العشق مجددآ

3

☆☆حكاية ميس☆☆
مرحبا اني ميس لابد عرفتوني من خلال كلام فرح عني طبعا اني وفرح ع طول مشاكل ع كلشي نتعارك بس وحده تموت ع ثانية..
طبعا ترتيبي بين الاخوات الثالثه ..
مثل متعرفون قصتنه ورى وفاة ماما الله يرحمه سمر اهتمت بينه هواي وعاملتنه مثل بناتها..صح ماكو فرق هواي بالعمر بس هي كانت تحمل اجمل واطيب قلب بالكون كله..
تعلقت بيها ورى وفاة ماما..ماعتبرتها اختي من بابا يعني غير شقيقه لا بالعكس هي اقرب من خواتي الثانيات اليه..
المهم تعرفون بيه اني محاميه..طبعا من اني طفله كنت باعده هالاختصاص من بالي بس صارت ويايه تجربه خلتني ادخل هذا الاختصاص..
رح احجيلكم قصتي ..
اني بديت اكبر قبل عمري يعني من عمري 13سنه بديت اتابع افلام رومانسيه..واسمع اغاني شاعريه..
وخصوصا القيصر ♡فوديته♡ وهيثم يوسف ..وغيرهم..
بديت اكبر واني احلم بفارس احلامي يجيني ع حصان ابيض ويطلب ايدي امام كل الناس ومن هالحركات..
دخلت الاعداديه ضليت مااختار صديقاتي عدل ضليت امشي وي كل وحده تضحك وعدها شغلات حب ع اساس اتعلم منهم ماكنت اعرف شي اسمه خيانه او علاقه عابره ..
كنت اتوقع اي اثنين يرتبطون نهايتهم زواج..
حاولو خواتي شهد وسمر ينصحوني مجنت اسمعهم لان صديقاتي سيطروا ع عقلي..
لحد مااجه يوم التقيت بي ب وسام..
طبعا وسام شاب وسيم كلش والبنات الي بالمدرسه كلهم خالين عينهم عليه..
اخته جانت ويانه بالمدرسه بس متكبره متختلط باحد وجانت مخطوبه و بصف سادس ..اني جنت بالخامس..
المهم هو جان يداوم بمعهد الفنون..
جان يجي بالحله ينتضر اخته حتى يرجعها للبيت جنت صح معجبه بي بس مابين هذا الشي ..
ولهذا السبب هو انتبهلي من بين كل البنات..
ورى شهر ضل يتحارش بيه يحاول يلفت انتباهي بس اني ماابين هذا الشي ..
بس مع هذا بديت افكر بي وحتى حلمت اني وياه متزوجين هه..
صديقاتي ضلو يسولفون بي هواي ويحاولون يدخلونه براسي وبالفعل نجحو..
كانت احد صديقاتي مرتبطه بصديقه حسن..
وجانت توصل اخباري اله ووصله خبر اعجابي بي..
طبعا اني خبيت هذا الشي عن خواتي خفت يأنبوني ..
وماانكر ابتعدت عن خواتي وتقربت من صديقاتي..
المهم مااطول عليكم اجه وسام واعترفلي بحبه وانطاني رقمه..وطبعا جنت غبيه وصدكت هو يحبني ..
جنت بالبيت ماكدر احجي وياه اتصال خلصناها مسجات ..طبعا بهذاك الوقت ماجان اكو واتس اب ولا فيس ولا انستا..
كنت يوميه اروح للمدرسه من وقت واخابره..
طبعا بديت اتعلق بي كولش..وبدء مستواي الدراسي يتراجع وبديت ابتعد كلش عن خواتي حتى هم رادو يفهمون السبب بس ماقبلت احجيلهم عن وسام..
ورى ارتباطنه بشهر ونص اتفق ويايه نطلع سويه بوقت الدوام..
يعني اجي للمدرسه بس ماادخل انتضره بس ماقبلت وهو مثل كل شاب لعوب قنعني بس شرطت اطلع وي صديقتي وحبيبها يعني موعد جماعي .وصار هذا الشي طلعنه الصبح ورحنا ع الشط وركبنا بزورق وتونسنا طبعا جان يحظني وحاول يبوسني بس اني جنت خايفه بس صديقتي شجعتني على هذا الشي وبدء يتقرب مني ويحظني ..
جان اول موعد اليه مانساه بحياتي ..ورجعت للمدرسه بسلام وبعدها للبيت ولا احد حس عليه كنت ممثله بارعه تغيرت للاسوء..
بدت طلعاتنه تكثر وبعدين صديقتي انفصلت عن صديقه ف صارت طلعتنه ان وياه سوه..
جان كل يوم خميس مااداوم ونطلع سويه بدء مستواي الدراسي يقل وبديت اوكع وارسب بالامتحانات الفصليه..
ورى 3اشهر من علاقتنه اني ووسام جانت احلى علاقه حب ووسام يحبني كلش وكنت ماارد اله طلب لان كنت واثقه بي واحبه ومخططين حتى اسامي اطفالنه بالمستقبل..
