العشق مجددآ

5

☆☆حكاية فرح☆☆
هلاااوووو

اني فروحه دلوعه العائله والخبله مالتهم نفس الوقت..
تكدرون تكولون احمد حلمي بس ع بنيه يعجبني احشش واقصف وكلشي..يعني حيويه ودايما انظر للامور ببساطه ..
ممكن هاي نعمه..
طبعا اني ماما الله يرحمها ماتت واني بعمر صغير بس مع هذا خواتي محسسوني بنقص ابد...
عندكم جوجو وسيوفي اقرب اثنين الي ..
يعني جوجو تنصحني وسيوف يفسدني..
اني وياه عدنا هواي سوالف محد يدري بيها نسويها بالختله..
مثلا قبل يومين رحت وياه وشربت نركيله او صعدت بدراجه اني وياه ..
هواي سوالف ههه طبعا اعتبره صديقي منذ الطفوله مو ابنها لاختي..
المهم اني اموري تمام بالدراسه دخلت كليه الاداره واقتصاد ونجحت بتفوق..
طبعا مكدرت ارتبط باحد لان جانت جوجو تنصحني وسيوف هماتين جان عندي زملاء..
وليش الجذب مرات انعجب باحد بس اسيطر ع نفسي..
يعني بين قوسين طلعت من الكليه واني عانس
طبعا ورى التخرج اجتي فرصه عمل اليه..
بابا فكر يفتح محل للعطور واكسسوارات بالمطار..وجنت اني المرشحه اتولى منصب المحل..
هههه ضليت احجي بالمناصب عهه تعودت من السياسين ..
المهم هذا المحل اني صرت المسئوله عنه ويشتغل ويايه اثنين بنات وولد ..
وطبعا منا بدت قصتي ..
اني يجوز متعرفون عني فد شي اني جوعيه يعني احب الاكل ..
ف تشوفوني كل ساعتين اشتري فد شي وآكله بس والله ماآكل هواي بس اشتهي ومن اشتري اوزعه المهم احب كل انواع الاكل الغير صحي ههه شعبالكم اني مثل جوجو..
المهم صار ويايه موقف:
جنت واكفه دا اشتري عصير طبيعي وماحسيت الا اجه شخص ووكف ورايه وحظني
وجان شون شارد من شي ..
مااوصفلكم شعوري جمدت بمكاني...ورى دقيقه رجعت لطبيعتي وحاولت ابعده بس ضل لازمني صرخت واجتي مره جبيره وولد..
فرح:لحكوووني ياااناس ابتعد عني ادبسسز
ردت المرأه:بنتي لتخافين افهمي الموضوع
فرح:شنو افهم خاله تعرفينه هذا
المرأه:اي بنتي اعرفه هذا ابني يوسف
فرح:خاله كولي لابنج خلي يبتعد عني لا والله هسه ااصرخ واخلي امن المطار يجون ياخذوه
ام يوسف:لا لا لا بنتي انتي فاهمه خطأ ابني مو عبالج ديتحارش بيج لا هسه اقنعه والله
فرح:لا والله ميتحارش ابنج لعد هسه الي ديسويه شنو
ام يوسف:بنتي بس لحظه اوعدج رح يبتعد
اجت ام يوسف وضلت تحجي وي ابنها وتحاول تبعده عني هو جان خايف كلش حسيت بخوفه من لزمته اليه ضلت تعامله مثل الطفل طبعا اني لحد هسه مشفت شكله بس احسه كلش طويل يعني اني قزمه بنسبه اله
حاولت وياه وضلت تحجي حسيته ابتعد عني وراح حضن امه ..وضل يأشر ع ولد وياهم يكوللها خلي يروح ماريده..
طبعا باوعتله ويمه يخبل شنو اوصفه الكم طبعا هو ادبسسز بس شوي خلي اوصفه..
طبعا هو طويل يعني فوك ال180م جسمه رياضي عضلات بس مو كبار كلش يعني شي مرتب حنطاوي ع ابيض.. وملامحه مرتبه
اني صفنت ضليت صافنه اكول هذا شبي ..
من كال لامه خلي يروح ع اخوه يمكن امه حجت وي هذا الولد وبوقتها هالولد ضاج وراح ..بعدين اكو مسطبه اخذت ام يوسف ابنها وضلت تهدء بي ..
بعدها اني ضليت واكفه وصافنه ممتخيله الموقف الي صار ..
بعد خمس دقايق هدء يوسف اني رحت لامه:
_خاله شنو صاير شبي ابنج
_خاله عذريني ع الموقف بس احب اشرحلج شي ابني مو بوعيه مريض صارله سنتين صار وياه حادث وصارت عنده مشاكل نفسيه وهو ميتصرف بعمره لا يتصرف مثل الاطفال ومتعلق بيه كولش وماعرف ليش واجه ختل وراج هو من يخاف من شي او يضوجه شي يختل بس هاي اول مره يختل ورى شخص غريب
_اووه خالتي لتكوليها عنده العافيه يارب واسفه ع الموقف بس والله مجنت ادري بي عبالي واحد ادبسسز حشاج
_لابنتي معذوره حقج متعرفين وشفتي ماشاء الله طول بعرض ع بالج يتحارش
_ايي زين خاله محتاجين شي اجيبلكم مي او عصير او اي شي
_لا بنتي لتعبين نفسج
_لا خاله لاتعب ولا شي زين تعالو تفضلو بالمحل مالتنه واني هسه اجيب شي تشربوه اعتبري عربون اعتذار
_لا بنتي اني الي لازم اعزمج واعتذر
_اوو خاله يلا يلا تعالو ويايه

