လွှမ်းမိုးခြင်းနိယာမ

သဲတစ်ပွင့် - ၃

အပိုင်း (၃) - ကစားပွဲ

ရာထူးအဆင့်အတန်းတစ်ခုခုရှိသူကို ထိုသို့ မေးခွန်းထုတ်လိုက်လျှင် စိတ်ထဲ မျပျော်မရွှင်ဖြစ်မည်မှာ ပုံမှန်ပေ။

သို့သော် မေးခွန်းအထုတ်ခံလိုက်ရသော ဖူဟောက်ကတော့ စော်ကားခံလိုက်ရသည့်ပုံမပြ။ ပြုံးလျက်ပဲ လက်နှစ်ဖက်ကို ဆုပ်ကာ လင်းချန်ကို အားတက်သရောကြည့်လိုက်သည်။

ဒီလှည့်ကွက်က အလုပ်ဖြစ်သည်ကိုတော့ လင်းချန်ဝန်ခံရပေမည်။

အမျိုးသားငယ်တစ်ဦး စားပွဲ‌ပေါ်ရှိ သက်သေခံအိတ်ကို မရယ်မပြုံးနှင့် ကောက်ယူကာ ခေါင်းငုံ့ကြည့်နေပြီးသည့်နောက် သူတို့ကို တစ်ခွန်းချင်းစီ စကားဆိုလာသည်ကို ရှင်းချုံလျန် နားထောင်နေလိုက်၏။

"ဒီသဲအဖြူတွေက သဲသေတ္တာဘူးထဲက လာတာပဲဖြစ်လိမ့်မယ် .. 'သဲကစားခြင်းကုထုံး'လို့‌ ခေါ်တယ် စိတ်ကုထုံးတစ်မျိုးရှိတယ် .. အဲ့ဒါက ဒီလို သဲအဖြူတွေနဲ့ တခြားပစ္စည်းတွေကို သုံးပြီး လူနာရဲ့ စိတ်အခြေအနေကို ကုသပေးတာမျိုး"

ထိုအမျိုးသားငယ်က တစ်ခုခုကို တွေးမိပုံပေါ်ကာ စကားကို သတိထား၍ပြောသည်။

"Taobao* မပေါ်ခင်အချိန်ကဆိုရင် သဲကုထုံးအတွက် လိုအပ်တဲ့ပစ္စည်းအစုံဝယ်ဖို့ဆို ယွမ် ၂၀၀၀၀ လောက်ကျမယ်။   ထုတ်လုပ်ဖြန့်ချီတဲ့သူလည်း ဘယ်လောက်မှ မရှိဘူး .. ဒါပေမယ့် ခုခေတ်ကျတော့ ဒီသဲအဖြူက ဘယ်ကလာသလဲဆိုတာကို ခြေရာခံဖို့ တော်တော်ခက်လိမ့်မယ်"

(ယွမ် ၂သောင်းက ဒီနေ့ငွေဈေးနဲ့တွက်ရင် မြန်မာငွေ သိန်း ၁၂၀ ကျော်လောက်ရှိမယ် .. Taobao ကတော့ ဈေးဝယ် App ပါ။ သိတဲ့သူ သိမယ်ထင်တယ်။ တချို့ပစ္စည်းတွေဆို ဈေးပေါပေါလောလောနဲ့ရတယ်)

သူ့စကားက တည်ငြိမ်အေးဆေးသော်လည်း တည်ငြိမ်သောမျက်လုံးများကြောင့်လား ဖြောင့်မတ်သောနေထိုင်ပုံကြောင့်လားတော့ မသိ။ သူ့ဘေးမှ မုတ်ဆိတ်‌မွှေးမရိတ်ရသေးသော ရဲအရာရှိကို တုံ့ဆိုင်းမင်သက်သွားစေသည်။

ဘယ်လိုပြောရပါ့မလဲ ... ကျွမ်းကျင်ပညာရှင်တစ်ဦးနှင့် မျက်နှာချင်းဆိုင်နေရမှဖြင့် ကိုယ့်ကိုယ်ကိုယ်အထင်ကြီးရဲတင်းမှုများက အသေးအဖွဲမျှသာ ဖြစ်ကုန်တော့၏။