العشق مجددآ

7

☆▪سمر▪☆
اليوم بليل رح يجون ام يوسف وابنها خطيه الله يشافيه بعده شاب بعمر الزهور الله يساعد امه اكيد قلبها ميت عليه لان اني ام واحس بيها اذا ابني يصير بي فلاونزه اموت الله يشافيه ويرجعه مثل ماجان واحسن اني عرضت عليها المساعده لاني ام حتى لو ابني قريب من عمري ابقى ام ..
رحت لسوق اشتريت كم غرض ناقص ورجعت للبيت طبعا سيف مموجود ولابابا ..
اتصلت بجلنار وسولفت وياها شوي وراها دخلت ميس بس حسيت عدها كلام..
_هلا سوسو كيفك اليوم ع وكت جايه شو
_هلا بميوس لا اليوم رحت اخذت دكتوره نبأ للمطار ومريت ع فريحه ورجعت
_اها وين راحت
_هيجي مؤتمر بعد تعرفين ..
_ايي صح شنو اليوم الغده
_هيجي خفايف لان اليوم عازمه ناس ع العشا ف ماالحك اسوي غده زين
_اها منو رح يجي اليوم هيجي مهم
_من رحت لفروح شفت هناك ام يوسف ويوسف صراحه كسرو خاطري
_منو ام يوسف
_لج ميسه شبيج هاي الي ابنها بي مرض نفسي والتقو وي فرح بالمطار
_ها ها تذكرت وانت شحقه عازمتهم اني اخاف خاف ليسوينه شي ابنها مو تكولون مريض
_عابتلج شسالفه قابل مخبل هو شو هادىء كلش مو اني اليوم رح اعزم دكتوره مريم حتى تشوف ابنها اذا بي امل تعالجه خطيه
_اها عنده العافيه ياربي
_تعالي احس بوجهج حجي
_ههه يبوي لذكريني
_خير شكو
حجتلي ميس عن موقفها وي القاضي وضحكنه بعدها راحت بدلت ملابسها ورجعت تساعدني ووراها اجو البقيه وتغدينا...

○●ام يوسف●○
احس كل شي صار وي فرح مو صدفه احس الله دزها النه ..
بنت طيبه واسم على مسمى اسمها فرح وتجيب الفرح بابتسامتها..
ابني احس ورى مشافها نفسيته بدت تتغير هي اول شخص يستجيب وياه بعد الي صار بي..
وطبعا هو ورى مالتقى بيها ضل يلح عليه يوميه نروح الفرح ..يارب ع ايد فرح يطيب ابني ..
اجه يوسف ..
_ماما يوسف حبيبي محتاج شي اسوي الك
_للل لا ب ب بس بيش س سسساعه
_ب4ونص
_ي ي يمتى ننروح
_اها قصدك بيت فرح لا ابني بعد.شي ساعه ونص يعني ورى اذان المغرب نروحلهم
_ ه ه هاا
_ماما يوسف فرح حلوة مو
ضحك يوسف واستحى ماعرف احسه يرتاحلهه بس ميحجي لان هو بعمره ما سأل او لح ع شغله
راح يوسف لغرفته رح اسوي جاي واخذه لابو يوسف ..

▪▪☆جلنار☆▪▪
اووف يربي مشتاقه لاهلي كومه..
ضوجه هنا ب اللمانيا صح دوله حلوة بس اني ماعندي احد اطلع وياه كل البنات الي وياي يطلعون وي كروبات ولد واني اتعقد منهم ..
الولد الوحيدين الي احبهم بحياتي بابا وسيف وعلي صديقنا
لان هذولي مينضرون الي غير شي يعني ارتاح وياهم عكس البقيه مارتاح مارتاحلهم اكرههم..
خابرت اليوم لسمر وكالت عازمين ام يوسف فدوة سمور اختي شكد قلبها طيب وتحتضن الكل الي تعرفه والي حتى ماتعرفه ياريت اكون مثلها بس ماكدر استقبل اي شخص سواء كان ولد او بنيه يعني ناس محددين بحياتي ..
..
نزلت جوه للرسبشن مالت الفندق الي كاعدين بي اشرب قهوة ..
شفت كلهم كاعدين بكروب اني اكره هيجي اجتماعات ف كعدت وحدي ...
وشغلت موسيقى بسماعات ودخلت بعالمي ..
بس اجه واحد خربلي الجو ونزعني السماعه..
_هي هي انت شكد متستحي شون تنزعني السماعه اكسر ايدك ترى
_ع كيفج اني اسف بس صارلي ساعه احجي وياج وانتي بغير عالم
_هاي انت كلتها بغير عالم يعني مااريد اعيش بجو مالكم
_اكولج شبيج ها شبيج اكلتنيي والله موصوجج صوجي اني مقدرج واحجي وياج.
_ايباه لا حباب اذا مقدرتني وحجيت وياي رح اموت امشي منا يلا
_رايح وصوجي اني ممبين عليج هيجي نموذج مبينه مثقفه
_تعال يانموذج ها تعال
هفف هالغبي عافني وراح بدون مااكمل كلامي اطلع منا احسن سد نفسي الله يسد نفسه
اطلع بره اشم هوا احسن ..
طبعا ماانسى موقفه اتصلت بميس..
_ياهلا بجوجو
_هلو شلونج
_الحمدلله شبي صوتج مبين ضايجه وحمقانه
_اي كلش ميته والله
_خير شكو منو وياج
_واحد قليل ادب
حجيت ميس الصار وياي وضحكت
_ههه يبوي الله موكعه الا بلسانج زين هو شلونه حلو لا ..زين شسمه ووياكم لو لا
_خيولي مو حلو شكله يلعب النفس وانتي هسه شكو تسالين ع شكله
وم اعرف يمكن ويانه بالسفره بس بغير قسم..
_ اها حلو
_اكولج اجو الجماعه لا
_اي هسه واني احجي وياج دخلو
_اوك حبيبي لعد روحي اني هم صاعده اقره شويه وانام باجر يكولون اكو رحله سياحيه للكروب
_اها شعجب تطلعين
_مو حبا بيهم بس ضايجه وم عندي احد اطلع وياه
_ اها بيها الخير حبي
_يلا عمري اني اخابركم بعدين قبل لتنامون ماشي حبي مع سلامه
_الله وياج حبي
طبعا رجعت للفندق..وهذا الغبي جان كاعد شافني واجه ..
_مرحبا
_خير عندك حجي زايد تكوله خاف نسيته مساع
_اللهم طولج ياروح شبيج ها هسه ليش هيجي كارهتني
_اني م اعرفك حتى اكرهك
_ياعيني اني اسمي امير واسف على الموقف الي صار
_اهلا لا عادي يلا مع سلامه
_ اوكفي اوكفي وين معرفتيني ع نفسج
_مو مهم تعرفني
_ع راحتج بس باجر تطلعين ويانه مو
_اي يلا باي
_مع سلامه
رحت واني مغثوثه منه مادري احسه يريد بس يحجي وياي يدخل نفسه بكلشي اني اعرف هيجي نماذج شنو يردون وليش يتقربون..
صعدت للغرفه حتى ادرس ...