اجه اليوم الي طلب بي وسام مني *****
طبعا اني تخبلت بس وسام قال:
_سكتي ميس اني مصدوم اكتشفت انتي متحبيني ..
_لا حبيبي والله احبك
_اذا تحبيني ليش ترفضين هذا الشي
_وسام حياتي انت شلون احنه بعدنا ممزوجين
_واذا حياتي شنو اول تالي احنه رح نتزوج وميهم اذا هذا الشي سويناه هسه لو بعدين
_ماعرف وسام والله ماعرف خايفه كولش
_لا انتي مخايفه بس كولي انتي متحبني وماواثقه بيه
_اش حبيبي اش والله احبك
_لعد ليش دترفضين
_حبيبي ميصير هسه
_لا اني اصلا ردت اختبرج بهذا الشي حتى اشوف تحبيبني لو لا بس طلعتي متحبيني
_لالالا حبيبي وسام والله احبك
_الي يحب ميرفض طلب حبيبه
_اوك حبيبي خلاص موافقه
_صدك حياتي اليوم اسعد يوم بحياتي واخيرا راح نكون مع بعض
_اي بس مو اليوم خليها ع الخميس واني راح اكول لبابا ورى الدوام عازمتني رنا ع غده حتى نضل سويه اكثر وقت
_فديت حبيبتي الي مترد طلب لحبيبها فددديت ام جهالي
_هههه فداك الكون حياتي يلا امشي ناكل كلش جوعانه
_مو تدللين حياتي كلشي تردينا اني حاضر..
جنت اكبر مغفله بالعالم ضحك عليه وسام بكلمتين وصدكته..
طبعا اجه يوم الخميس واتفقت وي رنا على شغله العزيمه اذا سألو اهلي عليه اني معزومه بيتهم..
وبالفعل طلعت وي وسام وكان هذا اليوم فقدت بي اعز مااملك..فقدت شرفي ..واستحق ماحصل لي لانني مغفله ...وغبيه وضميت علاقتي عن ميس..
قضيت نص يومي وي وسام وجان عبالك شهر عسل وحسيت نفسي عروسه..
والعصر رحت لبيت رنا حتى بابا يجي عليه ..
بس جانت الصدفه بابا مكدر يجي اجتي سمر لبيت رنا ودخلت..
من خلال الكلام عرفت سمر اني مجنت معزومه بيت رنا بس مبينت هذا الشي ..
بعدها ركبت بسيارتها واخذتني ع شط
_سمر هاي ليش اجينه هنا
_شوفي ميس صحيح انتي اختي بس اني مربيتج ع ايدي واعرفج من تتغيرين وصارلج كم شهر متغيره حيل ودراستج تراجعت واشوف الورقات مال امتحانات كله راسبه احجي ميس شنو ضامه عليه
_اهوو سمر شبيج اني م ضامه شي عليج ودراستي تراجعت بسبب الخامس صعب كلش واني ان شاءالله اشد حيلي ع الشهر الجاي وانجح
_اوك زين والغياب من الدوام ترى المديره خابرت وانطتني خبر انتي جاي تغيبين عن المدرسه زين شلون تغيبين واني كل يوم الصبح اوصلج او بابا يوصلج للمدرسه احجي ميس الله يخليج مااريد توكعين بمشكله هذا الزمن خطير وخصوصا انتي مراهقه بعدج ماصايره 17سنه احجيلي حبيبتي اني اختج وامج وصديقتج واكثر وحده تخاف عليج بهذا الكون اذا تحبين عادي ماكو بنيه ماحبت مابيها شي الحب حلو
_ها..سمر ماعرف شنو احجي
_ميخالف اني اختج وم راح ازعل منج
حجيت السمر ع كولشي صار بيه طبعا فاجأتني سمر برده فعلها
_يمممممه صدك تحجين لا ميس كولي غيرها هاي انتي يالغبيه هيجي سويتي
_عادي سمر هو يحبني والله واحنه راح نتزوج بس اخلص سادس ف عادي اذا هسه او بعدين
_ياغبيه منو جذب عليج بهذا الكلام ها ولج ايا الغبيه منو كلج هو يحبج اصلا الي يحب يحافظ على حبيبته وينتضر الحلال مو ياخذ شرفج وانتي زغيره ومراهقه ولج يضحك عليج استغلج ولعب عليج حتى يوصل للشي الي يريده وشوفي راح يتغير عليج من باجر يتغير تصرفاته وياج
_لا سمر وسام يحبني لالا لتحجين هالحجي ماسمحلج
_ لج نزلتي راس ابويه انتي ولج تعرفين المصيبه الي سويتيها بعمرج
_منزلت راس احد احبه ويحبني مبيها شي
_زين مخفتي من الله ولج انتي زانيه هسه
_ رب العالمين رح يسامحنه بس نتزوج
_ههههه صدك تزوجون انتي من كل عقلج ولج
_اي وراح اثبتلج
_اوك حبيبتي خلي نختبره ورح اثبتلج هذا الشي
_شلون
_هسه اتصلي بي وكوليله اختي سمر درت بكلشي وهددتني تكول لبابا اذا مااجيت تخطبني
_ههه شدتحجين انتي هو يحبي وماكدر اجذب عليه
_لا بس جربي وشوفي شنو راح يكولج
وبالفعل اتصلت عليه وكلتله ع كلام سمر مافهمت منه بس كلمه اني مشغول هسه بعدين اتصل بيج..
