Fading Away [ Hiatus ]

|| အပိုင်း ၂၈ ||

Song recommendation : မင်းအတွက်ဆိုရင် -  ဇော်ပိုင်

စွန်ကလေးက ကြိုးနဲ့မြဲနေဖို့ ငါဘယ်လိုအင်အားမျိုးနဲ့ ဆွဲချည်ထားရပါ့မလဲ အနိုင်ရယ်။ ငါ့ရင်ဘတ် သိပ်သည်းဆထဲမှာ မင်းအရိပ် ကပ်ညှိနေပြီးကတည်းက ငါ့ကောင်းကင်မှာ နေမသာတော့မှာ စိုးခဲ့ရတာ။ ခြေဆန့်လက်ဆန့်သာအောင် ကျယ်၀န်းတဲ့ ဝေဟင်ထက်မှာ မင်းဆိုတဲ့ ဇာမဏီငှက်တစ်ကောင်ကတော့ လွတ်လွတ်လပ်လပ် ပျံသန်းလို့ ရကြောင်းပေါ့ အနိုင်။ တောင်ပံခတ်သံကြားရုံနဲ့တင် ငါ့တိမ်ဆိုင်တွေက မင်းစေလိုရာအတိုင်း ပြေးစုလိုက် ၊ မင်းနှုတ်သီးအစွန်းအဖျားမှာ ကပ်ညှိလိုက်နဲ့။ ကောင်းကင်ရဲ့အစကို လေဟုန်စီးပြီးရှာတဲ့အခါ သက္ကရာဇာ်များစွာတိုင်အောင် သိုဝှက်ထားတဲ့ ငါ့အချစ်တွေကိုလည်း သက်တံ့အောက်ခြေက ရွှေအိုးထဲမှာ မင်းတွေ့ပါလိမ့်မယ်။

•••

"ဝေဟင် ထဦးကွာ!"

ဘုန်းနိုင် မနက်နိုးလင်းကတည်းက အလိုမပြည့်သည့်စိတ်‌ကြောင့် စိတ်အချဉ်ပေါက်နေခဲ့တာဖြစ်သည်။ ဝေဟင့်အခန်းထဲကို၀င်ပြီး စောင်ပုံကြားထဲမှာ အိပ်မောကျနေသူကို လှုပ်နှိုးပေမယ့် ဘုန်းနိုင်အသံကိုလည်း ကြားပုံမရ။ အင်းအဲနှင့် တအီအီလုပ်ကာ ပြန်ငြိမ်ကျသွားသည်။