...
☆▪فرح☆▪
اليوم سمور عزمت يوسف وامه ودكتوره مريم..
طبعا جهزنه الاكل اني وياها وميس ..
وحضرنه السفره وكلشي انتضرتا يجون..

بعدها اجتي دكتوره مريم قبلهم وحجيتلها عن قصه يوسف وكالت لازم تلتقي بي شخصيا..
بعدها بنص ساعه اجو يوسف وامه وابوه ..طبعا على سبيل الصدفه الجميله طلع بابا يعرف ابو يوسف من ايام الكليه وكلش فرحو بالمفاجأه وكضوها يسولفون سوه..
طبعا ام يوسف كلش حبابه حبوها اخواتي كلش وحتى دكتوره مريم ..
يوسف كان طول الزياره صامت ...
بعد ماخلصنا اكل وشربنا شاي يوسف حب يروح للحمام صدفه كان سيف يلعب في الاكس بوكس كره قدم ..
هو فات وكف يشوف سيف شلون يلعب ..
اني فتت صدفه وهو جان واكف هو وامه ف سألته:
_يوسف تحب تلعب
هو سكت ف ردت امه:
_ايي هو يوسف جان قبل ميترك البلي ستيشن من جان مو مريض ع طول يلعب شوكت متجيله يحبه
_اها صدك خاله لعد خلي يجي هسه يلعب
_اي صح ماما تعال العب
طبعا هو استحى واشر براسه بمعنى الرفض بس اني صرت اقوى منه وسحبته من ايديه ودخلته للصاله
_تعال يوسف جرب اني اعرف بيك مشتهي تلعب ماكو داعي تستحي ماشي
هو بالاول تفاجأ من ردت فعلي بعدين ابتسم بمعنى اي صح كلامك.. وراها اني جان اكو ع القنفه كوشايه او●مخده● شلتها وضربت بيها سيف هو ضحك يوسف من الحركه..
_يلا سويف كوم خلي يلعب يوسف بالاكس بوكس
_ثول متعرفين تحجين الا تضربين
_اضربك ونص لك اني خالتك ولازم تسمع كلامي
وكف سيف وهو نظرته نظره اشرار وطبعا مااوصفلكم فرق الطول بيناتنه وقال:
_تريدني احترمها ام حلك ع اساس خالتي وهي ليهسه طولها اقل من 160 ورجلها تلبس مال اطفال قياس 35
_لك احترم نفسك اني طويله وطولي 159 ونص ورجلي فديتني مال اميرات قابل مثلك رجلينات وحش
_هههه لج شون دبرتيها 159ونص
_بكيفي هسه المهم يلا لعب الولد وياك
طبعا باثناء مانحجي كان يوسف يضحك لكلامنه ولمحت ابتسامه جميله بوقت الس يكون سعيد
بس طبعا قبل لااروح من يمه هو سيف سيف لعب بشعري وكفشه وضليت اتعارك وياه بالضحك وكان يوسف كلش سعيد..
حتى والدته انتهبت لهذا الشي وشكرتني على ابتسامه ابنها بعدها تركناهم سوه يلعبون كان تجاوب يوسف معاي انا وعائلتي غريب احسه يعرفنا او ارتاحلنه...
المهم رحت اني وامه للصاله الثانيه جانت خواتي ودكتوره كاعدات يسولفون وطبعا بابا وابو يوسف بالحديقه كاعدين يسولفون ويضحكون يسترجعون ايام زمان ..
عرفت خاله ام يوسف ع جلنار راويتها صورها وراويتها صورنا القديمه ..وبعدها حجت مع دكتوره مريم الي طلبت باجر يجي يوسف للمستشفى حتى تجري عليه التحاليل ويارب خير..
انتهت السهره ع خير وكان الجميع سعداء حتى يوسف الي ندمج مع سيف وضحك ونسى للحظه انه مريض ..
بعدها الكل راحو لبيوتهم وبقينا انا واخواتي ننظف البيت وسولفنا واتصلنا بجوجو وبعدها حضرنا ملابسنا ونمنا ...
.
.

انتهى البارت..
علقو وصوتو لتصيرون اصنام
قولو شرايكم بالبارت..شنو اكثر شي عجبكم بيه وانطوني توقعاتكم بالبارتات الجايه