တကယ်ကို ယိုးစွပ်ခံရတာပါ။
မည်သို့ပင် တနုံ့နုံ့ ဖြစ်နေခဲ့ရစေကာမူ တနင်္လာနေ့သို့ အရောက်တွင်တော့ ဟော့ယွီသည် လွယ်အိတ်ကို လွယ်လျက်ဖြင့် ဘေးချင်းကပ်မှ တက္ကသိုလ်ဆီသို့ အချိန်မှန်ပင် ရောက်ရှိသွားရသေးကာ၊ တံခါးကို ခေါက်လိုက်ပါလေ၏။
တံခါးပေါက်နှင့် အနီးဆုံး နေရာတွင် ရှိနေသော လောင်ရှစ်：" ဝင်ခဲ့လိုက် "
ဟော့ယွီက ရည်မွန်ယဉ်ကျေးစွာပင်：" မင်္ဂလာပါဗျ၊ ကျွန်တော်က ပါမောက္ခ-ရှဲ့ကို လာရှာတာပါ "
" ရှဲ့ချင်းချန်၊ ခင်ဗျား ကျောင်းသား "
ရုံးခန်း အတွင်းဘက်မှသည် ရှဲ့ချင်းချန် ထွက်လာသည်နှင့် ဟော့ယွီမှာ အတန်ငယ် အံ့အားသင့်သွားခဲ့ရ၏။ ယနေ့၌ အကြင်သူသည် မျက်မှန်တစ်လက်ကို ဝတ်ဆင်ထားခဲ့သည်ပင်။
ရှဲ့ချင်းချန်သည် ယခင်က အနီး မမှုန်ခဲ့ပါပေ။
" လာတာနဲ့ အတော်ပဲ " ရှဲ့ချင်းချန်က တိုပြတ်ပြတ်ဖြင့်သာ ဆိုလာ၏：" ဝင်လာခဲ့လိုက် "
ဟော့ယွီမှာ မျက်မှန်တပ်ထားသည့် အကြင်သူ့၏ ပုံစံကို မနေနိုင်စွာပင် အကြိမ်အနည်းငယ်မျှ ထပ်ကြည့်ကြည့်လိုက်မိရ၏။ အလွန်တရာပင် ချောမောလွန်းလှပေကာ၊ ၎င်းတို့သည် အကြင်သူ၏ ခက်ထန်မှုတို့ကို အတန်ငယ်ခန့် လျော့ပါးသွားစေခဲ့ပြီး၊ ပညာရှိဆန်ဆန် အငွေ့အသက်မျိုးအား ပိုမိုအားကောင်းလာစေခဲ့လျက် ထိုမျှ မနှစ်မြို့ဖွယ် မကောင်းစေတော့ပါပေ။
စိတ်မကောင်းဖွယ်ရာမှာမူ ရှဲ့ချင်းချန်တစ်ယောက်ဟာ နှုတ်ဟ၍ စကားဆိုလိုက်သည်နှင့် အမူအကျင့်တို့မှာ ဟော့ယွီ အတွက် မွေ့လျော်မရှုစားနိုင်ဖွယ်ရာ ပြန်ဖြစ်သွားရခြင်းပေ：" ငါ မင်းကို ဒီကုန်ကြမ်းတွေကို သုံးပြီးတော့ သင်ရိုး PowerPointတချို့ လုပ်ပေးစေချင်တယ်။ ပြီးတော့ ဒီမှာရောပဲ၊ ဒစ်ဂျစ်တယ် ဗားရှင်း ပြောင်းရမဲ့ စာရွက်စာတမ်း တချို့လည်း ရှိသေးတယ်။ အထဲမှာ ဆေးပညာနဲ့ သက်ဆိုင်တဲ့ ဒေတာတွေ အများကြီး ပါနေတဲ့အပြင်ကို ဓာတ်ပုံတွေကနေ စာအဖြစ် ပြောင်းထားတာ ဆိုတော့ အမှားပါလွယ်တတ်တာမို့ ဆော့ဖ်ဝဲရဲ့ တိကျမှုကို ငါ စိတ်မချဘူး။ မင်း လက်နဲ့ ရိုက်ပြီးသွားလို့ ရှိရင် အကြိမ်ရေ နည်းနည်းလောက် ပြန်စစ်လိုက်ဦး၊ နားလည်လား? "
