العشق مجددآ

2

راح ابدي احجيلكم قصصنا وحده وحده..
..وبلسان اخواتي
اول وحده سمر...
احم احم ابدء..
●●حكايه سمر●○
مرحبا اني اسمي سمر حاليا عمري 36 بس ماراح احجيلكم عني هسه لا راح ابدي بالماضي حتى تعرفون حاضري ..
ولدت بعائله منفصلين امي وابويه عن بعض ..م حسيت بدفىء العائله..
ابويه عايش بمكان واني وماما بمكان ثاني ..
طبعا بابا ميسأل عني بسبب امي غيرت مكان البيت..وانتقلنا
ماما تشتغل مدرسه..بس هي ماربتني الي ربتني بيبي..
من صار عمري 6سنوات ماتت بيبي وقتها حسيت الدنيا صارت سوده فقدت الحنان وكلشي لان امي ببساطه ممهتمه بيه ..وجانت ترتبط هوايه وتسوي علاقات..
ورى وفاه بيبي بسنه تزوجت ماما واحد اجه عاش ويانه ..
جان يأذيني هوايه ويضحك عليه بس ماما عادي عندها اصلا مجانت تعرف بشنو احس..
جنت اني الي ادرس نفسي طبعا اني شاطره بدراسه كلش واتمنى من اكبر اصير دكتوره..
جنت بالمدرسه من يسوون اجتماع للاهالي استحي وابجي لان ماما ولا يوم تحضر هالاجتماع..
جنت اسألها عن بابا هواي تكولي ابوج تزوج ومايحبج شكو دتسألين عليه..
بديت اكبر صار عمري14...
بهذا العمر تغيرت حياتي ..
بسبب امي اخذتني لعرس اقارب زوجها ..واني جنت حلوة كلش وممبين عليه عمري 14لا مبينه جبيره ..
شافتني عمه زوج ماما عجبتها بعد العرس باسبوع اجت خطبتني من ماما..
طبعا ماما وافقت بسرعه لان تريد تتخلص من مسؤليتي ..
كنت صغيره لاحول الي ولاقوه غصبوني على الزواج من ابراهيم ...
بجيت حاولت ارفض بس ماكدرت لان تحقق الشي الي تريده ماما وزوجت..
طبعا ابراهيم واهله جانوا احسن من امي ..عشت عدهم معززه مكرمه..
طبعا اني جنت مااعرف شي عن الزواج ولذلك عانيت لان كنت طفله بريئه ماعرف شي ..
اجت ام ابراهيم حجتلي شغلات لازم اسويها واذا مسويتها ابراهيم راح يضربني ويحبسني..
واني من الخوف انطيت ابراهيم شنو يريد ..وكنت كل ليله ابجي..
بعد شهر بديت اشعر بدوخه وغثيان والم ببطني ام ابراهيم فرحت ماعرفت ليش ..
بس بعدين عرفت اني حامل..جانت اكبر صدمه اليه بهذاك العمر..
اني وين والحمل وين...اني طفله واحمل بطفل..حرام عليج ماما خليتيني بهيجي حاله حسبي الله ونعم الوكيل..
المهم خلصت العطله واني صار عليه شهرين بالحمل..
بدت المدرسه ..بس ماقبلو اداوم بسبب التعب الي راح اعانيه واني حامل ..مايصير اداوم واجلوا السنه غصبا عليه..بس وعدوني بس اولد بالسلامه ارجع للمدرسه..
وجنت كل يوم اشوف الطالبات يرحون للمدرسه واني ابجي ..
المهم بدت بطني تكبر واستحي منها اريد بس اضمها لبطني بس بعدها وصلت مرحله بطني صارت كلش جبيره..
ها نسيت اكولكم عائله ابراهيم متكونه من امه وابوه واخوه متزوج وعايش ويانه ومرته كلش خبيثه تغار مني..
واخوه الثاني متزوج وعايش بامريكا يدرس ..واخته عايشه بالامارات متزوجه..
