مليت من كثر الصبر طال انتظاري...طال والشوق في وسط الصدر سنين على هالحال

60

نطقت غالية وهي تحاول تفهم : هالاسبوع؟
هزت عهود راسها مكتفيه بالصمت
رجعت تسال : غريبه وش به مستعجل كذا
احمر وجه عهود الي جعل الجالسين مستغربين ردة فعلها ونطقت بتردد : يقول حسبي الله عليك من ولد يقول انه انه مايقدر يشوفها قدامه طول الوقت ببيت جده وماهي حلاله وان صار شي ذنبه برقبتنا
عم الصمت بالمكان وكان انكب عليهم ثلج من هول صدمتهم ولا كانت اقل من صدمة وانحراج الهنوف الي كانت شوي و تنفجر من قوة احمرار خدودها
نطقت ريما تغير الموضوع : هنوف اذا ودك بشي قوليه لي وانا اوصله معليك بس انتي قولي وهو طرق عن خشمه يقول تم
هزت براسها دليل على نفيها وهي للان منحرجة من الي سمعته وكان قدامهم
بدأت عهود تسولف باي شي يجي ببالها تحاول تغير الجو
{مجلس الرجال}
دخلوا بعد ما انتهى سلامهم الي استمر لدقايق برا المجلس
نطق عبدالله بترحيب : يالله حيهم
رد بدر : الله يحييك ويبقيك
كانوا يتبادلون التحية تاركين الي كانوا يتبادلون النظرات و الي وضح لابراهيم بان تركي ما كان عارف
فز من سمع ابوه ينطق : دامنا وصلنا والحمدالله مهنا خلاف ندخل بالموضوع الي حنا جايين له
رد عبدالله : اسلم
نطق بدر وهو يربت على رجل ولده : حنا طالبين القرب منكم وعلى سنة الله ورسوله نبي بنتكم الهنوف لولدنا ابراهيم
رد عبدالله الي ارتسمت ابتسامته : والله هذي الساعه المباركة والنعم بإبراهيم ومن رباه لو الشور شوري انا موافق مهنا خلاف ابراهيم رجال ولد رجال وما بنلقى مثله يخاف ويصون بنيتنا مير الشور شور البنت اول شي واخر شي قبل رايي
نطق ابراهيم الي يحاول يخفي سعادته : الله يرفع قدرك ياعمي
سكت يفكر بالرد الي رده وجلس يشتم نفسه بداخله : وش الي الله يرفع قدرك اي والله انك طايح على وجهك مثل ما قالت امك كل كلام الرجال وهذا ردك قطع الله وجهك
انقطع حبل تفكيره من سمع عبدالله ينطق : زين اجل لو ودك بالشوفه الشرعية انا ماعندي مانع
سكتت يناظر الي كان يحاول يخفي ابتسامته ونطق وهو يضحك : قم يا تركي قم شف له الطريق
قام تركي الي كانت انظاره فاضحته و بقوة وهو كان ساكت طول الوقت ينتظر بس انه نفرد معه
لحقه ابراهيم الي كان يبتسم وراه واختفت ابتسامته ما ان لف عليه
تركي : الحين جالسين يومين قبال بعض وطلعنا وجينا ولا قلت لي يالتسلب السلوقي هاا
ابتسم وهو يحاول بانه ما يبتسم الا ان ابتسامته انتصرت ونطق : لو قلت لك وش كنت بتقول
انلجم تركي من سؤاله الي ما توقعه و قال : مدري بس عالاقل كنت ادري مو انصدم بجيتكم
رد ابراهيم الي كان متحمس : اقول بس شف لنا الطريق ولا يكثر
رد تركي والغيرة تملكته : اعقب واخس ياقليل الادب ترا عشر دقايق وانت طالع وبوقف عند الباب احسب الوقت لا تفكر الدنيا سبهلله
رد ابراهيم : اي اي زين بس يلا كمل طريقك
كملوا طريقهم للصالة
تركي : اجلس وانا بروح اناديها وهذا علم يوصلك بس تدخل ببدا احسب بتجلس ساكت مستحي مشكلتك الحسابه بتحسب
هز ابراهيم راسه بقلة حيله وهو بداخله يشتمه على استقعاده معه
طلع تركي و دقايق وهو راجع و وراه الي دخلت بكل هدوء
نطق تركي يوجه كلامه لهم : تراي قريب الباب تخلص العشر دقايق وانا جاي اسحبك كلامي وقلته
طلع تارك الي كانت واقفه مستغربه كلامه وانفعاله فزت من سمعت صوت الي كان وراها
