အခန်း(၄) ဘိုးဘေးမှတ်တမ်း
ရှောင်ပိုင်ချွမ်းက ကမ္ပည်းစင်ရှေ့တွင် ဒူးထောက်ထား၍ ဂါရဝပြုလိုက်သည်။
“ဘိုးဘေးကြီးခင်ဗျား။ ညံ့ဖျင်းတဲ့ ကျွန်တော် ရှောင်ပိုင်ချွမ်းကို ခွင့်လွှတ်ပြီး ရှောင်မျိုးဆက်ကို ကယ်တင်ပေးပါခင်ဗျား။ ရှောင်မျိုးဆက်အရေးအတွက် ဘိုးဘေးရဲ့ မှတ်တမ်းကို ကြည့်ခွင့်ပြုပါခင်ဗျား”
ထို့နောက် ပြန်ထရပ်ပြီး သေတ္တာနက်ကို တရိုတသေ လှမ်းယူလိုက်သည်။
သေတ္တာနက်ကို မည်သို့သော ကျောက်နက်ဖြင့် ပြုလုပ်ထားသည်ကို ရှောင်မျိုးဆက်များ မသိခဲ့ရပါ။ ဘိုးဘေးကြီး၏ အမွေအနှစ်အဖြစ် ရှောင်မျိုးရိုး အစဉ်အဆက် ထိန်းသိမ်းစောင့်ရှောက်ခဲ့ရသည်။
ကျောက်နက်သေတ္တာပေါ်တွင် လွန်စွာသေးငယ်ပြီး ရှုပ်ယှက်ခတ်နေသော မျဥ်းကြောင်းများ၊ သင်္ကေတများ၊ ထူးဆန်းသော ရုပ်ပုံများနှင့် ပြည့်နက်နေ၏။ သေတ္တာအဖုံးပေါ်တွင် ရှေးဟောင်းအက္ခရာဖြင့် ရေးထွင်းထားသည့် ‘ရှောင်မိန်’ဟူသော စာလုံးတစ်လုံး ရှိသည်။
ရှောင်ပိုင်ချွမ်းက ကျောက်နက်သေတ္တာကို အင်္ကျီလက်အိုးထဲ ထည့်ပြီး ယူခဲ့လိုက်သည်။
ရသေ့ကြီး၏ အခန်းသို့ ရောက်သောအခါ ရသေ့ကြီးက ထိုင်ခုံတွင် အဆင်သင့် ထိုင်စောင့်နေသည်။
ရှောင်ပိုင်ချွမ်းက သူယူလာသော ကျောက်နက်သေတ္တာကို စားပွဲပေါ်တွင် တင်ပေးလိုက်သည်။
“ဆရာကြီး လေ့လာကြည့်ပါ ခင်ဗျ”
ရသေ့ကြီးက ကျောက်နက်သေတ္တာပေါ်ရှိ ရှေးဟောင်းအက္ခရာကို ကြည့်ပြီး ခေါင်းတညိတ်ညိတ်နှင့် မှတ်ချက်ချသည်။
“ဒါ ကျိုးခေတ်က စာပေအရေးသားပဲ။ ဒဏ္ဍာရီတွေထဲ ပြောကြသလိုပဲ။ ပညာရှိကြီးက ကျိုးခေတ်မှာ ပေါ်ခဲ့တာဖြစ်မယ်”
ထို့နောက် သေတ္တာပေါ်က အမှတ်အသားများ၊ မျဥ်းများ၊ သင်္ကေတများနှင့် ထူးဆန်းသော ရုပ်ပုံများကို စိတ်ဝင်စားစွာ ဆက်လေ့လာသည်။
YOU ARE READING
ETERNAL LIFE ETERNAL LOVE(first life)
Action🔸စာစဉ်အမည် 🔹ထာဝရအသက် ထာဝရအချစ်(ပထမဘဝ) 🔹ETERNAL LIFE ETERNAL LOVE(first life) 🔸ရေးသူ 🔹Mg Moe Thu(XL) 🔸ဇာတ်လမ်းအမျိုးစား 🔹Xianwuxia 🔸အဓိကဇာတ်ကောင် 🔹ရှောင်လုံ 🔸အခန်းသစ် 🔹စနေနေ့တိုင်း အခန်းသစ် တင်ပေးသွားပါမည်။ 🔹ဒီဇာတ်လမ်းက သဘာဝ၊ သဘာဝလွန်၊ နိ...
