع الجديد، فبلاش تعملي مشاكل وزعل بينا من مفيش.

تبعته للداخل واضعة ذراعيها بخصرها متذمرة:
-يا سلام! ازاي مش هحس بتغيير؟ طيب أنت كنت الأول بتيجي عندي يومين وساعات تلاته واربعة كمان لما بتحب تريح راسك من البيت الاولاني بمشاكله وزهقه، التقسيمة كانت إن كل واحده فينا لها يومين والجمعة كنت بتقضيه معايا، بعد جوازك تقدر تقولي تقسيمتك هتكون ايه؟