: تعالي اجلسي
لفت عليه تناظر يده الي تاشر لها تجلس بجنبه الا انها جلست بعيد عن المكان الي ياشر له
نطق وهو يضحك : يعني مستحيه واول مره نجلس مع بعض اخلصي بس تعالي
قلبت عيونها ونطقت بجدية نوعا ما : لو تتذكر وتركز بان كل مره تصير انت الي تسحبني ودامنا بدينا بالحلال خلنا نكمل بالحلال
رد وهو مستغرب جديتها : وش هالاخلاق
نطقت وهي تلعب باظافرها : مافيني شي
نطق وهو يخفي حماسه الي دمرته : زين قالت لك امي ترا اذا تمم الله بنملك هالاسبوع
ردت والاحراج تملكها : اي قالت لي وبعدين وش الي قلته لها
نطق وهو يعدل شماغه : ماقلت الا الصدق تخيلي اجلس طول الوقت وانتي قبالي ومقدر اجيك واكلمك وانتي تو تقولين دامنا بدينا بالحلال نكمل بالحلال وانا وش الي يخليني انتظر زيادة وش يضمني انك ما تهربين مره ثانيه سنتين ولا خمس
سكتت ماهي عارفه وش تدري وكلامه احرجها الا انها اكتفت بانها تلعب بأظافرها
نطق يخفف التوتر عنها : زين اسمعي بحجز موعد بكرة ونروح نحلل والتحليل مابيطول دام امورنا سليمه
لفت عليه وكانت بتنطق بشي الا انها تراجعت من شافت انظاره
وطق بتساؤل : بغيتي شي ؟
هزت راسها بالنفي
كمل كلامه : البيت على ما يجي العرس يكون جهز واي شي ببالك بس اطلبيه ويجيك
ردت : انشاءالله
سكتو كل واحد ينتظر الثاني ينطق الا ان الصمت مترأس المكان
نطق يكسر الهدوء : طيب ماعندك شروط شي
ردت : لا انت ماعندك شي
هز راسه وهو يقول : وش ابي بالنجوم والقمر قبالي
نطقت وهي تتهرب من انظاره :زين اجل انا بروح دامنا اتفقنا
وقامت برعه غير سامحه للي وقف وراها يحاول يوقفها الا انا ركضت بسرعه
تأفف وهو يقول : واخوك متعب نفسه وحاط وقت
طلع للي فز اول ما انفتح الباب يناظره بصدمه ثواني وانفجر ضحك
وهو يقول : عزالله افلحتوا هذا وانتوا توكم حتى عشر دقايق ما كملتوا وكرشتك كيف بعدين
رد الي كان يعدل شماغه يلهي نفسه : اقول امش بس
مشى وهو مكمل ضحك
رجعوا للمجلس ونطق اول ما جلسو
: انا تكلمت معها وتفاهمنا وانا الود ودي ان تمت الامور نملك هالاسبوع
هز عبدالله راسه بتفهم وهو مبسوط على ابراهيم الي واضح وعارف انه ماوده يجتمع معها ببيت جده الا وهي حلاله
رد : خلاص اجل باخذ كلامها ليوم وان وافقت حجزنا موعد لبكرة
هز أبراهيم راسه وهو مرتاح واخيرا احد قدر يفهمه بسرعه
>>>تسريع احداث
انتهى اجتماعهم بتفهم و ود
دخل عبدالله الصاله وهو يناظر بنته الي وضحت له ملامحها المحرجة
نطق بابتسامه : ها نقول يا عروسه ولا؟
ابتسمت له
قال وهو يناظر غالية الي كانت مبسوطه : يقولون السكوت علامة الرضا يعني وافقتي؟
هزت راسها وهو كلاها احراج من ابوها
فتح يدينه لها لاجل يضمها نطق بمجرد ما ارتمت بحضنه : الله يوفقكم يارب ويتمم لكم على خير
رد الكل : امين
نطقت غالية : والله كبرتوا وكبرتونا معكم
انتهى اليوم بفرحة البيتين
{صباح اليوم الثاني}
صحت مفزوعه تدور جوالها تدعي بان ما تكون راحت عليها نومه
تنفست براحة من شافت بانها صحت قبل المنبة
وقفت تبدأ روتينها قبل لا تطلع للمستشفى
وزلت بعد ما خلصت تسلم على امها وابوها و تتوجه للمستشفى
: صباح الخير
ردوا بعد ما سلمت عليهم : صباح النور
نطقت وهي تبعد عنهم : يلا انا ماشيه بغيتوا شي
ردت غالية : ابد سلامتك بس كلي بعد ما تخلصين زين يمه