وابراهيم اصغر واحد عمره 20سنه ..اطباعه مختلفه ساعه حلو وساعه مر..
المهم اجه اليوم الي ولدت بي ..طبعا ولادتي كلش صعبه لان جنت صغيره وصلت للموت ..
بعدها ولدت ابني سيف..
كنت اختلف عن الامهات لان جنت اكرهه لسيف لان احسه هو سبب دمار مستقبلي ..
عشت اول اشهر مابعد الولاده اصعب ايام بسبب بكاء سيف المستمر كنت كل يوم اكرهه اكثر واكثر..
صار عمر سيف 5اشهر قرروا اهله يطهروه ..بس لازم يسوون حفله طهور اله..
راح عمي وعمتي وابراهيم وبعدها مارجعوا
ماتو بحادث سياره ...
بعد وفاتهم بشهر ماتحملوا اخوان ابراهيم مسؤليتي اني وسيف ..
قرروا يرجعوني لامي..
طبعا امي ماكانت متحملتني اني ونوب هسه صرنا اثنين اني وابني ...
بعدها باسبوع قررت ترجعني لبيت ابويه..
ومن هنا بدأت حكايتي ..
وصلت لبيت ابويه واني خايفه لان مااعرف شنو بي ..
دخلتني امي وراحت بدون متحجي شي ..
شافني ابويه بمنظر يكسر الخاطر اني طفله وشايله ابني بيدي ..
بلحظتها حظني وبده يبجي..
واني جنت حاقده عليه لان تركني واني بنته..
اجت زوجه ابويه جان وجهها بشوش وجميله جدا ..رحبت بيه ودخلتني للبيت ..
دخلت شفت بنيه طفله بعمر ابني سيف اسمها فرح اختي ..
جان عمرها 10اشهر اكبر من سيف بكم شهر..
بيتهم جان كلش حلو ودافي وجبير ومبين عليهم عائله سعيده...وحقدت ع بابا اكثر..لان تركني اتعذب وي ماما..
بعدها كعدت وسيف بده يبجي اخذته مرت بابا مني وراحت تبدل اله..
ابويه حجه ويايه ووضحلي انو امي حرمتني منه جان ع طول يجي بس متخلي يشوفني بس كانت تاخذ فلوس مصرفي منه..
وبعد كم سنه انتقلنا لمكان ثاني وضاعت اخباري..دور عليه هواي بس ماحصلني لان امي اخذتني لغير محافظه ..
طبعا كلش غضب من امي وانقهر لان زوجتني واني طفله حجيتله قصتي كلها بجه عليه وحظني ووعدني راح يعوضني ولو بجزء قليل..
بعدها دخلو اثنين بنات زغار وحده عمرها 9سنوات اسمها جلنار..
وثانيه عمرها5اسمها ميس..
عرفهم بابا عليه كللهم هاي اختكم الكبيره ولازم تحبوها وتحترموها وشنو تطلب منكم تنفذولها..
وهمه جانوا مؤدبات وحبابات بسرعه حبوني وتعلقوا بيه..
امهم جانت امرأه مثاليه وحبابه كانت تهتم بيه وبابني سيف اكثر من بناتها الحقيقيات..
مفرقتني عنهم ولاهمه حسو اني مو اختهم بس من ابوهم
ابد ماحسيت بهذا الشعور عشنا كأخوات من بطن واحده..
رجعت للمدرسه الحمدلله ماتأخرت هوايه بدراستي بس سنه..
وعوضتها بالتوفق..وابني سيف واختي شهد تربو سويه..
ماما زينب ربنتهم ...عشت الحياه العائليه والحب والدفىء بمنزل والدي وانقطعت اخباري عن امي واهل ابراهيم..
عوضني والدي كل الفقدان ..
صار عمري 19 دخلت كليه الطب ..والكل جانو يساعدوني بالبيت وموفرين الي الهدوء وكلشي اطلبه يصير
بهاي الاثناء سيف ابني صار عمره 4سنوات بس هم جنت بعيده عنه احب اختي فرح اكثر منه ماعرف ليش يمكن لان يذكرني بكلشي فات..