طبعا اخذتهم للمحل وكعدتهم ودزيت وائل الولد الي يشتغل بالمحل جاب عصير ومي..
طبعا ضليت هيجي اسولف وياها وهو يوسف ساكت واحسه مستحي مني ..
شفت براءه بتصرفاته بنضراته بكلشي ف حاولت اخلي ينسى الي صار
ف ضليت احجي وياه
فرح:مرحبا اني فرح
يوسف ضل ساكت باوع اليه ودنك
فرح:شنو بعدك زعلان مني
باوع وابتسم واشر براسه بمعنى لا مازعلان
ام يوسف:يوسف ماما عيب لازم تسلم ع فرح مو عيب هيجي تسكت
هو ابتسم واستحى
فرح:لا خاله لضغطين عليه
بعدها اتصلت عليه ميس جانت محتاجه شغله وبعدها انتهت المكالمه..
التفتت لكيت ام يوسف تتفرج ع البضاعه وهو جان جالس ومستحي بعدها ام يوسف اعتذرت مني وشرحتلي انو هي جايه للمطار تستقبل ابنها الجبير بس جان موقف يوسف مفاجأ من شاف اخوه ركض واجه اليه وتعرفون الباقي. .
وبعدها استأذنت انو هي حترجع للبيت طبعا اني ةنطيتهم هديه تذكاريه من المحل ..
بعدها باثناء ميطلعون اجه يوسف ةهو مرتبك كلش وقال:
_ءءءء.. هللو...ففف فرح ...أأننني..يو يوسسف اسف
قال هالكلمتين وطلع بسرعه جان مرتبك كوه فهمت كلامه
امه وضحت كالت ابني اول مره يتجاوب مع شخص ويحاول يحجي وياع فهمتني انو هو طول مااهم كاعدين يحاول يجمع هالجمله حتى يكولها..
بالاخير صار شجاع وكالها..
هذا مرضه نفسي دمر حياته وحوله من انسان طبيعي الى انسان مريض خجول ويتصرف مثل الاطفال..وصار بيه قبل سنتين وبسبب هالمرض ماكمل دراسته الجامعيه..
راحت ام يوسف ويوسف ضليت هيجي اباوع الهم وشفت خطواته من يمشي مو مثل الاشخاص الطبيعين..
خطيه دعيت الله يشافي ويرجعه لامه امين يارب..
بعدها بساعتين رجعت للبيت وسولفت لاهلي الي صار ويايه..

انتهى البارت ..
حبيتو فرح اولا..
شنو رايكم بيوسف ..وشنو تتوقعون سبب مرضه ..ورح يلتقي بفرح مره ثانيه..
وانطوني توقعاتكم...
من البارت الجاي راح تبدي الاحداث الفعليه للقصه لان ما مضى مجرد تعريف للشخصيات واذا انتبهتو اكثره يعتمد على السرد مامضى وليس الحاضر ..
من البارت القادم ستبدء الحكايات مختلطه وليس كل اخت في بارت..
انطوني رايكم مبدئيا بالقصه ..وفديتكم لتصيرون اصنام ..
حبببكم