مرحلة السادس اعدادي

الاخير

جنت گاعد انا وابوي وامي بالبيت وجاي نتعشة ، فجأة ندك الباب بس تفلش تفلش ، رحت اركض ، فتحت الباب ، طلع مهدي ، صاح مبروك والك وعيونة بيهن دموع الفرح وحظني ، گتلة شبيك مهدي ، گال عاشت ايدك ع الدرجات ، گتلة والك ادخل للبيت ، بعدني ما مستلم النتيجة ، گال والك طلعت وانت اقل درجة عندك بالعربي ٩٨
عيوني مدري شبيهن صارن شلال من البجي وحظنت مهدي يمكن كسرت اضلوعة وشلتة
الله يا محلى ذيج اللحظة ، اتذكرها ، واتذكر من دخلت لبوي وامي وگتلهم ، ابوي گام وحظني وبجة ، اول مرة اشوفة هيج فرحان ،

اما امي فما گدرت تگوم بس بقت تبجي 😳 وصوت بجيها يضحك ، اگلها شبيج تگلي ( يب بع ام تاهل ) شجاي تحجين حجية ، طبعا تبجي وتحجي فكلشي ما ينفهم منها بعدين طلعت تقصد ( يا بعد امك تستاهل )
اول مرة اشوف اهلي هيج فرحانين ، صدك ايام ما تنسي
صليت بوقتها وتذكرت شلون مرت بية ايام فقدت كل الامل بس ما فقدت املي بالله ، واليوم اريد اشكره ع كل شي ، ع كل لحظة ،
الما عافني بلحظة ضعف ، يستاهل ما اترك شكره بلحظة قوة
امتحنت دور ثاني ومعدلي صار ٩٨،٨ وانقبلت

طب ناصرية لان ما اگدر اداوم خارج المحافظة واعوف اهلي وحدهم
هاي قصتي خلال سنتين اعتبرهن احلى ما بالعمر لان بيهن تحديت نفسي ورغباتي وسيطرت ع كل شي ، وبيهن حلمت وحققت حلمي ، لان بيهن حسيت بلذة الحياة وان الحياة احلى بهواي من قبل ، شكرا لكل شخص ساعدني
تمت
اغلبية الاحداث بالرواية هي حقيقية ، جمعتها برواية لان هواي طلاب فاهمين السادس غلط ع انة تعب وضيم ، حاولت اجمع اكثر المشاكل الي يواجهوها طلاب السادس وحلها ، بس طبق الخطوات بأمل واتخلص من خوفك
اتمنى انة گدرت اساعد 😊 ، طلاب السادس اهم نصيحة اتركوا النت حبايب 😊
ان شاء الله نشوفكم باحسن الكليات
مصطفى راجي