ولان الاشياء الحلوة متستمر ..
من صار عمري 21 ...
انصدمنا بخبر مرض ماما زينب ..عرفنا هي مصابه بسرطان ومع الاسف انتشر بجسمها وماقدرنا نساعدها بقت 5اشهر مريضه وبعدها توفت..
انتهت السعاده بيتنا وفقدنا كلشي حلو بهذا البيت كانت هي مصدر الدفىء بالبيت..
تركت اخواتي يتيمات وصغيرات ..تركت ابي وحيد لان جانت حب حياته..
تركتني اني وسيف هي ربت سيف على ايدها..
ببساطه فقدنا السعاده في المنزل..
جنت الوم نفسي والوم سيف لان احس اني وياه نمتلك النحس وباي منزل نعيش بيه يموتون اصحاب المنزل..
زاد كرهي لسيف اكثر واكثر ...
بس بابا فهمني كلشي الي صار قضاء وقدر ورب العالمين كاتب على ماما زينب تموت سواء اني عشت وياهم او لا..
وطلب مني اكون قويه ...واكون ام ثانيه لاخواتي ولابني ..
واني بالفعل قررت اصير ام ثانيه لاخواتي اعوضهم ولو بجزء صغير ..
مااخليهم يحسوون بالنقص ..
وبالفعل كرست حياتي الهم ..
جنت اتعب هوايه اداوم بالجامعه..وارجع اعدل البيت واطبخ ..
بعدها اختي جوجو بدت تكبر وضلت تساعدني بشغلات البيت ...
وبديت اتقرب من ابني سيف لان ما اله ذنب بكولشي ..
دخل للمدرسه هو وفرح وجان بابا مسئول عن دراستهم ..
بس اذا بابا عنده شغل اني ادرسهم..
بدت علاقتي بسيف تزيد يوم ورى يوم خصوصا ورى وفاه ماما زينب ..
ابني كبر كدام عيني جنت ممستوعبه هذا ابني بالاول عادي لان كان طفل بس يوم عن يوم كان يكبر ويصير اطول وجنت ممصدكه انو هذا ابني لان كان قريب لعمري كلش ..
رح احجيلكم ع موقف صار ويايه لما كان سيف عمره 15سنه
جان يوم جمعه ماعندي دوام بس كان ابويه مسافر لمحافظه ثانيه عنده اجتماع..
ف الصبح فروحه طلبت من سيف لان طويل يغير مكان اللوحه لان عالي ..
ف باثناء ماكان يغير وكع واغمى عليه لان الوكعه ع راسه طبعا احنه ضلينه منعرف شنو نسوي بس اني وفرح موجودات طلعت للشارع كان جيرانه وابن اخوه واكفين اني رحت اصرخ وابجي صح اني دكتوره واعالج الناس بس مكدرت اساعد ابني لان نسيت شنو دارسه من الخوف..المهم جيرانه ركض هو وابن اخوه للبيت شالو سيف واخذوه للسياره ورحنه للمستشفى ودخلنه للطوارىء ودخل سيف للغرفه هو والاطباء حتى يسعفوه..
طبعا كل الاطبااء الي بالمستشفى يعرفوني واهتمو بابني ..
اني جنت ابكي واصيح ابني ابني هذا الشخص ابن اخو جيرانه استغرب للوضع ..
بس سكت ..بعدها طلعو الاطباء كان سبب الاغمااء هو سيف صارت الوكعه ع منطقه العنق مما سبب اغماء وهسه طلع عنده رضوض بهذه المنطقه ولازم يبقى بالمستشفى ..
انطوه ابر مهدء ونام ..
بعدها تشكرت من جيرانه وعرفني ع ابن اخوه اسمه علي :
سمر:شكرا اخي تعبتك والله بس جنت مااعرف شنو اسوي وحد.بالبيت بس اني واختي
علي:لا شنو القصه مسويت شي المهم اخوج بخير ولتخافين عليه بطل وان شاء الله ماكو شي