مرحلة السادس اعدادي

الرابع

ردت اترك السنة بس اصدقائي ما خلوني
علي (صديقي ) رفض يمتحن نص السنة الا اذا امتحنت انا ، ومن سألتة ليش سويت هيج گال ( مو علمودك سويت هيج ، بس علمود ابوك )
كرم - ابوي؟ ابوي شدخلة بالموضوع ؟
علي - كرم انت اناني من اتخذت هيج قرار ، صح انت تعبان بس ابوك هم تعبان ، يكدر يكلكم انا تعبت وراح اقدم تقاعد ويستريح بالبيت وابسط شي راح تبقى انت بدون مصرف ، بس هو اتحمل فقد مصطفى واستمر بحياتة ، بينما انت فكرت تفكير اناني وبس شفت روحك تعبت بسرعة قررت تنسحب واستغليت حب ابوك الك ، لان تدري بيه خلال هاي الفترة هو ما يگدر يكلك لا لان يخاف عليك

هاي الشغلة واضحة مثل الشمس ومع ذلك ما جنت منتبه عليها لحد ما علي حجالي عنها
ما يصير اتخذ هيج قرار
ساعتها جان لازم افكر بالسالفة واتصرف صح ، فكرت وي نفسي معقولة انا اناني لهاي الدرجة ، يعني ابوي وامي منو الهم غيري حتى انا اگعد واسكت مثل الطفل واگلهم تعبت ، يعني هم شكد تعبوا علية حتى يكبروني ويشوفوني شاب اخلاقة حلوة ويعرف يميز الصح من الغلط ، وانا بعد كل هذا اجي واكلهم ما عاجبني اكمل دراسة او ما عاجبني هذا الشي ، لازم اكمل السنة وانجح لو مهما صار