အမတ်ချုပ်ငယ်လေးကတော့ ဒီနေ့လဲ တိုင်နဲ့ခေါင်းနဲ့ဆောင့်ပြီး အသနားခံရပြန်ပြီ

5 uni

အခန်း ၅

ဧကရီက ယောက်ျားတစ်ယောက်ဆိုရင်တောင် ဧကရာဇ်နဲ့ ဧကရီရဲ့ အခမ်းအနားအစဉ်အလာခြောက်ပါးပြည့်စုံပြီး ကြီးကျယ်ခမ်းနားတဲ့ မင်္ဂလာအခမ်းအနားကို လစ်ဟင်းလို့မရပါ။ ဒီနှစ်တွေထဲမှာ တိုင်းပြည်က ငြိမ်းချမ်းသာယာပြီး ကြွယ်ဝတာမို့ ဧကရာဇ်ရဲ့ ဘဏ္ဍာတိုက်ကလဲ အလျှံအပယ်ပါပဲ။ ဧကရီရဲ့ ခန်းဝင်ပစ္စည်းပမာဏဟာဆိုရင်ဖြင့် ရွှေတုံးသုံးသောင်းဖြစ်လေရာ အင်မတန် ကြီးကျယ်ထယ်ဝါလှတယ်လို့ ဆိုနိုင်တယ်။

သေချာပေါက် မှူးကြီးမတ်ရာတွေကလဲ လက်ဆောင်တွေ ယူလာကြတာ‌ပေါ့။ အဲဒီ့ထဲမှာမှ လက်ဆောင်အများဆုံး ယူဆောင်လာခဲ့သူကတော့ အမတ်ချုပ်ငယ်လေးကို နင်ချည်းပင်‌သေလေရော့ဆိုပြီး သစ္စာဖောက်ခဲ့တဲ့ ဒုတိယအမတ်ချုပ်သာဖြစ်နေပါတော့တယ်။

အခု ဧကရာဇ်အရှင်မှာ ဧကရီရှိလာပြီဖြစ်ပေမဲ့ အမတ်ချုပ်လေးရဲ့ တိုင်းသူပြည်သားလူအများအတွက် ကိုယ်ကျိုးစွန့် အနစ်နာခံမှုကြောင့် အကုန်လုံး တိတ်တဆိတ်သက်ပြင်းချကာ ပူဆွေးပြီး တစ်ချိန်တည်းမှာပဲ ပျော်ရွှင်ကြပြန်တယ်။ အကြောင်းမှာ အမတ်ချုပ်လို ဖြောင့်မတ်မှန်ကန်သူသာ အရှင့်အနားမှာ ရှိနေမယ်ဆိုရင် အရှင်ရဲ့ ပေါက်ကရလေးဆယ် ကပေါက်တိကပေါက်ချာ ဆန်းပြားခမ်းနားအတွေးအခေါ်များကို ထိန်းမတ်ပေးနိုင်မှာ အသေအချာပင်။ အဲလိုမှပဲ တိုင်းပြည်ကြီးလဲ တည်တံခိုင်မြဲလျက် ရှိပေလိမ့်မယ်။

ဧကရာဇ်တင်မြောက်ပွဲမင်္ဂလာအခမ်းအနားကျင်းပတဲ့နေ့မှာ ဧကရာဇ်အရှင်နဲ့ အမတ်ချုပ်လေးဟာ မင်္ဂလာအစီအစဥ်အတိုင်း ဖြတ်သန်းပြီး ခန်းဆောင်ဝင်တဲ့အချိန်မှာ မင်္ဂလာအရက်ကို အတူတကွ သောက်ကြပေတယ်။ အနှီအရက်ဟာ သမင်ချို၊ ရွဲယိုသီးတို့နဲ့ စိမ်ထားပြီး စိတ်ကြွစေသည့်အစွမ်းရှိလေတယ်။ ဘာစိတ်လဲဆိုဝာ သိကြတယ်မဟုတ်လား။

ဧကရာဇ်အရှင် ရေချိုးသန့်စင်ပြီး ဝတ်ရုံတော်လဲနေချိန်မှာ အစေခံတွေက အမတ်ချုပ်လေးကို ပြင်ဆင်ပေးပြီးလေပြီ။ အခုလိုအခြေအနေကို ကြုံတွေ့ရမယ်မှန်း အရင်ကတည်းက တွေးခဲ့ပေမဲ့ လက်တွေ့ကိုရောက်တဲ့အခါ အမတ်ချုပ်လေးလဲ အတော်ပင်နေရခက်ကြောင်း သိလိုက်ရတော့တယ်။ အစေခံများ ကူညီတာကိုတောင် လက်မခံဘဲ ကိုယ့်ဘာသာ ဖြေရှင်းဖို့ကို ရွေးလိုက်တဲ့အတွက် မင်္ဂလာခန်းဆောင်မဝင်ခင် ဆည်းပူးခဲ့ရတဲ့ ပြင်ဆင်နည်းအဖြာဖြာနဲ့ ခန်းဆောင်ဝင်ဖို့အတွက် ပြင်ဆင်ရတော့လေသတဲ့။