سمر فهمت كلمته وكالت هذا تركج ..طبعا مصدكت بيها..
ضليت اتصل بي مده 10ايام كله تلفونه مغلق تخبلت لان ماصدكت ب وسام هشكل يسوي بيه ...
خلصت عطله نصف السنه كانت مدتها اسبوعين هذولي الاسبوعين مرو عبالك سنين جنت منتضره تبدي المدرسه واشوف وسام..
بس وسام اختفى مابين اله اثر ..
تجرأت ورحت لاخته..
_مرحبا مروه
_هلا
ردت عليه كوه وهي تباوعلي بنص عين
_ممكن احجي وياج ع انفراد
_لااحجي عادي مااضم شي ع صديقاتي
_ارجوك تعالي ارديج بشغله ضروريه
_اووف يلا احجي
رحت اني وياها ع صفحه
_مروة وسام مختفي ماكو صارلي اسبوعين اتصل بي وماكو
_اي وسام غير رقمه ميريدج تزعجي
_هاا ليش ازعجه
_اي مو انتي اهلج كشفوج ميريد يتورط بمشاكلج
_يعني قصدج تخلى عني اني مطلبت شي بس جنت اختبره حتى يجي يخطبني
_هههه يخطبج انتي ههه ضحكتني
_ ليش شبيه اني
_شبيج هههه صدك متدرين شبيج شنو مخبل يتزوج وحده مثلج
_مثلي شنو قصدج
_اي وحده انطت روحها قبل الزواج هاي شنو نسميها تردين يجي يخطبج روحي بابا اخوي ميشرفه وحده مثلج
_شبيج مروه شدتحجين
_يلا بابا روحي منا وبعد ماريد تجين وتحجين وياي اني بنيه اخاف ع سمعتي
_مروه صدك تحجين اخوج وينه اريد احجي وياه هسه
_شوفي اذا مرحتي منا والله افضحج بالمدرسه واخلي سيرتج ع كل لسان
تركتني مروه وراحت جانت هاي اكبر صدمه بحياتي اكتشفت لعبه وسام وخيانته الي ماتحملت الموقف الي صار راسا وكعت وفقدت الوعي
اتصلت المديره ب بابا واجو هو وسمر خايفين عليه كلش والمديره انطتني اجازه مرضيه مده اسبوع
حجيت لسمر الي صار ويايه بس بعد ميفيد الحجي الفاس وكع براس وخسرت كلشي ..
طبعا صارت عندي ازمه نفسيه بس بفضل سمر وتفاؤلها تخطيت هذا الشي وقالت لازم اصير قويه ولازم هذا الشي يقويني مايكسرني ولازم اطلب التوبه من الله ...وبعدها التفت بدراستي واصير انسانه ناجحه بالمستقبل..
وبالفعل بدت حياتي تتغير ونضجت بسبب هالتجربه المره وتعلمت من اخطائي وغيرت حياتي وشخصيتي هالتجربه القاسيه خلقت من ميس انسانه قويه جدا لااحد يستطيع يتقرب منها..
خلقت مني انسانه مااوثق باحد بس بعائلتي ..
بارده المشاعر اتجاه كل شخص خارج نطاق اسرتي ..
وتحسنت دراستي ودخلت كليه القانون..خلصت الكليه واني بس ادرس ونجحت وكنت من المتفوقين وكنت حلم كل الشباب في الجامعه بس كنت مغلقه ع نفسي مانطيت مجال لاي احد حتى لو يريد يخطبني لان ببساطه كرهت الرجال..
ع فكره شهد وفرح عرفوا بعلاقتي الفاشله بس ميدرون بالي صار اخر شي ..يعني ضل سر بيني وبين سمر...
حاليا اني اشتغل بالمحكمه مستشاره قانونيه ومحاميه شاطره ...
.
.
.
تعبت ع غير وقت اكمل قصتي لان اريد اروح انام باجر عندي دوام
تصبحون ع خير ..بنات لتغلطون غلطتي وتوثقون ثقه عمياء ..
انتضروا تنضجون يالا تجربون الحب حتى لتوكعون بخطأي
ترى الي يحب يمسك نفسه وينتضر ياخذ حبيبه بالحلال..
اترككم وي جوجو اختي تحجي قصتها ...
مع سلامه..اشوفكم بعدين

انتهى البارت كولو شنو رايكم بي وبقصه ميس وهل تكدر بعد تحب وتوثق وتكون عائله؟؟
انطوني اقتراحاتكم لتصيرون اصنام ..وصوتو للقصه اني ماتعب واكتب حتى انتو تصيرون اصنام ههههه احبكم❤❤