#صوت_من_المجهول
((( بقلم زينب ماجد )))
#الحلقة_٣٤
اخذت السيارة على بيت اهلي ..
نزلت دكيت الباب فتحتلي امي .. حچت : يمه بنيتي غفورة يمه
اخذت ابني من ايدي وحضنتني
حضنتها حيل وكمت اشم بيها دمعت عيني واني اكولها : لميني يمه والله الوجع طشرني تعبت منهم كلهمممم
- عمت عيني يمه ريته بعدوج ان شاءالله ناخية امير المؤمنين كل دمعة منج صاروخ من المصايب فوك روسهم ناخية الزهرة
اخذتني ودخلتني جوا ..
وبقت حاطتني اني وابني بحضنها وتكول : ابقي عدي بعد لا تروحيله نعلة اهله لابو عشيرته
-تتذكرين وكت الجنتي عدنا بسفرته لايران الكال بيها شغل جان ماخذها سفرة مو شغل
-يولي لا تهمين بيه ربج يجازي وينها ام البنين التطلع حوبتج بيه وبالبربوك مالته .. اهم شي وليدج يمه فكري بابنج ولا تفكرين بيه
-امنعي عقلي ما يفكر امنعي كلبي ما يتكطع يمه كوا كاعد اتجرع ايامي تكول خناجر بكلبي من القهر مدا اكدر استوعب ولا اتأقلم اقنع بروحي كارهتة بس يمه ايامي وياه تأذيني شكد جنت ماشية وياه على نيتي وحابته وهو مستغفلني وفاتحله بيت وعايش حب حياته ولا كأني موجودة
-ربج موجود ييمه يسمع ويشوف ويجازي ما ينسى احد لا ما يحطه بميزان اعماله ويجازي بيهن لا تنقهرين يبتي وحطي عينج بعين ربج ناخيته وانا كلب والدة اليقويج ويصبرج وما يخلي احد يصيبج باذية بجاه هو الواحد القيوم
وخرت راسي من حضنها : ماما اني لازم اروح اول مكان حيفكر يجي لهنا .. اذا اجاج كوليله ذبت ابنها وراحت لجامعتها
-راح تروحين لجامعتج صدك
-لا راح اروح لشغلي اذا ما لزمت شغلي بيدي وضمنت روحي بيه ابقى طول عمري مكفخة اله ولاخوتي ما راح اكدر اوكف على حيلي بدون راتبي .. ما راح اتنازل عنه لو مهما يكون .
- راح تبقين هنا لو ترجعين لبيته
-هنا يسيطر عليه اكثر من بيته ابيته يستخطيني هنا يخلي اخوتي يسوون بيه الما يكدر هو يسوي .. راح ابقى ببيته لحد ما الكى حل لروحي واخلص منه بس بالاول لازم اضمن شغلي .. جبتلج فلوس وذهبي كله ضمي عندج ولا تكولين لاحد يمج .
-روحي والزهرة توكفلج ان شاءالله ناخية ام البنين
طلعت اخذت السيارة ورحت ع المقر ما مسيت للقسم رحت لغرفة المدير العام اسأل على عمي سألت السكرتير موجود كال : على جية
-تمام راح اروح للقسم من يجي انطيني خبر
-تمام
مشيت للقسم سلمت
سلموا عليه : يا هلا وين هالغيبة هاي
- مريضة شوية تعبانة .. شنو الأخبار ؟
- باقي لمولد الإمام المهدي سبعة ايام عدنا تعاون مع المؤسسة اللبنانية على احياء مهرجان احتفال بالميلاد الشريف هذا البرنامج
اخذت البرنامج باوعته
: شنو نكدر نقدم لعوائل الشهداء بمثل هيج يوم
-تكريم
- ممكن سويت جرد بقائمة العرائل اللي راح ندعيها
-راح نباشر
-توكلوا واني وياكم
كعدت ع الحاسبة واخذت رقم اكثر من عائلة انطيتهم الموعد ودزيتلهم الدعوة .. وبقت عوائل هواية بعدني دا اشتغل عليها .. اجا قسم من الأدارة : الحجي ابو نور بإنتظارج
- تمام جاية ، رحمن دزلي ارقام العوائل ع الواتساب مالتي مع اسم الشهيد اذا تكدر اني اخابرهم على حسابي الخاص
- تمام ست هسه اسوي تحديد للاسماء واحولهم على رقمج
-عاشت ايدك
طلعت من القسم توجهت للأدارة دخلت عمي كاعد سلمت عليه كال : شنو الوضع
- من سيء الى اسوء
-خير شصاير
-اتزوج
-ياهو اللي اتزوج ايوب
-طلع متزوج مو اتزوج واخذ الاقوى اللي اتزوجها نفسها اللي تعرفها نادية
-لا تكليلي خطيبته القديمة
-فاتحلها بيت ويصرف عليها وعلى امها
-معقوله
-لحد هسه اسال مثل سؤالك عمو اتمنيت لو بداخلي مثل الهدوء الجاي يبن على وضعي الخارجي بس اكو ريح عاتية كاعد تعصف بروحي ما ادري بيا ساعة تكوم عاصفتها وتهدم كلشي
